Mu xaxiʼ xchiʼuk junuk avoʼonton

STALEL onoʼox ti chiʼ kʼalal oy buchʼu chlik sjelubtas mantale, mas to mi jalik to chetʼese. Li jun jcholmantal eke xuʼ van chiʼ kʼalal jayvoʼ to noʼox krixchanoetik xcholojbe mantale. Kʼalal laj yichʼ yabtel Jeremias ta yalel li kʼusi chkʼot ta pasel ta jelavele, xi la stakʼe: «Mu to jnaʼ xiloʼilaj, yuʼun queremun to» (Jer. 1:5, 6). Koltaat yuʼun Jeova li Jeremiase xchiʼuk tskoltaot ek. Ta tsʼakale muʼyuk xa chaxiʼ xchiʼuk jun xa me avoʼonton.

Li buchʼu muʼyuk chiʼ xchiʼuk jun yoʼontone lek noʼox ta kʼelel xchiʼuk lek ti kʼu yelan chvaʼie, lek noʼox tspas senyail ta sat, ta skʼob o yan senyailtak xchiʼuk lek noʼox ti kʼu yelan chloʼilaje.

Mi muʼyuk to pasem avuʼun taje, xuʼ xachan batel. ¿Kʼuxi xuʼ xapas? Jkʼeltik batel ti kʼu yuʼun chijxiʼe xchiʼuk ti mu junuk koʼontontike. Yikʼal van jaʼ ta skoj li kʼusi tspas jbekʼtaltike.

Ta onoʼox xavul avoʼonton kʼalal mu spas avuʼun chavaʼi li kʼusi tsots oy ta aba spasele o mi mu jechuk chbat ta pasel avuʼune. Jaʼ yuʼun li jchinabtike tspas ta mantal jbekʼtaltik sventa chepajes li adrenalina sbie. Ta skoj taje xpʼitpʼun xa tajek koʼontontik, anil xa tajek chkichʼtik ikʼ, chlik chikʼinajkutik, chlik nikuk jkʼobtik, sjol kakantik xchiʼuk xkaʼitik ta yechʼomal ketik ti chijxiʼe. Li kʼusi tspas jbekʼtaltik ta skoj taje, jaʼ ti chakʼ kiptike. Jaʼ yuʼun jkʼeltik lek kʼuxi xuʼ jtunestik sventa xijmuyubajuk noʼox chijkʼopoj xchiʼuk ti junuk noʼox koʼontontik kʼalal chketʼes jpartetike.

¿Kʼusi xuʼ jpastik sventa mu masuk jvul koʼontontik? Teuk ta ajol ti stalel onoʼox ti chijxiʼutike. Pe sventa mu xaxiʼ xchiʼuk junuk avoʼontone, skʼan mu xavul avoʼonton. Junuk avoʼonton xchiʼuk ichʼvanan ta mukʼ mi jech kʼot ta atojolale. ¿Kʼuxi xuʼ spas avuʼun?

Chapano lek aba. Chʼakbo lek yorail sventa xachapan li apartee. Akʼo venta mi xavaʼibe lek smelolal li kʼusi ch-echʼ avalbe skʼoplale. Mi skʼan xatʼuj kʼusi ch-echʼ avalbe skʼoplale, tsako ta venta li kʼusitik snaʼojik xae xchiʼuk li kʼusi oy ta avoʼonton akʼo spasike, yuʼun jaʼ tskoltaot sventa xtʼuj avuʼun kʼusi ti mas ch-echʼ avalbe skʼoplale. Chiʼino ta loʼil li buchʼu jal xa xchanoj yetʼesel mantal mi toj vokol chavaʼi ta slikebale, jaʼ tskoltaot sventa xatojob lek ta stʼujel li kʼusi chtun yuʼun li buchʼutik te chaʼiike. Mi anaʼoj xa lek ti jaʼ la atʼuj li kʼusitik mas tstabeik sbalil yantike, mu xa masuk xvinaj ti chavul avoʼonton kʼalal chavetʼes li apartee.

Chapano lek ti kʼu yelan chalikes aloʼile. Tʼujo li kʼusitik chlik avale. Mi lik xaʼox loʼilajane, te chavaʼi ti ta kʼunkʼun chchʼay batel li xiʼele.

