Tuneso lek li mikrofonoe

EP TAJEK chchʼakbeik yorail xchiʼuk chakʼik persa li kermanotaktik kʼalal chkʼotik ta tsobajele. Yoʼ stabeik sbalil li tsobajeletike, skʼan lek xpʼejlajet xaʼiik li mantale.

Li j-israeletik ta voʼnee muʼyuk toʼox tstunesik aparato sventa sonido yoʼ jamal ta aʼiel li kʼusi chalike. Jaʼ yuʼun, ¿kʼuxi van laj yaʼiik epal miyon j-israeletik kʼalal kʼoponatik yuʼun Moises ta stenlejaltik Moab kʼalal muʼyuk toʼox ochemik li ta Albil Balumile? Li Moisese xuʼ van la xchol viniketik ta skotol skarpana j-israeletik ti jaʼ chchaʼalik batel li kʼusi chale (Deut. 1:1; 31:1). Kʼalal jaʼ toʼox lik spojik li osil ta smaleb Kʼakʼal ta Jordane, lik stsob j-israeletik ta yelov vits Gerizim xchiʼuk Ebal li Josuee, pe li jlevietik yaʼeluke xuʼ van teik ta stenlejaltik ta oʼlol ti bu oy li j-israeletike. Skotol li buchʼu te tsobolike laj yaʼiik li bendision xchiʼuk li vokoliletik laj yalbe skʼoplal Diose, vaʼun «xuʼ», xi la stakʼ skotolik (Jos. 8:33-35). Xuʼ van la xchol jkʼopojeletik ek ti bu tsobolike, akʼo mi jech koltavan onoʼox ti kʼu yelan li osiltike.

Kʼalal echʼ xaʼox 1500 jabile, «toj ep xa noʼox tajek krixchanoetik la stsob sbaik» te ta stiʼ Nab Galilea sventa chchikintabeik li kʼusi chal Jesuse, li Jesuse muy chotluk ta jkot varko xchiʼuk och batel jutuk li ta yut nabe, vaʼun lik skʼopon li epal krixchanoetike (Mar. 4:1, 2). ¿Kʼu yuʼun ti jech la spase? Yuʼun yaʼeluke snaʼoj ti tstsatsaj yechʼomal ye ta skoj li ba voʼe.

Li ta slikebaltik siglo 20, ep buchʼutik tstaik ta chikintael mi tsots chkʼopoj xchiʼuk mi xpʼejlajet kʼusi chal li buchʼu chetʼes mantale, pe mi muʼyuke, jutuk noʼox li buchʼutik chaʼiike. Pe li ta slikebaltik 1920, lik stunesik aparato sventa sonido ta s-asambleaik li stestigotak Jeovae sventa jamal xvinaj li yechʼomal yeike.

Aparato sventa sonido. Mas to tstsatsaj yechʼomal ye yuʼun li buchʼu chetʼes mantale xchiʼuk lek to ta aʼiel. Mu persauk tsots chkʼopoj li buchʼu chetʼes mantale xchiʼuk mu persauk tajek tstsʼetan xchikinik li buchʼutik teike, jaʼ xa noʼox oy ta yoʼontonik xchikintael li mantale.

Avie tstunesik xa lekil aparato sventa sonido ta s-asambleaik li stestigotak Jeovae. Jech xtok, tstunesik sventa jamal xaʼiik kʼusi chal li buchʼutik chetʼesik mantal li ta Salon sventa Tsobobbaile, li buchʼutik sbainojik tsobajele o li buchʼutik tskʼelik o chaptaik vun ta plataformae. Junantik tsobobbailetike tstunesik mikrofono sventa xuʼ xakʼ sloʼilik li buchʼutik te oyike. Chano stunesel lek mi oy ta atsobobbaile.

Tojobtaseletik ti tsots skʼoplale. Yoʼ lek xatunes li mikrofonoe teuk ta ajol li kʼusitik liʼe: 1) 10 o 15 sentimetrouk snamal xavakʼ ta ave li mikrofonoe. Mi solel nopol chavakʼ ta avee, xuʼ mu jamaluk xkaʼitik li kʼusi chavale. Pe mi solel nom chavakʼ xtoke, jutuk tajek xkaʼitik li kʼusi chavale. 2) Maʼuk ta xokon asat xavakʼ li mikrofonoe, tukʼ xavakʼ. Mu xakʼopoj kʼalal chajoypʼin ajole, jaʼ noʼox mi tukʼ oy ta asat li mikrofonoe. 3) Mas tsots jutuk xakʼopoj kʼalal chatunes mikrofonoe. Pe mu xa avan xtok un, yuʼun li mikrofonoe xkaʼitik yuʼun ta sjunul salon li yechʼomal avee. 4) Joypʼino ajol mi chajam anukʼ ta skoj ti oy avobal yaʼele, mi cha-ojobaje o mi chajatʼisaje.

Kʼalal chavetʼes mantale. Kʼalal chamuy ta plataformae xchiʼuk kʼalal te xa vaʼalot ta atrile, oy onoʼox buchʼu tstijanbot li mikrofonoe. Lek tukʼ xavaʼi kʼalal chatijanbate xchiʼuk kʼelo batel li buchʼutik te oyike. Kajano ta atril li avune xchiʼuk akʼo venta ti mu smakbot asat li mikrofonoe.

