Li asamblea rejionale ch˗echʼ ta radio xchiʼuk ta television

Stuk xa noʼox jech echʼ li asamblea rejional ta 2020. Jaʼ to sba velta laj yichʼ pasel gravar sventa skotol li krixchanoetik ta spʼejel balumile xchiʼuk xuʼ skʼelik li ta Internete. Akʼo mi jech, jutuk mu skotoluk li ermanoetik ta Malaui xchiʼuk ta Mozambiquee la skʼupinik ek li asamblea rejionale akʼo mi chʼabal s˗internetik. ¿Kʼuxi laj yutik taje?

Li Komite yuʼun Kordinadoretik xchiʼuk li Komite sventa Chanubtasel ti jaʼ ventainbil yuʼun li Jtsop Jbeiltasvaneje laj yalik ti xuʼ xjelav li asamblea rejional ta radio xchiʼuk ta television li ta Malaui xchiʼuk ta Mozambique. ¿Kʼu yuʼun ti jech kʼot ta nopel yuʼunike? Yuʼun li lum Malauie jaʼ jun lum ti bu mas toyol tajek stojol li Internet ta spʼejel balumile. Jaʼ yuʼun, jutuk noʼox li stestigotak Jeova ti oy s˗internetike. Xi chal li William Chumbi ti te chtun ta Komite sventa Betel ta Malauie: «Jaʼ noʼox ta radio xchiʼuk ta television xuʼ xaʼiik mantal li ermanoetike». Li Luka Sibeko ti te chtun ta Komite sventa Betel ta Malauie xi chal eke: «Ti manchukuk oy li radio xchiʼuk televisione, jutuk noʼox li ermanoetik ti la stabeik sbalil jechuk li asambleae». Jaʼtik jech li ta Mozambique eke. Jutuk noʼox li ermanoetik ti xuʼ xman yuʼunik li selular, tavleta o yan kʼusitike xchiʼuk mu xtoj yuʼunik li Internete.

¿Kʼuxi pas yuʼunik?

Ta skoj li coronaviruse, junantik estasionetik ta radio xchiʼuk junantik kanal ta televisione te xa onoʼox chjelav yuʼunik li tsobajeletik ta jujun xemanae.a Li ermanoetike laj yalbeik li yajval estasion ti akʼo x˗akʼbatik junchibuk mas ora sventa te x˗echʼ li asamblea rejionale.

Li ta Malauie jaʼtik jech tsnuptanik li ermanoetik eke. Li ta radio xchiʼuk ta televisione jaʼ noʼox jun ora xuʼ x˗akʼbat yetʼesik li kʼusi tskʼan chetʼesike, yuʼun tsvul yoʼontonik mi xchʼajubik li buchʼutik chchikintaik ta skoj ti toj jale. Akʼo mi jech, la xchapbeik smelolal ti tstabeik sbalil li jnaklejetike. Jech kʼuchaʼal liʼe, ta skoj ti mu to stakʼ xijlokʼkutike, laj yalbeik ti tskoltaik li krixchanoetik sventa xaʼiik li lekil aʼyej ta Vivliae. Taje jaʼ xuʼ xkoltaatik sventa xlekub stalelalik xchiʼuk ti xmuyubajikuk xchiʼuk li yutsʼ yalalike. Kʼalal la xchapbeik yajval estasion ti kʼusi sbalil tstabeike, akʼbatik junchib ora mas li ermanoetike.

Li ta Malauie laj yetʼesik asamblea rejional ta jun estasion ta radio xchiʼuk jun kanal ta television, yuʼun li estasion xchiʼuk li television taje ta smiyonal xa noʼox krixchanoetik ta xchikintaik xchiʼuk ta skʼelik li ta Malauie. Li ta Mozambiquee oy 85 estasion ta radio xchiʼuk jun kanal ta television ti te jelav li asambleae.