Jaʼ jech xapas xtok kʼalal chachapan aba ta cholmantale. Maʼuk noʼox xanop li kʼusi chkʼot avale, nopo xtok kʼu yelan li buchʼu chkʼot acholbe mantale. Baʼyel nopo lek ti kʼu yelan chkʼot loʼilajane. Xuʼ xachanbe li buchʼutik chanemik xa lek ta cholmantale xchiʼuk ti yijik xa ta mantale.

Yikʼal van chanop ti jaʼ to mu xa xaxiʼ xchiʼuk jun xa avoʼonton mi kʼelbil o aptabil noʼox chavetʼes li apartee. Pe bu chata, mas to van chavul avoʼonton. Jlome ep kʼusi tstsʼibaik li ta svunike; pe li yantike jutuk noʼox. Pe li kʼusi tskoltaot sventa mu masuk xaxiʼe, maʼuk li kʼusi atsʼibaoj ta vune, jaʼ mi achʼunoj lek ti oy sbalil li kʼusi chavetʼese.

Aptao jayibuk velta li apartee. Mi jech chapase, mas xa kʼun chlokʼ ta alel avuʼun li kʼusi chakʼan chavalbe skʼoplale. Taje jaʼ tskoltaot sventa teuk ta ajol li kʼusi chakʼan chavalbe skʼoplale, yoʼ xanaʼ kʼusi chaval mi sta yoraile. Skʼan melel xa yaʼeluk xavil kʼalal chachanilane. Nopo ti te xa akʼeloj li buchʼutik chaʼibote. Mi sta-o li apartee, xuʼ ta chotol o ta vaʼal xachanilan.

Albo Jeova ti akʼo skoltaote. ¿Mi tstakʼbot van li Diose? Xi chal li Vivliae: «Liʼe jaʼ li kʼusi jpatoj-o koʼontontik ta stojolale, yuʼun kʼusiuk noʼox ti ta jkʼanbetike chaʼibutik mi jech ta jkʼanbetik jech kʼuchaʼal tskʼan yoʼontone» (1 Juan 5:14). Mi oy ta avoʼonton chavichʼ ta mukʼ Dios xchiʼuk mi oy ta avoʼonton chakolta krixchanoetik sventa stabeik sbalil li kʼusi chal Vivliae, ta me stakʼbot. Mi achʼunoj ti tskoltaot li Diose, jaʼ tspatbot avoʼonton sventa spas avuʼun li kʼusi oy ta abae. Jaʼ tskoltaot sventa mu xaxiʼ xchiʼuk jun noʼox avoʼonton ta akuxlejal mi jech atalelal kʼuchaʼal tskʼan chʼul espiritue: kʼanelal, kuxetel oʼontonal, jun oʼontonal, manxoal xchiʼuk ti xanaʼ xapajes abae (Gal. 5:22, 23).

Chano batel mas. Mas xa me jutuk chaxiʼ mi nopajtik noʼox chalokʼ ta cholmantale xchiʼuk mas xa me kʼun chavaʼi chakʼopoj ta yeloval krixchanoetik mi nopajtik noʼox chavakʼ aloʼil ta tsobobbaile. Kʼalal mas xa nopajtik chavetʼes batel apartee, mas xa van jun avoʼonton chavaʼi aba. ¿Mi oy ta avoʼonton ti nopajtik noʼox chavetʼes aparte ta yeloval krixchanoetike? Alo ti xuʼ xajelubtas li parteetik ta chanob vun mi oy buchʼu mu xuʼ yuʼune.

Mi laj xa apas li kʼusitik laj xa yichʼ alele, jtunel me avuʼun mi chavakʼ venta kʼusitik chapas kʼalal chaxiʼ xchiʼuk kʼalal mu junuk avoʼontone. Mi laj avakʼ ventae xchiʼuk mi latojob spajtsanel aba ti chaxiʼe, tskoltaot sventa lekuk xakʼopoj. Oy chaʼtos ti kʼu yelan chvinaj ti chijxiʼe: ta jbekʼtaltik xchiʼuk ta jkʼopojeltik.

