TEKSTOETIK TI CHAPBIL SMELOLALE
Numeros 6:24-26 | «Acʼo yacʼboxuc ep bendición li Mucʼul Diose, acʼo xchabioxuc»
«Akʼo yakʼbot bendision xchiʼuk akʼo xchabiot li Jeovae. Akʼo xojobajuk sat Jeova ta atojolal xchiʼuk lekuk xilot. Akʼo stoy sat ta atojolal li Jeovae xchiʼuk junuk avoʼonton yuʼun» (Numeros 6:24-26, Xchʼul Kʼop Dios sventa Achʼ Balumil).
«Acʼo yacʼboxuc ep bendición li Mucʼul Diose, acʼo xchabioxuc. Acʼo lecuc yiloxuc li Mucʼul Diose, xchiʼuc acʼo yacʼboxuc avilic slequil yoʼnton. Acʼo scʼanoxuc o li Mucʼul Diose; acʼo yacʼboxuc jun avoʼntonic’, ac’o xiicuc ta stojol li achi’iltaquique» (Números 6:24-26, Xchʼul Cʼop ti Jtotic Diose, ta skʼop Chenalhó).
Li kʼusi skʼan xal Numeros 6:24-26
Li kʼusi chal liʼe ojtikinbil kʼuchaʼal bendision chakʼ paleetik o bendision chakʼ Aaron, ti jaʼ li baʼyel mero bankilal pale ta Israele (Eksodo 28:1). Li bendision taje likem talel ta stojolal Dios (Numeros 6:22, 23). Li Jeovae xi laj yalbe li Moisese: «Xi xavalbe li Aaron xchiʼuk xnichʼnabtake: ‹Xi skʼan xavalik kʼalal chavakʼbeik bendision li jteklum Israele›». Vaʼun, jaʼ laj yal bal li kʼusi chal ta Numeros 6:24 kʼalal ta 26. Li paleetike chchʼunik li mantaletik yakʼoj Dios taje xchiʼuk chichʼbeik ta mukʼ li sbi Jeovae.a Li versikulo 27 xi to chale: «Sventa xkakʼbe bendision li jteklum Israele, skʼan staik ta alel jbi li Aaron xchiʼuk xnichʼnabtake».
«Akʼo yakʼbot bendision xchiʼuk akʼo xchabiot li Jeovae». Li Jeovae tskolta, tsbeiltas xchiʼuk chakʼbe bendision li yajtuneltak sventa lekuk xbat li xkuxlejalike (Proverbios 10:22). Li ta Numeros 6:24 kʼalal ta 26, jutuk mu skotoluk li Vivliaetik ta tsotsile chakʼ ta aʼiel ti jmoj o tsobol chakʼbe bendision li jteklume, pe li tsʼibetik ta orijinale jamal chal xtok ti ta jujuntal chakʼbe bendision li j˗israeletike.
«Akʼo xojobajuk sat Jeova ta atojolal xchiʼuk lekuk xilot». Kʼalal oy buchʼu tskʼanbe ti akʼo xojobajuk sat Jeova ta stojolale, yakal tskʼanbe ti akʼo lekuk x˗ilate.b Jech xtok, xuʼ xi chichʼ jelubtasele: «Akʼo lekuk xilot li mukʼul Diose» (Numeros 6:25). Li Jeovae chakʼbe ta ilel xkʼuxul yoʼonton xchiʼuk slekil yoʼonton ta stojolal li yajtuneltake (Isaias 30:18).
«Akʼo stoy sat ta atojolal li Jeovaec xchiʼuk junuk avoʼonton yuʼun». Kʼalal chal ti tstoy sat ta stojolal yajtuneltak li Jeovae, taje jaʼ skʼan xal ti ta slekil yoʼonton chchikinta li kʼusi chal li yajtuneltake xchiʼuk chakʼbe jun oʼontonal. Oy junantik vunetike chal ti kʼalal jun oʼontonal (shalom) xi li ta ebreoe, maʼuk noʼox skʼan xal ti chlaj skʼoplal li paskʼopetike, jaʼ skʼan xal xtok ti muʼyuk xa buchʼu ch˗ipaje, ti ch˗akʼbatik li kʼusitik chtun yuʼunik jujun kʼakʼale xchiʼuk ti chabibilik lek ta mantale.
