Валамтэосты тупатыны но тупаса улыны тырше

ИЕГОВА ИНМАР ӧте христианъёсты ог-огенызы тупаса улонэз дунъяны но лэсьтыны ваньзэ, мае быгато, сое утён понна. Зэмос христианъёс вань кужмысьтызы со ӧтёнлэсь кылзӥськыны тыршо бере, соос ог-огенызы тупаса но огкылысь уло. Соин ик, паймонэз ӧвӧл, соос, кинъёс жадизы ини валамтэослэсь но тупамтэослэсь, христиан кенеше лыкто шуыса.

Тани мар луиз Мадагаскарын. Одӥг тунаськись-пелляськись, Иеговалэн Адӟись-Ивортӥсьёсызлэсь ог-огенызы тупаса улэмзэс адӟыса, туж паймиз, но со солэн сюлмаз йӧтӥз. Со малпаз: «Кыӵе ке религиез бырйыны малпай ке, мон одно ик тазэ быръё». Дыр ортчыса, со тунаськемысь-пелляськемысь дугдӥз. Собере кӧня ке толэзь ӵоже со воштӥськонъёс лэсьтӥз, солэн кузпалъяськонэз Инмарлэн куронъёсызлы мед тупалоз шуыса. Озьы со Иеговалы, тупаса улонлэн Инмарезлы, ужаны-тыршыны кутскиз.

Та пиосмурт сямен ик, котькуд ар трос сюрс адямиос, христиан кенеше лыктыса, каньыллык шедьто, кудӥз соослы туж кулэ вал. Но Библиын верамын, «лек вожъяськон, ачимъяськон» кенешысь тупаса улонэз быдтыны но бадӟым шуг-секытъёс вайыны быгато шуыса (Иак. 3:14—16). Со дыре ик отын туж умой визь-кенешъёс но сётэмын, кызьы со выллем шуг-секытъёслэсь палэнскыны но тупаса улыны. Со визь-кенешъёсты улонамы кутыны капчигес мед луоз шуыса, ойдолэ эскеромы улонысь куд-ог учыръёсты.

ШУГ-СЕКЫТЪЁС НО СООСТЫ СЭРТТОН-ПЕРТЧОН

«Мон нокызьы но огкыл шедьтыны уг быгатӥськы вал вын-агаен, кудӥныз ӵош ужамы. Одӥг пол ми ог-огмы шоры кесяськыны кутскимы. Со куспын кык пиосмуртъёс пыризы но милесьтым керетэммес адӟизы» (КРИС).

«Сузэр, кудӥныз ми ӵемысь ӟеч иворез вераны ветлӥськомы вал, малпамтэ шорысь монэн ветлэмысь дугдӥз. Собере со монэн вераськемысь но дугдӥз. Мон уг валаськы вал, мар луиз» (ДЖАНЕТ).

«Ми куинь кузя телефон пыр вераськиськомы вал. Одӥгез ми пӧлысь «ӟеч луэ» шуиз но, мон малпай, со кошкиз ини шуыса. Соку мон со сярысь кӧня ке умойтэм кылъёс верай, нош со ваньзэ кылэм» (МАЙКЛ).

«Кенешамы кык сузэръёс, кудъёсыз пионер луыса ужало-тыршо вал, керетон поттӥзы. Одӥгез мукетсэ ялан тэргалляз. Соослэн керетэмзы шоры учкыны милемлы капчи ӧй вал» (ГЭРИ).

Вань та учыръёс сокем кышкытэсь кадь уз потэ, дыр. Озьы ке но, котькудӥз учыр быгатысал сюлэмзэс вӧсь карыны соослэсь, кинъёс сюризы сыӵе учыре, но кенешысь тупаса улонэз сӧрыны. Туж шумпотоно, ваньмыз та вын-агайёс но сузэр-апайёс, Библиысь визь-кенешъёсты уже кутыса, кусыпъёссэс тупатӥзы шуыса! Кыӵе возетъёс соослы юрттӥзы?