Aʼio lek kʼu yelan yechʼomal ave ta mikrofono kʼalal chlik kʼopojane. ¿Mi toj tsots li yechʼomal avee o mi xpokʼlajet ta aʼiel kʼalal chakʼopoje? Mi jeche, xuʼ xa namaj 3 o 4 sentimetrouk. Skʼan me ta yeloval mikrofono xakʼel li avune o kʼalal chakʼopoje. Xuʼ xatoy jutuk ta sba mikrofono li kʼusi chakʼele, pe mu xakʼel ta yolon li mikrofonoe.

Kʼalal chakʼel vun ta plataformae. Sventa chakʼel li buchʼutik te oyike, skʼan xatoy li Avivliae o li vun yakal chakʼele. Ta skoj ti te oy ta yeloval asat li mikrofonoe, skʼan xavakʼ ta xokon mikrofono li kʼusi chakʼele. Pe sventa lek xakʼopoj ta yeloval li mikrofonoe, skʼan xajoypʼin jutuk li ajol ta jot xokon li mikrofonoe.

Jutuk mu skotoluk velta vaʼal lek xtuchanobil smikrofonoik li ermanoetik kʼalal ch-echʼ skʼelik li revista Li Jkʼel osil ta toyole. Jaʼ yuʼun mas lek chichʼik ikʼ mi lek vaʼalike xchiʼuk mas lek chlokʼ ta alel li kʼusi tskʼelike. Teuk me ta ajol ti solel tsots skʼoplal kʼalal chichʼ kʼelel li parafoetik ta tsobajeletike. Jaʼ yuʼun, tstabeik sbalil li buchʼutik te oyik mi lek chakʼele.

Kʼalal chavakʼ aloʼil ta tsobajele. Akʼo mi chatunes mikrofono sventa chavakʼ aloʼil li ta atsobobbaile, lekuk xpʼejlajet xchiʼuk tsots onoʼox me xakʼopoj. Sventa lek xata ta kʼelel Avivlia o yan vunetik ti chichʼ chanele, skʼan toyol jutuk xatsak kʼalal chavakʼ aloʼile.

Li ta jujun tsobobbailetike oy ermanoetik ti tsjelubtasik batel li mikrofono mi chakʼan chavakʼ aloʼile. Mi jech li ta atsobobbaile, jechuk ayeʼojuk-o akʼob mi la-albat ti xuʼ xaval aloʼile, yuʼun jech chilot li buchʼu yichʼoj li mikrofonoe xchiʼuk anil chichʼbot batel. Ta ora noʼox me xatsak mi la-akʼbat li mikrofonoe. Jech xtok, jaʼ to xakʼopoj mi lek xaʼox atijanoj ta avee xchiʼuk ta ora onoʼox xasutes mi laj avakʼ aloʼile.

Kʼalal chavetʼes junuk skʼelobil cholmantale. Baʼyel me skʼan xakʼel lek kʼu yelan chatunes mikrofono mi chavetʼes junuk skʼelobil cholmantale. Mi oy xtuchanobil li mikrofono chatunese, xuʼ lek xatunes xchibal akʼob sventa chajam li Avivliae xchiʼuk li avuntake. Mi atsakoj li mikrofonoe, xuʼ van mas xanik o xabakʼ, akʼo mi skʼan onoʼox skoltaot achiʼil sventa jaʼ stsak li mikrofonoe, yoʼ xajam li Avivliae. Sventa lek stsak mikrofono li buchʼu chajelav achiʼuke, skʼan xachanilanik. Teuk me ta ajol xtok ti skʼan mu xavalopatin li buchʼu te oyik kʼalal te oyot ta plataformae, mas to kʼalal chakʼopoje.

Xuʼ van xjelavik oxvoʼ chanvoʼuk li buchʼutik chetʼesik junuk skʼelobil li ta Tsobajel sventa Tunelale xchiʼuk ti chanavik li ta plataformae. Mi jeche, skʼan oy jayibuk li mikrofonoe xchiʼuk ti baʼyel onoʼox skʼan akʼel ta junuk yavil o xuʼ xichʼik akʼbel kʼalal chmuyik xa li buchʼutik chjelavike. Skʼan akʼel lek ti bu yavil li mikrofonoe xchiʼuk ta yorailuk noʼox, jaʼ yuʼun baʼyel skʼan chapanel lek skotol. Kʼalal chichʼ chanele, xuʼ te xchanik kʼu yelan ta tunesel li mikrofonoe. Mi mu stakʼ xchanik li ta plataformae, xuʼ van oy kʼusi stsakik ti xkoʼolaj smukʼul kʼuchaʼal mikrofono sventa xchanik stunesel lek. Kʼalal mi tsutse, lek me xakajan komel ta yavil li mikrofonoe, jech xtok kʼelo me mu xatim ta tekʼel jpʼejuk kavle kʼalal mi la yal tal ta plataformae.

Toj tsots skʼoplal ti jtunestik lek mikrofono li ta jtsobajeltike, yuʼun jaʼ te ta jpatbe jba koʼontontik ta jujuntal kʼalal ta jchantik li Skʼop Diose (Evr. 10:24, 25). Mi lek ta jtunestik li mikrofonoe, xuʼ jkolta jbatik sventa jpatbe jba koʼontontik ta jujuntal.