¿Kʼusi spasoj Jeova sventa spojutik lokʼel li ta mulil xchiʼuk ta lajelale?

1, 2. 1) ¿Kʼusi smakojbe skʼoplal li mulile, xchiʼuk kʼuxi xuʼ stsal kuʼuntik? (Kʼelo xtok «Liʼe tsots skʼoplal»). 2) ¿Kʼusi ta jkʼelbetik batel skʼoplal li ta xchanobil liʼe, xchiʼuk kʼusi ta jkʼeltik li ta yan xchanobiltak chtale? (Kʼelo xtok ti bu chal: «Li kʼusi skʼan xanabe skʼoplale» ti lokʼ li ta revista liʼe).

¿MI OY ta avoʼonton chanaʼ kʼu to yepal skʼanojot li Jeovae? Sventa xanaʼe, kʼuchaʼal mu xakʼelbe skʼoplal li kʼusi spasoj ta atojolal sventa spojot lokʼel li ta mulil xchiʼuk li ta lajelale. Li mulilea jaʼ kajkontratik ti toj xibal sbae xchiʼuk ti muʼyuk buchʼu stsal yuʼun ta stuk noʼoxe. Jkotoltik ta jpas jmultik jujun kʼakʼal, yuʼun jpasmulilutik, jaʼ yuʼun chijchamutik (Rom. 5:12). Pe li Jeovae yaloj ta jamal ti tskoltautik lokʼel li ta mulil xchiʼuk li ta lajelale.

² Li Jeovae te xa van ta vakmil jabil tskolta talel krixchanoetik sventa stsal yuʼunik li mulile. Ti jech tspase, jaʼ ta skoj ti skʼanojutik tajeke, yuʼun skʼanojutik xa onoʼox kʼalal la spasutike. Jaʼ yuʼun, oy kʼusitik labalik sba spasoj sventa skoltautik ta stsalel li mulile. Li Diose snaʼoj ti chikʼutik batel ta lajelal li mulile, pe mu skʼan ti oyuk buchʼu xcham junuke, yuʼun oy ta yoʼonton ti xijkuxi ta sbatel osile (Rom. 6:23). Jaʼ jech tskʼan ta atojolal li Jeova eke. Li ta xchanobil liʼe, ta jambetik smelolal li oxib sjakʼobiltak liʼe: 1) ¿kʼusi la spas Jeova sventa oyuk spatobil yoʼonton li krixchanoetike?, 2) ¿kʼusi toʼox la spas li krixchanoetik ta voʼne sventa lekuk x-ilatik yuʼun Jeova akʼo mi jpasmuliletik? xchiʼuk 3) ¿kʼusi la spas Jesus sventa skolta lokʼel ta mulil xchiʼuk ta lajelal li krixchanoetike?

¿KʼUSI LA SPAS JEOVA SVENTA OYUK SPATOBIL KOʼONTONTIKE?

3. ¿Kʼuxi kʼotik ta jpasmulil li Adan xchiʼuk Evae?

³ Kʼalal la spas Adan xchiʼuk Eva li Jeovae, oy ox ta yoʼonton ti xmuyubajikuk noʼoxe. Laj yakʼbe skʼupil naik, laj yakʼ ti xnupunike, ti snojesik ta krixchanoetik li balumile xchiʼuk albatik xtok ti spasik ta paraiso spʼejel balumil jech kʼuchaʼal li nichimaltik Edene. Jtos no’ox ti kʼusi albatik ti mu stakʼ spasike xchiʼuk albatik yuʼun Jeova ti ta xchamik mi muʼyuk la xchʼunike. Pe jnaʼojtik xa li kʼusi kʼot ta pasele: jun chopol anjel ti muʼyuk skʼanoj krixchanoetik xchiʼuk li Jeovae oy kʼusi chopol la spas sventa sloʼla li Adan xchiʼuk Evae. Li stukike muʼyuk la spat yoʼontonik ta stojolal li Stotike, jaʼ la xchʼunik kʼusi laj yal li chopol anjele, vaʼun la spas smulik. Jaʼ onoʼox jech kʼot ta pasel li kʼusi yaloj Jeovae. Li vaʼ kʼakʼale, te lik talel li svokolike: malubik, vaʼun chamik (Jen. 1:​28, 29; 2:​8, 9, 16-18; 3:​1-6, 17-19, 24; 5:5).

