XCHANOBIL 10
KʼEJOJ 31 Xanavan skotol ora xchiʼuk Jeova
Jchanbetik kʼu yelan tsnop Jeova xchiʼuk Jesus
«Ta skoj ti laj yil svokol ta sbekʼtal li Kristoe, li voʼoxuk eke chapano abaik sventa jechuk xanopik jech kʼuchaʼal tsnop li Kristoe» (1 PED. 4:1).
LI KʼUSI CHALBE SKʼOPLALE
Ta jkʼeltik batel kʼusi la xchan Pedro ta stojolal Jesus ta sventa ti kʼu yelan tsnope xchiʼuk ta jkʼeltik batel li kʼusi xuʼ jchantik eke.
1, 2. 1) ¿Kʼusi smakoj ti jkʼanojtik li Jeovae? 2) ¿Kʼuxi laj yakʼ ta ilel Jesus ti skʼanoj Jeova ta sjunul snopbene?
LI Jesuse jamal laj yalbe skʼoplal li mantal mas tsots skʼoplal ti te chal ta Smantal Moisese, xi laj yale: «Skʼan xakʼan ta sjunul avoʼonton li Jeova Dios avuʼune, ta sjunul akuxlejal, ta sjunul anopben xchiʼuk ta sjunul avipal» (Mar. 12:30). Jaʼ yuʼun, skʼan jkʼantik Jeova ta sjunul jkuxlejaltik, jaʼ xkaltik, ta skotol li kʼusi x-ayan kuʼuntike. Taje te smakoj li kʼusi oy ta koʼontontike, ti kʼu yelan chkaʼi jbatike xchiʼuk li kipaltike. Jech xtok, te smakoj ti kʼuxi ta jtunes li jnopbentike, jaʼ xkaltik, li kʼusitik ta jnoptike. Ta skoj ti jkʼanojtik li Jeovae, jaʼ tstij koʼontontik sventa jchanbetik ti kʼu yelan tsnope. Melel onoʼox, mu onoʼox xkaʼibetik smelolal skotol ti kʼu yelan li snopbene, pe li kʼusi xuʼ skoltautike jaʼ mi la jchanbetik li snopben Kristoe, yuʼun li stuke lek tajek la xchanbe ti kʼu yelan tsnop li Stote (1 Kor. 2:16 xchiʼuk li nota de estudio ta español «nosotros sí tenemos la mente de Cristo»).
2 Li Jesuse skʼanoj ta sjunul snopben li Jeovae. Snaʼoj li kʼusi oy ta yoʼonton Dios ti akʼo spase xchiʼuk jpʼel ta yoʼonton tspas akʼo mi xil-o svokol. Ta skoj ti tskʼan lek ch-ilat yuʼun li Stote, muʼyuk kʼusi laj yakʼ ti xchʼaybat-o yoʼontone.
3. ¿Kʼusi la xchan ta stojolal Jesus li jtakbol Pedroe, xchiʼuk kʼusi laj yalbe yajtsʼaklomtak Kristo ti akʼo spasike? (1 Pedro 4:1).
3 Li Pedro xchiʼuk li yan jtakboletike la xchiʼinik ta xanbal li Jesuse xchiʼuk laj yil ta sat stukik ti kʼu yelan tsnope. Kʼalal la stsʼiba Pedro li baʼyel skartae, te laj yalbe yajtsʼaklomtak Kristo ti akʼo xchapan sbaik sventa jechuk snopik kʼuchaʼal li Kristoe (kʼelo 1 Pedro 4:1). Kʼalal laj yal Pedro «chapano abaik» xie, jaʼ laj yal li kʼusi nopem xaʼi chalik li soltaroetike. Jaʼ jech laj yakʼ ta aʼiel ti kʼalal ta jnoptik jech kʼuchaʼal li Kristoe xkoʼolaj ta jun tsatsal abtejebal ti jaʼ tskoltautik sventa jtsaltik li kʼusi chopol tskʼan koʼontontike xchiʼuk li kʼusi chopol chakʼ sbalumil Satanase (2 Kor. 10:3-5; Efes. 6:12).
