Зэмлыклы дышетэ

1, 2. а) Мар Иисуслэн улоназ нырысетӥ интыын вал но малы? б) Мар юрттоз милемлы ужан-тыршонын азинлыко луыны?

ИИСУС ХРИСТОС тӥрен ужась, яке пу бордын ужась, вал, нош бератаз со дышетӥсь луиз (Марк 6:3; Иоанн 13:13). Со быгатыса быдэсъяз кыксэ ик та ужъёсты. Пу бордын ужась кадь со дышетскиз пӧртэм тӥрлыкъёсты уже кутыны, огшоры пулэсь туж кулэ арбери лэсьтон понна. Нош дышетӥсь кадь со Гожтэмъёсты мур тодэмзэ быгатыса уже кутӥз но огшоры адямиослы Инмарлэн Кылысьтыз зэмлыкъёсты валэктылӥз (Матф. 7:28; Лука 24:32, 45). Куамын арескын Иисус пу бордын ужамысь дугдӥз но ӟеч иворез вераны кутскиз, малы ке шуоно со тодэ вал, со тужгес но кулэ уж шуыса, кудзэ солы быдэстоно. Со вераз, Инмарлэн Эксэйлыкез сярысь ӟеч иворез тодытон одӥгез муг луэ шуыса, малы сое Инмар музъем вылэ ыстӥз (Матф. 20:28; Лука 3:23; 4:43). Иисус понна ӟеч иворез тодытон нырысетӥ интыын вал, но солэн потэ вал, соин ӵош мукетъёсыз но ӟеч иворез мед вералозы шуыса (Матф. 9:35—38).

² Асьмеос пӧлысь куд-огез гинэ пу бордын ужало, но ваньмы асьмеос адямиосты Библиысь зэмлыклы дышетӥськомы. Та кулэ луись уже ачиз Инмар пыриське, Библия юнме уг нима ук милемыз «Инмарлэн ужасьёсыз», яке ӵош ужасьёсыз, шуыса (1 Кор. 3:9; 2 Кор. 6:4). Ми тодӥськомы: Иеговалэн «кылызлэн инъетэз — зэмлык» (Пс. 118:159, 160). Соин ик котькудмылы «зэмлыклэсь кылзэ» шонер дышетыны кулэ. (Лыдӟе 2 Тимофейлы 2:15.) Со понна милемлы дышетсконо быгатыса уже кутыны Библиез — валтӥсь тӥрлыкез, кудӥз юрттэ милемлы адямиосты Иегова сярысь, Иисус Христос сярысь но Эксэйлык сярысь зэмлыклы дышетыны. Адямиосты зэмлыклы дышетыны мед быгатомы шуыса, Иеговалэн организациез дышетон тӥрлыкъёсты дасяз, кудъёссэ умой уже кутыны дышетсконо.

3. Кыӵе ужпумез луыны кулэ ужан-тыршонмылэн, ӟеч иворез вераны дырмы вань на бере? Кыӵе адямиосты милемлы утчано, кызьы верамын Апостолъёслэн ужъёсазы 13:48?

³ Та тӥрлыкъёс дасямын адямиосты дышетон понна, соослы ӟеч иворез тодытон понна гинэ ӧвӧл. Тодытӥсь иворез вера гинэ, нош дышетӥсь сое валэктэ. Дышетӥсьлэн ужпумез — валэктыны адямилы иворез но сое сюлмаз пыртыны, бератаз адями соя мед улоз шуыса. Ӟеч иворез вераны дырмы вань на бере, милемлы вань кужыммес пононо но тыршоно адямиосын Библиез дышетыны кутскыны но соосты зэмлыклы дышетыны. Соин ик ми тыршиськомы шедьтыны соосты, «кин быронтэм улон шоры шонер амалэн учке», но юрттӥськомы соослы Иеговалэн ужась-тыршисьёсыз луыны. (Лыдӟе Апостолъёслэсь ужъёссэс 13:44—47, 48 кылбурез лыдӟе сноскаысьa.)

