Пӧсьтолэзь

Иисуслэн вань кылъёсыз но ужъёсыз, озьы ик паймымон ужъёсыз но, возьматӥзы, со Атаезлэсь быдэсак адӟем кариз шуыса (Иоанн 14:9). Малы милемыз дышетыны быгато Иисуслэн паймымон ужъёсыз? Иисус но солэн Атаез милемыз туж ярато. Иеговалэн кужыменыз Иисус курадӟись адямиослы юрттылӥз. Татысь адӟиськиз, Иисус адямиосты туж яратэ шуыса. Огпол кык синтэмъёс солэсь юрттэтсэ куризы (Матф. 20:30—34). Учке: Иисус соосты жаляз но бурмытӥз. Грек глагол, кудӥз «жаляса» шуыса берыктэмын, возьматэ вань сюлмысь, туж зол гажан-жалянэз. Адямиосты туж гажаса-жаляса, Иисус яратонзэ возьматӥз. Яратон солэсь мылкыдзэ ӝутӥз сютэмъёсты сюдыны но гижлочерен висисез бурмытыны (Матф. 15:32; Марк 1:41). Ми оскыны быгатӥськомы: Иегова, туж гажась-жалясь Инмар, но солэн Пиез милемыз туж ярато но, курадӟонъёсмес адӟыса, соослы вӧсь луэ (Лука 1:78; 1 Пётр 5:7). Соос туж возьмало со дырез, куке адямиосты вань курадӟонъёслэсь мозмытыны быгатозы! w23.04 3 б., 4, 5 абз.

Лэсьтоно ваньзэ, мае быгатӥськомы, та дуннеысь адямиос сямен, медам малпаське шуыса. Мар со понна кароно? Библиез лыдӟыса но эскерыса, йырвизьмес юнматӥсь малпанъёсын тырмытоно. Со сяна, малпаськон амалмес утён понна, кенешлэн пумиськонъёсаз ветлоно но тодытоно. Нош Иегова кылзэ сётэ, ми чиданы луонтэм визь сынаськонъёсын ум пумиське шуыса (1 Кор. 10:12, 13). Та секыт берпум нуналъёсы Иеговалы оскымон мед луомы шуыса, ваньмылы эшшо но трос вӧсяськыны кулэ. Иеговалэн потэ, ми солы сюлэммес мед усьтомы шуыса (Пс. 61:9). Вань ужъёсыз понна Иеговаез данъялэ но солы тау каре. Солэсь юрттэтсэ куре кышкатэк тодытыны. Шуг-секытъёсын яке визь сынаськонъёсын пумиськыкуды, солы вазиське. Эн лэзе нокинлы но номырлы тӥледлы люкетыны ялан Иеговалы вӧсяськыны. w23.05 7 б., 17, 18 абз.

Малы ми кенешлэн пумиськонъёсаз ветлӥськомы? Нырысь ик ми Иеговаез данъяськомы (Пс. 25:12; 110:1). Со сяна, ми пумиськонъёсы ветлӥськомы, та секыт дыръёсы ог-огмылэсь мылкыдмес ӝутон понна (1 Фес. 5:11). Ваньзэ тае лэсьтыны луэ, кимес ӝутыса но валэктонъёс сётъяса. Но валэктонъёс сётъяку, шуг-секытъёс кылдыны быгато. Оло нош, ми кышкаськомы валэктонъёс сётъяны. Яке милям валэктонъёс сётъяммы туж потэ, но милемыз сокем ӵем уг юало. Мар кароно та шуг-секытъёсын? Еврейёслы гожтэтаз апостол Павел вераз, макем кулэ пумиськонъёсы ветлыны. Христианъёслы со шуиз: «Огмылэсь огмы мылкыдмес лӧпкытыломе». Милемлы кимес ӝутыны капчигес луоз, ми валамы ке, осконмес возьматӥсь огшоры кылъёсмы но огъя оскисьёсмылэсь мылкыдзэс ӝутыны быгато шуыса. Нош милемыз сокем ӵем уг юало ке, милям шумпотэммы луэ, мукетъёсызлэн валэктонъёс сётъямзы луэ шуыса (1 Пётр 3:8). w23.04 20 б., 1—3 абз.

Эксэйлэн косонэз ялэмын! Еврей калык, кудӥз ог 70 ар ӵоже вавилон пленын вал, табере Израиле берытскыны быгатӥз (Езд. 1:2—4). Тае Иегова гинэ лэсьтыны быгатэ вал. Пленэ басьтэм адямиоссэ Вавилон уг лэзьы вал (Ис. 14:4, 17). Но Вавилон куашкатэмын. Нош выль кивалтӥсь ялӥз, еврей калык вордскем музъемаз берытскыны быгатэ шуыса. Еврей калык пӧлысь котькудӥзлы, тужгес но семьяослэн йыръёссылы, ужпум кутоно вал: Вавилонысь кошконо яке кылёно. Ужпум кутыны секыт вал. Тросэзлы Вавилонысь кошкыны секыт вал бадӟым арлыдзы сэрен. Озьы ик еврей калык пӧлысь тросэз Вавилонын вордӥськизы. Соослэн мукет интыын улэмзы ӧй вал. Израиль шоры соос учкизы музъем шоры кадь, кудаз куке но ӵыжы-выжыоссы улӥзы. Со сяна, куд-ог еврейёс Вавилонын туж узырмизы, вылды. Соин ик соослы секыт вал, дыр, умой коркаоссэс яке ужзэс кельтыны но тодмотэм музъеме кошкыны. w23.05 14 б., 1, 2 абз.

