Ta 50 jabile, jutukajem 73% li chonbolometike | ¿Kʼusi chal li Vivliae?

Li ta 9 yuʼun oktuvre ta 2024, li Fondo Mundial para la Naturaleza la spukbe skʼoplal ti kʼu yelan chil svokol li chonbolometik ta skoj li kʼusi tspas krixchanoetike. Li ta aʼyej taje, te laj yichʼ alel ti ta 50 jabile (ta 1970 kʼalal ta 2020), jutukajem 73% li chonbolometik oy ta teʼtike. Xi to pʼijubtasvane: «Li kʼusi chkʼot ta pasel kʼalal voʼob jabile jaʼ te chvinaj kʼusi chkʼot ta pasel ta stojolal li kʼusitik kuxajtik ta balumile».

Ep buchʼutik labal sba chaʼiik maʼ taje, pe stalel jech. Yuʼun kʼupil sba tajek chkiltik li jbalumiltike xchiʼuk kʼux chkaʼitik kʼalal chil svokol li chonbolometike. Jaʼ jech chkaʼi jbatik ta skoj ti yakʼoj ta koʼontontik Dios ti akʼo jchabitik li chonbolometike (Jenesis 1:27, 28; Proverbios 12:10).

Jech oxal, xuʼ van xi xajakʼbe abae: «¿Mi oy kʼusi xuʼ jpastik ta stojolal li chonbolometike? ¿Mi oy kʼusi chal li Vivliae?».

Oy kʼusi lek chtal ta jelavel

Akʼo mi xkakʼtik tajek persa xchabiel li jbalumiltik xchiʼuk li chonbolometike, mu spas kuʼuntik, jaʼ noʼox xuʼ yuʼun li Diose. Li ta Vivlia ta Apokalipsis 11:18 te chal ti Diose tslajes «li buchʼutik yakal tsokesik li balumile». Oy chaʼtos kʼusi chakʼ jchantik li versikulo taje:

1. 1. Muʼyuk onoʼox bu chakʼ permiso Dios ti sokes ta j˗echʼel balumil li krixchanoetike.

2. 2. Oy kʼusi poʼot xa spas li Diose. ¿Kʼuxi jnaʼojtik? Jaʼ ta skoj ti jutuk xa tajek skʼan slajesbe stsʼunbal chonbolometik li krixchanoetike.

¿Kʼusi tspas li Diose? Jaʼ tstunes li Ajvalilal yuʼune, ti te to ch˗ajvalilaj talel ta vinajel yoʼ sventain spʼejel li balumile (Mateo 6:10). Li Ajvalilal taje jaʼ chchanubtas li jchʼunej mantal krixchanoetik sventa xchabiik xchiʼuk ti xkʼuxubinik li chonbolometike (Isaias 11:9).