MANTAL TA SLIKEBALTIK PAJINA: XUʼ XANOPAJ TA STOJOLAL DIOS
¿Mi nopol chavaʼi aba ta stojolal Dios?
«Kʼalal lek xkil jbatik xchiʼuk Diose muʼyuk kʼusi chijxiʼ-o, muʼyuk kʼusi skʼan kuʼuntik chkaʼi jbatik xchiʼuk jun noʼox koʼontontik. Jaʼ noʼox chchabiutik xchiʼuk oy ta yoʼonton ti lekuk xbat li jkuxlejaltike.» (CHRISTOPHER, CHEX KEREM LIKEM TA GHANA)
«Li Diose chil kʼalal chavul avoʼontone, vaʼun mas chchabiot xchiʼuk mas oyot ta yoʼonton.» (HANNAH, TSEB LIKEM TA ESTADOS UNIDOS, TI 13 SJABILALE)
«Ti jnaʼoj ti lek chilun Diose jaʼ li kʼusi mas jun koʼonton yuʼune. Ti lek chkil jba xchiʼuke jaʼ li kʼusi mas ep sbalil chkile.» (GINA, LIKEM TA JAMAICA, TI TE VAN 45 SJABILALE)
Li Christopher, Hannah xchiʼuk Ginae mu stukikuk ti jech chaʼi sbaike. Epal krixchanoetik ta spʼejel Balumile lek xchʼunojik ti lek ch-ilatik yuʼun Diose. Pe ¿kʼu yelan chavaʼi aba li voʼote? ¿Mi nopol oyot ta stojolal chavaʼi? ¿Mi chakʼan chanopaj ta stojolal? ¿O mi chakʼan mas to chanopaj ta stojolal? Pe xuʼ van xi chajakʼbe abae: «Li Dios ti skotol xuʼ yuʼune, ¿mi xuʼ lek xilun ti jecheʼ krixchanoun noʼoxe?».
XUʼ XIJNOPAJUTIK TA STOJOLAL LI DIOSE
Li Vivliae chal ti xuʼ xijnopajutik ta stojolal li Diose. Jech kʼuchaʼal liʼe, li ta Isaías 41:8 chal ti ‹lek la skʼopon sbaik› xchiʼuk Dios li moltotil Abrahame. Jech xtok, li Santiago 4:8 xi chalbutike: «Nopajanic ta stojol li Diose, jech chnopaj ta atojolic ec». Taje jamal chakʼ ta ilel ti xuʼ xijnopajutik ta stojolale. Pe ¿kʼuxi xa onoʼox xuʼ xijnopajutik ta stojolal ti mu xkiltike?
Sventa jtakʼtik taje, jkʼeltik kʼuxi chlik chʼiuk ti lek xil sbaik chaʼvoʼ krixchanoetike. Jutuk mu skotoluk veltae jaʼo chlik kʼalal tsjakʼbe sba sbiik ta jujuntale. Ta skoj ti nopolik noʼox chloʼilajik, chalbe sbaik kʼusi tsnopik xchiʼuk kʼu yelan chaʼi sbaike, jaʼ chchʼi-o batel mas ti lek xil sbaike. Jech xtok kʼalal chakʼik persa oy kʼusitik lek tspasik ta jujuntale mas me tstsatsub-o batel ti lek xil sbaike. Taje chakʼ ta ilel ti jaʼ jech chkʼot ta pasel kʼalal chijnopaj ta stojolal li Diose. Jkʼeltik batel kuxi xuʼ jech xkʼot ta pasel taje.