Инмарлэн Кылыз милесьтым мылкыдмес ӝутэ юн, гажась-жалясь но яратӥсь луыны. Лукалэсь 21:19 гожтэмын: «Чидан [«юн луон», ВД] пыр лулъёстэс утелэ». Колоссыослы 3:12 мылкыдмес ӝутэ: «Дӥсяське-шобырске гажась-жалясь... луонлэн дӥськутэныз». Нош 1 Фессалоникаослы 4:9, 10 верамын: «Ачиз Инмар ог-огдэс яратыны дышетӥз. [...] Агай-вынъёсмы, тӥледыз эшшо но золгес яратыса улыны куриськомы». Вань та кылъёс гожтэмын вал христианъёслы, кудъёсыз юн луэмзэс, гажан-жалянзэс но яратонзэс возьмато вал ини. Озьы ке но соослы азьланяз но та сямъёссэс возьматоно вал. Озьы ик кароно милемлы но. Со понна эскере, кызьы нырысетӥ даурысь христианъёс та сямъёссэс возьматъязы. Собере тӥ валалоды, кызьы со вын-агайёслэсь но сузэр-апайёслэсь адӟем карыны быгатӥськоды. Та юрттоз тӥледлы валаны, дась-а тӥ бадӟым куректонлы. Соку, бадӟым куректон кутскыку, тӥледлы капчигес луоз шуг-секытъёстэс чиданы но мылкыдды луоз азьланяз но юн луыны. w23.07 3 б., 4, 8 абз.

Кинъёс пӧлы гинэ ми медам пыре — зырӟем христианъёс яке «мукет ыжъёс» пӧлы, милемлы «дун-шектэм сюрес» вылысь кожоно ӧвӧл (Иоанн 10:16). Малы ке шуоно со духовной райтӥ ортче но Эксэйлыклэн вуоно бакель каронъёсыз доры вуттэ. 1919-тӥ арысен кӧня ке миллион пиосмуртъёс, кышномуртъёс но нылпиос потӥзы ини Быдӟым Вавилонысь, зэмос луисьтэм религилэн дунневыл империысьтыз, но та сюрес вылэ султӥзы. Иегова сюлмаськиз, Вавилонысь потэм еврей калыклэн сюресэз ӵошкытатэмын мед луоз шуыса (Ис. 57:14). Нош мар вераны луоз асьме нуналъёсысь «дун-шектэм сюрес» сярысь? 1919-тӥ арлэсь азьло кӧня ке дауръёс ӵоже Иегова сое гажась пиосмуртъёс пыр Быдӟым Вавилонысь потӥсь сюресэз сузяз. (Ӵошатэ Исаиялэсь 40:3.) Соос дасяськон ужъёсты быдэсъязы, берлогес Быдӟым Вавилонысь потэм адямиос духовной рае пырыны мед быгатозы шуыса, кытын чылкыт йыбырттон тупатэмын вал. w23.05 15—16 б., 8, 9 абз.

Иеговалэн потэ, ми солы шумпотыса но вань сюлмысьтымы мед ужаломы-тыршомы шуыса (2 Кор. 9:7). Возьматэ-а со, милям духовной ужпумъёсмес быдэстыны мылкыдмы ӧвӧл ке, тыршоно ӧвӧл шуыса? Эскеромы апостол Павеллэсь учырзэ. Со вераз: «Ас мугорме курадӟытыса зӥбломытӥсько, тэрытскись-кылзӥськись карисько» (1 Кор. 9:25—27). Павел ассэ кужмысь косӥз лэсьтыны сое, мар шонер луэ, соку но, куке солэн мукет сямен лэсьтэмез потэ вал. Кельшиз-а Иеговалы Павеллэн ужан-тыршонэз? Туж кельшиз! Тыршемез понна Инмар сое бакель кариз (2 Тим. 4:7, 8). Кызьы возьматэ Павеллэн учырез, Иегова шумпотэ, куке ми, мылкыдмы шоры учкытэк, азьланяз но тыршиськомы ужпуммес быдэстыны. Со шумпотэ, малы ке шуоно тодэ: мае ке лэсьтыны милемлы котьку ик уг кельшы ке но, ми сое Инмарез яратэменымы лэсьтӥськомы. Апостол Павелэз сямен ик, Иегова милесьтым но тыршеммес бакель кароз (Пс. 125:5). Куке ми солэсь бакель каронъёссэ ас выламы шӧдомы, милям мылкыдмы ӝутскоз азьланяз но тыршыны. w23.05 28—29 б., 9, 10 абз.