4. ¿Kʼusi ta jkʼeltik batel li ta xchanobil liʼe?
4 Li ta xchanobil liʼe, ta jkʼeltik batel ti kʼu yelan tsnop li Jesuse xchiʼuk ti kʼuxi xuʼ jchanbetike. Ta jkʼeltik batel kʼuxi xuʼ 1) jchanbetik ti kʼu yelan tsnop Jeovae, 2) ti bikʼituk xkakʼ jbatike xchiʼuk 3) ti oyuk lek jchʼuleltike.
JECHUK JNOPTIK KʼUCHAʼAL TSNOP JEOVA
5. Albo skʼoplal bakʼin laj yakʼ ta ilel Pedro ti mu koʼoluk kʼusi la snop kʼuchaʼal li Jeovae.
5 Kalbetik skʼoplal ti bakʼin laj yakʼ ta ilel Pedro ti mu koʼoluk kʼusi la snop kʼuchaʼal li Jeovae. Li Jesuse laj yalbe yajtakboltak ti chbat ta Jerusalene, ti te chchukat yuʼun li jnitvanejetik ta relijione, ti chichʼ majele xchiʼuk ti chichʼ milele (Mat. 16:21). Li Pedroe snaʼoj ti jaʼ Mesias li Jesuse ti jaʼ li buchʼu albil chtal spoj li steklumal Diose, jech oxal mu chʼunbajuk laj yaʼi ti xakʼ permiso Jeova ti xichʼ milel li Jesuse (Mat. 16:16). Jaʼ yuʼun, li Pedroe stuk bu laj yikʼ batel xchiʼuk xi laj yalbee: «Oyuk slekil avoʼonton ta atojolal, Kajval; ta batsʼi melel mu jechuk chkʼot ta atojolal taje» (Mat. 16:22). Li Jesus xchiʼuk li Pedroe mu jmojuk li kʼusi tsnopike, yuʼun li Pedroe mu jechuk la snop kʼuchaʼal tsnop li Jeovae.
6. ¿Kʼuxi laj yakʼ ta ilel Jesus ti koʼol tsnop jech kʼuchaʼal tsnop li Jeovae?
6 Li Jesuse jaʼ jech tsnop kʼuchaʼal tsnop li Stot ta vinajele. Xi laj yalbe li Pedroe: «¡Akʼo aba ta jpat, Satanas! Chamakbun kakan, yuʼun maʼuk chanop li kʼusitik tsnop Diose, jaʼ chanop li kʼusitik tsnop krixchanoetike» (Mat. 16:23). Li Jesuse snaʼoj onoʼox ti mu kʼunuk sventa spas li kʼusi oy ta yoʼonton li Jeovae, yuʼun snaʼoj ti ta onoʼox xil svokol xchiʼuk ti ta xchame. Jaʼ yuʼun, la spʼaj li tojobtasel laj yakʼ Pedroe, ti xuʼ van ta slekil yoʼonton jech laj yale. Kʼalal jech albate, li jtakbole laj yakʼ venta ti skʼan jechuk xlik snop kʼuchaʼal tsnop li Jeovae. ¡Lek tajek kʼusi chakʼ jchantik ek!
7. ¿Kʼuxi laj yakʼ ta ilel Pedro ti yakal xa chakʼ yipal sventa jechuk snop kʼuchaʼal tsnop li Jeovae? (Kʼelo li lokʼol ta pajina 1).