Sventa staik bendision li j˗israeletike persa skʼan xchʼunbeik smantal li Jeovae (Levitiko 26:3-6, 9). Kʼalal jech ta spasike, li Jeova eke chakʼ onoʼox kʼotuk ta pasel li kʼusi yalojbe li steklumale, vaʼun tskolta. Taje jaʼ jech la spas kʼalal ajvalilaj li Salomon xchiʼuk li Esekiase (1 Reyes 4:20, 25; 2 Kronikas 31:9, 10).
Li yajtsʼaklomtak Kristoe maʼuk ti xcholet xa chalik batel li kʼusi laj yichʼ alel ta Numeros 6:24 kʼalal ta 26. Pe xuʼ me jtatik onoʼox ta alel kʼalal ta jkʼanbetik vokol Jeova sventa xchabi li yan yajtuneltake o kʼalal ta jpatbetik yoʼonton li yantike (1 Tesalonisenses 5:11, 25). Muʼyuk jelem˗o li Jeovae, yuʼun oy˗o ta yoʼonton chakʼbe bendision xchiʼuk chchabi li yajtuneltak ti tukʼ yakʼoj sbaike. Jaʼ yuʼun, li melel yajtsʼaklomtak Kristoe xuʼ staik li jun oʼontonale, yuʼun snaʼojik ti tstoy sat Jeova ta stojolalike, jaʼ xkaltik, ti lek ch˗ilatike.
Stsʼak loʼil ta Numeros 6:24-26
Li baʼyel lajuneb kapitulo li ta slivroal Numerose jaʼ te chakʼ ta ilel ti laj yakʼbe mantal li steklumal kʼalal jaʼo te oyik li ta stsʼel vits Sinaie. Ti kʼu sjalil te komike, li Jeovae la xchapan li steklumal sventa xkʼotik ta jun mukʼta jteklume xchiʼuk laj yakʼbe jayibuk mantaletik ti tun li ta trato la spas xchiʼuk li j˗israeletike.
Li Jeovae laj yalbe Moises ti jaʼ laj yichʼik biiltasel ta paleetik li Aaron xchiʼuk li xnichʼnabtak sventa xakʼbeik bendision li jteklume xchiʼuk laj yichʼik albel kʼu yelan skʼan spasik (Numeros 6:22, 23). Kʼalal biiltasbilik xa ox li Aaron xchiʼuk snitilultake, jaʼ la stunesik li kʼusi chal ta Numeros 6:24 kʼalal ta 26 sventa xakʼbeik bendision li jteklume. Pe ta tsʼakale, li paleetike naka xa noʼox la xchaʼalilanik kʼalal chakʼik li slajeb chikʼbil matanal ta templo jujun kʼakʼale.
Sventa xavaʼibe smelolal kʼusi chal li slivroal Numerose, kʼelo li video liʼe:
a Li sbi Dios li ta ebreoe Jeova chichʼ jelubtasel li ta tsotsile. Sventa xanaʼ kʼu yuʼun ep Vivliaetik muʼyuk stikʼojbeik li sbi Dios ti jaʼ noʼox chal Mukʼul Dios, xie. Kʼelo li mantal: «¿Buchʼu jaʼ li Jeovae?».
b Pe jech xtok un, li Vivliae chal ti la snakʼ sat Jeova ta stojolal li j˗israeletik kʼalal muʼyuk kʼusi lek tspasike (Isaias 59:2; Mikeas 3:4).
c Li Biblia de Estudio de la NVI (Nueva Versión Internacional) chal ti nopoltik noʼox xvinaj sbi Dios li ta versikuloetike, «jaʼ sventa xakʼbe yip li kʼusi chal ta versikulo 27». Akʼo mi jech, junantike chalik ti chakʼ la ta ilel ti jaʼ jun Trinidad li Dios kʼalal oxib to velta te xvinaj li sbie. Pe mu jechuk maʼ taje. Jun krixchano ti chchanbe skʼoplal Vivlia xchiʼuk ti xchʼunoj ta sventa Trinidade, xi chale: «Ti oxib to velta xvinaj li sbi Diose muʼyuk laj yakʼbe ta aʼiel pale ti jaʼ jun Trinidad li Diose, jech xtok li buchʼutik laj yichʼik li bendisione muʼyuk bu jech la staik ta nopel ek. Yuʼun jaʼ noʼox sventa masuk to kʼupil sba xkom xchiʼuk lekuk ta aʼiel li tekstoetike» (The Pulpit Commentary, volumen 2, pajina 52). Mi chakʼan to chanabe mas skʼoplale, kʼelo li mantal: «¿Mi jaʼ jun Trinidad li Diose?».