Соосты, кинъёс Иеговалэн нуналыз дыръя уз утиське, апостол Павел ӵошатӥз изисьёсын. Соос котырысьтызы югдурез но дырлэсь ортчемзэ уг валало. Соин ик соос кулэ луись югдуръёсты уг адӟо яке асьсэды шонертэм возё. Туннэ тросэз изись адямиослы кельшо (Рим. 11:8). Соос уг валало, ми «берпум нуналъёсы» улӥськомы но ӝоген бадӟым куректон вуоз шуыса (2 Пётр 3:3, 4). Но ми валаськомы, нуналысь нуналэ сак луыны туж кулэ шуыса (1 Фес. 5:6). Со понна милемлы каньыл сюлмын улоно но шонер малпаськоно. Малы? Та дуннеысь адямиос сямен асьмеды медам возе шуыса. Милемыз кужмысь косыны быгато политикаен герӟаськем яке мукет юанъёсын кин ке пала кариськыны. Иеговалэн нуналыз матэктэмъя, ми вылэ эшшо но золгес зӥбозы. Озьы ке но сюлмаськоно ӧвӧл, мар верано. Инмарлэн духез юрттоз милемлы каньыл сюлмын улыны но малпаськыса визьмо ужпумъёс кутыны (Лука 12:11, 12). w23.06 10 б., 6, 7 абз.

Мар сярысь тӥ малпаськоды, Самсон нимез кылыкуды? Тӥляд тодады лыктэ, вылды, Инмарлэн ужась-тыршисез, кудӥз туж кужмо вал. Со озьы ик вань. Но огпол Самсон шонертэм ужпум кутӥз, кудӥз урод бервылъёсы вуттӥз. Озьы ке но Иегова Самсонэз оскымон ужась-тыршисеныз лыдъяз. Соин ик Инмар Самсонлэсь учырзэ Библие пыртӥз, ми солэсь дышетскыны мед быгатомы шуыса. Самсон пыр Иегова паймымон ужъёс лэсьтылӥз, быръем израиль калыкезлы юрттон понна. Самсонлэн кулэмез бере сю аръёс ортчыса, Иегова апостол Павеллэсь мылкыдзэ ӝутӥз Самсонлэсь нимзэ пыртыны соос пӧлы, кинъёслэн юн осконзы вал (Евр. 11:32—34). Туж секыт дыръя но Самсон Иеговалы оскиськиз. Милям дышетскеммы луэ Инмарлэн та ужась-тыршисезлэсь. Солэн учырез милемыз юнматыны быгатэ. w23.09 2 б., 1, 2 абз.

Ми быгатомы эшшо но юнэсь луыны, Иеговалы ӵем вӧсяськимы ке но солы вань шуг-секытъёсмы сярысь верамы ке (1 Фес. 5:17). Оло нош, али тӥляд бадӟымесь шуг-секытъёсты ӧвӧл. Но юалэ асьтэлэсь: «Утчасько-а мон Иеговалэсь юрттэтсэ, куке мылкыды куашкамын яке мар карыны уг тодӥськы?» Тӥ дышемын ке котьку Инмарлы вӧсяськыны, бадӟым шуг-секытъёс дыръя но тӥледлы капчи луоз солэсь юрттэт курыны. Юн оске: со умой тодэ, ку но кызьы тӥледлы юрттоно (Пс. 26:1, 3). Ми али ик ини шуг-секытъёс дыръя юн луимы ке, соку бадӟым куректон дыръя но ваньзэ чиданы быгатомы, дыр (Рим. 5:3). Малы озьы вераны луоз? Тросэз вын-агайёс валазы: куке соос кыӵе ке шуг-секыт дыръя юн кылизы, мукет шуг-секытъёсты чиданы капчигес вал ини. Та соослэсь осконзэс юнматӥз, Иегова соосын артэ но соослы юрттыны дась шуыса. Нош оскон юрттӥз соослы вуоно шуг-секытъёс дыръя но юнэсь луыны (Иак. 1:2—4). w23.07 3 б., 7, 8 абз.

Иегова валась луэмзэ возьматэ, малы ке шуоно со зӥбыт-востэм но гажась-жалясь. Кылсярысь, Иегова зӥбыт-востэм луэмзэ возьматӥз, куке Содомын лек улӥсьёсты быдтыны малпа вал. Кылчинъёс пыр Иегова шонерлыко Лотэз косӥз гурезьёсы пегӟыны. Но Лот кышказ. Со Иеговаез туж куриз лэзьыны солы но семьяезлы Сӥгоре кошкыны. Нош Иегова та пичи карез но быдтыны малпа вал. Иегова Лотэз косыны быгатэ вал аслаз кивалтэтэзлэсь кылзӥськыны. Но Инмар Лотлэсь куронзэ быдэстӥз но Сӥгорез ӧз быдты (Ул.-выл. 19:18—22). Кӧня ке сю аръёс ортчыса, Иегова Ниневияын улӥсьёсты гажаз-жаляз. Инмар Иона пророкез ыстӥз ялыны, та кар но отын улӥсьёс быдтэмын луозы шуыса. Но Ниневияын улӥсьёс ӧпкелизы. Соин ик Иегова соосты гажаз-жаляз но карзэс ӧз быдты (Иона 3:1, 10; 4:10, 11). w23.07 21 б., 5 абз.