7 Ta mas tsʼakale, li Pedroe laj yakʼ ta ilel ti yakal xa chakʼ yipal sventa jechuk snop kʼuchaʼal tsnop li Jeovae. Li Diose kʼot xa ox ta nopel yuʼun ti jaʼ xa yorail sventa xchʼam ta steklumal li jyanlumetike. Jaʼ yuʼun, laj yalbe Pedro ti akʼo xbat xcholbe mantal li Kornelioe ti jaʼ li buchʼu baʼyel kʼot ta yajtsʼaklom Kristo ti maʼuk Judae. Li vaʼ kʼakʼale, li judaetike nopem xaʼiik ti muʼyuk chchiʼinik jutebuk li jyanlumetike, jaʼ yuʼun xuʼ van vokol laj yaʼi ti spas li kʼusi albate. Pe kʼalal laj yaʼibe smelolal li kʼusi oy ta yoʼonton li Jeovae, la sjel li snopbene. Kʼalal albat yuʼun Kornelio ti xbat vulaʼanatuke, muʼyuk kʼusi laj yal, la xchʼun noʼox batel (Ech. 10:28, 29). La xcholbe mantal li Kornelio xchiʼuk skotol li buchʼutik te oyik ta snae, vaʼun laj yichʼik voʼ (Ech. 10:21-23, 34, 35, 44-48).
Li Pedroe ch-och batel ta sna Kornelio. (Kʼelo parafo 7).
8. ¿Kʼuxi chkakʼtik ta ilel ti jaʼ jech ta jnoptik kʼuchaʼal tsnop li Jeovae? (1 Pedro 3:8).
8 Kʼalal echʼ xa ox jayibuk jabile, li Pedroe xi la stojobtas li yajtsʼaklomtak Kristoe: «Koʼoluk me kʼusi chanop akotolik» (kʼelo 1 Pedro 3:8). Sventa jmojuk kʼusi jnoptik jkotoltik li stestigoutik Jeovae, skʼan jchantik ti kʼu yelan tsnop li Jeovae, taje xuʼ te jtatik li ta Skʼope. Kalbetik junuk skʼelobil ti kʼu yelan jmoj ta jnoptike. Li Jesuse la stijbe yoʼonton yajchankʼoptak ti jaʼuk baʼyel xakʼ ta xkuxlejalik li Ajvalilal yuʼun Diose (Mat. 6:33). Jaʼ yuʼun, mi oy junuk ermano ta jtsobobbailtik ti kʼot ta nopel yuʼun ti chtun ta tsʼakal orae, ¿mi jaʼ van jech chkalbetik jech kʼuchaʼal laj yalbe Jesus li Pedroe? Moʼoj. Ta jkʼupil kʼoptatik ti toj lek ti jech kʼot ta nopel yuʼune xchiʼuk chkalbetik ti ta jkʼan ta jkoltatike.
BIKʼITUK XKAKʼ JBATIK
9, 10. ¿Kʼuxi laj yakʼ ta ilel Jesus ti skʼan bikʼit xkakʼ jbatike?
9 Kʼalal jun xa ox akʼobal skʼan xichʼ milel li Jesuse, laj yakʼbe xchan Pedro xchiʼuk li yan yajtakboltak ti toj tsots skʼoplal ti bikʼituk xakʼ sbaike. Li Jesuse laj yalbe Pedro xchiʼuk Juan ti akʼo xchapanik sventa jmojuk xveʼik xchiʼuk li yajtakboltak ta slajeb veltae. Laj van skʼelik lek ti oyuk junuk lechlech boch xchiʼuk jlikuk pokʼ o manta sventa xichʼ pokbel yakan li buchʼutik chkʼotik ta veʼele. Pe ¿buchʼu van tsbain spokel li akanile?
