¿Kʼuxi xuʼ xijkʼot ta jun melel amigoil?

¿MI OY kʼusitik tsots anuptanoj xchiʼuk ti chʼabal xa buchʼu xuʼ skoltaot avaʼie? Avie, toj tsots xa vokolil xchiʼuk toj echʼ xa noʼox xibal sba kʼusi xuʼ jnuptantik ti xuʼ jvul-o koʼontontik yuʼune xchiʼuk ti jtuk chkaʼi jbatike. Pe mu me jnoptik ti chʼabal xa buchʼu xuʼ skoltautik ta stsalel li jvokoltike (2 Tim. 3:1). Li Vivliae chal ti oy melel amigoiletik ti xuʼ skoltautik «kʼalal oy jvokoltike» (Prov. 17:17).

TI KʼU YELAN XUʼ XKOLTAVANIK LI MELEL AMIGOILETIKE

Li jtakbol Pabloe ay chiʼinatuk yuʼun yamigotak kʼalal ay ta vulaʼal ta yantik lume xchiʼuk ep ta tos ti kʼu yelan koltaate (Kol. 4:​7-11). Kʼalal te chukul ta Romae, jaʼ la spasik li kʼusi mu xuʼ yuʼun spasele. Jech kʼuchaʼal li Epafroditoe laj yichʼbe batel li kʼusitik jtunel yuʼune xchiʼuk li kʼusi la stakik batel li ermanoetik ta Filipose (Filip. 4:18). Li Tikiko eke jaʼ la spuk batel li kartaetik la stsʼiba Pablo ta sventa li tsobobbailetike (Kol. 4:7).a Ta skoj ti jech koltavan li yamigotake, li Pabloe jech-o la stsatsubtasbe yoʼonton tsobobbailetik kʼalal te chukul ta snae xchiʼuk kʼalal laj yichʼ tikʼel ta chukele. Li voʼotik eke, ¿kʼuxi xuʼ xijkʼot ta melel amigoil?

Avie, oy ermanoetik xchiʼuk ermanaetik ti chakʼik ta ilel ta stalelalik ti jaʼik melel amigoiletike. Kalbetik skʼoplal Elísabet ti jaʼ jun prekursora regular ta Españae. Kʼalal albat ti tsakbil ta kanser smeʼ xchiʼuk ti muʼyuk xa xpoxile, oy jun ermana laj yakʼ ta ilel ti jaʼ jun melel amigaile, yuʼun tstakbe batel kʼupil sba tekstoetik ta Vivlia ta mensaje li Elisabete. Xi chal li Elisabete: «Li mensajeetik la stakbun tale, te laj kakʼ venta ti mu jtukuk oyune xchiʼuk jaʼ laj yakʼbun kipal sventa xkuch batel kuʼun li jvokol jujun kʼakʼale» (Prov. 18:24).

Mas to me lek chkamigoin jbatik xchiʼuk li ermanoetik mi ta jkoltatik sventa xlokʼik ta cholmantal xchiʼuk ti xbatik ta tsobajeletike. ¿Mi xuʼ van jkoltatik junuk ermano ti oy xa sjabilal sventa xbat ta tsobajeletik o ti xlokʼ ta cholmantale? Kʼalal jech ta jpastike, jaʼo me ta jpatbe jba koʼontontik ta jujuntal (Rom. 1:12). Pe oy ermanoetik ti mu stakʼ xlokʼ ta snaike. ¿Kʼusi van xuʼ jpastik sventa xijkʼot ta melel amigoil?

JECHUK XILUTIK KʼUCHAʼAL MELEL AMIGOIL LI BUCHʼUTIK MU STAK’ XLOKʼ TA SNAIKE

Oy ermanoetik ti mu stak’ xbatik ta tsobajeletik ta skoj ti tsots ipik o ta skoj ti oy kʼusi yan tsnuptanike. Taje jaʼ jech la snuptan David k’alal albat ti tsakbil ta kansere xchiʼuk ti mas ta vakib u laj yichʼ quimioterapiae. K’alal jaʼo chichʼ poxtaele, li David xchiʼuk li yajnil ti Lidia sbie jaʼ no’ox ch-ochik ta videollamada li ta tsobajeletike.

¿Kʼuxi koltavan sjunul li tsobobbaile? Kʼalal tstsuts li tsobajeletike, junantik ermanoetik ti te oyik ta salone chchiʼinik ta loʼil li nupultsʼakal ti te ochemik ta videollamadae. Jech xtok, li ermanoetike tstakbeik batel mensaje li David xchiʼuk Lidia sventa xalbeik ti toj kʼupil sba ti chakʼ sloʼilike. ¿Kʼu van yelan laj yaʼi sbaik ta skoj ti jech la spasike? Li David xchiʼuk Lidiae kʼanbil laj yaʼi sbaik kʼalal jech la spas li yamigotakike.

