Sloʼil xkuxlejalik

◼ Australia: Li Johne jaʼ jun vinik ti lek xchanoj vune, kʼalal bikʼit toʼoxe chbat ta chʼulna, pe kʼot ta jun krixchano ti «mu xchʼun mi oy Dios» ta melele. Jun prekursor laj yiktabe komel jun foyeto ti jaʼ sbi ¿Es la vida obra de un Creador?, kʼalal ay svulaʼan yan veltae laj yiktabe komel li foyeto El origen de la vida. Li prekursore jech lik svulaʼan sventa xkʼot ta yoʼonton li Johne, yuʼun laj yichʼbe batel li revistaetik mas achʼike, laj yakʼbe yil xtok vunetik ta sventa li kʼusitik spasojan li Diose xchiʼuk li albilkʼopetik ta Vivliae. Kʼalal laj yil ti chapal xa li Johne, laj yakʼbe li livro La Biblia... ¿la palabra de Dios, o palabra del hombre?, kʼalal laj xaʼox skʼel li livroe, li Johne laj yal ti jaʼ xa li buchʼu «mu snaʼ ta melel mi oy Diose» (agnóstico moderado). Vaʼun, li prekursore laj yakʼbe yil John li livro Chchanubtasvan ta parafo 8 ta pajina 20 xchiʼuk li parafo 13 kʼalal ta 16 li ta pajina 23 xchiʼuk ta 24. Li tekstoetik la skʼelbe li Johne toj labal sba laj yil ti xi laj yale: «Xuʼ van ta jkʼan ta jnaʼ li kʼusi chal Vivliae».

◼ México: Jun veltae albat jun jcholmantal yuʼun jun vinik ti muʼyuk xchʼunoj mi jaʼ yakʼoj ta naʼel Dios li Vivliae. Li jcholmantale laj yalbe mi xuʼ xakʼbe yil ti jaʼ yakʼoj ta naʼel Dios li Vivliae. Kʼalal oy xaʼox jayibuk velta loʼilajike, jelel xaʼox li kʼusi tsnop ta sventa li kʼusitik yakal chchan ta Vivliae. Li kʼusi mas kʼot ta yoʼontone jaʼ li mantaletik chal Dios ti skʼan pasele. Xi laj yalbe li jcholmantale: «Ta slikebale, kʼalal jaʼo ta jkʼeltik li Vivliae, xkoʼolaj kʼuchaʼal mantaletik ti likemik talel ta kʼusiuk noʼox livroal laj kile xchiʼuk muʼyuk toʼox kʼusi chakʼ jnop. Pe kʼalal ta jkʼel li avie, toj chopol tajek chkaʼi jba, mas to kʼalal ta jkʼel li mantaletik chakʼ ta sventa li talelaletike».

◼ Estados Unidos: Kʼalal jaʼo chcholik mantal ta buyuk noʼox xchiʼuk grupo li ta mukʼta lumetike, jun nupultsʼakal laj yojtikinik jun ants ti likem ta Taiwán lume, ti xchʼunoj ta stojolal li Diose, pe li Vivlia jaʼ noʼox la sventa krixchanoetik ti nakalik ta Occidentee. Nopaj batel ti bu oy li skajleb vunetike, yuʼun jaʼo mu snaʼ kʼusi tspas ta xkuxlejal, akʼo mi ep kʼusitik x-ayan yuʼun. Yuʼun spatoj yoʼonton ti chkoltaat yuʼun Vivlia sventa oyuk sbalil xil li xkuxlejale. Li nupultsʼakale lik yakʼbeik chanubtasel xchiʼuk li livro Chchanubtasvane xchiʼuk li foyeto Cómo hallar paz y felicidad duraderas sbie. Maʼuk la xchanik li kapitulo 2 ta livroe, yuʼun jaʼ laj yalbeik skʼoplal li kʼusi chal li ta jvokʼ foyeto ti xi sbie «Una guía para toda la humanidad». Kʼalal laj xaʼox xchanik li vakib parafo li ta foyetoe, li antse laj yal ti solel labal sba laj yil ti stuk noʼox jech li Vivliae, yuʼun mu xkoʼolaj xchiʼuk li ta livroetik ti stsʼibaojik yan relijionetike. Kʼalal laj xaʼox yil ti kʼotemik ta pasel li albilkʼopetik chal ta Vivliae, xi laj yale: «¡Muʼyuk jtaʼoj-o junuk livro ti chal ti jech kʼotem ta pasel kʼuchaʼal chal li Vivliae!».

◼ Japón: Akʼo mi albat jun jcholmantal yuʼun yajval na ti muʼyuk xchʼunoj li Diose, li jcholmantal taje chbatilan onoʼox svulaʼan, vaʼun jaʼ chakʼbe ta ilel li mantaletik chlokʼ ta ¡Despertad! ti xi sbie «¿Casualidad o diseño?». Ta jelavele, li vinike jel ti kʼusi tsnop toʼoxe xchiʼuk laj yal ti xuʼ van oy li Jpasvaneje. Li avie xchʼunoj xa ti oy li Diose, li jcholmantale yakal xa chakʼbe chanubtasel xchiʼuk li foyeto Lekil aʼyejetik yakʼoj Dios sbie.

◼ Canadá: La xchʼam jlik achʼ revista jun ants ti jaʼo lokʼ ta sna ti chbat ta skaroe. Kʼalal sut skʼel li ermanae, li antse laj yal ti mu skʼane xchiʼuk ti muʼyuk xchʼunoj ta stojolal li Diose. Li ermanae muʼyuk bu laj yikta sba, vaʼun laj yichʼbe batel li foyeto Cómo lograr una vida llena de satisfacción sbie. Kʼalal te oy ta sna la sta li antse, laj yalbe ti akʼo mi snaʼoj xa onoʼox ti muʼyuk xchʼunoj ta stojolal li Diose, pe jaʼ la snop ta stojolal ti stuk tstsʼites li yalabtake. Li ermanae jaʼ laj yakʼbe yil li kʼusi chal ta parafo 6 ta pajina 4 li ta foyeto ti bu chal ti bu xuʼ xichʼ tael li lekil tojobtaseletike. Li ermanae la stijbe yoʼonton sventa skʼel li xchanobil 2 ti te chal kʼuxi ta tsʼitesel li alab nichʼnabiletike. Li antse ta sjunul yoʼonton la xchʼam li foyetoe.