«Сюрес вылын эн керетэ» (Ул.-выл. 45:24). Та визь-кенешез Иосиф аслаз агайёсызлы сётӥз, куке соос атайзы доры бертыны потӥзы. Макем визьмо кылъёс вераз со соослы! Адями ассэ кияз возьыны уг быгаты ке, со капчиен мукетъёсыныз керетыны кутске. Крис, кудӥз сярысь вылӥынгес верамын вал, валаз, солэн умойтэм сямъёсыз вань шуыса: вылтӥяськонэз но кылзӥськымтэез. Воштӥськыны тыршыса, Крис вын-агаез простить карыны куриз но, вань кужымзэ поныса, ассэ кияз возьыны тыршиз. Крислэсь тыршемзэ адӟыса, солэн ӵош ужасез но воштӥськыны кутскиз. Али соос туж шумпото, Иеговалы ӵош ужаны-тыршыны быгато шуыса.

«Визь-кенештэк мытэм уж куашка» (Мад. 15:22). Джанет валаз, солы та кенешлэсь кылзӥськоно шуыса. Со ужпум кутӥз кылдэм югдур сярысь со сузэрен вераськыны. Джанет лякытэн куриз вераны, мар сузэрез ӝоже уськытӥз. Нырысь кыкназылы ик секыт вал. Нош куке соос каньылэн вераны кутскизы асьсэлэн шӧдонъёссы сярысь, пумен вераськыны капчигес луиз. Со сузэр адӟиз, со югдурез шонертэм валаз но Джанет отын янгыш ӧвӧл шуыса. Со Джанетэз простить карыны куриз. Али соос нош ик Иеговалы ӵош ужало-тыршо.

«Соин ик, кузьымдэ курбон сётон интые вайид но, отысен тодад лыктӥз ке, братэдлэн тыныд кыӵе ке но кӧтӝожез вань шуыса, соку курбон сётон ӝӧк доры кузьымдэ кельты, мын, нырысь ик тупа братэныд» (Матф. 5:23, 24). Та визь-кенешез тӥ Иисуслэн Гурезь йылын тодытонысьтыз тодӥськоды, луоз. Куке Майкл валаз, макем умойтэм со лэсьтӥз, солы туж урод луиз. Со малпаз лэсьтыны ваньзэ, мае быгатэ, со вын-агаен кусыпъёссэс тупатон понна. Со вераськиз соин пумиськыны но простить карыны куриз. Мар луиз собере? Майкл вера: «Вын-агае сюлмысьтыз монэ простить кариз». Соос нош ик эшъяськизы.

«Ог-огдэс чидаса улэ, кинлэн ке кин ке вылэ йыркурез вань ке, ог-огдылы простить каре» (Кол. 3:12—14). Кызьы кык сузэръёс, кудъёсыз сярысь вылӥынгес верамын вал, тупамтэоссэс сэрттыны-пертчыны быгатӥзы? Одӥг тӧро умоен юрттӥз соослы таӵе юанъёс вылын малпаськыны: «Вань-а милям правомы керетонъёсынымы мукетъёссэ ӝоже уськытыны? Вань-а милям зэмзэ ик мугмы, ог-огенымы кусыпъёсмес тупатытэк, азьланяз но Иеговалы ужаны-тыршыны?» Сузэръёс сётэм визь-кенешлэсь кылзӥськизы. Табере соослэн кусыпъёссы тупазы, но соос ӵош шумпотыса ӟеч иворез верало.

Тӥледыз кин ке но ӝоже уськытӥз ке, нырысь Колоссыослы 3:12—14 сётэм возетэз уже кутыса утчалэ. Тросэз валазы, зӥбыт-востэм луоно но простить карыны дась луоно шуыса. Нош куддыръя со гинэ тырмыт уг луы. Соку Матфейлэсь 18:15 гожтэм возет юрттоз. Та визь-кенеш вера, мар кароно, куке одӥг адями мукетызлы пумит секыт сьӧлыка. Озьы ке но, тӥ сое асьтэлэн учырады но уже кутыны быгатоды. Вын-агай яке сузэр-апай доры мынэ но, тырше лякытэн вераськыны но кусыпъёстэс тупатыны.

