Li Jeovae muʼyuk chchʼay ta yoʼonton li buchʼutik makal xchikinike

Li Jeovae oy ta yoʼonton ti xkojtikin jkotoltike, mu ventauk ti kʼu yelan jkuxlejaltike (1 Timoteo 2:3, 4). Li stestigotak Jeovae tspasik Vivliaetik xchiʼuk yan vunetik sventa xkojtikintik, ti te tsakal skʼoplal li buchʼutik makal xchikinike. Jaʼ jech, li j-organisasiontike slokʼesoj ta smilal xa noʼox videoetik ta mas ta sien jeltos senya kʼopetik.a ¿Kʼuxi chichʼ pasel xchiʼuk chichʼ pukel li videoetik taje? ¿Kʼuxi lekubem talel li abtelal taje?

¿Kʼuxi chichʼ pasel li videoetik ta senya kʼope?

Oy jelubtasej kʼopetik ta spʼejel balumil ta jeltos senya kʼopetik. Kʼalal chichʼ jelubtasel junuk mantal ta senya kʼope, baʼyel chaʼibeik lek smelolal li mantal tsjelubtasike. Vaʼun, tsnopik lek kʼuxi xu sjelubtasik li ta senya kʼope, laj une tspasik gravar ta video. Avie, oy 60 jeltos senya kʼopetik yakal chichʼ jelubtasel ta videoetik sventa xichʼ chanel li Vivliae. Oy to yan 40 jeltos senya kʼopetik ti bakʼintik chichʼ pasele.

Kʼalal chichʼ pasel videoetik ta senya kʼop ta voʼnee, toj toyol toʼox stojol chlokʼ. Li kamara xchiʼuk yan kʼusitik chtune toj toyol stojol. Jech xtok, ta jun estudio toʼox chichʼ pasel gravar. Bakʼintike, jaʼ to chichʼ vaʼanel, yantik veltae skʼan achʼubtasel. Jaʼ yuʼun, sventa chapal xkom ti bu chichʼ jelubtasel ta senya kʼope, chlaj mas ta 30 mil dolar.b

Sventa lekuk xichʼ tunesel li matanal takʼine, li j-organisasiontike saʼojbe lek smelolal kʼuxi xuʼ mas yalel xlokʼ kʼalal chichʼ jelubtasel ta senya kʼope. Jaʼ yuʼun, jaʼ ta jtunestik li kʼusi mas achʼike, li kʼusi mas yalelike xchiʼuk ti jtunelike. Avie, muʼyuk xa ta jtunestik li estudio sventa gravasione. Jujun ekipo ti tsjelubtas li videoetik ta senya kʼope, xuʼ spas ta s-ofisinaik ti tstunesik fondo verde o cromae. Kʼalal oy jayvoʼ ermanoetik chvinaj li ta videoe, xuʼ spas gravar ta s-ofisinaik ta jujuntal o li ta snaike.

Jech xtok, yichʼoj pasel programaetik ta komputadora sventa xichʼ jelubtasel li vunetik ta yan kʼope. Koliyal taje, j-oʼlol to sjalil tsul ti kʼu sjalil chichʼ jelubtasel ta senya kʼope. Tstojik tajek ta vokol ermanoetik taje. Xi laj yal jun ermano ti Alexander sbie: «Ximuyubaj tajek, yuʼun nopajtik xa chlokʼ li videoetik ta senya kʼope. Jujun kʼakʼal ta jkʼel junuk video».

Avie, sventa xichʼ chapanel ti bu chichʼ jelubtasel ta senya kʼope, mu sta 5 mil dolar chichʼ. Jaʼ yuʼun, mas xa ep videoetik chichʼ pasel ta jeltos senya kʼopetik.

¿Kʼuxi chichʼ pukel li videoetik ta senya kʼope?

Mi laj yichʼ pasel gravar junuk videoe, skʼan xichʼ takbel batel li buchʼu chtun yuʼune. Ta voʼone toʼoxe, li gravasionetike chichʼ takel batel ta jun empresa sventa spas ta videoetik xchiʼuk ta DVD, laje chichʼ takel batel ta tsobobbailetik. Pe sventa xichʼ pasel taje, toj jal chichʼ, toj ep abtel xchiʼuk ep takʼin chlaj. Jaʼ noʼox li ta sjabilal 2013, laj mas ta 2 miyon dolar sventa xichʼ pasel DVD ta senya kʼop.