4. Кызьы шедьтоно соосты, «кин быронтэм улон шоры шонер амалэн учке»?

⁴ Нош кызьы шедьтоно соосты, «кин быронтэм улон шоры шонер амалэн учке»? Нырысетӥ даурын кадь ик сыӵе адямиосты шедьтон понна одӥг гинэ амал — со адямиослы ӟеч иворез вераны. Соин милемлы кылзӥськоно Иисуслэн косонэзлэсь: «Кыӵе гинэ городэ яке гуртэ пыриды ке, ярамон муртэ шедьтэ» (Матф. 10:11). Зэм, кылзӥськисьтэм, вылтӥяськись адямиос но соос, кинъёслэн Инмар сярысь тодэмзы уг поты, милесьтым ивормес уз кылзэ, дыр. Ми утчаськомы пӧяськисьтэм, кылзӥськись адямиосты но соосты, кинъёслэн зэмлыкез тодэмзы потэ. Сыӵе адямиосты утчанэз ӵошатыны луоз соин, кызьы Иисус пу бордын ужаз. Со тупась пу утча вал, солэсь кыӵе ке арбери лэсьтон понна, кылсярысь, пукон, ӧс яке сиес. Собере басьтэ вал аслэсьтыз тӥрлыкъёссэ но, вань быгатэмзэ поныса, кулэ луись арбери лэсьтэ. Озьы ик ми но, нырысь утчаськомы кылзӥськись адямиосты, нош собере, дышетон тӥрлыкъёсты усто уже кутыса, юрттӥськомы соослы Христослэн дышетскисьёсыз луыны (Матф. 28:19, 20).

5. Мае милемлы тодоно дышетон тӥрлыкъёс сярысь? Вералэ пример. (Учке статья кутсконысь туспуктэмъёсты.)

⁵ Котькуд тӥрлыклэн аслаз ужпумез. Басьтомы, кылсярысь, пу бордын ужан тӥрлыкъёсты, кудъёсыныз ужаз Иисусb. Со тӥрлыкъёсын Иисус мерталляз, пус пуктылӥз, вандылӥз, пасьялляз, огазеяз, шонертылӥз но мукет. Озьы ик милям но котькуд тӥрлыкмылэн, кудзэ ми ужан-тыршонын уже кутӥськомы, аслаз нимысьтыз ужпумез вань. Ойдолэ эскеромы, кызьы ми соосты уже кутыны быгатомы.

АСЬМЕМЫН ТОДМАТӤСЬ ТӤРЛЫКЪЁС

6, 7. а) Кызьы тӥ визитной карточкаосты уже кутӥськоды? б) Кыӵе кык ужпумез быдэстэ кенешлэн пумиськонъёсаз ӧтён?

⁶ Визитной карточкаос. Соос пичиесь, но туж пайдаё. Соос юртто адямиослы тодыны, кинъёс ми, нош озьы ик jw.org сайтэнымы тодматскыны, кытысь тросгес тодыны луэ милям ужмы сярысь но Библия дышетон сярысь курыны. Та сайт пыр 400 000-лэсь тросгес адямиос Библия дышетон сярысь куризы ини, но котькуд нунал трос сю выльёсыз Библия дышетон сярысь куро! Котьку сьӧрамы басьтыны луоз кӧня ке визитной карточкаосты, тупась учыре соосты кинлы ке но ӵектон вылысь.

⁷ Ӧтёнъёс. Кенешлэн пумиськонъёсаз ӧтён кык ужпумез быдэстэ. Отын гожтэмын: «Ӧтиськомы тӥледыз Иеговалэн Адӟись-Ивортӥсьёсыныз ӵош Библиез дышетыны» — но кык амал ӵектэмын: Эксэйлык юртэ пумиськонъёсы ветлыны яке нимаз Библиез дышетыны. Озьыен, та тӥрлыкез уже кутыса, ми юрттӥськомы адямиослы тодыны, кинъёс ми, но ӵектӥськомы Библиез дышетыны соослы, кинъёслэн Инмар сярысь тодэмзы потэ (Матф. 5:3). Ми адямиосты пумиськонъёсамы ӧтиськомы но ум учкиське, потэ-а соослэн Библиез дышетэмзы, уг-а. Нош адями пумиськонамы лыктӥз ке, адӟоз, макем трос тодон-валан сётэ Библияc.

