Tuneso Vivlia kʼalal oy kʼusi chajakʼbate

KʼALAL oy buchʼu tskʼan tsnaʼ li kʼusi jchʼunojtike, ti kʼu yuʼun jelel li jkuxlejaltike, li kʼusi jpatoj-o koʼontontike, ti kʼu yelan chkiltik li kʼusi chkʼotanuk ta pasele, chkakʼtik persa ti jtakʼbetik ta Vivliae. ¿Kʼu yuʼun? Yuʼun jaʼ Skʼop Dios, jaʼ te chal li kʼusi jchʼunojtike xchiʼuk jaʼ te chal ti kʼu yelan skʼan xijkuxie. Jaʼ tskoltautik ta yaʼibel smelolal xtok li kʼusitik yakal chkʼot ta pasel ta spʼejel Balumile. Jpatoj lek koʼontontik ta sventa li kʼusi yaloj tspas Dios ti te chal ta Vivliae (2 Tim. 3:16, 17).

Jnaʼojtik lek kʼusi oy ta jbatik ta skoj ti stestigoutik Jeovae (Is. 43:12). Jaʼ yuʼun maʼuk ta jpʼijil noʼox jtuktik li kʼusi chkaltike, jaʼ chkaltik li kʼusi chal ta Skʼop Jeovae. Manchuk mi oy kʼusi jelel ta jnoptik ta jujuntal, tskoltautik onoʼox Vivlia sventa sbeiltasutik ta sventa li kʼusi ta jnoptike, yuʼun jchʼunojtik ti melel li kʼusi chale. Li Vivliae chakʼ jnop jtuktik jlomuk ta sventa li kʼusi lek chkiltike. Jaʼ yuʼun skʼan me jkʼel jbatik ti maʼukuk xkalbetik yantik li kʼusi ta jnoptike, jaʼ oy ta koʼontontik ti xkakʼbetik yil li beiltaseletik ta Vivlia sventa xuʼ snop stukik ek. Jech kʼuchaʼal li jtakbol Pabloe oy ta koʼontontik ti «xichʼ chʼunel mantal ta sventa li xchʼunel oʼontonale» (Rom. 16:26).

Ta Apokalipsis 3:14 te chichʼ albel skʼoplal ti Jesukristoe jaʼ li «tukʼil testigoe xchiʼuk ti melele». ¿Kʼu yelan tstakʼ kʼalal oy kʼusi chjakʼbate xchiʼuk kʼusi tspas kʼalal oy kʼusi tsnuptane? Bakʼintike tstunes lokʼolkʼopetik sventa chakʼbe snop stukik. Bakʼintik xtoke tsjakʼbe kʼusi tsnop ta sventa junuk teksto li buchʼu oy kʼusi chjakʼbate, junantik velta xtoke jaʼ jech chal ti kʼu yelan tsʼibabil ta Vivliae o jaʼ noʼox chalbe skʼoplal li tekstoe (Mat. 4:3-10; 12:1-8; Luk. 10:25-28; 17:32). Li ta baʼyel sigloe te toʼox chichʼ kʼejel li balbalvunetik li ta nail tsobobbailetike. Muʼyuk sprevail mi oy yuʼun Jesus li vunetik taje; pe lek xojtikin li kʼusi chale xchiʼuk nopolik noʼox chalbe skʼoplal kʼalal chchanubtasvane (Luk. 24:27, 44-47). Jaʼ yuʼun laj yal ti maʼuk chlokʼ ta yoʼonton stuk li kʼusi chale, jaʼ laj yal li kʼusi yaʼioj ta stojolal Stote (Juan 8:26).

Ta jkʼan jech ta jpastik kʼuchaʼal li Jesuse. Manchuk mi muʼyuk kaʼioj jtuktik chkʼopoj li Jeova, oy kuʼuntik Vivlia ti jaʼ Skʼope. Mi ta jtunestik kʼalal oy kʼusi ta jtakʼtike, jaʼ chkakʼtik ta ichʼel ta mukʼ li Diose. Chkakʼtik ta ilel ti maʼuk ta jnopben jtuktik li kʼusi chkaltike, ti jchʼunojtik lek ti jaʼ Jeova li buchʼu xuʼ xal li kʼusi melele (Juan 7:18; Rom. 3:4).

Maʼuk noʼox oy ta koʼontontik ti jtunestik li Vivliae, skʼan lek xijtojob stunesel sventa lek xchikintaik li kʼusi chkaltike. Mi lek chchikintaike, xuʼ xkakʼbetik yilik kʼusi chal li Vivliae xchiʼuk xi jakʼbetike: «¿Mi mu jechuk chavaʼi ti jaʼ skʼan jchʼuntik li kʼusi yaloj Dios ta Vivlia ta sventa li kʼusi taje?», o «¿Mi anaʼoj ti chal onoʼox Vivlia ta sventa li kʼusi yakalutik sloʼiltaele?». Yan mi mu xchʼun ti jaʼ Skʼop Dios Vivlia li krixchanoe, xuʼ xi xkalbetike: «Ta jkʼan ta jkʼelbot kʼusi chal jun voʼneal albil kʼop». O xuʼ xi xkalbetike: «Li livro ti mas pukbil skʼoplale, xi chale...».

Bakʼintike xuʼ jaʼ noʼox xkalbetik skʼoplal li kʼusi chal junuk teksto ta Vivliae. Pe li kʼusi mas leke, jaʼ ti jsaʼtik li tekstoe sventa jkʼelbetik o chkaptabetik. Mi xuʼ chkiltike, jaʼ jkʼelbetik li Svivlia yajval nae. Mas chkʼot ta yoʼonton krixchanoetik mi ta jtunestik li Vivliae (Evr. 4:12).

Mas to skʼan stunes Vivlia li mol ta tsobobbail kʼalal oy kʼusi chjakʼbate. Li kʼusi onoʼox skʼan spas sventa x-och ta mol ta tsobobbaile, jaʼ ti «skʼan lek snapʼan sba ta sventa li tukʼil kʼop ta sventa ti kʼu yelan chchanubtasvane» (Tito 1:9). Kʼalal ch-albat mantal yuʼun mol ta tsobobbail jun ermanoe, xuʼ van stsak ta mukʼ li mantal ch-akʼbat ta sventa li kʼusi xuʼ tspas ta xkuxlejale, jaʼ yuʼun tsots skʼoplal ti slokʼes ta Vivlia li mantal chal jun mol ta tsobobbaile. Mi tstunesik Vivlia li moletik ta tsobobbaile, jech chchanik ek li ermanoetik kʼalal chchanubtasvanike.