XCHANOBIL 48
Tʼujo lek avamigotak
Xijmuyubaj noʼox kʼalal oy kamigotaktike xchiʼuk mu jtukuk chkaʼi jbatik kʼalal chkil jvokoltike. Pe pʼijan me, yuʼun li Vivliae chal ti mu buchʼuuk noʼox xuʼ xkamigointike. Vaʼun chaʼa, ¿kʼusi xuʼ skoltaot sventa xatʼuj lek li avamigotake? Jkʼeltik batel.
1. ¿Kʼusi van xuʼ xkʼot ta atojolal ta skoj li avamigotake?
Ep ta veltae, xuʼ xlekub o sok jtalelaltik yuʼun li kamigotaktike. Taje jaʼ jech chkʼot ta pasel akʼo mi ta Internet noʼox ta jkʼopon jbatik o ta jtakbe jbatik mensaje. Xi jamal chal li Vivlia eke: «Li buchʼu jaʼ chchiʼin li buchʼutik pʼijike chpʼijub ek, pe li buchʼu jaʼ chchiʼin li buchʼutik bolike muʼyuk kʼusi lek chkʼot ta stojolal» (Proverbios 13:20). Mi skʼanojik xchiʼuk mi chichʼik ta mukʼ Jeova li avamigotake, jaʼ me tskoltaot sventa xanopaj ta stojolal li Jeovae xchiʼuk ti lekuk li kʼusi chkʼot ta nopel avuʼune. Jech oxal, li Vivliae chal ti skʼan lek jtʼujtik li kamigotaktike. Mi skʼanojik Jeova li kamigotaktike, ta me jtabetik sbalil, yuʼun xuʼ jpatbe jba koʼontontik xchiʼuk ta jtsatsubtasbe jba koʼontontik ta jujuntal (1 Tesalonisenses 5:11).
2. ¿Mi tsots van skʼoplal chil Jeova li buchʼutik chavamigoine?
Tstʼuj lek yamigotak li Jeovae. Xi chal li Vivliae: «Li buchʼu tukʼe lek tajek xil sba xchiʼuk» (Proverbios 3:32). ¿Kʼu van yelan chaʼi sba kuʼuntik Jeova mi jaʼ ta jchiʼintik li buchʼutik muʼyuk lek stalelalike? ¡Chopol tajek chaʼi sba kuʼuntik! (Kʼelo Santiago 4:4). Pe ¿kʼu van yelan chaʼi sba mi jaʼ chkamigointik li yamigotake? Xmuyubaj tajek kuʼuntik xchiʼuk chijkʼot ta slekil amigo ek (Salmo 15:1-4).
JCHANTIK TO BATEL MAS
Jkʼeltik batel kʼu yuʼun tsots skʼoplal ti jtʼujtik lek li kamigotaktike xchiʼuk ti kʼusi xuʼ xapas sventa xata alekil amigotak ti xuʼ skoltaote.
3. Pʼijan me, mu me xachiʼin li buchʼutik muʼyuk lek stalelalike
Kʼalal chopol stalelalik xijchie, jaʼ skʼoplal li buchʼutik muʼyuk skʼanojik Diose xchiʼuk ti muʼyuk chchʼunbeik smantale. Kʼelik li VIDEOE xchiʼuk albeik skʼoplal li sjakʼobil liʼe:
¿Kʼuxi van xuʼ xlik kamigointik li buchʼutik chopol stalelalike?
Kʼelik 1 Korintios 15:33 xchiʼuk albeik skʼoplal li sjakʼobiltak liʼe:
¿Buchʼutik ti mu stakʼ xavamigoin chavile? ¿Kʼu yuʼun ti jech chavale?
Kʼelik Salmo 119:63 xchiʼuk albeik skʼoplal li sjakʼobil liʼe:
¿Kʼuxi xuʼ xanaʼ ti buchʼutik xuʼ xavamigoine?
Mi kʼaʼem jpʼejuk mantsanae, xuʼ me xkʼaʼ li yan mantsanaetik eke. ¿Mi xuʼ van sokes atalelal li buchʼutik muʼyuk lek stalelalik eke?