8. Малы туж кулэ, адями одӥгаз ке но пумиськонамы мед лыктоз шуыса? Вералэ пример.

⁸ Туж кулэ адямиосты ӧтьыны одӥгаз ке но пумиськонамы лыктыны. Пумиськонамы лыктыса, соос адӟозы, Иеговалэн Адӟись-Ивортӥсьёсыз Библиысь зэмлыклы дышето но адямиослы Инмарез тодыны юртто шуыса, нош зэмос луисьтэм религиос — уг (Ис. 65:13). Ӵапак солы саклыксэс висъязы США-ын улӥсь Рей но Линда. Кӧня ке аръёс талэсь азьло соос черке ветлыны ужпум кутӥзы. Соос Инмарлы оско вал, но соослэн Инмар сярысь тодэмзы потэ вал, соин ик соос карысьтызы котькуд черке пыраны малпазы. Нош каразы черкъёссы туж трос вал. Кутсконысеныз ик Рей но Линда малпазы, мае соос чаклалозы, асьсэлы черк бырйыкузы. Нырысь ик, черкын служба дыръя соос мае ке выльзэ тодыны кулэ, нош кыкетӥез, черке ветлӥсьёсъя адӟиськыны кулэ, соос Инмарлы ужало-тыршо шуыса. Кӧня ке ар куспын Рей но Линда карысьтызы вань черкъёсы вуылӥзы, но тупасьсэ ӧз шедьтэ. Одӥгаз но черкын соос номыр выльзэ ӧз тодэ, нош черке ветлӥсьёслэн дӥськутсыя уг адӟиськы вал, соос Инмарлы ужало-тыршо шуыса. Берпуметӥ черке пырамзы бере Линда уж дораз кошкиз, нош Рей дораз бертӥз. Эксэйлык юрт вӧзтӥ ортчыкуз, Рей малпаз: «Пырало ай, учко, мар каро отын». Веранэз но ӧвӧл, Эксэйлык юртын солы туж кельшиз: котькин ӝикыт дӥсяськемын но пальпотэ. Рей нырысетӥ радэ пуксиз, но ваньмыз, мае со кылӥз, солэн сюлмаз пыриз. Кызьы вераз вал Павел, христиан пумиськонэ нырысетӥзэ лыктэм адями адӟемезлы сокем паймыны быгатоз, со вералоз: «Зэмзэ ик, Инмар тӥ пӧлын» (1 Кор. 14:23—25). Ӵапак сыӵе шӧдонъёсыз вал Рейлэн. Со котькуд арняе Эксэйлык юртэ ветлыны кутскиз, нош собере арня вискысь пумиськонъёсы но. Соин ӵош Линда но ветлыны кутскиз. Соослы 70 ареслэсь тросгес вал ке но, соос Библиез дышетыны кутскизы но, дыр ортчыса, пылатӥськизы.

ВЕРАСЬКОНЭЗ КУТСКЫНЫ ЮРТТӤСЬ ТӤРЛЫКЪЁС

9, 10. а) Малы буклетъёсты ужан-тыршонын уже кутыны капчи? б) Валэктэ, кызьы уже кутоно «Мар со сыӵе Инмарлэн Эксэйлыкез?» буклетэз.

⁹ Буклетъёс. Милям тямыс буклетъёсмы вань, кудъёсыз юртто милемлы капчиен адямиен вераськыны кутскыны. Соос 2013-тӥ арысен печатласькыны кутскизы, но со дырысен вить миллиардлэсь тросгес буклетъёс печатламын ини! Со буклетъёс одӥг кадь радъямын, соин ик, одӥгзэ уже кутыны дышетскыса, тӥ мукетъёссэ но уже кутыны быгатоды. Кызьы, соосты уже кутыса, адямиен вераськыны кутскыны?

