Kampaña ta septiembre sventa jlikestik estudioetik

Li ta septiembree, chkakʼtik persa ti epuk buchʼutik xlik kakʼbetik˗o estudio li foyeto Kʼupino akuxlejal. Xuʼ xijtun ta prekursor auksiliar ti 30 ora noʼoxe. ¿Kʼu yelan li kampaña liʼe?

• Kʼalal ta jchiʼintik ta loʼil ta sba veltae. Jtunestik li slajeb pajina li ta foyeto sventa x˗ayan ta yoʼonton mantal li krixchanoe xchiʼuk kakʼbetik yil kʼu yelan li chanubtasel ta Vivlia chkakʼtike. Mu me jchʼay ta joltik li buchʼutik yakʼojik ta ilel ti oy ta yoʼontonik mantale, jech kʼuchaʼal li jrevisitatike. Li buchʼu muʼyuk toʼox la xchʼam jun estudioe xuʼ van kʼupil sba xil li foyeto xchiʼuk ti kʼu xa yelan chijchanubtasvane. Muʼyuk chkiktatik komel li foyeto mi muʼyuk te oy li yajval nae xchiʼuk muʼyuk ta jtakbetik batel li buchʼu muʼyuk oy ta yoʼonton mantale. Li Komite sventa Abtelal ta Tsobobbaile xuʼ xchapanik yan tsobajeletik sventa cholmantal li u taje.

• Yan butik xuʼ jcholtik mantal. Mi chchol mantal ta karrito li jtsobobbailtike, chichʼ akʼel ta karrito li foyeto Kʼupino akuxlejal. Mi oy junuk krixchano tskʼan chichʼ batel li foyetoe, xuʼ xkalbetik ti xuʼ xichʼ chanubtasel ta Vivlia ta moton xtoke. Xuʼ xkalbetik kʼu yelan chijchanubtasvan o xuʼ jakʼbetik kʼusi ora xuʼ xkakʼbetik yil. Li buchʼu sbainoj skʼelel cholmantale xuʼ xalbe junantik jcholmantaletik ti akʼo xbatik ta chonolajebaletik yoʼ slikesik estudioetik. Kʼalal ta jcholtik mantal ta buyuk noʼoxe, oyuk ta koʼontontik slikesbel junuk estudio li jchiʼiltik ta abtel o yan krixchanoetike.

Li Jesuse laj yalbutik ti jpastik ta yajchankʼop li krixchanoetike xchiʼuk ti jchanubtastike (Mt 28:19, 20). Oy ta koʼontontik ti jechuk xkʼot ta pasel mi lik li kampaña ta sventa li foyeto Kʼupino akuxlejal.