4. ¿Kʼu yuʼun spʼajoj mulil li Jeovae, xchiʼuk kʼu yuʼun tskoltautik ta stsalel? (Romanos 8:​20, 21).

⁴ Chakʼ tajek vul oʼonton li kʼusi kʼot ta pasele, pe li Jeovae oy kʼusi laj yakʼ jnaʼtik ta Vivlia ti toj tsots skʼoplale: ti spʼajoj li mulile. Yuʼun li mulile tsnamajesutik ta stojolal li Jtotike xchiʼuk chikʼutik batel ta lajelal (Is. 59:2). Taje jaʼ ta skoj ti skʼanoj tajek mulil li jtoyba anjele, li Satanase. Jaʼ yuʼun, laj yakʼ ta preva li Adan xchiʼuk Evae xchiʼuk jech-o chakʼutik ta preva ek. Laj van snop ti kuch xa yuʼun ta skoj li kʼusi la spas ta nichimaltik Edene. Pe mu toʼox snaʼ kʼu to yepal kʼanvanem li Jeovae, jaʼ yuʼun muʼyuk onoʼox la sjel li kʼusi oy ta yoʼonton ta stojolal li snitilulaltak Adan xchiʼuk Evae. Li Diose skʼanoj tajek li krixchanoetike, jaʼ yuʼun oy kʼusi la spas ta anil sventa oyuk spatobil yoʼontonik (kʼelo Romanos 8:​20, 21). Snaʼoj onoʼox ti oy buchʼutik ta xkʼanat xchiʼuk ti tsaʼik koltael ta stojolal sventa stsal yuʼunik li mulile. Li Jeova ti jaʼ Jpasvanej xchiʼuk ti jaʼ jun lekil Totile oy kʼusitik la spas ta stojolal li snitilulal sventa xuʼ xnopajik ta stojolale, ti stsal yuʼunik li mulile xchiʼuk li lajelale. ¿Kʼuxi tspas taje?

5. ¿Kʼusi ora laj yakʼbe spatobil yoʼonton krixchanoetik li Jeovae? Albo smelolal (Jenesis 3:15).

⁵ (Kʼelo Jenesis 3:15). Kʼalal laj yal Jeova ti chichʼ lajesbel skʼoplal li Satanase, jaʼ te vinaj ta sba velta ti oy spatobil yoʼonton li krixchanoetike. Li Diose laj yalbe skʼoplal jun nitilulal ti toj tsots skʼoplal chbate, yuʼun jaʼ tslajesbe skʼoplal ta jelavel li Satanase xchiʼuk jaʼ chchapan skotol li kʼusitik sokanuk li ta nichimaltik Edene (1 Juan 3:8). Pe baʼyel chyayijesat yuʼun Satanas li Nitilulal taje, jaʼ xkaltik, oy kʼusitik tspas sventa smil. Kʼalal jech kʼot ta pasele, li Jeovae kʼux tajek laj yaʼi. Pe tsʼik yuʼun xchiʼuk laj yakʼ permiso ti xichʼ milel li Nitilulal sventa spoj lokʼel ta mulil xchiʼuk ta lajelal ta smiyonal noʼox krixchanoetik.

¿KʼUSI TOʼOX LA SPASIK TA VOʼNE SVENTA LEKUK X-ILATIK YUʼUN JEOVA AKʼO MI JPASMULILETIK?