Библиын мукет но пайдаё визь-кенешъёс вань, кудъёсыз кусыпъёсыз тупатыны юртто. Соос милемлы пайда мед ваёзы шуыса, милям луыны кулэ со сямъёсмы, кудъёсыз святой духлэн емышез пӧлы пыро,— «яратон, шумпотон, тупаса улон, чидась луон, лякытлык, гажась-жалясь луон, ог-огедлы оскиськымон луон, зӥбыт-востэм луон, возиськыны быгатон» (Гал. 5:22, 23). Та Инмарлы ярась сямъёс вӧй кадь луо, кудӥныз ӟукыртӥсь ӧсэз вӧяло. Соос ӝоггес кусыпъёсты тупатыны юртто.

ПӦРТЭМ СЯМЪЁС КЕНЕШЕЗ УЗЫРГЕС КАРО

Котькудӥзлэн асьме пӧлысь аслаз сямыз. Ми ваньмы пӧртэм сямен учкиськомы со яке та шоры, пӧртэм сямен асьмеды возиськомы. Ваньмыз со милесьтым кусыпъёсмес узыргес но тунсыкогес каре. Озьы ке но, сямъёсмылэн пӧртэм луэменызы сэрен, валамтэос кылдыны быгато. Одӥг вын-агай, кудӥз трос аръёс ини тӧро луыса ужа-тырше, таӵе пример вераз: «Возьдаськись адямилы вераськись но мукетъёсыныз капчиен огкыл шедьтӥсь адямиен артэ луыны секыт. Сыӵе пӧртэмлык кышкыт кадь уг поты ке но, со бадӟым шуг-секытъёс вайыны быгатэ». Нош котьку-а пӧртэм сямо адямиос куспын валамтэос кылдо? Ойдолэ тодамы ваёмы кык апостолъёсты, Пётрез но Иоаннэз. Кыӵе адями вал Пётр? Со ӝог пурӟись но малпанъёссэ шонерак верась адями вал шуыса, вералоды, вылды. Нош Иоанн? Со туж небыт адями вал но туж малпаськыса мае ке вера яке лэсьтэ вал. Та апостолъёс сярысь юнме озьы уг верало. Пётр но Иоанн чылкак пӧртэм адямиос вал, кадь. Озьы ке но, соос, ог-огенызы тупаса, ӟеч иворез веразы (Ап. уж. 8:14; Гал. 2:9). Кызьы адӟиське, пӧртэм сямо христианъёс но огкылысь ужаны-тыршыны быгато.

Кенешады вань, дыр, вын-агай, кудӥзлэн вераськемез но ассэ воземез тӥледлы уг кельшы. Но тодады возёно, Христос со адями понна но кулӥз шуыса, соин ик тӥледлы сое яратыны кулэ (Иоанн 13:34, 35; Рим. 5:6—8). Шонертэм луысал, тӥ солэсь палэнскысалды но малпасалды ке, соин ноку но эшъяськыны уд быгатэ шуыса. Со интые юалэ асьтэлэсь: «Лэсьтэ-а со вын-агай мае ке, мар Библилы пумит луэ? Луоз-а вераны, со юри мынэсьтым йырме кур каре шуыса? Яке милям соин сямъёсмы пӧртэмесь но соин со мыным уг кельшы-а?» Тани эшшо одӥгез кулэ луись юан: «Кыӵе умой сямъёслы мон солэсь дышетскыны быгатысал?»

