Jamaluk me ta aʼibel smelolal li kʼusi chavale

MU ME jecheʼuk noʼox ep kʼusitik xaval, skʼan me stabeik sbalil li buchʼutik chchikintaike. Lek me xatojob ta kʼopojel mi jech chapase, vaʼun tstabeik sbalil li buchʼutik te ta tsobobbaile xchiʼuk li yan krixchanoetike.

Ep kʼusitik smakojbe skʼoplal kʼalal jamal ta aʼibel smelolal li kʼusi chkaltike. Junantike te chalbe skʼoplal ta xchanobil 26, «Xcholetuk xaval batel li mantale», yantik xtoke te chalbe skʼoplal ta xchanobil 30, «Oyuk ta avoʼonton li buchʼu chchikintaike». Li ta xchanobil liʼe ta jkʼeltik to batel jaytosuk skʼoplal.

Kʼunuk ta aʼibel smelolal li kʼusi chkaltike xchiʼuk ti kʼu yelan chkaltike. Mi kʼun ta aʼibel smelolal li kʼusi chkaltike xchiʼuk mi komik noʼox li orasion ta jtunestike, mas me lek xijtojob ta kʼopojel un bi. Li ta Mantaletik ta Vits laj yal Jesuse te chakʼ jchantik ti skʼan jamaluk ta aʼibel smelolal li kʼusi chkaltike, mu ventauk buchʼutik xchiʼuk bu likemik tal. Xuʼ van muʼyuk toʼox bu yaʼiojbeik skʼoplal li kʼusi laj yal Jesuse, pe laj yaʼibeik smelolal ta skoj ti jaʼ laj yal li kʼusi ta jnuptantik jujun kʼakʼale, jech kʼuchaʼal liʼe: kʼuxi xuʼ xijmuyubaj, kʼuxi xuʼ lek xkil jbatik xchiʼuk li yantike, kʼusi xuʼ jpastik kʼalal ta jvul koʼontontike xchiʼuk kʼuxi oyuk smelolal li jkuxlejaltike. Jech xtok kʼupil sba ti kʼu yelan laj yale xchiʼuk kʼun ta aʼibel smelolal (Mat., kap. 5-7). Akʼo mi jech, li ta Vivliae chata ep ta tos ti kʼu snatil li jujun orasione xchiʼuk ti jelajtik kʼu yelan cholbile. Pe teuk me ta ajol li kʼusi mas tsots skʼoplale, jaʼ ti jamaluk xchiʼuk kʼunuk ta aʼibel smelolal li kʼusi chavale.

Mi kʼun ta aʼiel li kʼusi chkaltike, mas me jamal ta aʼibel smelolal akʼo mi jaʼ li chanubtaseletik ti tsotsik ta chanele. ¿Kʼusi xuʼ jpastik sventa kʼunuk ta aʼibel smelolal li kʼusi chkaltike? Jaʼ noʼox alo li kʼusitik jtunelike. Chapano xtok li kʼusitik mu masuk tsotsik skʼoplal yoʼ snit sba xchiʼuk li kʼusitik mas tsotsik skʼoplale. Mu me aniluk xavalbe skʼoplal li jujun tekstoe, jaʼ lek tʼujo li bu mas jtunelike, vaʼun chano xchiʼuk albo lek smelolal. Mu me epuk kʼusitik xaval, yuʼun xuʼ xchʼaybe sbalil li kʼusitik mas tsotsik skʼoplale.

Jech xapas xtok kʼalal chavakʼ estudioe. Mu xavalbe skʼoplal skotol li kʼusi smakoje. Jaʼ mas lek ti jaʼ noʼox xavalbe li kʼusitik mas tsotsik skʼoplale, yuʼun te to onoʼox chchan ta jelavel kʼalal chchan Svivlia stuke xchiʼuk kʼalal chbat ta tsobajele.

Skʼan me lek xachapan aba sventa kʼun ta aʼibel smelolal kʼalal chachanubtasvane. Jech xtok, mi chakʼan ti akʼo jamal xaʼibeik smelolal yantik kʼalal chachanubtasvane, baʼyel skʼan lek xavaʼibe smelolal li voʼote. Yuʼun kʼalal oy kʼusi lek chkaʼibetik smelolale, xuʼ xkalbetik srasonaltak ti kʼu yuʼun jech chkaltike xchiʼuk xuʼ xkal ta jkʼop jtuktik.

