Li Jeova xchiʼuk Jesuse batsʼi lek yoʼontonik ¿mi ta van jchanbetik stalelalik li ta yorail Snaʼobil slajel Cristoe?

1. Li ta yorail Snaʼobil slajel Cristoe, ¿kʼusi tspasik li stestigotak Jeovae?

¹ Li Jeovae oy tajek ta yoʼonton ti akʼo xkʼot ta pasel li kʼusi tskʼane. Kʼalal chalbe skʼoplal li bendisionetik chichʼ talel li Ajvalilal yuʼune, xi chal ta Isaías 9:7: «Jaʼ jech tspas ta sventa ti batsʼi lec yoʼnton li Mucʼul Dios ti tspas ta mantal scotol te ta vinajele». Li Jesús eke laj yakʼ ta ilel ti oy tajek ta yoʼonton li melel yichʼel ta mukʼ Jeovae (Juan 2:13-17; 4:34). Kʼalal jaʼo yorail li Snaʼobil slajel Cristoe, ta smiyonal noʼox stestigotak Jeova chkakʼ kipaltik sventa jcholtik mas mantal, yuʼun kʼalal jech ta jpastike jaʼ jech ta jchanbetik stalelal li Jeova xchiʼuk li Jesuse. Li voʼote, ¿mi ta van xapas li jabil liʼe?

2. ¿Kʼusi chlik jpastik li ta 7 yuʼun marsoe xchiʼuk kʼusi chkʼot ta pasel mi ta sjunul koʼontontik la jpastike?

² Li kampanya sventa Snaʼobil slajel Cristoe. Ti kʼusi ora ta jlikestik li kampanyae jaʼ ta sabado 7 yuʼun marso. Lek ti xlik xa noʼox jchapan jbatik sventa sjunul koʼontontik jkolta jbatik li ta kampanyae. Li tsobobbailetike muʼyuk chpajik ta abtel, yuʼun chakʼik persa tstsutsesik skotol li yosilal bu chcholik mantale. Jchapan jbatik yoʼ jpuktik li vun sventa snaʼobil Cristoe o xkakʼtik ta ilel ta jpajinatik ta jw.org/tzo, taje xuʼ jech jpastik ta stojolal li buchʼu chkakʼbetik chanubtasel ta Vivliae, li buchʼutik chkʼot onoʼox jvulaʼantike, li jchiʼiltik ta abtele, ta chanun xchiʼuk li kutsʼ kalaltike.

3. ¿Kʼusi xuʼ jpastik sventa jcholtik mas mantal li ta yuilal marso xchiʼuk avrile?

³ Li abtelal ta prekursor auksiliare. Ta skoj ti oy tajek ta koʼontontik li cholmantale, jaʼ ta jchʼakbetik-o mas yorail. Jaʼ yuʼun mas me ep chij-abtejutik li ta prekursor auksiliar li ta yuilal marso xchiʼuk avrile, ta skoj ti xuʼ 30 ora noʼox jsaʼtike. Li ta yichʼel ta mukʼ Jeova ta kutsʼ kalaltike o kʼalal ta jchan Jvivlia ta jtuktike, xuʼ jpastik orasion sventa jnopbetik skʼoplal kʼuxi xuʼ jpastik (Prov. 15:22). Kʼalal mi xijmuyubajutik chijkoltavan li ta kampanyae, xuʼ me xtijbat yoʼontonik yan ermanoetik sventa xkoltavanik ta sjunul yoʼontonik ek. Mi oy kʼusitik ta jpastik sventa jcholtik mas li mantale, jaʼ me jech yakal ta jchanbetik Jesús ti oy tajek ta yoʼonton spasel li yabtel Diose (Mar. 6:31-34).

4. ¿Kʼusi chkʼot ta pasel mi chkakʼtik ta ilel slekil koʼontontik kʼuchaʼal Jeova xchiʼuk Jesuse?

⁴ Mi jech chkakʼtik ta ilel slekil koʼontontik kʼuchaʼal Jeova xchiʼuk Jesús li ta yorail Snaʼobil slajel Cristoe, lek me kʼusi chkʼot kuʼuntik ta pasel. Li baʼyele, jaʼ ti xuʼ xaʼiik epal krixchanoetik li mantale. Jech xtok, xuʼ xijmuyubaj chijtun ta stojolal Jeova xchiʼuk li krixchanoetike (Hech. 20:35). Pe li kʼusi mas tsots skʼoplale, jaʼ ti jech ta jlekubtasbetik yoʼonton li Jeova xchiʼuk li Xnichʼone.