¹⁰ Басьтомы, кылсярысь, «Мар со сыӵе Инмарлэн Эксэйлыкез?» буклетэз. Возьматэ адямилы нырысетӥ бамысь юанэз но юалэ солэсь: «Тӥ куке малпаськиды-а, мар со сыӵе Инмарлэн Эксэйлыкез?» Собере возьматэ солы ӵектэм валэктонъёсты но юалэ, мар со малпа. Вератэк, адями шонер валэктон сётӥз-а, ӧз-а, усьтэ буклетысь «Мар вера Библия» подзаголовокез но лыдӟе Библиысь гожтэм кылбуръёсты — Данииллэсь 2:44 но Лукалэсь 1:32, 33. Луэ ке, азьланьтэ вераськондэс. Собере адямилэсь саклыксэ висъялэ «Малпаськелэ» подзаголовокысь «Кыӵе луоз улон Инмарлэн Эксэйлыкезлэн кивалтэмез улсын?» юанлы. Озьы тӥ тододы, мар сярысь мукет дыръя вераськыны. Адями доры выльысь лыктэмды бере эскере соин «Малы дышетэ милемыз Библия?» книгалэн вакчи пуштросысьтыз 8-тӥ юанэз. Та публикация — эшшо одӥгез дышетон тӥрлык, кудӥз юрттэ адямиен Библиез дышетыны кутскыны.

БИБЛИЛЫ ОСКОНЭЗ ЮНМАТӤСЬ ТӤРЛЫКЪЁС

11. Мае лыдэ басьто, куке быръё, кыӵе темаен журнал поттоно? Мае милемлы тодоно журналъёс сярысь?

¹¹ Журналъёс. «Возьмаськон башня» но «Сайкалэ!» — со журналъёс, кудъёсыз дунне вылын самой бадӟым лыдын поттӥсько но самой трос кылэ берыктӥсько. Соосты пӧртэм шаеръёсын лыдӟо. Соин ик, журналэз дасяку, сыӵе темаосты быръё, соос тунсыко мед луозы шуыса вань адямиослы, кытын гинэ соос медаз улэ. Та журналъёс юртто милемлы валэктыны адямилы, кызьы пайдаё визь-кенешъёс шедьтоно, кудъёсыз улонэз умойгес карозы. Но нырысь тодоно, кинлы соос поттӥсько.

12. а) Кинлы поттӥське «Сайкалэ!» журнал но кыӵе солэн ужпумез? б) Вералэ, кызьы тӥ кемалась ӧвӧл та журналэз ӵектӥды.

¹² «Сайкалэ!» журнал поттӥське адямиослы, кудъёсыз Библиез ӧжыт тодо яке чик но уг тодо сое. Оло нош, со адямиос номыр но уг тодо христиан дышетонъёс сярысь яке религилы оскемысь дугдӥзы, оло нош, соос уг оско, Библия соослы юрттыны быгатэ шуыса. «Сайкалэ!» журналлэн валтӥсь ужпумез — оскытыны лыдӟисез, Инмар вань шуыса (Рим. 1:20; Евр. 11:6). Со сяна, та журнал оскытэ, Библия — со «Инмар кыл» шуыса (1 Фес. 2:13). Тани кыӵе темаос эскерисько 2018-тӥ арын «Сайкалэ!» журналъёсын: «Мар кароно, шудо луон понна», «12 визь-кенеш, кызьы семьяын шудо луоно» но «Кайгырисьёслы юрттэт».

13. а) Кинлы поттӥське вӧлмытон понна поттэм «Возьмаськон башня» журнал? б) Вералэ, кызьы тӥ кемалась ӧвӧл та журналэз ӵектӥды.

¹³ «Возьмаськон башня» журнал, вӧлмытон понна поттэмез, валэктэ Библиысь дышетонъёсты соослы, кинъёс ӧжыт ке но гажало ини Инмарез но солэсь Кылзэ. Со адямиос Библиез ӧжыт тодо ке но, валанзы шонер ӧвӧл на (Рим. 10:2; 1 Тим. 2:3, 4). Тани кыӵе темаос эскерисько 2018-тӥ арын вӧлмытон понна поттэм «Возьмаськон башня» журналъёсын: «Библия вужмемын ӧвӧл на-а?», «Мар ваёз вуоно улон?» но «Яратэ-а асьмемыз Инмар?».

