Chapalukutik-o sventa jsaʼtik li buchʼutik tskʼan chchan Vivliae
1. ¿Kʼusi skʼan jpastik sventa spas kuʼuntik li kʼusi laj yal Jesús ta Mateo 28:19, 20?
1 Li Jesuse laj yal ti akʼo jchanubtastik sventa jpastik ta jchʼunolajel li krixchanoetike (Mat. 28:19, 20). Jech oxal, skʼan chapalukutik-o sventa jsaʼtik li buchʼutik tskʼan chchan Vivliae, maʼuk noʼox li ta jun skʼakʼalil tʼujbil sventa taje. Li kʼusitik chichʼ alel batel liʼe xuʼ skoltautik.
2. ¿Buchʼutik xuʼ xkalbetik mi tskʼan chchanik Vivlia?
2 Albo mi skʼan xchan Vivlia. Mi ep buchʼutik ta xkalbetik mi tskʼan chchanik Vivliae, mas me xuʼ jtatik junuk (Ecl. 11:6). ¿Mi oy apasoj preva ti tukʼ chavalbe mi skʼan xchan Vivlia li krixchanoetike? Jun tsobobbail ta Estados Unidos laj yakʼik persa sventa jech tspasik ta sjunul u. ¡La staik 42 krixchanoetik! Jech noxtok, mu me xa nop ti snaʼojik xa onoʼox ti chkakʼtik chanubtasel ta Vivlia li yajval naetik ti oy ta yoʼontonik mantale. Ta yan velta kʼalal mi la chaʼvulaʼane, ¿kʼu yuʼun mu xa jakʼbe mi tskʼan chchan Vivlia? Mi muʼyuk la xchʼame, mu kʼusi skʼoplal. Xuʼ xa vulaʼan-o sventa xa chʼiesbe ta yoʼonton li mantale. Ta yan xtoke, xuʼ van xa jakʼbe alakʼnatak, avutsʼ avalal, achiʼiltak ta abtel o ta chanun mi tskʼan van chchanik Vivlia xchiʼuk voʼot. Jech noxtok, xuʼ xa jakʼbe li buchʼutik cha chanubtas mi oy yamigotak o yutsʼ yalal ti tskʼan chchanik Vivliae.
3. ¿Kʼusi abtejebal oy kuʼuntik ti jtunel tajek sventa jlikestik chanubtasel ta Vivliae, xchiʼuk bakʼin xuʼ jtunestik?
3 Jun abtejebal ti jtunel tajeke. Jun kabtejebtik ti jtunel tajek sventa slikesel junuk chanubtasel ta Vivliae jaʼ li tratado ¿Mi cha kʼan cha naʼ li kʼusi melele? Manchuk mi la xchʼam junuk vun o muʼyuk li krixchanoe xuʼ xavakʼbe komel. Xuʼ xichʼ tunesel kʼalal chichʼ cholel mantal ta pʼolmajebaletik, ta bebetik, kʼalal cha tak batel junuk kartae xchiʼuk kʼalal cha bat ta chaʼvulaʼale. Xchiʼuk xuʼ xavikta komel li ta naetik ti muʼyuk te yajvale. ¿Kʼu yuʼun mu xavichʼ batel kʼalal cha xanav ta karoe, kʼalal cha bat ta manolajele xchiʼuk kʼalal cha bat ta avabtele? Li ta slajebal pajinae chalbe jutuk smelolal kʼuyelan xuʼ xichʼ chanel li Vivliae xchiʼuk chalbe skʼoplal li livro Chchanubtasvane.
4. ¿Kʼuxi ta tunesel sventa jlikestik chanubtasel ta Vivlia li tratado Li kʼusi melele?
4 ¿Kʼu yelan ta tunesel? Mi la avakʼbe xaʼox tratado li yajval nae, akʼbo yil li sjakʼobiltak ta baʼyel pajinae, xchiʼuk xi xa jakʼbee: «¿Bu junukal sjakʼobil mas chkʼot ta avoʼonton xchanel?». Ta tsʼakale jmoj xa chanik li stakʼobil yichʼoj tal li tratadoe, vaʼun kʼelo o albo jutuk skʼoplal kʼusi chal li slajebal pajina ti chalbe skʼoplal li chanubtasel ta Vivliae. Vaʼun akʼbo yil li ta livro Chchanubtasvan ti bu xuʼ stabe mas yaʼyejal ta sventa taje, akʼbo li livroe xchiʼuk nop akʼopik sventa kʼusi ora xuʼ xa vulaʼan yan velta.
5. ¿Kʼu yuʼun skʼan chapalukutik-o sventa jlikestik chanubtaseletik ta Vivlia?
5 Li bu ta jcholtik mantale oy to buchʼutik oy ta yoʼontonik xchanel li kʼusi chchanubtasvan ta melel li Vivliae. Jaʼ jun muyubajel ti xuʼ jkoltatik li krixchanoetik sventa xuʼ stamik batel li be sventa kuxlejale. Mi chapalutik-o sventa ta jsaʼtik li buchʼutik tskʼan chchan Vivliae, mas me xuʼ jtatik muyubajel (Mat. 7:13, 14).