10 Li vaʼ kʼakʼale, jaʼ mas sbainoj mosoiletik ti tspokbeik yakan li jvulaʼaletike. Pe jaʼ lik spok akanil li Jesuse. Muʼyuk bu xchibet ti jech la spase. ¡Labal van sba laj yil yajtakboltak kʼalal la slokʼ li skʼuʼ slapoj ta sbae, ti la xchuk jlik pokʼ o manta ta xchʼute, ti lik skʼeb voʼ li ta lechlech boche xchiʼuk ti lik pokbatuk yakanike! (Juan 13:4, 5). ¿Mi xnop van avuʼun kʼu sjalil laj yichʼ yuʼun Jesus ta spasel taje? Yuʼun la spokbe yakan li 12 ta voʼ yajtakboltake, ti te skʼoplal li Judas ti valopatinvan ta tsʼakale. Bikʼit tajek laj yakʼ sba li Jesuse. Laje, xi laj yalbe ta slekil yoʼonton li yajtakboltake: «¿Mi xavaʼibeik smelolal li kʼusi la jpasboxuke? Li voʼoxuke ‹Jchanubtasvanej› xchiʼuk ‹Kajval› xi chavalbeikun jkʼoplal. Lek ti jech chavalbeikune, yuʼun jaʼun. Jaʼ yuʼun, mi la jpokboxuk avakanik li voʼon ti Avajvalikun xchiʼuk ti Jchanubtasvanejun avuʼunike, jaʼ jech skʼan xapokbe aba avakanik ta jujuntal ek» (Juan 13:12-14).
Sventa bikʼit xkakʼ jbatike, skʼan xlokʼ talel ta yutil to koʼontontik
11. ¿Kʼuxi laj yakʼ ta ilel Pedro ti bikʼit xa ox yakʼoj sbae? (1 Pedro 5:5; kʼelo xtok li lokʼole).
11 Li Pedroe la xchanbe Jesus ti bikʼit yakʼoj sbae. Kʼalal sut xa ox batel ta vinajel li Jesuse, li Pedroe la xpoxta ta skʼelobil juʼelal jun vinik ti koxo xa onoʼox kʼalal vokʼe (Ech. 1:8, 9; 3:2, 6-8). Ta skoj ti jech la spase, labal sba tajek laj yil li krixchanoetike (Ech. 3:11). ¿Kʼusi van tspas li Pedroe? Teuk ta joltik ti bu likeme toj tsots skʼoplal chilik ti lekuk ojtikinbilike. Jaʼ yuʼun, ¿mi tskʼan van ichʼel ta mukʼ ti jech la spase? Moʼoj, yuʼun bikʼit laj yakʼ sba xchiʼuk jaʼ laj yakʼ ta ichʼel ta mukʼ li Jeova xchiʼuk Jesuse. Xi laj yal ta stojolal li Jesuse: «Jaʼ yuʼun, ta sventa li sbie xchiʼuk li xchʼunel koʼontonkutik ta sbie, kolem xa li vinik liʼ akʼelojike xchiʼuk ti xavojtikinike» (Ech. 3:12-16). Kʼalal echʼ xa ox kʼuk sjalile, li Pedroe la stsʼibabe batel yajtsʼaklomtak Kristo ti toj tsots skʼoplal ti bikʼituk xakʼ sbaike. Li kʼusitik laj yale, jaʼ van tsvules ta joltik ti la xchuk jlik pokʼ o manta ta xchʼut li Jesuse xchiʼuk ti la spokbe yakan li yajchankʼoptake (kʼelo 1 Pedro 5:5).
Li Pedroe bikʼit laj yakʼ sba xchiʼuk jaʼ laj yakʼ ta ichʼel ta mukʼ Jeova xchiʼuk Jesus kʼalal la spas jun skʼelobil juʼelale. Xuʼ me bikʼit xkakʼ jbatik ek mi muʼyuk ta jkʼantik kʼupil kʼoptael kʼalal oy kʼusi ta jpastik ta stojolal yantike. (Kʼelo parafo 11, 12).
12. ¿Kʼuxi xuʼ bikʼit xkakʼ jbatik jech kʼuchaʼal la spas li Pedroe?
