Kansionetik ti tsnopajesutik ta stojolal Diose

Li musikae jaʼ matanal yakʼojbutik li Jeovae, yuʼun tskoltautik sventa lekuk noʼox kʼusi jnoptik, ti xijmuyubajuk noʼoxe xchiʼuk ti oyuk kʼusi stij koʼontontike. Jaʼ jech ta jtabetik sbalil ek li kansionetik ti chlokʼ ta JW Broadcasting®. Yuʼun tsnopajesutik ta stojolal Jeova.

Li ta 2014 kʼalal to avie, lokʼem xa mas ta 70 kansionetik. ¡Li june oy xa mas ta voʼob sien jeltos kʼopetik! Xuʼ van xi chanope: «¿Buchʼutik tspasik li kansionetike xchiʼuk kʼu yelan tspasik?».

Ti kʼu yelan chichʼ pasele

Li Departamento de Servicios de Audio y Videoe jaʼ sbainojik spasel li kansionetik sventa Broadcasting xchiʼuk li yan kansionetike. Pe jaʼ oy ta sba skʼelel li Komite sventa Chanubtasel yuʼun Jtsop Jbeiltasvaneje. Te van 13 ermanoetik xchiʼuk ermanaetik ti jaʼ sbainojik spasel li kansionetike, jaʼ tstsʼibabeik sletrail, tskʼelik sonido xchiʼuk yan kʼusitik. Li Komite sventa Chanubtasele tstunes ermanoetik ti te chkoltavan tal ta snaik sventa skolta sbaik spasel li kansionetike. Jlome tstsʼibabeik sletrail li kansionetike, yantike chkʼejinik, jlom xtoke tstijik li stijobiltak sonetike. Li ermanoetik taje muʼyuk tskʼanik ichʼel ta mukʼ ta skoj ti lek xtojobike.

¿Kʼu yelan chichʼ pasel li kansionetike? Li Komite sventa Chanubtasele jaʼ tstʼujik junuk loʼil ta Vivlia ti jaʼ te tslokʼesik tal li kansionetike xchiʼuk tskʼelik kʼuxi xuʼ xkʼot ta koʼontontik. Li 13 ermanoetik ti jaʼ sbainojik spasel li kansionetike jaʼ tstʼujik buchʼu tskʼel lek kʼu yelan chkom li kansionetike xchiʼuk ti buchʼu tstsʼibae. Laje tspasik gravar. Vaʼun li Komite sventa Chanubtasele jaʼ chal mi oy to kʼusi skʼan tukʼibtasel. Li buchʼutik sbainojik spasel li kansione tskʼelik mi oy to bu skʼan tukʼibtasel, laje tspasik gravar yan velta. Li kansionetike tspasik gravar ta Betel o ta sna stukik li ermanoetik ti muʼyuk te oyik ta Betele.

Kʼalal tspasik kansionetik li ermanoetike, ep ta tos programaetik skʼan stunesik. Jech xtok, tstunesik stijobiltak son, mikrofonoetik xchiʼuk yan aparatoetik sventa spasik li kansionetike. Li stojol jujun mikrofonoetike te van chaʼmil o 20 mil. Li ta 2020, te van chib miyon 320 mil takʼin laj li ta aparatoetik sventa musikae.

¿Kʼuxi tspasik sventa mu slajesik ep takʼine? Li kʼusi tspasike jaʼ ti maʼuk noʼox tstunesik li ermanoetik ti te chtunik ta Betele, yuʼun tstunesik ermanoetik xtok ti ta sna to chkoltavanik tale. Pe maʼuk noʼox, yuʼun li jtijsonetike mu xa persauk tstsob sbaik sventa xichʼik pasel gravare, yuʼun ta komputadora xa noʼox chichʼ pasel.

«Li kansionetike tstsatsubtas xchʼunel koʼonton»

Li ermanoetike lek tajek chaʼiik xchikintael li kansionetike. Li Tara ti likem ta Alemaniae xi chale: «Li kansionetike ep tajek skoltaojun kʼalal ta jvul tajek koʼontone. Kʼalal chkaʼi ta jkʼop jtuke, xkoʼolaj ti tsmeyun chkaʼi li Jeovae». Xi chal Dmitry ti te nakal ta Kazajistáne: «Ta jkʼupin tajek xchikintael li kansionetike, yuʼun mu persauk jkʼelbe li sletraile, yuʼun jnaʼoj ti te lokʼem ta Vivliae. Jech xtok, tskoltaun yoʼ jaʼuk xkakʼ ta koʼonton li kʼusitik sventa mantale».

Li Delia ti likem ta Sudáfrica chal kaʼitik kʼu yelan chaʼi sba kʼalal chchikinta li kansionetike: «Li kansionetike tstsatsubtas xchʼunel koʼonton. Kʼalal chkat koʼonton o kʼalal oy jvokoltake, oy onoʼox junuk kansion ti tspatbun koʼontone. Bakʼintike, ¡akʼo mi jaʼ noʼox chkaʼibe li sonale, lek xa chkaʼi jba yuʼun!».

Ep tajek buchʼu tskʼupinik li kansionetik liʼe. Li Lerato ti likem ta Sudáfrica eke xi chale: «Li kansionetik Poʼot xa xtal xchiʼuk Poʼot xa xtal li achʼ balumile tskoltaun, yuʼun te xa jkʼeloj yaʼel chchaʼkuxi tal li jmeʼ ta achʼ balumile. Kʼalal ta jchikinta jujun velta li kansionetike, xkoʼolaj ti chbat xa jmey chkil li jmeʼe».

Jun tseb ta Sri Lanka koltaatem yuʼun jun kansion. Xi chale: «Li jmaestra ta siensiae laj yakʼun ta kʼexlal ta sat jchiʼiltak ta chanun ta skoj ti jaʼun stestigoun Jeovae. Lixiʼ tajek, yuʼun mu jnaʼ kʼusi chkal laj kaʼi. Kʼalal likʼot ta jnae, li jmeʼe laj yalbun ti akʼo jchikinta li kansion Fuerte tú serás. Li kansione te laj yakʼ kil ti skʼan jchapan jba sventa jnaʼuk kʼusi jtakʼbe li jmaestrae. Ta yokʼomale la jchiʼin ta loʼil li jmaestrae, vaʼun laj yalbun ti mas xa xaʼibe smelolal li kʼusi jchʼunoje. Ta jtojbe tajek ta vokol Jeova ti toj kʼupilik sba li kansionetik tslokʼes s˗organisasione».

¿Bu chichʼ tael takʼin yoʼ xichʼ pasel li kansionetik taje? Jaʼ li matanal takʼin chavakʼik ta sventa li abtelal ta spʼejel balumil li ta donate.jw.org. Kolavalik tajek ti ta sjunul avoʼontonik chavakʼike.