Chichʼik koltael li antsetik ti ilbajinbilike
« TA SPʼEJEL balumile, ta smiyonal xa noʼox antsetik xchiʼuk tsebetik yichʼojik utilanel. Xuʼ van jech anuptanoj ek. Pe ¿mi tsots skʼoplal chil Dios ti junuk avoʼonton xavaʼi abaik li antsoxuke? ¿Mi ta van slajesbe skʼoplal li vokoliletik chanuptanike? Jaʼ ta jkʼeltik batel taje».
Taje jaʼ jech chal jun mantal li ta jw.org ti xi sbie: «¿Kʼuxi xuʼ staik jun oʼontonal li antsetike?: ¿Kʼusi chal li Vivliae?». Ta slajeb li mantale te chal ti xuʼ xayales ta PDF sventa xapas imprimir xchiʼuk ti xapux ta oʼlole. Xi chal jun ermana ta Estados Unidos ti Stacy sbie: «La jpas imprimir jaylikuk, vaʼun jmoj ay kakʼkutik xchiʼuk jun ermana ta snail antsetik ti yichʼojik ilbajinel ti te xkom ta jterritoriokutike».
Jun ants ti te ch-abteje la skʼanbe mas skopiail li vun taje sventa xchʼakbe li antsetik ti te nakalike. Vaʼun, laj yichʼ chʼakel 40 ta lik xchiʼuk 30 tarjeta ti chalbe skʼoplal li jw.org. Ta yan velta xtoke, li buchʼu sbainoj skʼelel li snail antsetike laj yalbe ermanaetik ti akʼo yakʼik ta ilel kʼu yelan li chanubtasel ta Vivlia chkakʼtike.
Li Stacy xchiʼuk yan chaʼvoʼ ermanaetike toj lek laj yichʼik chʼamel kʼalal batik ta yan snail antsetik ti yichʼojik ilbajinele, la xchʼamik komel voʼlik li vun taje xchiʼuk laj to skʼanik mas. Jun ants ti te ch-abteje xi laj yale: «Li vun liʼe ep tajek tstabeik sbalil li antsetik ti liʼ oyike. Chtun tajek kuʼunkutik». Kʼalal batik ta yan veltae, la stsob sbaik tal jayvoʼ antsetik sventa xilik kʼu yelan chichʼ akʼel li chanubtasel ta Vivliae, oy chaʼvoʼ ti laj yalik ti tskʼan chbatik ta tsobajel li vaʼ xemanae.
Xi to chal li Stacye: «Labal sba tajek laj kilkutik ti lek chaʼiik xchanel li mantal liʼe. Kʼalal ta jpastik imprimir xchiʼuk ta jpuxtike, kʼupil sba xvinaj xchiʼuk jaʼ chtijbat-o yoʼonton li antsetik ti yichʼojik ilbajinel sventa snaʼik kʼusi tspas li Ajvalilal yuʼun Diose. Ximuyubajkutik tajek ti toj lek la xchʼamik li mantale. Oy xa tajek ta koʼontonkutik sventa xkilkutik kʼuxi chakʼbunkutik sbendision Jeova ti jech chkakʼ-o kipalkutik xcholbel lekil aʼyej li krixchanoetik taje».