Albo smelolal li jaypʼel kʼop ti mu masuk tstunesike. Bakʼintike skʼan van xavalbe smelolal jaypʼeluk kʼop ti mu masuk tstunesike. Mu me xanop ti snaʼojik xa onoʼoxe, pe mu xanop xtok ti mu kʼusi snaʼike. Ta skoj ti achanoj xa li Vivliae, xuʼ van chatunes jaypʼel kʼop ti mu masuk tstunesik li yantike. Mi muʼyuk chavalbe smelolale, li buchʼutik mu xojtikinik lek stestigotak Jeovae xuʼ van mu xaʼibeik smelolal ti jaʼ skʼoplal krixchanoetik li jaypʼel kʼop liʼe: «Kʼuk yepalik», «Tukʼil xchiʼuk pʼijil mosoil», «Yan jchijtak» xchiʼuk «Epal krixchanoetik» (Rom. 11:5; Mat. 24:45; Juan 10:16; Apok. 7:9). Jech xtok, mi mu xojtikinik lek li s-organisasion stestigotak Jeovae, xuʼ van mu snabeik smelolal kʼusi jaʼ li jun «jcholmantale», li «prekursore», li «jkʼelvanej ta sirkuitoe» xchiʼuk li «Snaʼobil slajel Kristoe».

Skʼan onoʼox albel smelolal xtok jaypʼeluk kʼop ta Vivlia ti tstunesik li buchʼutik maʼuk stestigotak Jeovae. Yuʼun jlom krixchanoetike tsnopik ti jaʼ jun mukʼta paskʼop tspas krixchanoetik li Armajedone. Jech xtok, tsnopik ti oy ta koʼontontik o jaʼ vinajel li «Ajvalilal yuʼun Diose», pe muʼyuk tsnopik ti jaʼ jun batsʼi ajvalilale. Junantik xtoke ta sventa li jpʼel kʼop «chʼulelal» xie, jaʼ chtal ta sjolik li kʼusi mu xvinaj ta kʼelel ti kuxul la chkom kʼalal chcham jun krixchanoe. Ta smiyonal noʼox krixchanoetike chanubtasbilik ti jaʼ jun dios li «chʼul espiritue» xchiʼuk ti jaʼ la jun Trinidade. Jech xtok, ta skoj ti muʼyuk xa stsakojik ta mukʼ li mantaletik ta Vivliae, skʼanik van albel smelolal li mantal ta Vivlia liʼe: «¡Jatavanik lokʼel ta stojolal li mulivajele!» (1 Kor. 6:18).

Li buchʼutik muʼyuk nopem xaʼiik skʼelel li Vivliae xuʼ van mu xaʼibeik smelolal mi xi noʼox chavale: «Xi la stsʼiba li Pabloe...» o «Xi laj yal li Lukase...», yuʼun xuʼ van oy yamigoik o slakʼnaik ti jech sbiike. Jaʼ yuʼun skʼan jamal xaval ti jaʼ jun yajtakbol Kristoe o ti jaʼ jun jtsʼibajom ta Vivliae.

Akʼo mi xojtikinik lek li spʼisobiltak tstunes Jvivliatik ta tsotsil li krixchanoetik avi kʼakʼale, xuʼ to onoʼox xakolta yoʼ xaʼibeik lek smelolal ti kʼutik smukʼule. Jech kʼuchaʼal li arka la spas Noe ti 135 metro snatile, ti 22.5 metro sjamleje xchiʼuk ti 13.5 metro stayleje (Gén. 6:15). Pe mi chatunes skoʼoltasobil ti xojtikinik lek li krixchanoetike, mas to me tsnaʼik ti kʼu smukʼul ta melele.