Малы милемыз дышетэ Иоаслэн учырез? Со кельше вал мур выжытэм писпулы, кудӥз пыкъеттэк сылыны ӧз быгаты. Иодаез сыӵе пыкъетэн ӵошатыны луэ. Солэн кулэмез бере но Инмарлэсь палэнскем адямиос котыраз кылдэм бере Иоас усиз. Татысь адӟиське, эшъёсмылэсь яке семьямылэсь адӟем карыса гинэ, Инмарлэсь кышкано ӧвӧл шуыса. Инмарен юн кусыпъёс возён понна, милемлы асьмелы тыршоно солы оскымон луыны но солэсь кышкаса улыны. Нош со понна кулэ ялан Библиез эскерыны, со вылын малпаськыны но вӧсяськыны (Иер. 17:7, 8; Кол. 2:6, 7). Иегова милесьтым укыр троссэ уг куры. Солэн куронъёсыз сярысь вакчияк гожтэмын Екклесиастын 12:13: «Инмарлэсь кышка но Солэн курон-косонъёсызъя ул,— та бордын адямилэн вань улонэз возиське». Инмарлэсь кышкамы ке, ми быгатомы вуоно шуг-секытъёсты чиданы но Инмарлы оскымон кыльыны. Соку Иеговаен кусыпъёсмес номыр уз сӧры. w23.06 19 б., 17—19 абз.

Тани кызьы кутске туннэлы кылбур: «Престол вылын Пукись шуиз» (Усьт. 21:5а). Усьтӥськон книгаын куинь пол гинэ гожтэмын, кызьы ачиз Иегова адямиослы вазиське. Та соос пӧлысь одӥгез. Озьыен, та кылъёсты кылчин яке улӟытэм Иисус уг вера, нош ачиз Иегова вера. Нош со «верам кылзэ котьку но быдэсъясь Инмар» (Тит. 1:2). Кызьы ми адӟимы, 5-тӥ кылбурлэн кутсконэз милемыз оскытэ, Усьтӥськонын 21:5, 6 гожтэм кылъёслы быдэсак оскыны луэ шуыса. Пыр-почгес эскеромы «Тани, Мон ваньзэ выльзэ кылдытӥсько» верамез. Та кыл Усьтӥськон книгаын трос пол пумиськылэ. Нош мар собере гожтэмын? Иегова вера: «Мон кылдытӥсько». Со уг вера, «Мон кылдыто» шуыса. Инмар вера вуоно воштӥськонъёс сярысь быдэсмем воштӥськонъёс сярысь кадь. Озьыен, Иеговалэн малпанэз но уг кылды, солэн кылсётонэз уз быдэсмы шуыса (Ис. 46:10). w23.11 3—4 б., 7, 8 абз.

Апостол Пётрлэн тырмымтэосыз выльысь но выльысь кыре потылӥзы. Тани куд-ог учыръёс. Куке Иисус вераз, Библиысь азьпалзэ ивортонъёсты быдэстон понна, солы курадӟоно но кулоно луоз шуыса, Пётр соглаш луымтэзэ возьматӥз (Марк 8:31—33). Пётр но мукет апостолъёс трос пол споръяськизы, кин соос пӧлын бадӟымез шуыса (Марк 9:33, 34). Куке Иисусэз тушмонъёсыз кутӥзы, Пётр мечсэ поттӥз но одӥг адямилэсь пельзэ ӵогыса куштӥз (Иоанн 18:10). Со уе ик кышкаменыз Пётр куинь пол вераз, Иисусэз уг тоды шуыса, Иисус матысь эшез вал ке но (Марк 14:66—72). Собере Пётр туж бӧрдӥз. Но Иисус аслаз апостолэзлы оскемысь ӧз дугды. Со тодӥз, Пётр сое азьло сямен ик яратэ шуыса. Тае возьматыны со солы луонлык сётӥз. Улӟемез бере Иисус Пётрен пумиськиз но солы шуиз: «Мынэсьтым ыжъёсме возьма». Пётр дась луыса та уж борды басьтӥськиз (Иоанн 21:15—17). Иерусалимын Витьтонэтӥ нуналэз пусйыку, Иисуслэн дышетскисьёсыз нырысьсэ святой духен зырӟемын вал. Пётр но соос пӧлын вал. w23.09 22 б., 6, 7 абз.

Апостол Пётр тӧроосты ӧте: «Инмарлэсь уллёзэ... чаклалэ-уте» (1 Пётр 5:1—4). Дуно тӧро, ми тодӥськомы, тон вын-агайёстэ но сузэр-апайёстэ яратӥськод но соос сярысь сюлмаськемед потэ шуыса. Но трос ужъёсыд яке жадеменыд сэрен, оло нош, куд-дыръя тон малпаськод, аслэсьтыд ужъёстэ быдэстыны уд быгатӥськы шуыса. Мар соку кароно? Вера аслад сюлмаськонъёсыд сярысь Иеговалы. Пётр гожтӥз: «Ужаськод-тыршиськод ке, ужа-тыршы сыӵе кужымен, кудзэ тыныд Инмар сётэ» (1 Пётр 4:11). Вын-агайёслэн но сузэр-апайёслэн шуг-секытъёссы выль дуннеын гинэ сэрттэмын-пертчемын луозы, вылды. Эн вунэты: «возьмасьёслэн Кузёйырзы», Иисус Христос, быгатэ соослы юрттыны озьы, кызьы тон уд быгатӥськы. Мае ке но со али лэсьтэ ини, нош мае ке вуонояз лэсьтоз на. Нош али Инмар тӧроослэсь возьма, соос вын-агайёссэс но сузэр-апайёссэс яратозы, соос сярысь сюлмаськозы но соослы адӟем карон возьматозы шуыса. w23.09 29—30 б., 13, 14 абз.