¿Kʼu yepal laj takʼin sventa xichʼ jelubtasel ta television li asamblea rejionale? Laj 28,227 dólarb (tetik van oʼlol miyon li ta jtakʼintike.) Ti kʼu yepal laj takʼin sventa xichʼ jelubtasel ta radio li asamblea rejional ta chib lumetike, jaʼ jutuk mu laj 20 mil dólar (jutuk mu oʼloluk miyon li ta jtakʼintike). Ti kʼu yepal chichʼ tojel li estasion ta radioe jelajtik, jaʼ ti kʼu smukʼul bu kʼalal smakoje. Mi muʼyuk mas nom bu chkʼot li estasione, chichʼ tojel 15 dólar (te van oxib sien li ta jtakʼintike). Yan mi chkʼot ta sjunul li lume jaʼ chichʼ tojel 2,777 dólar (te van mas ta 50 mil li ta jtakʼintike).

Li kermanotaktike lek tajek ti kʼu yelan tstunesik li matanal takʼine. Jech kʼuchaʼal liʼe, li ta Malauie lek noʼox sba ti kʼu yepal kʼanbatik stojol li estasionetike. Jun veltae, yalesbatik 30 %. Koliyal taje muʼyuk xichʼ lajesel 1,711 dólar (tetik van 30 mil li ta jtakʼintike). Junantik estasionetik ta Mozambiquee la syalesbeik stojol ta skoj ti lek tsʼakal snaʼ stojik li stestigotak Jeovae xchiʼuk ti ta yorail ta xakʼike.

Tstojik ta vokol li ermanoetike

Tstojik tajek ta vokol li kermanotaktik ti la xchikintaik li asamblea ta radio xchiʼuk ti la skʼelik ta televisione. Xi chal jun mol ta tsobobbail ta Malaui ti Patrick sbie: «Ta jtojbekutik tajek ta vokol li Jtsop Jbeiltasvanej ti laj yakʼ kaʼikutik jech li asamblea kʼalal jaʼo yakal li chamele». Xi chal yan ermano ta Malaui ti Isaac sbie: «Chʼabal kʼusi yan kuʼunkutik. Jaʼ noʼox xuʼ te xkaʼikutik ta radio li asamblea rejionale, ta jtojkutik tajek ta vokol. Jaʼ jun matanal ti stuk xa noʼox jech laj yakʼbunkutik li s-organisasion Jeovae. Koliyal taje, sjunul li kutsʼ kalale la stabeik sbalil. Jpʼel ta koʼontonkutik ti skʼanoj tajek steklumal li Jeovae».

Xi laj yal jun jcholmantal ta Mozambique ti sba to velta echʼ yuʼun li asamblea rejional ta 2020: «Kʼalal laj kil li asamblea ta telee la svules ta jol ti Jeova Diose jaʼ li Buchʼu skotol xuʼ yuʼune. Akʼo mi oy chamel, li Jeovae laj yakʼbunkutik tal li veʼlil ta mantale xchiʼuk liʼ tal yakʼbunkutik liʼ ta jnakutike. Jamal laj kil ti skʼanoj sbaik li yajtuneltak Jeovae xchiʼuk jchʼunoj ta melel ti jaʼ melel relijion liʼe».

Xi chal jun mol ta tsobobbail ti Wyson sbie: «Ta jtojbe tajek ta vokol li tukʼil mosoil ti oyunkutik tajek ta yoʼonton kʼalal jaʼo xyaket li chamele. Chʼabal kʼusi mas x˗ayan kuʼunkutik xchiʼuk liʼ nakalunkutik ti bu povreik tajeke. Pe koliyal ti echʼ ta radio xchiʼuk ta television li asambleae, la jkʼupinkutik tajek xchiʼuk la jtabekutik ep sbalil».

Li Komite yuʼun Kordinadoretik xchiʼuk li Komite sventa Chanubtasele laj yalik ti ch˗echʼ ta radio xchiʼuk ta television li asamblea rejional ta 2021 ta junantik lumetike. ¿Bu tstabeik stojol ti jech chetʼesik li asamblea rejionale? Koliyal li matanal takʼin chichʼ akʼel li ta abtelal ta spʼejel balumil ti ep ta tos kʼuxi chichʼ akʼel li ta donate.jw.org. Kolavalik tajek ti chavakʼik li matanal takʼine.