6. Li Abel xchiʼuk Noe ti oy lek xchʼunel yoʼontonike, ¿kʼusi la spasik sventa xnopajik ta stojolal li Jeovae?

⁶ ¿Kʼuxi xuʼ xnopajik ta stojolal Jeova li jpasmulil krixchanoetike? Li stuke ta kʼunkʼun laj yakʼ talel ta ojtikinel. Kʼalal laj xa ox stoy sbaik li Adan xchiʼuk Evae, li Abel ti jaʼ li xchibal skeremike jaʼ li buchʼu baʼyel laj yakʼ ta ilel ti oy xchʼunel yoʼonton ta stojolal Jeovae. Li Abele skʼanoj tajek li Jeovae, tskʼan ti lekuk x-ilate xchiʼuk oy ta yoʼonton chnopaj ta stojolal. Jaʼ yuʼun, lokʼ ta yoʼonton laj yakʼbe smoton. Ta skoj ti jaʼ jchabichije, la stʼuj jaykotuk sba yol xchij sventa xchikʼbe ta smoton li Jeovae. ¿Kʼu yelan laj yil li Diose? «Lek laj yil li Abele xchiʼuk li matanal laj yakʼe» (Jen. 4:4). Ta mas tsʼakale, li Jeovae lek laj yil ti laj yakʼik matanal li yan krixchanoetik jech kʼuchaʼal la spas li Noee, yuʼun skʼanojik xchiʼuk spatoj yoʼontonik ta stojolal (Jen. 8:​20, 21). Jamal xvinaj ti akʼo mi jpasmulil li krixchanoetike, xuʼ lek x-ilatik xchiʼuk xnopajik ta stojolal li Jeovae.b

7. ¿Kʼusi chakʼ jchantik ti lokʼ ta yoʼonton Abraan ti laj yakʼ ta milbil matanal li xnichʼone?

⁷ Li Abraane tsots laj yakʼ ta ilel xchʼunel yoʼonton ek. Oy kʼusi kʼanbat yuʼun Jeova akʼo spas ti mu kʼunuke: ti xakʼ ta chikʼbil matanal li Isaake. Kʼux van tajek laj yaʼi Abraan kʼalal jech kʼanbate. Akʼo mi jech, jpʼel ta yoʼonton la xchʼunbe smantal. Kʼalal jutuk xa ox skʼan smil li skereme, pajtsanat yuʼun li Jeovae. Li kʼusi kʼot ta pasele chakʼ jchantik li kʼusi tspas ta jelavel li Jeovae: ti jpʼel ta yoʼonton chakʼ ta matanal li skʼanbil Nichʼon ta skoj ti skʼanoj tajek li krixchanoetike (Jen. 22:​1-18).

8. ¿Kʼusi senyail li matanal laj yichʼ akʼel jech kʼuchaʼal chal li ta Smantal Moisese? (Levitiko 4:​27-29; 17:11).

⁸ Kʼalal echʼem xa ox jayibuk sien jabile, li Jeovae laj yakʼbe Mantaletik li j-israeletike. Laj yalanbe ti skʼan xakʼik ta milbil matanal chonbolometik sventa xuʼ spasbat ta perton li smulike (kʼelo Levitiko 4:​27-29; 17:11). Li matanaletike jaʼ skʼelobil ti chakʼ jun matanal li Jeova ti xuʼ spoj lokʼel ta j-echʼel ta mulil li krixchanoetike. Li Diose laj yakʼ ti akʼo xchapbeik smelolal li j-alkʼopetik ti chil svokol xchiʼuk ti ta xcham li albil Nitilulale, jaʼ xkaltik, li Xnichʼon Dios ti xkoʼolaj ta jkot chij ti chichʼ akʼel ta milbil matanale (Is. 53:​1-12). Nopo xa noʼox avaʼi liʼe: li Jeovae laj yakʼ ta matanal li skʼanbil Nichʼon sventa spoj lokʼel ta mulil xchiʼuk ta lajelal skotol li krixchanoetike, taje te me akʼoplal ek.

¿KʼUSI LA SPAS JESUS SVENTA SKOLTA LI KRIXCHANOETIKE?

9. ¿Kʼusi laj yakʼ ta naʼel li Juan J-akʼ-ichʼvoʼe? (Ebreos 9:22; 10:​1-4, 12).

⁹ Li ta sjabilal 29, xi laj yal Juan J-akʼ-ichʼvoʼ kʼalal laj yil li Jesus ti likem ta Nasarete: «¡Kʼelavil li Xchʼiom Chij Dios ti chchʼay mulil ta balumile!» (Juan 1:29). Jaʼ jech laj yakʼ ta naʼel ti jaʼ Jesus li albil Nitilulal ti yaloj xa onoʼox Dios chtale. Jaʼ yuʼun, jaʼ Jesus ti chakʼ xkuxlejal kʼuchaʼal matanale. Vaʼun, oy xa me spatobil yoʼonton li krixchanoetik ti xuʼ xpojatik lokʼel li ta mulil xchiʼuk li ta lajelale (kʼelo Ebreos 9:22; 10:​1-4, 12).

10. ¿Kʼuxi laj yakʼ ta ilel Jesus ti jaʼ tal stak ta ikʼel li jpasmuliletike?

¹⁰ Li Jesuse jaʼ mas laj yakʼ ta yoʼonton skoltael li krixchanoetik ti oy smul chaʼi sbaike xchiʼuk laj yalanbe ti akʼo stsʼakliate. Snaʼoj lek ti jaʼ ta skoj mulil chil svokol li krixchanoetike. Jech oxal, la xchiʼinan ta loʼil li buchʼutik nabil ti jaʼik jpasmuliletike. Xi laj yal ta stojolalike: «Muʼyuk bu chtun yuʼunik doktor li buchʼutik muʼyuk ipike, jaʼ noʼox chtun yuʼunik li buchʼutik ipike». Xi to laj yale: «Maʼuk tal jtak ta ikʼel li buchʼutik tukʼike, jaʼ tal jtak ta ikʼel li jpasmuliletike» (Mat. 9:​12, 13). Taje jech onoʼox laj yakʼ ta ilel, yuʼun ta slekil yoʼonton la xchʼaybe smul li ants ti ta yaʼlel sat la spokbe yakane (Luk. 7:​37-50). Jun velta xtoke, li Jesuse te la sta ta poso jun jsamaria ants, pe oy kʼusitik laj yakʼbe xchan akʼo mi snaʼoj ti jaʼ jmulavil antse (Juan 4:​7, 17-19, 25, 26). Ta skoj li mulile, chijcham jkotoltik. Jaʼ yuʼun, li Jeovae laj yakʼbe sjuʼel Jesus sventa xchaʼkuxes li vinik antsetik xchiʼuk li ololetike (Mat. 11:5).

11. ¿Kʼu yuʼun jun yoʼonton chnopajik ta stojolal Jesus li jpasmuliletike?

¹¹ Akʼo mi tsots tspas smul li krixchanoetike, jun noʼox yoʼonton chnopajik ta stojolal li Jesuse. Mu labaluk sba chkaʼitik ti jech chnopajik ta stojolale, yuʼun kʼalal la xchiʼinan ta loʼile, xaʼi ti kʼu yelan chaʼi sbaike xchiʼuk la xkʼuxubinan (Luk. 15:​1, 2). Jech xtok, la skʼupil kʼoptaan xchiʼuk laj yakʼanbe bendision li buchʼutik chakʼ xchʼunel yoʼontonik ta stojolale (Luk. 19:​1-10). Li Jesuse lek laj yakʼ ta ilel ti snaʼ xkʼuxubinvan li Stote (Juan 14:9). Li kʼusitik la spas xchiʼuk ti k’u yelan kʼopoje laj yakʼ ta ilel ti skʼanojutik li Jeovae, ti snaʼ xkʼuxubinvane xchiʼuk ti tskʼan tskoltautik sventa stsal kuʼuntik li mulile (Luk. 5:​27, 28).

12. ¿Kʼu yelan laj yal Jesus ti chchame?