Милемлы палэнсконо адямиослэн малпаськон амалзылэсь. Ми та дуннеысь адямиос сямен малпаськыны кутскимы ке, Иегова сярысь но солэн эсэпъёсыз сярысь вунэтыны но быгатомы (1 Кор. 3:19, 20). Со, «мае адямиос визьмо шуыса лыдъяло», ӵем дыръя адямиослэсь мылкыдзэс ӝутэ, Инмарлэсь кылзӥськытэк улыны. Пергамысь но Фиатираысь куд-ог христианъёс, котырысьтызы адямиос сямен, азыса-калгыса но сульдэр-идолъёслы йыбыртъяса улыны кутскизы. Иисус та кенешъёслы шонерак визь-кенеш сётӥз, малы ке шуоно соос азон-калгонлэсь ӧз палэнске (Усьт. 2:14, 20). Туннэ но ми пӧртэм шонертэм малпанъёсты кылӥськомы. Семьямы но тодмоосмы вераны быгато, Иеговалэн куронъёсыз укыр чурытэсь но соослэсь кылзӥськоно ӧвӧл шуыса. Кылсярысь, соос вераны быгато, мылпотонъёсмылы сётскыны урод ӧвӧл но Библиысь эсэпъёс вужмизы ини шуыса. Нош куддыръя малпан кылдыны быгатэ, Иеговалэн курон-косонъёсыз тырмыт ӧвӧл шуыса. Соин ик мылкыд но ӝутскыны быгатэ Библиын гожтэмлэн «сьӧраз потыны» (1 Кор. 4:6). w23.07 16 б., 10, 11 абз.

Мариялы Иеговалэсь кужым кулэ вал. Со быземын ӧй на ке но, со секытэн луиз. Мариялэн нылпиосыз ӧй вал на ке но, солы будэтоно вал пияшез, кудӥз Мессия луыны кулэ вал! Со сяна, солы вераськоно вал Иосифен, кудӥзлы со бызьыны кулэ вал. Кызьы солы валэктоно, малы со секытэн, со пиосмуртэн кӧламын ӧй вал на ке но? (Лука 1:26—33). Кытысь Мария кужым басьтӥз? Со мукетъёсызлэсь юрттэтсэс утчаз. Кылсярысь, Мария Гавриилэз тросгес вераны куриз солы сётэм уж сярысь (Лука 1:34). Собере ӝоген со мынӥз «гурезё шаере, Иудалэн городаз», Елисавета ӵыжы-выжыез доры. Елисавета Марияез ушъяз но святой духлэн валтэмез улсын вордӥськоно пиез сярысь азьпалзэ ивортон вераз (Лука 1:39—45). Мария шуиз, Иегова солы «Ас киызлэсь кужымзэ возьматӥз» шуыса (Лука 1:46—51). Гавриил но Елисавета пыр Иегова Мариез юнматӥз. w23.10 14—15 б., 10—12 абз.

144 000 зырӟем христианъёс Иисусэн ӵош инмын священникъёс луозы (Усьт. 14:1). Музъем вылын улонзы дыръя Инмар соосты святой духеныз зырӟе но, соос солэн пиосыз луо. Вераны луоз, музъем вылын улыкузы, соос духовной храмлэн Святой интыяз шуыса (Рим. 8:15—17). Святойлэсь но святой инты возьматэ инмез, кытын улэ Иегова. Катанчи, кудӥз Святой инты но Святойлэсь но святой инты вискы ошемын вал, возьматэ Иисуслэсь мугорзэ. Музъем вылын адями кадь улыкуз, со инме ӝутскыны уг быгаты вал. Нош мугорзэ курбонлы сётэмез бере Иисус инме ӝутскиз но вань зырӟем христианъёслы инмын улон понна сюрес усьтӥз. Инмын улон понна, соослы но мугоръёссэс кельтыны кулэ (1 Кор. 15:50; Евр. 10:19, 20). w23.10 28 б., 13 абз.

Куке ефрем калык Гедеонэз пыкылыны кутскиз, со соосын лякытэн вераськиз (Суд. 8:1—3). Гедеон вожзэ ӧз потты. Соосты кылзыса но буйгатыса, Гедеон зӥбыт-востэм луэмзэ возьматӥз. Визьмо тӧроос Гедеонлэсь адӟем каро. Тӧроосты пыкыло ке, соос сыӵе адямиосты сак кылзо но соосын лякытэн верасько (Иак. 3:13). Талы луыса кенеш тупаса улэ. Куке Гедеонэз мадиан калыкез вормемез понна данъяны турто вал, со ваньмыз понна Иеговаез данъяз (Суд. 8:22, 23). Кызьы тӧроос Гедеонлэсь адӟем карыны быгато? Соослэн мар ке но умой пӧрме ке, соослы ваньмыз понна Иеговаез данъяно (1 Кор. 4:6, 7). Кылсярысь, кин ке но тӧроез ушъя умой дышетэмез понна. Соку тӧро та адямилэсь саклыксэ висъяны быгатэ, милемыз ваньмес Инмарлэн Кылыз но Иеговалэн организациез дышето шуыса. Куддыръя тӧролы умой луысал малпаськыны, со аслыз укыр трос саклык уг висъя-а шуыса. w23.06 4 б., 7, 8 абз.

