Tojobkutik batel mas li ta cholmantale: Jaʼ jpastik li kʼusi lek ta xaʼiike

¿KʼU YUʼUN TSOTS SKʼOPLAL? Li buchʼutik tʼujbil chbatik ta vinajel xchiʼuk li buchʼutik liʼ chkuxiik ta balumile ta stakik ta ikʼel skotol krixchanoetik sventa xtal yuchʼik li matanal voʼ sventa kuxlejale (Ap 22:17). Li voʼ taje jaʼ skʼan xal skotol li kʼusitik spasoj Jeova sventa spoj li jchʼunej mantal krixchanoetik li ta mulil xchiʼuk li ta lajelale. Sventa jkoltatik li krixchanoetik ti jeltos stalel xkuxlejalike xchiʼuk ti jeltos kʼusi xchʼunojike, skʼan jnaʼtik kʼuxi xuʼ xkakʼtik ta ojtikinel li «lekil aʼyejetik ti te oy-o sbatel [osil]» yoʼ lekuk xaʼiik li krixchanoetike (Ap 14:6).

¿KʼUXI TA PASEL?

• Baʼyel tʼujo li kʼusi chavalbe skʼoplale xchiʼuk tʼujo junuk teksto ti chkʼot ta yoʼonton li krixchano ti bu chachol mantale. Xuʼ jaʼ xatunes ti bu chal: «Kʼuxi xuʼ jlikes jloʼiltik» o li kʼusi lek chkʼot yuʼun ta pasel aviloje. ¿Kʼusi tekstoal o kʼusi ti mas tskʼupinik aviloje? ¿Kʼusi notisiail ti jaʼ to chalbeik skʼoplal avabinoj li krixchanoetike? ¿Kʼusi ti mas tskʼupinik yalbel skʼoplal li viniketik xchiʼuk li antsetike?

• Kʼalal chaloʼilaje, tsako me ta venta li kʼusi nopem xaʼiike xchiʼuk ti kʼuxi chkʼot kʼopojikuk ti bu nakalote (2Ko 6:3, 4).

• Ojtikino lek li jvuntike xchiʼuk li videoetik ti te oy li ta abtejebaletik sventa xijchanubtasvane, vaʼun xuʼ me jaʼ xatunesbe li buchʼu lek chaʼie.

• Yaleso vunetik xchiʼuk videoetik ti jaʼ ta skʼopik li krixchanoetik ti bu chachol mantale.

• Xanaʼuk xajel li kʼusi xa ox anopoj chavalbe skʼoplale (1Ko 9:19-23). Jech kʼuchaʼal liʼe, ¿kʼusi van chapas mi laj avaʼi ti jaʼ to cham yutsʼ yalal li yajval nae?

MI LA AKʼELIK LI VIDEOE, TAKʼIK LI SJAKʼOBILTAK LIʼE:

• ¿Kʼusi la slikes-o sloʼil li jcholmantale?

• ¿Kʼusi yakal tsnuptan li krixchanoe?

• ¿Kʼusi tekstoal xuʼ ox skʼelbe li krixchanoe xchiʼuk kʼu yuʼun?

• ¿Kʼuxi chajel li kʼusi chavalbe skʼoplal sventa mas lek xaʼiik li buchʼu chacholbe mantale?