Jvokʼ ti bu oy sjakʼobile
◼ ¿Kʼusitik skʼan xchanik li ololetik yoʼ xchʼiik ta mantale?
Li totil meʼiletik ti jaʼik yajtsʼaklom Cristoe solel ep kʼusitik tspasik sventa tstojobtasik xchiʼuk chanubtasik ta smantal Jeova li yalab xnichʼnabik kʼalal tstsʼitesike (Efes. 6:4). Skotol sob tskʼelik li teksto sventa jujun kʼakʼale, yuʼun yilojik ti oy sbalil staojbeike. Kʼalal tspasik li yichʼel ta mukʼ Dios ta yutsʼ yalalike o ta yan kʼakʼale, oy jlom ti tskʼelik xchiʼuk chalbeik skʼoplal junuk videoe, chalbeik skʼoplal jtosuk mantal li ta livro Los jóvenes preguntan, li ta junantik loʼil ta Vivliae chakʼik ta ilel skʼelobiltak o chakʼik ta ilel kʼuxi xuʼ xakʼ ta xkuxlejalik. Akʼo mi jech, pe sventa xchʼiik ta mantal li alab nichʼnabiletike, skʼan xchanik li kʼusitik melel ta Vivlia ti tsotsik ta aʼiele (Heb. 6:1).
Jnoptik jlikeluk kʼusi chbat kakʼbetik xchan krixchanoetik kʼalal chbat jcholbetik mantale. Kʼalal ta jchiʼintik ta loʼil ta sba veltae o kʼalal chbat jchaʼvulaʼantike, li kʼusi nopem onoʼox xkaʼitike jaʼ ti ta jlikestik jun chanubtasel ta Vivlia xchiʼuk li livro ¿Kʼusi chchanubtasvan ta melel li Vivliae? Mi tsuts kuʼuntik xchanel li livro taje, ta jlikestik xchanel li livro «Tey me comanic o ta stojol ti scʼuxul yoʼnton ti Diose». ¿Kʼu yuʼun jech ta jpastik? Yuʼun li livro Chchanubtasvan[e] jaʼ chkoltaatik yoʼ xchanik li kʼusi baʼyel skʼan chanel ta Vivliae, pe li livro «Scʼuxul yoʼnton ti Diose» chkoltaatik kʼuxi xuʼ xakʼ ta xkuxlejalik li beiltaseletik ta Vivliae. Kʼalal mi laj xchanik xchaʼlikal livro li buchʼutik achʼik toe chkoltaatik sventa ‹lek yibelik› ta stojolal Cristo xchiʼuk yoʼ ‹lek snakleb li xchʼunel yoʼontonike› (Col. 2:6, 7). ¿Mi mu lekuk ti jchantik xchiʼuk kalab jnichʼnabtik li vunetik taje? Tsots skʼoplal ti xchanik ek ta sventa li pojelale, li Ajvalilal yuʼun Diose xchiʼuk ta sventa ti kʼu yelan oyik li animaetike. Jech xtok, skʼan xchanik ti kʼu yuʼun chakʼ to oyuk vokolil li Diose xchiʼuk kʼuxi jnaʼojtik ti kuxulutik li ta slajebal kʼusitik chkʼotanuk ta pasel avie. Skʼan snaʼik lek ti jaʼ melel relijion li stestigotak Jeovae, ti xaʼibeik lek smelolal li beiltaseletik ta Vivliae xchiʼuk ti xchanik stʼujel «li cʼusi leque xchiʼuc li cʼusi chopole» (Heb. 5:14). Melel onoʼox ti skʼan stsakik ta venta jayib sjabilal yalab xnichʼnabik li totil meʼiletike xchiʼuk ti kʼusi vunal xuʼ stunesike. Akʼo mi jech, oy ep ololetik ti xaʼibeik smelolal li kʼusitik melel ta Vivlia ti tsotsik ta aʼiele, akʼo mi kʼoxik to (Luc. 2:42, 46, 47).
Sventa xichʼik koltael li totil meʼiletike, Li Jkʼel osil ta toyole yichʼoj talel mantaletik ti jaʼ sventa kerem tsebetike, sloʼil kuxlejal xchiʼuk yantik. Li utsʼ alaliletike xuʼ te staik xtok ta jpajinatik ta Internet li mantaletik taje. Jaʼ tsnop stukik li totil meʼiletik mi tstunesik li ta Akʼobal sventa Yichʼel ta Mukʼ Jeova ta Kutsʼ Kalaltik li vunetik taje, kʼalal chchanubtasik ta jujuntal li yalab xnichʼnabike o kʼalal chakʼbeik yil kʼuxi xuʼ xchanunaj ta stukike.