Иегова куронъёсмес уг быдэсты ке, куинь юан вылын малпаськыны луоз. Нырысетӥез: «Зэм-а со, мае мон курисько, мыным туж кулэ?» Ӵем дыръя ми малпаськомы, тодӥськомы шуыса, мар милемлы кулэ. Но Иегова сое умойгес тодэ. Нош куд-ог куронъёсмы Инмарлэн эрикезлы воксё пумит луыны быгато (1 Иоанн 5:14). Шуом, анай но атай Иеговаез куро, нылпизы зэмлыкъя мед улоз шуыса. Со умойтэм курон ӧвӧл, кадь. Но Иегова нокинэ кужмысь уг косы солы ужаны-тыршыны. Солэн потэ, котькудӥз ачиз мед быръёз шуыса солы ужаны-тыршыны (К. Зак. 10:12, 13; 30:19, 20). Соин ик умойгес луоз, анай но атай Иеговалэсь юрттэтсэ куризы ке нылпизылэсь сюлэмзэ вырӟытыны. Озьы соос быгатозы нылпизылы юрттыны Иеговаез яратыны но соин эшъяськыны (Мад. 22:6; Еф. 6:4). w23.11 21 б., 5 абз.; 23 б., 12 абз.

Малы буйгатон — со умой амал мукетъёсызлы яратонмес возьматыны? Одӥг библейской справочникъя, кыл, кудӥз татын «буйгатон» шуыса берыктэмын, возьматэ куректӥсь мурт вӧзын луэмез. Озьыен, куке ми куректӥсь вын-агайёсмес буйгатӥськомы, ми соослы юрттӥськомы азьланяз но Инмарлы оскымон ужаны-тыршыны. Вын-агайёсмес буйгатыса, ми соослы яратонмес возьматӥськомы (2 Кор. 7:6, 7, 13). Буйгатон юн герӟаськемын гажан-жалянэн. Гажась-жалясь адями мукетъёссэ буйгатыны тырше, сюлэм вӧсь луэмзэс капчиятон понна. Озьыен, куке ми адямиосты гажаськомы-жаляськомы, милям соосты буйгатэммы потэ. Апостол Павел Иеговаез «гажан-жалянлэн Атаеныз» нима (2 Кор. 1:3). w23.11 9—10 б., 8—10 абз.

Котькуд христиан мурт шуг-секытъёсын пумиськылэ. Эскеромы апостол Павеллэсь учырзэ. Фессалоникаысь христианъёслы со шуиз: «Тӥ доры вуылыкумы, азьвыл ик тӥледлы вераллямы, курадӟонъёс адӟылоно луомы шуыса. Кызьы тӥ тодӥськоды, озьы ик луиз но» (1 Фес. 3:4). Нош Коринфысь христианъёслы со гожтӥз: «Ми туж зол, чиданы луонтэм куректон-кайгу адӟоно луимы. Ум но малпаське ни вал, улэп кылёмы шуыса» (2 Кор. 1:8; 11:23—27). Туннэ но христианъёс пӧртэм шуг-секытъёсын пумиськыло (2 Тим. 3:12). Оло нош, куке тӥ Христослэн дышетскисез луиды, эшъёсты но ӵыжы-выжыосты асьсэды лек возьыны кутскизы. Оло нош, пӧяськытэк улэменыды сэрен, ужан интыяды шуг-секытъёс кылдӥзы (Евр. 13:18). Оло нош, оскиськонды сярысь мукетъёсызлы вераменыды сэрен, кивалтӥсьёс тӥледлы пумитъяськыны кутскизы. Павеллэн верамезъя, маин гинэ ми медам пумиське, шумпотыны кулэ. w23.12 10—11 б., 9, 10 абз.

Иаков трос шуг-секытъёсын пумиськиз. Солэн кык пиосыз, Симеон но Левий, семьязылэсь ӟеч нимзэ саптазы но Иеговаез сантэмазы. Озьы ик Иаковлэн яратоно кышноез, Рахиль, кыкетӥ нылпизэ вайыкуз, кулӥз. Со сяна, секыт сютэм аръёс сэрен Иаков бадӟым арлыдын Египетэ кошконо луиз (Ул.-выл. 35:16—19; 37:28; 45:9—11, 28). Ваньмыз та шоры учкытэк, Иаков Иеговалы но солэн кылсётонъёсызлы оскыса улӥз. Нош Иегова Иаковез оскытӥз, со солы ярамон шуыса. Кылсярысь, Иегова Иаковлы трос пудо но ляльчиос сётӥз. Иаков Иеговалы туж тау кариз, луоз, куке пумиськиз Иосифен, кудзэ кема дыр ӵоже кулэмын шуыса малпаз. Мар юрттӥз Иаковлы шуг-секытъёс дыръя оскымон кыльыны? Иеговаен матысь эшъяськон (Ул.-выл. 30:43; 32:9, 10; 46:28—30). Милям но Иеговаен матысь кусыпъёсмы луизы ке, соку быгатомы малпамтэ шорысь кылдэм шуг-секытъёсмес чиданы. w23.04 15 б., 6, 7 абз.