Albo lek smelolal jaʼ to ti kʼuxi xaʼiik leke. Mu van baluk noʼox ti chkalbetik skʼoplal kʼusi skʼan xal jpʼeluk kʼop sventa jambetik smelolal li kʼusi yakal chkaltike. Li ta Jerusalen ta skʼakʼalil Esdrase maʼuk noʼox tskʼelik o chaptaik li Mantaletike, chalbeik smelolal xtok. Yoʼ xaʼibeik lek smelolal li j-israeletike, li jlevietike jaʼ tsjambeik smelolal xchiʼuk jaʼ chalik kʼuxi xuʼ xakʼ ta xkuxlejalik li vaʼ kʼakʼale (Neh. 8:7, 12). Chanbo stalelal li jlevietike, jaʼ yuʼun chʼakbo lek yorail sventa chavalbe smelolal li teksto chakʼele xchiʼuk akʼbo yilik kʼuxi xuʼ xakʼ ta xkuxlejalik.

Kʼalal chaʼkuxiem xaʼox li Jesuse, laj yalbe yajtsʼaklomtak ti skotol li kʼusitik chkʼot ta pasele jaʼ skʼoteb ta pasel li albil kʼopetik ta Vivliae. Jech xtok laj yalbe skʼoplal kʼusi sbainojik ta skoj ti laj yilik li kʼusitik kʼot ta pasele (Luk. 24:44-48). Kʼalal chkalbetik yantik kʼuxi xuʼ stabeik sbalil ta xkuxlejalik li kʼusi chkakʼbetik xchanike, mas me kʼun chaʼibeik-o smelolal.

Tsots me skʼoplal mi oy ta yoʼontonik li mantale. Oy yantik kʼusitik smakojbe skʼoplal mi chaʼibe o mi muʼyuk chaʼibe smelolal li jun krixchanoe, yuʼun maʼuk noʼox ti lek jamal chavalbe skʼoplal li kʼusi chavale. Mi muʼyuk ta yoʼonton mantal li jun krixchanoe, muʼyuk me chaʼibe smelolal kʼalal ta jchanubtastike (Mat. 13:13-15). Jech xtok, li buchʼutik maʼuk smantal Dios chilik li kʼusitik chal Vivliae, muʼyuk sbalil chilik li mantaletike (1 Kor. 2:14). Mi jech chkʼot ta pasele, jaʼ mas lek ti te noʼox kʼalal xatsutses aloʼile.

Bakʼintik li junantik krixchanoetike muʼyuk ta yoʼontonik mantal ta skoj ti yiloj svokolike, jaʼ yuʼun mi chchikintaik kʼuk sjalile, xuʼ van lek xa chaʼiik li kʼusitik melel ta Vivliae. Kʼalal laj yal ti chichʼ tsitsel li Jesuse xchiʼuk ti chichʼ milele, muʼyuk laj yaʼibeik smelolal li yajchankʼoptake. ¿Kʼu yuʼun? Yuʼun muʼyuk snopojik ti jech chkʼot ta pasele xchiʼuk muʼyuk ta yoʼontonik ti jech chil svokole (Luk. 18:31-34). Akʼo mi jech, li buluchvoʼ jtakboletike laj yaʼibeik smelolal ta jelavel, maʼuk noʼox taje, yuʼun laj yakʼ ta xkuxlejalik xtok ti kʼu yelan chanubtasatik yuʼun li Jesuse.

Tsots me skʼoplal ti kʼu yelan jtalelaltike. Maʼuk noʼox me xuʼ xaʼibeik-o smelolal jloʼiltik mi lek jamal chkalbetik smelolale, tsots me skʼoplal xtok ti kʼu yelan li jtalelaltike. Li kʼusi xvul ta sjol epal krixchanoetik kʼalal ayik ta sba velta li ta Salon sventa Tsobobbaile jaʼ ti skʼanoj sbaik li buchʼutik te oyike, maʼuk li kʼusi laj yakʼik ta chanele. Jech xtok, epal krixchanoetike sjeloj li kʼusi chopol tsnopik ta jtojolaltik ta skoj ti xijmuyubaj noʼoxe xchiʼuk chchikintaik xa li kʼusitik melel chal Vivliae. Junantik li krixchanoetik taje, chalik ti oyik ta melel relijion li stestigotak Jeovae, yuʼun laj yakʼik venta ti skʼanoj sbaik ta jujuntal li yajtuneltak Diose xchiʼuk ti tskolta sbaik kʼalal oy svokolike. Jaʼ yuʼun, kʼalal chakolta li krixchanoetik ta yaʼibel smelolal li kʼusitik melel chal Vivliae, akʼo venta ti kʼu yelan chavalbe smelolale xchiʼuk ti kʼu yelan atalelale.