Xmuyubajik tajek li buchʼu makal xchikinik kʼalal laj yilik li videoetik taje. Pe taje, mu kʼunuk ta tunesel, mas to kʼalal yantik x-epaj batel li sintaetik xchiʼuk DVD. Bateltike, kʼalal chichʼ pasel gravar jlikuk slivroal Vivliae, tsmak jayibuk DVD. Xi chvul ta sjol jun ermano ta Brasil ti Gilnei sbie: «Kʼalal ta jkʼan ta jkʼelkutik junuk tekstoe, skʼan jsaʼkutik bu videoal oy, laj une ta jsaʼkutik li versikuloe, toj vokol toʼox ta saʼel». Xi chal jun ermana ti Rafayane sbi ti tstunes toʼox li DVD ta senya kʼope: «Tsots tajek kʼalal ta jchan Jvivliae, jal chichʼ kuʼun sventa jsaʼ li tekstoe xchiʼuk li referensiaetike». Sventa xichʼ cholel mantale, li ermanoetike skʼan xkuchik batel jayibuk DVD xchiʼuk sintaetik sventa xakʼbeik yil ta stelevision li buchʼutik oy ta yoʼontonik mantale. Jlome chkuchik batel li stijobil DVD. Laje lik lokʼuk tal li stijobil DVD ti oy spantayaile xchiʼuk ti stakʼ kuchele, taje mas xa kʼun ta tunesel. Xi chal li Bobby ti te nakal ta Estados Unidose: «Mi laj xa ox kakʼtik ta ilel junuk teksto, pe ti ta jkʼan chkakʼtik ta ilel yane, ta yan xa DVD ta jsaʼtik tal. Ta skoj ti toj jal chichʼe, vokol chkaʼitik ta yakʼel ta ilel kʼusi chal Vivlia li ta cholmantale».

Li ta 2013, li s-organisasion Jeovae la slokʼes jun aplikasion, jaʼ sbi JW Library Sign Language. Xuʼ te syalesik ermanoetik li videoetik ta senya kʼop xchiʼuk ti xakʼik ta ilel ta selularik o ta stavletike. Ta slikebale jaʼ to noʼox oy ta senya kʼop ta Estados Unidos, pe li ta 2017 laj yichʼ achʼubtasel sventa stunesik li jeltos senya kʼopetike. Xmuyubajik tajek li ermanoetike. Xi chal jun ermano ta Brasil ti jaʼ sbi Juscelinoe: «Solel mu jchʼun laj kaʼi, la jnopilan tajek ti solel skʼanojunkutik li Jtsop Jbeiltasvanej li buchʼutik makal jchikinkutike xchiʼuk ti tskʼan ti xichʼikutik ta mantal kʼuchaʼal li yan ermanoetike. Kʼalal lokʼ li aplikasione, ximuyubaj tajek xchiʼuk mas to oy tajek ta koʼonton laj kaʼi xchanel li Vivliae».

Avie, skotol li videoetik chichʼ pasel ta senya kʼope, xuʼ xichʼ kʼelel ta selular o ta tavlet, te chichʼ akʼel ta ilel ta jpajinatik ta Internet xchiʼuk li ta aplikasion JW Library Sign Language. Koliyal taje, uni jayib xa noʼox kʼakʼal chichʼ jelubtasel, spasel gravar xchiʼuk spukel li videoetik ta senya kʼope, muʼyuk xa chjalij jayibuk u o jabiletik. Jech, ep videoetik ta senya kʼopetike jmoj chlokʼ xchiʼuk li vunetik ta yantik kʼope.

Kʼelavil kʼusi chal jlom ermanoetik ti makal xchikinike. Xi chal jun ermana ti Klízia sbie: «¿Kʼusi organisasional ti oy tajek ta yoʼonton li buchʼutik makal xchikinik sventa xakʼbe li sveʼelik ta mantal ti kʼun tajek ta taele? Muʼyuk buchʼu yan ti jech tspas ta jtojolalkutik jech kʼuchaʼal li s-organisasion Jeovae». Xi chal li Vladimire: «Li videoetike chakʼbun kil ti parejo skʼanojan Jeova li buchʼutik jamal o makal xchikinike».

Ep li ta videoetik ta senya kʼope, xi chale: «Li spukel vun liʼe jaʼ jtos abtelal sventa chanubtasel ta Vivlia ta spʼejel balumil ti ta matanal takʼin chichʼ pasele». Ta jtojkutik ta vokol li matanal takʼin chavakʼike. Ep ta veltae, jaʼ te chichʼ akʼel li ta donate.jw.org. Li matanal takʼin liʼe, chichʼ tunesel sventa xichʼ pasel Vivliaetik xchiʼuk yan vunetik ta jeltos kʼopetik, ti te tsakal skʼoplal li senya kʼopetike.