22-тӥ псаломын вераське, макем юн оске вал Давид, Иегова сое яратэ но со сярысь сюлмаське шуыса. Давид Иеговаез аслаз Возьмасеныз нима но соин матысь кусыпъёсыз сярысь вера. Давид Инмар вылэ быдэсак оскиське вал, соин ик солэсь кылзӥськыса улэ вал. Та юрттэ вал солы кышкатэк улыны. Давид тодӥз, Иегова сое вань улытозяз яратоз шуыса. Малы солэн сыӵе юн осконэз вал? Давид адӟе вал, Иегова со сярысь умой сюлмаське но котькуд нунал солы ваньзэ кулэзэ сётэ шуыса. Давид тодӥз, Иегова — солэн Эшез но аслаз улонэныз со Инмарез шумпоттэ шуыса. Соин ик со юн оскиз, Иегова со сярысь котьку но сюлмаськоз шуыса. Та юрттэ вал солы кышкатэк но шумпотыса улыны (Пс. 15:11). w24.01 29 б., 12, 13 абз.

Кыкетӥ дунневыл ож йылпумъяськем бере трос шаеръёсын Иеговалэн ужась-тыршисьёсыз кышкатэк тодытыны быгатӥзы. Солы луыса трос адямиос Иеговаен тодматскизы. Нош туннэ Эксэйлык сярысь ивор быдэс дунне вылын вӧлмытӥське. Туннэ но Кивалтӥсь кенешысь агайёс Иисус Христослэсь кылзӥсько. Курон-косонъёс сётыкузы, соос тыршо югдур шоры Иегова но Иисус сямен учкыны. Нош ёросэз чакласьёс но тӧроос со курон-косонъёсты кенешъёслы сёто. Зырӟем тӧроос, озьы ик кенешъёсысь вань тӧроос но, Христослэн «бур кияз» возисько (Усьт. 2:1). Валамон, та агайёс тырбыдэстэмесь но куддыръя янгышало шуыса. Моисей но, Иисус Навин но, апостолъёс но куддыръя янгышазы (Лыд. 20:12; Иис. Н. 9:14, 15; Рим. 3:23). Озьы ке но Иисус оскиськымон ляльчи пыр но тӧроос пыр кивалтэмысь уг дугды. Со сяна, со соос пыр азьланяз но кивалтоз. Соин ик ми быдэсак оскыны быгатӥськомы курон-косонъёслы, кудъёссэ Иисус сётэ быръем агайёс пыр. w24.02 23—24 б., 13, 14 абз.

Ми Иеговаез шумпоттыны быгатӥськомы, со сярысь мукетъёсызлы вераса. Ми вераськомы адямиослы, макем ми яратӥськомы инмысь Атаймес но макем ми солы тау кариськомы. Милям потэ, мукет адямиос но Иеговаез мед тодозы но соос понна но со яратӥсь Атай мед луоз шуыса (Иак. 4:8). Ми шумпотыса адямиослы возьматӥськомы, мар верамын Библиын Иеговалэн яратонэз, шонерлыкез, визьлыкез, кужымез но мукет сямъёсыз сярысь. Озьы ик ми Иеговаез данъяськомы но сое шумпоттӥськомы, куке котькуд нунал солэсь адӟем кариськомы. Озьы лэсьтӥмы ке, мукет адямиос адӟозы, дыр, ми та дуннеысь адямиос кадь ӧвӧл шуыса (Матф. 5:14—16). Соку милям луонлыкмы кылдоз соослы валэктыны, малы ми тросэз адямиос кадь ум улӥське. Сое тодыса, кылзӥськись сюлэмо адямиослэн Инмар сярысь тросгес тодэмзы потоз. Куке ми Иегова сярысь мукетъёсызлы вераськомы но котькуд нунал солэсь адӟем кариськомы, ми Иеговаез шумпоттӥськомы (1 Тим. 2:3, 4). w24.02 10 б., 7 абз.

Зэмос христианъёс луон понна, тӥледлы дышетсконо солы, мар котькуд нунал кулэ луоз. Со юрттоз тӥледлы кенешысь ужъёстэс быдэсъяны, адямиосын умой кусыпъёс возьыны но тупась уж шедьтыны. Кылсярысь, дышетске умой лыдӟиськыны но гожъяськыны. Библиын вераське, адями, кудӥз котькуд нунал Инмарлэсь Кылзэ лыдӟе но со вылын малпаське, шудо но азинлыко луоз шуыса (Пс. 1:1—3). Тӥ Библиез нуналлы быдэ лыдӟиды ке, дышетскоды Иегова сямен малпаськыны но адӟоды, кызьы Библиысь возетъёсты улонады пыртоно (Мад. 1:3, 4). Вын-агайёс но сузэр-апайёс, юрттэт курыса, вазисько агайёслы, кудъёсыз быгато дышетыны но Библия вылэ пыкиськем визь-кенешъёс сётъяны. Тӥ умой лыдӟиськиськоды но гожъяськиськоды ке, тӥ быгатоды мукетъёсызлэсь осконзэс юнматыны, пумиськонъёсын умой малпам валэктонъёс сётъяса но пайдаё речьёс вераса. Озьы ик тӥ быгатоды пайдаё малпанъёсты гожтыны, кудъёсыз юрттозы тӥледлы асьтэлэсь оскондэс юнматыны но мукетъёсызлы юрттыны. w23.12 26—27 б., 9—11 абз.