12 Jech kʼuchaʼal li Pedroe, xuʼ me bikʼit xkakʼ jbatik ek. Li kʼusi xuʼ skoltautike jaʼ mi te ta jnopbentik ti maʼuk noʼox ta jkʼopojeltik chvinaj ti bikʼit kakʼoj jbatike, yuʼun skʼan xlokʼ talel ta yutil to koʼontontik. Taje jaʼ li kʼusi laj yalbe skʼoplal Pedro kʼalal laj yal ti skʼan bikʼit xkakʼ jbatike. Ti oy kʼusitik ta jpastik ta stojolal yantike jaʼ ta skoj ti jkʼanojtik Jeova xchiʼuk li jchiʼiltaktike, maʼuk ta skoj ti ta jkʼantik kʼupil kʼoptaele. Ta me xkakʼtik ta ilel ti bikʼit chkakʼ jbatik mi xijmuyubaj noʼox chijtun ta stojolal Jeova xchiʼuk ta stojolal kermanotaktik akʼo mi mu xakʼik venta li yantike (Mat. 6:1-4).
«OYUK ME LEK ACHʼULELIK»
13. ¿Kʼusi smakoj kʼalal «oyuk me lek achʼulelik» xie?
13 ¿Kʼusi smakoj kʼalal «oyuk me lek achʼulelik» xie? (1 Ped. 4:7). Kʼalal oy kʼusi ta jnop ta jpastike, skʼan me xkakʼtik ta ilel ti jaʼ jech ta jnoptik kʼuchaʼal tsnop li Jeovae. Jech xtok, teyuk me ta joltik ti jaʼ mas tsots skʼoplal ti lekuk xkil jbatik xchiʼuk li Jeovae. Mi oy lek jchʼuleltike, chkakʼtik venta ti oy kʼusitik mu jnaʼtik spasele, muʼyuk ta jnoptik ti jnaʼtik xa skotole. Jech xtok, ta jkʼanbetik koltael Jeova ta orasion sventa sbeiltasutik.a
14. Alo bakʼin muʼyuk la spat yoʼonton ta stojolal Jeova li Pedroe.
14 Kʼalal jun xa ox akʼobal skʼan xcham li Jesuse, xi laj yalbe li yajchankʼoptake: «Li akʼobal liʼe chavichʼ makbel avakan akotolik ta jkoj». Xi jpʼel yoʼonton la stakʼ li Pedroe: «Manchuk mi tsmak yakan skotolik ta akoj, ¡li voʼone mi jaʼuk bu ta jmak kakan!». Li vaʼ akʼobale, li Jesuse xi la stojobtasan junantik yajchankʼoptake: «Vikʼiluk-o me asatik xchiʼuk pasilanik orasion» (Mat. 26:31, 33, 41). Ti lajuk xchʼun Pedro li kʼusi laj yal Jesuse, xuʼ van tsots yoʼonton laj yal jechuk ti jaʼ yajchankʼop Jesuse. Pe ta skoj ti mu jechuk la spase, laj yal ti mu xojtikine. Ta skoj taje, ¡chopol tajek laj yaʼi sba! (Mat. 26:69-75).
15. ¿Kʼusi koltaat-o Jesus sventa oyuk lek xchʼulel kʼalal jun xa ox akʼobal skʼan xchame?
15 Li Jesuse la spat yoʼonton ta stojolal Jeova. Akʼo mi jaʼ jun tukʼil krixchano, ep ta velta la skʼopon Jeova kʼalal jun xa ox akʼobal skʼan xchame. Ti jech la spase jaʼ akʼbat stsatsal yoʼonton sventa jaʼ spas li kʼusi tskʼan yoʼonton Stote (Mat. 26:39, 42, 44; Juan 18:4, 5). Li Pedroe laj yakʼ venta ti la spasilan orasion li Jesuse, taje muʼyuk van xchʼay-o ta sjol.