Берпуметӥ юан валтӥсез луэ. Адями вераськыны яратэ ке, нош тӥ ӵемгес шып улӥськоды, малпаське, макем капчиен со, ӟеч иворез веракуз, адямиен вераськыны кутске. Тӥ сое ӧтьыны быгатоды ӵош тодытыны, солэсь малы ке дышетскон понна. Яке, кылсярысь, со маиз вань, ваньзэ жалятэк сётэ мукетъёсызлы, нош тӥледлы секыт луэ озьы лэсьтыны. Малпалэ, макем со шумпотэ, куке арлыдоослы, висисьёслы яке ёрмисьёслы юрттэ. Озьыен, тӥ чутрак пӧртэмесь ке но, адямилэсь умой сямъёссэ адӟыны тыршыса, соин умой кусыпъёс возьыны быгатоды. Тӥ матысь эшъёс ӧд луэ ке но, быгатоды ог-огеныды тупаса улыны. Со пайда ваёз тӥледлы но, быдэс кенешлы но.

Еводиялэн но Синтихиялэн сямъёссы туж пӧртэмесь вал, вылды. Озьы ке но, апостол Павел ӧтиз соосты «Кузё-Инмарлы тыршыса, огмылкыдын» улыны (Флп. 4:2). Тыршиськоды-а тӥ озьы ик огмылкыдын но тупаса улыны?

ВАЛАМТЭОСТЫ ӜОГГЕС ТУПАТЫНЫ ТЫРШЕ

Умойтэм шӧдонъёс сяська пӧлын будӥсь жаг турын кадь. Ми соосты выжыенызы валче ӧм быдтэ ке, соос эшшо но тросгес но юнгес луозы. Адямилэн пушказ кӧтӝожез вань ке, со быдэс кенеш вылын шӧдӥськыны быгатэ. Иеговаез но вын-агайёсмес яратон милесьтым мылкыдмес ӝутэ лэсьтыны ваньзэ, мае быгатӥськомы, сямъёсмылэн пӧртэм луэмзы Инмарлэн калыкез пӧлысь тупаса улонэз медаз сӧры шуыса.

Мукетъёсыныз тупаса улыны тыршыса, валамтэосты но тупамтэосты сэрттӥськомы-пертчиськомы ке, со паймымон емышъёс вайыны быгатоз. Тани мар луиз одӥг сузэрен. Со вера: «Мыным потэ вал, одӥг сузэр монэн пичи пиналэн кадь выре шуыса. Мынам солы туж йыры кур луэ вал. Йыркуре будэмен, мон соин уродэн вераськыны кутски. Мон малпай: „Со монэ чик уг гажа. Соин ик мон но сое уг гажа“».

Собере сузэр малпаськыны кутскиз, кызьы со ачиз ассэ возиз. Со шуэ: «Мон адӟи, мынам аслам но урод сямъёсы вань шуыса, но туж куректӥ со понна. Мон валай: мыным воштӥськыны кулэ. Ваньзэ Иеговалы вераса, мон сузэрлы пичияк кузьым басьтӥ но открытка гожтӥ, кудаз монэ простить карыны кури, асме умойтэм вози шуыса. Ми ӟыгырскимы но, мар вал, ваньзэ вунэтыны кыл сётӥмы. Со дырысен ми тупаса улӥмы».

Адямиос куспын тупаса улон ӧвӧл. Озьы ке но, тросэз, вылтӥяськеменызы сэрен яке кыӵе ке кышкытлык кылдэмен, асьсэды тушмонъёс кадь возьыны кутско. Ӵемгес озьы асьсэды возё соос, кинъёс Иеговалы уг йыбыртъяло. Нош соос пӧлын, кинъёс Иеговалэсь нимзэ нулло, тупаса но огмылкыдысь улон луыны кулэ. Инмарлэн кивалтэмез улсын Павел гожтӥз: «Сюлворыса курисько: Инмарлэн ӧтем улонэзлы тупамон улэ: востэм, зӥбыт улэ; ваньзэ чидалэ, огдэс огды гажалэ-яратэлэ. Одӥг духен тупаса, огмылкыдын улыны тырше» (Еф. 4:1—3). Огмылкыдын улон туж дуно луэ. Ойдолэ туж тыршомы озьы улыны но куспамы кылдэм котькуд тупамтэосты сэрттомы-пертчомы.