¿Mi oy van junuk ajvalil ti xtojob lek ta sventainel li balumile? | ¿Kʼusi chal li Vivliae?

Oy vokolil ta sventa ajvalilal li ta spʼejel balumile, yuʼun tsaʼik kʼop li krixchanoetike, oy chlik skʼopik ta skoj votasion xchiʼuk chchʼak sbaik ta skoj li politikae. Jaʼ jech tsnuptanik ek li ajvaliletik ta yantik lumetik ti jun noʼox yoʼontonik yileluke.

Li Vivliae chalbe skʼoplal jun Ajvalilal ti xtojob lek ta ajvalilale. Oy van avaʼiojbe skʼoplal. Jaʼ li Ajvalilal laj yalbe skʼoplal Jesukristo li ta orasion padrenuestroe.

• «Xi me yelan skʼan xapasik orasione: ‹Jtotik ta vinajel, akʼo yichʼ chʼultajesel li abie. Akʼo taluk li Ajvalilal avuʼune. Akʼo kʼotuk ta pasel avuʼun li kʼusi tskʼan avoʼonton ta sba balumil jech kʼuchaʼal ta vinajele›» (Mateo 6:9, 10).

¿Kʼusi chal Vivlia ta sventa li Ajvalilal taje?

Li Ajvalilal yuʼun Diose xtojob lek ta ajvalilal

Li Ajvalilal taje ta vinajel to tspas mantal.

• Li Jesuse laj yal ti jaʼ «li Ajvalilal ta vinajele» (Mateo 4:17; 5:3, 10, 19, 20). Jaʼ yuʼun xi laj yale: «Maʼuk sventa balumil li Ajvalilal kuʼune» (Juan 18:36).

Tsjip lokʼel ta ajvalilal li krixchanoetike, jaʼ xa ch˗och li Ajvalilal yuʼun Diose.

• Xi chal li Vivliae: «Bikʼitik tslilin xchiʼuk tslajesbe skʼoplal skotol li ajvalilaletik taje [jaʼ xkaltik li krixchanoetike], vaʼun stuk xa noʼox te chkom sbatel osil» (Daniel 2:44).

Li ta Ajvalilal taje, ti jaʼ ch˗ajvalilaj li Jesukristoe, mi jsetʼuk onoʼox bu chlaj skʼoplal.

• Xi chal li Vivliae: «Li ajvalilal tspase te˗o sbatel osil, muʼyuk chlaj˗o skʼoplal» (Daniel 7:13, 14).

Li Ajvalilal taje chchabiutik xchiʼuk chakʼ jun oʼontonal li ta balumile.

• Xi chal li Vivliae: «Ta jujuntal te chchoti ta yolon steʼel s˗uvaik xchiʼuk ta yolon steʼel s˗igoik, muʼyuk buchʼu tsibtasatik» (Mikeas 4:4).

Chanbo mas skʼoplal li Ajvalilal yuʼun Diose

Kʼalal ay ta balumil li Jesuse, «la xcholbe skʼoplal li lekil aʼyejetik ta sventa li Ajvalilale» (Mateo 9:35). Xi onoʼox laj yale:

• «Li lekil aʼyejetik ta sventa li Ajvalilale ta xichʼ cholel ta spʼejel balumil sventa xaʼi skotol li jteklumetike, vaʼun ta xtal li slajebe» (Mateo 24:14).

Li avi kʼakʼale, yakal ta xichʼ cholbel skʼoplal mas ta 240 lumetik xchiʼuk bikʼtal lumetik li Ajvalilal yuʼun Diose. ¿Kʼusi bendisional chakʼ tal li Ajvalilal yuʼun Diose? ¿Kʼuxi xuʼ xatabe sbalil? Ta jtijkutik avoʼonton ti xachanbe mas skʼoplal li Ajvalilal taje.

Kʼelo li video ¿Kʼusi jaʼ li Ajvalilal yuʼun Diose?