¿Mi xvul ta ajol?

¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

• ¿Kʼuxi xuʼ mas xpʼejlajet xi jkʼopoj li ta «puru lequil cʼop[e]», jaʼ xkaltik, skʼoplal li kʼusi melel ta sventa Diose xchiʼuk li kʼusi oy ta yoʼonton tspase? (Sof. 3:9.)

Jaʼ jech skʼan jpastik kʼalal ta jchantik yan kʼop sventa xpʼejlajet lek xi jkʼopoj li ta «puru lequil cʼop[e]», skʼan 1) jtsʼetanbetik lek xchikinal, 2) jchanbetik li buchʼutik lek snaʼik li kʼope, 3) jchanubtas li joltik sventa xcholetuk lek jkomes ta joltik li sbi slivroaltak Vivliae o ti jkomes ta joltik tekstoetike, 4) jchaʼaltik li kʼusi jchanojtike, 5) jnopbetik skʼoplal li kʼusi jchanojtike, 6) jchanbetik «sgramatikail» li mantale, 7) mu xi jpaj ta be, 8) jchapanbetik lek yorail ti xi jchanunaje xchiʼuk 9) jchanilantik li «puru lequil cʼop[e]» (15/8, pajina 21-25).

• ¿Kʼusi smelolal ta sventa nupunel ti «oxcʼol li chʼojone»?

Li jpʼel kʼop «oxcʼol li chʼojone» jaʼ skʼoplal ta lokʼolkʼop li nupunele, jaʼ smelolal ti oxpʼej sat chʼojon kʼotemik li malalil, li ajnilal xchiʼuk li Jeovae, pe li Jeova une jaʼ li jpʼej sat chʼojon ti mas tsots skʼoplale (Ecl. 4:12). Kʼalal nopol oyik ta stojolal Dios li nupul-tsʼakale, ta me sta yipalik ta mantal sventa stsal yuʼunik li vokoliletike xchiʼuk jaʼ me ch-akʼbat-o smuyubajelik (15/9, pajina 16).

• ¿Kʼusi smelolal ti kʼalal xi laj yichʼ alel: «Laj yacʼbutic scʼobic ta jolti[k]» ti xie, ti te ta xichʼ tael ta Hebreos 6:2?

Li jpʼel kʼop yaʼeluk taje maʼuk chalbe skʼoplal li svaʼanel moletik ta tsobobbaile, moʼoj, jaʼ chalbe skʼoplal kʼalal chichʼik li matanaletik yuʼun chʼul espiritue (Hech. 8:14-17; 19:6) (15/9, pajina 32).

• ¿Kʼuxi xuʼ xakʼik ta ilel ti yichʼoj ta mukʼ yermanotakik li jkʼelvanejetike?

Jaʼ ti mu sujik ta spasel li kʼusi muʼyuk ta yoʼonton spasel stukike xchiʼuk ti chalbeik srasonal kʼu yuʼun chakʼik jlomuk mantale (15/10, pajina 22).

• ¿Kʼusi xuʼ xchanik li jkʼelvanejetik ta tsobobbail ta sventa ti kʼu yelan tstunes steʼik li jchabi chij ta Israele?

Li jchabi chije ta sbeiltas ta jun natil lukluk teʼ li xchije. Kʼalal tstikʼ o tslokʼes ta koral li xchije, te chjelav yuʼun ta «yolon [steʼ]» sventa chchap xchiʼuk sventa chil mi tsʼakal (Lev. 27:32, NM). Jaʼ jech li jchabi chijetik yuʼun yajtsʼaklomtak Cristo eke, skʼan me xojtikinbeik lek li xchijtak Dios ti akʼbil sbainik skʼelele xchiʼuk ti teuk me satik ti kʼusitik tsnuptanike (15/11, pajina 9).