Куке тӥ кышканы кутскиськоды, малпаське, мае Иегова азьланяз лэсьтоз. Пуктэ син азяды, макем умой улон луоз, куке Шайтан уз луы. 2014-тӥ арын улосысь конгрессын возьматэмын вал, кызьы атай аслаз семьяеныз малпаськиз, мар гожтэмын луысал 2 Тимофейлы 3:1—5, отын выль дунне сярысь вераськысал ке: «Выль дуннеын шудо дыръёс вуозы. Соку адямиос ог-огзэс но Инмарез яратӥсесь луозы; востэмесь, мукетъёссэ гажасесь, лякыт кылын вераськисесь, анай-атайлэсь кылзӥськисесь, тау карисесь, шонерлыкоесь, гажась-жалясесь, простить карисесь, мукетъёсыз сярысь ӟечсэ верасесь, чидасесь, лякытэсь, ӟечез-уродэз валасесь луозы; ог-огзылы оскымонэсь луозы; возьытэз валасесь, зӥбытэсь луозы; каньылэн, эзылыса улон сярысь, Инмарез золгес яратозы. Вань сюлмысьтызы Инмарлы оскозы но ужъёсынызы осконзэс возьматозы. Таӵе муртъёсын эшъяськы». Нош тӥ семьяеныды яке эшъёсыныды ӵош малпаськиськоды-а, кыӵе улон луоз выль дуннеын? w24.01 6 б., 13, 14 абз.

Ми оскиськомы, Иегова аслэсьтыз калыксэ яратэ шуыса. Библиын гожтэмын: «Кузё-Инмарлэн ӟеч эрикез Ас калыкез бордын улэ» (Пс. 149:4). Но кинлэн ке но таӵе юанэз кылдэ, вылды: «Нош монэ Иегова яратэ-а?» Библиын вераське трос адямиос сярысь, кудъёсыз Инмарлы оскымон ужазы-тыршизы, но со дыре ик соослы секыт вал оскыны, Иегова соосты яратэ шуыса (1 Экс. 1:6—10; Иов 29:2, 4; Пс. 50:13). Но Библия возьматэ, сьӧлыко адямиос Иеговалы ярамон луыны быгато шуыса. Мар кароно со понна? Иисус Христослы осконо но пылатӥськоно (Иоанн 3:16). Озьы ми возьматомы: сьӧлыкъёсмы понна ӧпкелимы но Инмарлы кылмес сётӥмы солэсь эриксэ быдэсъяны (Ап. уж. 2:38; 3:19). Иегова туж шумпотэ, соин эшъяськон понна, ми та вамышъёсты лэсьтӥськомы ке. Сӥзиськыкумы сётэм кылмыя улыны тыршиськомы ке, Иегова милемыз аслыз ярамон адямиосын но матысь эшъёсыныз лыдъя (Пс. 24:14). w24.03 26 б., 1, 2 абз.

Ми Иисуслэн дышетскисьёсызлэсь адӟем каромы, тодытӥмы ке соку но, куке кивалтӥсьёс ужмес нуыны уг лэзё. Ми быдэсак оскиськомы, Иегова милемлы тодытон ужез нуыны юрттоз шуыса. Соин ик вӧсяське, кышкасьтэм сям но визьлык курыса. Со сяна, Иеговалэсь юрттэт куре шуг-секытъёс пыр потыны. Ми пӧлысь тросэз курадӟо тазалыкенызы герӟаськем шуг-секытъёсынызы сэрен. Кин ке но куректэ матысь адямиез кулэмен сэрен. Кинлэн ке но семьяяз секыт югдур кылдэмын. Вань соос но, кинъёс уйылон-уллянъёсын но мукет шуг-секытъёсын пумиськыло. Нош инкуазь шимучыръёс, пандемияос но ожмаськонъёс дыръя ваньзэ тае чиданы эшшо но секыт. Сюлэмдэс Иеговалы усьтэ. Вералы солы, матысь эштылы кадь ик, асьтэлэн сюлмаськонъёсты сярысь. Юн оске: Иегова тӥледлы одно ик юрттоз! (Пс. 36:3, 5). Ми ялан вӧсяськимы ке, та юрттоз милемлы, «куректон-кайгу лыктыку, чидасесь» луыны (Рим. 12:12). Иегова тодэ, маин пумиськоно луо солэн ужась-тыршисьёсыз. Библиын гожтэмын, Инмар «викышъям-бӧрдэмзэс кылэ» шуыса (Пс. 144:18, 19). w23.05 5—6 б., 12—15 абз.

Кулэ луись ужпумъёсты кутон азьын «Инмарлэсь эриксэ валаны» тыршоно (Еф. 5:17). Нош кызьы валано Инмарлэсь эриксэ? Шедьтоно Библиысь возетъёсты, кудъёсыз милям учыренымы герӟаськемын. Соосты лыдэ басьтӥмы ке, ми визьмо ужпум кутыны быгатомы. Шайтанлэн потэ, ми та дуннеысь ужъёс пӧлы йырынымы валче мед выёмы но Инмарлы ужан-тыршонлы дырмы медаз кыльы ни шуыса (1 Иоанн 5:19). Куд-ог христианъёс малпаны быгато, коньдон, дышетскон яке уж Иеговалы ужан-тыршонлэсь кулэгес шуыса. Но озьы малпаськыса, соос возьматозы, та дуннеысь адямиос кадь малпаськыны кутскизы шуыса. Валамон, коньдон, дышетскон яке уж ас понназ урод ӧвӧл. Но соослы улонын нырысетӥ инты висъяно ӧвӧл. w24.03 25 б., 16, 17 абз.