¿Mi chopol li pornografia o li cibersexoe?

Li kʼusi chal Vivliae

Li Vivliae muʼyuk jamal chalbe skʼoplal li pornografia xchiʼuk cibersexoe. Akʼo mi jech, li Vivliae jamal chal kʼusi tsnop ta stojolal li buchʼu muʼyuk smelolal chil li chiʼinejbail ta vayele o ti chchiʼin ta vayel yan krixchano ti maʼuk li snup xchiʼile. Jkʼeltik batel avilik junantik beiltaseletik ta Vivlia liʼe:

• Li Kolosenses 3:5 jamal chalbutik ti akʼo jiptik lokʼel li kʼusitik chopol kʼusi tskʼan koʼontontik ti xuʼ stij koʼontontik ti xijmulivaje. Mi la jkʼeltik li pornografiae, mas to ch˗ayan ta koʼontontik yuʼun. Jech xtok, ibal xa me sba chijkom ta sat li Diose.

• Jech kʼuchaʼal chal ta Mateo 5:28, «buchʼuuk noʼox ti te skʼeloj-o junuk ants ti oy ta yoʼonton tskʼupin yaʼie laj xa me sloʼla snup xchiʼil ta yoʼonton xchiʼuk li ants taje». Mi la jkʼeltik li pornografiae, xuʼ jaʼ stij koʼontontik ta pasel li mulivajele.

• Efesios 5:3 xi cha˗albat li yajtsʼaklomtak Kristoe: «Mu me xavalbeik skʼoplal jutebuk li mulivajele, skotol li kʼusitik ibal sbae o li kʼusitik mu x-echʼ ta oʼontonal spasele». ¿Mi chopol ti chkalbetik skʼoplal li kʼusitik ibal sbae? Jamal xvinaj ti chopol xtok ti ta jkʼeltik ta lokʼoletik, ta videoetik, ta jlikuk livro o ta junuk mensaje li pornografiae.

• «Li yabtel jbekʼtaltike lek xvinaj xchiʼuk jaʼ liʼe: mulivajel, kʼusitik ibal sba, [...] yan kʼusitik kʼuchaʼal taje. Jaʼ jech ta jpʼijubtasoxuk ta sventa li kʼusitik taje jech kʼuchaʼal laj xa onoʼox jpʼijubtasoxuke, ti buchʼutik jech ta spasike muʼyuk me chuʼuninik li Ajvalilal yuʼun Diose» (Galatas 5:19-21). ¿Mi chopol chil Dios li buchʼutik tskʼelik li pornografiae? Chopol chil xtok li buchʼutik chchʼay˗o yoʼontonik li ta cibersexo, ti chalbeik skʼoplal li chiʼinejbail ta vayel ta telefono o li sexteoe. Mi jech la jpastik li kʼusitik taje, muʼyuk xa me lek chilutik˗o li Diose.