Jvokʼ ti bu oy sjakʼobile

◼ ¿Mi xuʼ jtunestik Internet sventa jcholbetik mantal o xkakʼbetik estudio li buchʼutik ta yan lum nakalik ti mu xkojtikintike?

Oy jlom jcholmantaletik tstunesik Internet yoʼ tsaʼik mi oy buchʼu tskʼanik junuk estudio ta Vivlia li ta lumetik ti bu mu xakʼik jcholtik mantale o ti bu chʼabal mas stestigotak Jeovae. Bakʼintike, lek kʼusitik kʼotem ta pasel yuʼunik. Akʼo mi jech, xuʼ me xibal sba mi ta jchiʼintik ta loʼil ta Internet li buchʼutik mu xkojtikintike o ti chkakʼbetik jkoreotike (kʼelo li Kabteltik sventa Dios yuʼun julio ta 2007, paj. 11). Akʼo mi jaʼ oy ta koʼontontik yalbel mantal li buchʼutik lek yoʼontonike, pe xuʼ me jaʼ jtatik ta chiʼinel ta loʼil li buchʼutik chopolike xchiʼuk xuʼ jaʼ jtatik li jvalopatinej mantaletike (1 Kor. 1:19-25; Kol. 2:8). Jech xtok, li ta lumetik ti bu mu xakʼik jpastik jlomuk li yabtel Diose o ti mu xakʼik jutebuke, li j-abteletik teye xuʼ me skʼelik li kʼusi ta jtaktik batele. Ta skoj taje xuʼ me xkakʼbetik ta vokol xkuxlejalik li ermanoetik ti te nakajtike. Jaʼ yuʼun, mu stakʼ jtunestik Internet yoʼ jsaʼtik krixchanoetik ta yan lum sventa jcholbetik mantal.

Mi oy bu la jtatik ta cholbel mantal junuk krixchano ti likem tal ta yan lum ti jaʼ noʼox talem ta vulaʼale, mu me lekuk mi voʼotik-o ta jkʼan ta jchʼiesbetik ta yoʼonton mantal kʼalal mi sut xaʼox batel ta snae, jaʼ to mi laj yal Betel ti xuʼ xa jech jpastike. Li kʼusi stakʼ jpastike jaʼ ti jchanubtastik ta stunesel li jw.org sventa sta mantaletik teye o sventa xkʼopoj batel li ta Betel ti jaʼ oy ta sba skʼelel cholmantal li ta slumale. Mi oy Salonetik sventa tsobobbail ti bu nakale xuʼ jtijbetik yoʼonton sventa xbat ta vulaʼal. Mi lek chaʼi mantal xchiʼuk mi tskʼan ti akʼo xvulaʼanat yuʼun junuk stestigo Jeovae, kʼanbo snumeroal stelefono, skoreo o bu nakal mi xuʼ chavile, vaʼun akʼbo li sekretarioe, li stuke tstak batel ta Betel ta jpajinatik jw.org. Li Betel ti jaʼ oy ta sba skʼelel cholmantal li ta lum ti bu nakal li krixchanoe xuʼ me xkoltaat ta xchanel mas li mantale, yuʼun jaʼ mas xojtikin kʼu yelan li smantaltak ajvalil teye (kʼelo li Kabteltik sventa Dios yuʼun junio ta 2014, paj. 6 xchiʼuk li Kabteltik sventa Dios yuʼun noviembre ta 2011, paj. 2).

Mi oy junuk krixchano ti yakal ta jvulaʼantik ti chbat ta naklej ta yan lume o mi oy buchʼu yakal chkakʼbetik estudio ti nakal ta yan lum ti jaʼ noʼox xkojtikintik ta Internete, skʼan me jech jpastik kʼuchaʼal laj xa yichʼ alel tale. Pe mu me xkiktatik ta anil, jaʼ to mi bat vulaʼanatuk yuʼun junuk jcholmantal ti bu nakale. Akʼo mi jech, mi te nakal ti bu mu xakʼik jpastik jlomuk li yabtel Diose o ti mu xakʼik jutebuke, skʼan me xkichʼ lek jpʼijiltik kʼalal ta jtakbetik batel karta ti chalbe skʼoplal Vivliae, kʼalal ta jkʼopontik batel ta telefonoe o kʼalal ta jtakbetik koreoe (Mat. 10:16).