¹² Li Jesuse snaʼoj xa onoʼox li kʼusi tsnuptane. Ep ta velta laj yalbe yajchankʼoptak ti ta xichʼ valopatinele xchiʼuk ti chichʼ milel ta jtel teʼe (Mat. 17:22; 20:​18, 19). Jech xtok, snaʼoj ti jaʼ chchʼay-o mulil kʼalal chakʼ sba ta matanal jech kʼuchaʼal laj yal li Juan xchiʼuk li j-alkʼopetike. Laj yal xtok ti kʼalal mi cham xa oxe, ta xnopajik talel ta stojolal «skotol li jeltos krixchanoetike» (Juan 12:32). Li buchʼutik chakʼ xchʼunel yoʼontonik ta stojolal Jesus xchiʼuk ti tstsʼaklibeik li yav yoke, xuʼ me lek x-ilatik yuʼun Jeova, vaʼun ti xkolik lokʼel li ta mulile (Rom. 6:​14, 18, 22; Juan 8:32). Sventa jechuk xkʼot ta pasel taje, li Jesuse tsots yoʼonton xchiʼuk ta sjunul yoʼonton cham akʼo mi tsots laj yil svokol (Juan 10:​17, 18).

13. ¿Kʼuxi cham li Jesuse xchiʼuk kʼusi chakʼ jchantik ta stojolal Jeova? (Kʼelo xtok li lokʼoletike).

¹³ Laj yichʼ valopatinel li Jesuse, la xchukik, la xchopol kʼoptaik, la sjutbeik smul, laj yalik ti sta-o xichʼ milele, laj yutilanik xchiʼuk la smajik. Pe maʼuk noʼox, yuʼun oy jayvoʼuk soltaroetike la sjokʼanik ta jtel teʼ sventa smilik. Li Jesuse kuch yuʼun skotol li vokoliletik taje. Pe li Jeovae kʼux tajek laj yaʼi ti laj yil kʼu yelan chil svokol li Xnichʼone. Akʼo mi skʼanoj tajek xchiʼuk mu albajuk sjuʼel, muʼyuk kʼusi la spas sventa skolta. ¿Kʼu yuʼun? Ta skoj ti kʼanvaneme, xi laj yal li Jesuse: «Yuʼun skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16).

14. ¿Kʼu yelan chavaʼi aba ti laj yakʼ ta matanal xkuxlejal ta atojolal li Jesuse?

¹⁴ Ti jech laj yakʼ sba ta matanal li Jesuse, jaʼ jech jamal laj yakʼ ta ilel Jeova ti skʼanoj skotol li snitilulaltak Adan xchiʼuk Evae. Taje jaʼ me svinajeb ti yuʼun skʼanojot tajek eke. ¿Mi mu labaluk sba chavil skotol li kʼusi lokʼ ta yoʼonton spasel Dios xchiʼuk ti laj yil svokol sventa spojot lokʼel li ta mulil xchiʼuk li ta lajelale? (1 Juan 4:​9, 10). Li Diose oy ta yoʼonton tskʼan tskoltautik ta jujuntal sventa xijtun ta stojolal akʼo mi jpasmulilutik to xchiʼuk ta jelavele tskʼan tstupʼbe-o skʼoplal li mulile.

15. ¿Kʼusi skʼan jpastik sventa jtabetik sbalil ti la yakʼ ta matanal xkuxlejal li Jesuse?

¹⁵ Ti laj yakʼbutik ta matanal Xnichʼon li Jeovae, jaʼ sventa xichʼ chʼayel ta j-echʼel li jmultike. Pe oy kʼusi skʼan jpastik, li Juan J-akʼ-ichʼvoʼ xchiʼuk li Jesukristoe laj yalik li kʼusi skʼan jpastike, xi laj yalike: «Suteso avoʼontonik, yuʼun nopajem xa tal li Ajvalilal ta vinajele» (Mat. 3:​1, 2; 4:17). Jaʼ yuʼun, mi ta jkʼan ta jtsaltik li mulil xchiʼuk mi ta jkʼan chijnopaj ta stojolal li jkʼanvanej Jtotike, tsots skʼoplal ti jsutes koʼontontike. Pe ¿kʼusi smakoj ti ta jsutes koʼontontike xchiʼuk kʼuxi tskoltautik sventa lekuk xilutik Jeova akʼo mi jpasmulilutik? Taje jaʼ ta jkʼelbetik skʼoplal li ta yan xchanobile.