¿Mi xuʼ van oy kʼusi jpastik sventa jchiʼintik ta cholmantal li buchʼutik mu stakʼ xlokʼ ta snaike? Akʼo mi uni jutuk noʼox li kʼusi ta jpastik yilele, pe jaʼ me jech tsakbil ta venta chaʼi sbaik (Prov. 3:27). ¿Kʼu yuʼun mu jchiʼintik ta spasel karta o ti jcholtik mantal ta telefono xchiʼukike? Li moletike lek onoʼox ti xchapanik sventa xjelav ta videollamada li tsobajel sventa cholmantale. Li David xchiʼuk Lidiae la stojik tajek ta vokol ti jech la spas li stsobobbailike. Xi chal li Davide: «Akʼo mi jaʼ noʼox chi-ochkutik ta videollamada xchiʼuk li grupo sventa cholmantale, la stsatsubtas tajek koʼontonkutik, yuʼun ta jloʼiltakutik kʼusitik sventa mantal xchiʼuk chichʼ pasel orasion». Ti mi oy junuk avaj-estudioe, xuʼ van xavikʼ batel bakʼintik ta sna li ermano o li ermana ti mu stakʼ xlokʼ ta snae. Pe baʼyel me xajakʼbe mi stakʼ xavikʼ batel li ta snae.

Kʼalal jech ta jchiʼintik li ermanoetik ti mu stakʼ xlokʼ ta snaike, chkojtikintik lek kʼu yelan stalelalik xchiʼuk mas to me lek xkil jbatik xchiʼukik. Yuʼun kʼalal chkaʼitik kʼu yelan tstunes Skʼop Dios sventa xchanubtasik yantik xchiʼuk ti skoltaik sventa xnopaj ta stojolal Jeovae, mas to ep sbalil chkiltik li ermanoetike. Kʼalal jech yelan chijkoltavane, xuʼ me mas jta kamigotaktik (2 Kor. 6:13).

Kʼalal oy kʼusitik tsots la snuptan li Pabloe, te kʼot kʼelatuk yuʼun li Titoe. Taje jaʼ koltaat-o sventa junuk noʼox yoʼonton (2 Kor. 7:​5-7). Taje chakʼ kiltik ti maʼuk noʼox xuʼ jpatbetik yoʼonton kamigotaktik kʼalal oy kʼusi chkalbetike, yuʼun chpatbat tajek yoʼontonik xtok kʼalal te jchiʼuktik xchiʼuk kʼalal oy kʼusi ta jpastik ta stojolalike (1 Juan 3:18).

JECHUK XILUTIK KʼUCHAʼAL MELEL AMIGOIL LI BUCHʼUTIK CHICHʼIK KONTRAINELE

Li ermanoetik xchiʼuk li ermanaetik ta Rusiae jaʼ jun slekil kʼelobil ti kʼu yelan ta skolta sbaik ta jujuntale. Kalbetik skʼoplal kʼusi la snuptan Serguéi xchiʼuk Tatiana ti jaʼik jun nupultsʼakale. Li polisiaetike ochik ta snaik sventa xchajik ta kʼelel, vaʼun ikʼatik batel ta snail polisiaetik sventa oyuk kʼusitik xjakʼbatik. Jaʼ baʼyel koltaat lokʼel li Tatianae, vaʼun sut batel ta sna. Xi chal Serguéi li kʼusi kʼot ta pasel kʼalal kʼot xa ox ta snaik li Tatianae: «Te tal jun ermana ti mu snaʼ xiʼe. Laje, te tal yan ermanoetik sventa xkoltavanik ta xchʼubael jnakutik ta skoj ti ay xchajik ta kʼelele».

Xi to chal Serguéi: «Lek onoʼox chkaʼi li kʼusi chal Proverbios 17:17 ti xi chale: ‹Li melel amigoile skotol ora chakʼ ta ilel ti chkʼanvane xchiʼuk jaʼ jchiʼiltik ta vokʼel chkʼot kʼalal oy jvokoltike›. Mas to chkil kʼu yelan chkʼot ta pasel ta jkuxlejal li kʼusi chal teksto avi ti chkichʼ kontrainele. Jnaʼoj onoʼox lek ti mu xkuch kuʼun jtuk li jvokole. Li Jeovae yakʼojbun kamigotak ti tsots yoʼontonike, yuʼun muʼyuk yiktaojikun-o».b

Ta skoj ti mas xa tstsatsaj batel li kuxlejale, chtun tajek kuʼuntik ti oyuk kamigotaktik sventa skoltautike. Kʼalal mi jaʼo xa li mukʼta tsatsal vokolile, mas to me chtun kuʼuntik. Jech oxal, avie skʼan xa noʼox me xkakʼtik persa sventa xijkʼot ta jun melel amigoil (1 Ped. 4:​7, 8).