Ti kʼu yelan chvinaj ta jbekʼtaltike. Ti kʼu yelan chijvaʼi xchiʼuk ti kʼu yelan chkakʼ jkʼobtike jaʼ te chvinaj mi chijxiʼ o mi jun koʼontontik. Akʼo venta kʼu yelan chavakʼ li akʼobe. Mu me junuk avoʼonton mi chavakʼ ta apat li akʼobe o mi tsinajtik chavakʼ ta axokone, mi chatsak atril o mi jujulikel chatikʼ ta avorxa li akʼobe, mi jujulikel chajamulan li svotonal asakoe, mi jech noʼox chapik xokon asat, aniʼ o snenal asat, chapik areloj, alapis, a-aniyo o avuntak xchiʼuk ti muʼyuk xa lek ta kʼelel li senyail chapas ta asat, ta akʼob o yantik senyail.

Jech xtok jaʼ senyail ti mu junuk avoʼonton mi chajuxilan ta piso li avoke o mi xatal xabate, mi toj tsinil ti kʼu yelan chavaʼan abae o mi jecheʼ majajtik li anekebe. Jaʼ senyail xtok mi jujulikel chalekʼulan li avee, mi jujulikel chabikʼ atub xchiʼuk mi anil xa tajek chavichʼ ikʼ ti muʼyuk lek chanojes ta ikʼ li apulmone.

Mi laj avakʼ persae, xuʼ stsal avuʼun skotol taje. Akʼo ta avoʼonton kʼusi jtosukal chakʼan yiktael spasel. Akʼo venta kʼusi jtosukal ti skʼan mu xapase, vaʼun nopo kʼuxi xuʼ xavikta spasel. Paso li kʼusitik taje, vaʼun muʼyuk xa me chaxiʼ xchiʼuk chvinaj ti jun xa avoʼonton ti kʼu yelan vaʼalote.

Ti kʼu yelan chvinaj ta jkʼopojeltike. Te chvinaj ti chijxiʼutik mi chnik li yechʼomal ketike o mi tsots tajek chijkʼopoje. Bakʼintik xtoke toj nopajtik ta jam jnukʼtik ta skoj ti oy kobaltik yaʼele o toj anil chijkʼopoj. Te kʼunkʼun chlekub batel avuʼun ti kʼu yelan chakʼopoj mi muʼyuk chalubtsaje.

Kʼalal skʼan to xamuy ta plataformae, ep ta velta xavichʼ lek ikʼ mi chaxiʼe xchiʼuk junuk avoʼonton. Maʼuk xanopilan ti kʼu yelan chavaʼi abae, jaʼ akʼo ta avoʼonton ti kʼu yuʼun chakʼan chavakʼ ta ojtikinel li kʼusi achapanoje. Kʼelo jlikeluk li buchʼutik te chaʼiik kʼalal skʼan to xlik kʼopojane, vaʼun stseʼet xapasbe asat mi laj avil li buchʼu lek yoʼontone. Kʼunkʼun xakʼopoj li ta slikebal apartee, laje jaʼ xa noʼox xavakʼ ta avoʼonton yetʼesel li apartee.

¿Mi chchʼay ta melel ti chijxiʼe? Mu xanop ti chchʼay ta j-echʼel avuʼun li xiʼele. Ep li buchʼutik xchanojik xa lek ta yetʼesel mantale chiʼik kʼalal jlikel xa skʼan xmuyik ta plataformae. Pe xchanojik xa ti mu masuk xiʼike. Oy buchʼu xi laj yale: «Chixiʼ to, pe mu xkakʼ ta ilel».

Mi chavakʼ ta avoʼonton yiktael li kʼusitik jaʼ senyail ti chaxiʼe, tsnopik yantik ti mu xanaʼ xaxiʼ xchiʼuk ti jun noʼox avoʼontone. Manchuk mi chaxiʼ to, pe mu xa xakʼik venta.

Vuleso ta ajol ti kʼalal ch-epaj tajek li adrenalina ti jaʼ chlik xiʼkutik yuʼune chakʼ tajek kipaltik xtok. Jaʼ yuʼun tuneso lek sventa xamuyubaj noʼox kʼalal chakʼopoje.

Mu persauk jaʼ to chapas kʼalal te xa vaʼalot ta plataforma li kʼusitik laj xa yichʼ alele. Kʼalal chaloʼilaj jujun kʼakʼale, akʼo persa ti mu xaxiʼe, ti junuk avoʼontone xchiʼuk muyubajan kʼalal chakʼopoje. Mi jech chapase, jaʼ tskoltaot sventa jun xa avoʼonton chaloʼilaj ta plataforma xchiʼuk kʼalal chachol mantal ti bu mas tsots skʼoplal skʼan xkakʼtik ta ilele.