16. ¿Kʼuxi laj yakʼ ta ilel Pedro ti vulem xa ox lek xchʼulele? (1 Pedro 4:7).
16 Ta mas tsʼakale, li Pedroe xvokolet la skʼanbe koltael ta orasion li Jeovae. Kʼalal chaʼkuxiem xa ox li Jesuse, laj yalbe Pedro xchiʼuk yan jtakboletik ti ta xichʼik chʼul espiritu sventa xcholik mantale. Pe laj yalanbe ti teuk smalaik ta Jerusalen sventa x-akʼbatike (Luk. 24:49; Ech. 1:4, 5). ¿Kʼusi la spas Pedro kʼalal jaʼo tsmala ti x-akʼbat li chʼul espiritue? Li Vivliae chal ti muʼyuk xikta sba ta spasel orasione xchiʼuk jech la spasik ek li yan yajtsʼaklomtak Kristoe (Ech. 1:13, 14). Kʼalal laj xa ox stsʼiba li baʼyel skartae, la stijbe yoʼonton yajtsʼaklomtak Kristo ti oyuk lek xchʼulelike xchiʼuk ti xvokoletikuk skʼanbeik koltael ta orasion li Jeovae (kʼelo 1 Pedro 4:7). Li Pedroe lik spat yoʼonton ta stojolal Jeova xchiʼuk kʼot ta yoyal tsobobbail (Gal. 2:9).
17. ¿Kʼusi ti persa skʼan jpastik mu ventauk mi oy kʼusitik xijtojob spasele? (Kʼelo xtok li lokʼole).
17 Sventa oyuk lek jchʼuleltike, skʼan jpasilantik orasion. Jnaʼojtik onoʼox ti skʼan jkʼanbetik beiltasel li Jeovae akʼo mi jaʼ ta jpastik li kʼusi mu vokoluk chkaʼitik spasele. Pe mas to me jech skʼan jpastik kʼalal oy kʼusi tsots skʼoplal ta jnop ta jpastike, yuʼun li Jeovae jaʼ snaʼoj li kʼusi lek ta jtojolaltike.
Li Pedroe xvokolet la skʼanbe koltael Jeova. Xuʼ me xkakʼtik ta ilel ek ti oy lek jchʼuleltik kʼalal ta jkʼanbetik koltael li Jeovae, mas to kʼalal tsots skʼoplal kʼusi ta jnop ta jpastike. (Kʼelo parafo 17).b
18. Jech kʼuchaʼal la spas li Pedroe, ¿kʼusi xuʼ jpastik ek?
18 Ta jtojbetik tajek ta vokol Jeova ti toj echʼ xa noʼox lek la spasutike, yuʼun xuʼ jchanbetik li staleltake (Jen. 1:26). Jnaʼojtik onoʼox ti mu xchanbe kuʼuntik jech tajek kʼuchaʼal li stalelaltake (Is. 55:9). Pe jech kʼuchaʼal la spas li Pedroe xuʼ me jchantik snopel kʼuchaʼal tsnop li Jeovae, ti bikʼituk xkakʼ jbatike xchiʼuk ti oyuk lek jchʼuleltike.
KʼEJOJ 30 Jaʼ Kamigo, jaʼ Jdios, jaʼ Jtot
a Sventa xanabe mas skʼoplal kʼusi skʼan xal ti oyuk lek jchʼuleltik ta mantale, kʼelo ta jw.org o ta JW Library®. Saʼo ti bu chal: «Tekstoetik ti chapbil smelolale», mi laje, saʼo ti bu chal «2 Timoteo 1:7: ‹Li Diose maʼuk chakʼbutik chʼul espiritu sventa xiʼel›» mi laje, kʼelo ti bu chal «Lekil nopbenal».
b LI KʼUSI XVINAJ TA LOKʼOLE: Jun ermana yakal tspas orasion kʼalal mu to chjelav sventa sjakʼ yabtele.