Jeremias 33:3 «Taun ta kʼoponel, vaʼun ta jtakʼbot»

«Taun ta kʼoponel, vaʼun ta jtakʼbot xchiʼuk chkalbot ta anil li kʼusitik mukʼtik skʼoplale xchiʼuk li kʼusitik vokol ta aʼiel ti mu to xanabe skʼoplale» (Jeremias 33:3, Xchʼul Kʼop Dios sventa Achʼ Balumil).

«Vocoletan ta jtojol vuʼun chajtacʼbot, chacacʼbot avil cʼusitic toj mucʼtic, cʼusi muʼyuc vinajem ti muʼyuc onoʼox jech aviloje» (Jeremias 33:3, Xchʼul Cʼop Jtotic Dios, ta skʼop Chenalhó).

Li kʼusi skʼan xal Jeremias 33:3

Li kʼusi laj yal Dios liʼe jaʼ sventa stijbe yoʼonton krixchanoetik ti akʼo spasik orasione. Mi jech la spasike, ch˗akʼbat snaʼik li kʼusitik chkʼot ta pasel ta jelavele.

«Taun ta kʼoponel, vaʼun ta jtakʼbot». Kʼalal chal «taun ta kʼoponel» xie, maʼuk skʼan xal ti jaʼ noʼox ta jtabetik ta albel sbi li Diose. Yuʼun jaʼ skʼan xal xtok ti ta jkʼopontik sventa jkʼanbetik koltael xchiʼuk beiltasele (Salmo 4:1; Jeremias 29:12).

Li kʼusi chal li teksto liʼe yikʼaluk van jaʼ laj yichʼik albel li jteklum Israel ta voʼnee. Yuʼun li j˗israeletike laj yiktaik xa ox li Diose xchiʼuk yakal tstsakatik ta kʼop yuʼun li soltaroetik ta Babiloniae (Jeremias 32:1, 2). Li Jeovaea laj yalanbe ti akʼo xnopajik ta stojolal yan veltae xchiʼuk ti skʼanbeik koltaele.

«Chkalbot ta anil li kʼusitik mukʼtik skʼoplale xchiʼuk li kʼusitik vokol ta aʼiel ti mu to xanabe skʼoplale». Li kʼusitik yaloj chalbutik Diose jaʼ li kʼusitik vokol ta aʼiele (o ti vokol ta naʼele), yuʼun ti muʼyukuk chalbutik li Diose muʼyuk bu chkaʼibetik skʼoplal ti jechuke. Kʼalal chal «li kʼusitik vokol ta aʼiel» xie, xuʼ xi chichʼ jelubtasel xtoke «cʼusi muʼyuc vinajem».

¿Kʼusi ti «muʼyuc vinajem» ti chakʼ ta naʼel Dios li vaʼ orae? Jaʼ li kʼusi chkʼot ta pasel ta tsʼakale, jaʼ xkaltik, ti chichʼ lajesel li jteklum Jerusalene xchiʼuk ti muʼyuk xa buchʼu te chnakie, pe ti chichʼ chaʼmeltsanel ta tsʼakale (Jeremias 30:1-3; 33:4, 7, 8). Pe li Diose laj yal xtok ti muʼyuk chchʼay skʼoplal li steklumale (Jeremias 32:36-38).

Stsʼak loʼil ta Jeremias 33:3

Li ta sjabilal 608 kʼalal muʼyuk toʼox talem Jesus xchiʼuk ti lajuneb xa ox jabil yakal ch˗ajvalilaj li Sedekiase, li j-alkʼop Jeremiase jaʼo albat yuʼun Jeova li kʼusi chal ta Jeremias 33:3. Li Jeremiase laj xa onoʼox yal ti Jerusalene ch˗och ta skʼob li jbabiloniaetike xchiʼuk ti chichʼ chukel batel li ajvalil Sedekiase. Ta skoj ti muʼyuk lek laj yaʼi li ajvalile, la stikʼ ta chukel li Jeremiase (Jeremias 32:1-5; 33:1; 37:21).

Kʼalal jaʼo jech yakal chkʼot ta pasele, li Diose laj yal li kʼusi chal ta Jeremias 33:3. Pe li ajvalil Sedekias xchiʼuk jutuk mu skotoluk li jteklume muʼyuk la staik ta kʼoponel li Jeovae xchiʼuk muʼyuk la saʼik. ¡Toj chopol ti jech-o la stoy sbaike! (Jeremias 7:26; 25:4). Jun jabil ta tsʼakale, lokʼ ta ajvalil li Sedekiase, laj yichʼ lajesel li Jerusalene xchiʼuk jutuk mu skotol li buchʼutik kuxul komike laj yichʼik chukel batel ta Babilonia (Jeremias 39:1-7).

Li kʼusi chal ta Jeremias 33:3 tsvules ta joltik ti Diose chakʼ kojtikintik lek ‹li kʼusi tskʼan yoʼontone› xchiʼuk chakʼ jnaʼtik li kʼusitik vokol ta aʼibel smelolal mi ta jchantik li Vivliae xchiʼuk mi ta jkʼanbetik koltael sventa xkaʼibetik smelolale (Kolosenses 1:9; 1 Korintios 2:10). Li kʼusitik vokol ta aʼibel smelolal chal Diose te skʼoplal li kʼusi tspas ta jelavele (Apokalipsis 21:3, 4).

Sventa xavaʼibe smelolal li kʼusi chal li slivroal Jeremiase, kʼelo li video liʼe: