¿Kʼuxi xuʼ jtsal li prevaetike?

Li jtakbol Pabloe xi la stsʼibae: «Kʼalal ta jkʼan ta jpas li kʼusi tukʼe, jaʼ oy ta jtojolal li kʼusi chopole» (Romanos 7:​21). ¿Mi oy jech avaʼioj aba? Mi jeche, li mantal liʼe tskoltaot sventa stsal avuʼun li akʼel ta prevae.

• Li kʼusi skʼan xanaʼe

• Kʼusi stakʼ xapas

• Li kʼusi tsnop yan kerem tsebetike

Li kʼusi skʼan xanaʼe

Li akʼel ta preva xchiʼuk sujele jutuk mu koʼoluk snitojbe sba skʼoplal. Jaʼ yuʼun, xi chal li Vivliae: «Tsokes jlekil talelaltik li xchiʼinel chopol krixchanoetike» (1 Korintios 15:33) Li sujel xchiʼuk li kʼusi chkiltik ta television o ta Internete, xuʼ me stij koʼontontik o xlik jpastik li kʼusi chopol tspasike (Eksodo 23:2).

«Li sujel sventa lekuk xilutik li yantike o ti ta jkʼan chijkʼot ta yamigoe, xuʼ me jech xlik jchanbetik stalelalik» (Jeremy).

Nopo ta sventa liʼe: ¿Kʼu yuʼun xanaʼ ti mas vokol chavaʼi stsalel junuk preva kʼalal chanopilanbe skʼoplal kʼu yelan chayiloxuk li yantike? (Proverbios 29:25).

Kʼusi skʼan xal: Mu xavakʼ sok alekil talelal li sujel chavichʼe.

Kʼusi stakʼ xapas

Jpʼeluk me ta avoʼonton li kʼusi achʼunoje. Yuʼun mi xanaʼet noʼoxe, xuʼ me xakʼot ta yixtol li yantike. Jaʼ lek tsako ta venta li tojobtasel liʼe: «Kʼelik me skotol li kʼusi chapasike; tukʼ me xanapʼan abaik ta stojolal li kʼusi lek tajeke» (1 Tesalonisenses 5:​21). Mi xavaʼibe smelolal li kʼusi achʼunoje, mas me kʼun chavaʼi ta spasel xchiʼuk tstsal avuʼun li prevaetike.

Nopo ta sventa liʼe: ¿Kʼu yuʼun mas lek xanaʼ ti xachʼunbe smantal Dios ta sventa li talelaletike?

«Kakʼoj venta ti kʼalal jpʼel ta koʼonton li kʼusi jchʼunoje xchiʼuk kʼalal ta jpʼaj li prevae, mas tstsakikun ta venta li yantike» (Kimberly).

Jun slekil kʼelobil ta Vivliae jaʼ li Daniele. Kʼalal chex kerem toʼoxe, laj yakʼ ta yoʼonton xchʼunbel smantaltak li Diose (Daniel 1:8).

Akʼo venta li kʼusi mas chakʼbot avokole. Li Vivliae chalbe skʼoplal «li kʼusi stalel tskʼan yoʼonton kerem tsebetike». Jaʼ xkaltik, li kʼusi oy tajek ta yoʼontonik kʼalal jech sjabilalike (2 Timoteo 2:​22). Maʼuk noʼox sventa li chiʼinejbail ta vayele, te smakojbe skʼoplal xtok ti tskʼan lek ch-ile yuʼun li yantike xchiʼuk ti tskʼan tsventain sba stuk akʼo mi mu to sta sjabilale.

Nopo ta sventa liʼe: Xi chal li Vivliae: «Ta jujuntal chichʼik akʼel ta preva kʼalal tijbil yoʼontonik xchiʼuk loʼlabilik ta skoj li kʼusi tskʼan yoʼonton stukike» (Santiago 1:​14). Li voʼote, ¿kʼusi ti mas tsloʼlabot avoʼonton chavaʼie?

«Skʼan xatsak ta venta li kʼusi mas chakʼot ta prevae. Sabo skʼoplal sventa stsal avuʼun xchiʼuk tsʼibao ta vun li kʼusi jtunel chavile sventa mi la anuptan yan prevae anaʼoj xa kʼuxi tstsal avuʼun» (Sylvia).

Jun slekil kʼelobil ta Vivliae jaʼ li Davide. Bakʼintike, oy kʼusi chopol la spas ta skoj ti laj yichʼ sujele o bakʼintike ayan ta yoʼonton stuk. Pe oy kʼusi la xchan ta skoj li kʼusi chopol la spase xchiʼuk laj yakʼ persa sventa xlekub li xkuxlejale. Li Davide xi laj yalbe ta orasion li Jeovae: «Dios kuʼun, sakubtasbun koʼonton xchiʼuk achʼubuk li kʼusi oy ta koʼonton sventa skoltaun yoʼ tukʼuk xkakʼ jbae» (Salmo 51:10).

Oy ta aba snopel. Xi chal li Vivliae: «Mu me xavakʼ akʼo stsalot li kʼusi chopole» (Romanos 12:21). Jaʼ xkaltik, ti xuʼ stsal avuʼun li prevae. Voʼot chanop atuk mi chakʼan chapas li kʼusi leke.

Nopo ta sventa liʼe: ¿Kʼusi xuʼ xapas sventa tukʼuk xavakʼ aba xchiʼuk ti jaʼuk xapas kʼusi lek kʼalal chavichʼ akʼel ta prevae?

«Ta jnopbe skʼoplal kʼu yelan chkaʼi jba ta tsʼakal mi liyal ta prevae. Xi ta jnope:‹¿Mi mas xa van lek chkaʼi jba? Yikʼaluk van, pe uni jlikel noʼox. ¿Mi mas van jun koʼonton chikom yuʼun? Moʼoj, mas to chopol chkaʼi-o jba. Vaʼun chaʼe, ¿mi oy sbalil ti ta jpase? ¡Ta melel, muʼyuk!›» (Sophia).

Jun slekil kʼelobil ta Vivliae jaʼ li Pabloe. Akʼo mi laj yal ti oy onoʼox kʼusi chopol tskʼan yoʼontone, pe la snop lek kʼusi tspas sventa mu xakʼ sba ta tsalel xchiʼuk laj yal stuk ti tspas ta mantal li sbekʼtale xchiʼuk ti tspas ta smosoe (1 Korintios 9:​27).

Kʼusi skʼan xal: Voʼot me oy ta aba ti kʼu yelan chatsal li prevaetike.

Teuk ta ajol ti mu teuk-o li prevaetike. Xi chal Melissa ti 20 sjabilale: «Li prevaetik la jnuptan kʼalal chexun toʼoxe, toj tsotsik toʼox laj kil. Li avie, mu xa jechuk». Xi to chale: «Kʼalal ta jnopbe skʼoplal taje, chakʼ kil ti stsal kuʼun li prevaetik ta jnuptan avie. Kʼalal mi la jnopbe skʼoplal leʼ ta mas jelavele, chkakʼ venta ti lek ti la jpʼaj li prevae».