4. Xuʼ jta jlekil amigotik akʼo mi mu xijkoʼolaj xchiʼukik
Li Vivliae chalbe skʼoplal David xchiʼuk Jonatan. Akʼo mi jelajtik tajek sjabilalik xchiʼuk akʼo mi jaʼ xnichʼon ajvalil li Jonatane, lek tajek laj yamigoin sbaik xchiʼuk li Davide. Kʼelik 1 Samuel 18:1 xchiʼuk albeik skʼoplal li sjakʼobiltak liʼe:
¿Mi xuʼ van xkamigointik li buchʼu jelel jabilaltik jchiʼuktike, li buchʼu jkʼulej o povree? ¿Kʼu yuʼun ti jech chavale?
Kʼelik Romanos 1:11, 12 xchiʼuk albeik skʼoplal li sjakʼobil liʼe:
¿Kʼuxi tstsatsubtasbe sba yoʼontonik li buchʼutik yamigo sbaik ti skʼanojik Jeovae?
¿Kʼuxi la sta slekil amigo li jun kereme? Kʼelik li VIDEOE xchiʼuk albeik skʼoplal li sjakʼobiltak liʼe:
¿Kʼu yuʼun la svul tajek yoʼontonik stot smeʼ Akil ta skoj li yamigotak la saʼ ta s˗eskuelae?
¿Kʼu yuʼun lek toʼox tajek laj yaʼi yamigoinel xchiʼiltak ta chanun li Akile?
¿Kʼusi la spas sventa mu xa stukuk xaʼi sbae?
5. ¿Kʼuxi xuʼ jta jlekil amigotik?
Kʼelavil kʼuxi xuʼ xata alekil amigotak xchiʼuk kʼuxi xuʼ xakʼot ta lekil amigoil ek. Kʼelik li VIDEOE.
Kʼelik Proverbios 18:24 xchiʼuk 27:17 xchiʼuk albeik skʼoplal li sjakʼobiltak liʼe:
¿Kʼuxi xuʼ skolta sbaik li buchʼutik yamigo sbaik ta melele?
¿Mi oy jech avamigotak jech kʼuchaʼal chal ta Proverbiose? Mi muʼyuke, ¿kʼuxi van xuʼ xata?
Kʼelik Filipenses 2:4 xchiʼuk albeik skʼoplal li sjakʼobil liʼe:
Sventa xata alekil amigotake, skʼan lekil amigoilot ek. ¿Kʼuxi van xuʼ xapas taje?
Sventa oyuk alekil amigotake, skʼan lekil amigoilot ek.
JUNANTIKE XI CHALIKE: «Mu ventauk buchʼu chkamigointik, jaʼ noʼox venta mi lek yoʼontonike».
¿Kʼu xachi yaʼel li voʼote?
¿KʼUSI LA ACHAN?
Mi ta jtʼuj lek li kamigotaktike, jun noʼox koʼontontik xchiʼuk xmuyubaj kuʼuntik li Jeovae.
Svulesobil ta joltik
¿Kʼu yuʼun tsots skʼoplal chil Jeova li buchʼutik chkamigointike?
¿Buchʼutik ti mu stakʼ xkamigointike?
¿Kʼuxi xuʼ xata alekil amigotak?
XUʼ TO XAKʼEL LIʼE
Kʼelavil kʼuxi xuʼ skoltautik kamigotaktik kʼalal chkil jvokoltike.
«Jsaʼ lek kamigotik yoʼ to mu xvul li slajeb kʼusitike» (Li Jkʼel-osil ta toyole, noviembre ta 2019)
Kʼelavil kʼuxi xuʼ xata alekil amigotak.
¿Kʼu yuʼun skʼan xavichʼ apʼijil mi chasaʼ avamigotak ta Internete?
Kʼelavil kʼu yuʼun la sjel yamigotak li jun ermanoe. Kʼelbo avil li sloʼil xkuxlejale, «Ta jkʼan yaʼel ti oyuk jtote».
«Jelbat˗o xkuxlejalik yuʼun li Vivliae» (Li Jkʼel-osil ta toyole, avril-junio ta 2012)