БИБЛИЕЗ ДЫШЕТЫНЫ МЫЛКЫДЭЗ ӜУТӤСЬ ТӤРЛЫКЪЁС

14. а) Кыӵе ужпумзы валтӥсь дышетон тӥрлыкъёс пӧлысь куинь видеороликъёслэн? б) Вералэ, кызьы тӥ адямилы одӥгзэ ке но видеороликмес возьматыны быгатӥды?

¹⁴ Видеороликъёс. Иисус музъем вылын улыку, пу бордын ужасьёслэн огшоры тӥрлыкъёссы вал. Али соослэн электротӥрлыкъёссы вань ини, кылсярысь, электропилаос, электродрельёс, волятон машинаос но мукет. Нош милям, печатлам публикациосмы сяна, туж умой видеороликъёсмы вань, кудъёсыз пӧлысь куинез пыро валтӥсь дышетон тӥрлыкъёс пӧлы: «Малы Библиез дышетоно?», «Кызьы ортчытӥське Библиез дышетон?» но «Мар каро Эксэйлык юртын?». Та видеороликъёс пӧлысь куд-огзэ умой луэ возьматыны, адями доры нырысетӥзэ лыктыку, нош мукетъёссэ — выльысь лыктыку. Со туж умой тӥрлыкъёс, малы ке шуоно соос адямиослэсь мылкыдзэс ӝуто Библиез дышетыны но пумиськонъёсамы лыктыны.

15. Вералэ, кызьы адями вылын шӧдӥське анай кылыныз видеоролик учкемез.

¹⁵ Одӥгез сузэрмы Микронезиысь лыктэм кышномуртэз пумитаз. Со тодӥз, со кышномуртлэн анай кылыз яп шуыса. Сузэрмы солы со кылын «Малы Библиез дышетоно?» видеороликез возьматӥз. Куке кышномурт анай кылзэ кылӥз, со шумпотыса вераз: «Паймоно кадь, та мынам анай кылы ук! Вераськемезъя со адями милям шормуӵысьтымы. Со мынам кылыным вераське!» Собере со кышномурт вераз, jw.org сайтысь учкоз но лыдӟоз шуыса ваньзэ, мар вань яп кылын. (Ӵошатэ Апостолъёслэсь ужъёссэс 2:8, 11.) Нош тани мукетыз учыр, кудӥз та видеороликен ик герӟаськемын. США-ысь одӥг сузэрмылэн агаезлэн пиез улэ шаерын, кытын милемлы Инмарлы йыбыртъяны люкето. Сузэрмы солы солэн кылыныз видеоролик вылэ ссылкаез ыстӥз. Видеороликез учкыса, агаезлэн пиез гожтӥз сузэрмылы: «Мыным тужгес но тунсыко потӥз видеороликлэн со люкетэз, кудаз верамын, та дунне кужмо но лек кивалтӥсьлэн киулаз возиське шуыса. Мон кури монэн Библиез дышетыны».

ЗЭМЛЫКЛЫ ДЫШЕТЫНЫ ЮРТТӤСЬ ТӤРЛЫКЪЁС

16. Валэктэ, кыӵе ужпумзы та брошюраослэн: а) «Кылзӥськы Инмарлэсь но пырак ул», б) «Мае ми тодыны быгатӥськомы Инмарлэн Кылысьтыз?», в) «Кин туннэ Иеговалэсь эриксэ быдэсъя?».

¹⁶ Брошюраос. Кызьы дышетоно зэмлыклы адямиез, кудӥз урод лыдӟиське яке солэн кылыныз нокыӵе но публикациос ӧвӧл? Сыӵе учырлы милям тупась тӥрлыкмы вань — «Кылзӥськы Инмарлэсь но пырак ул» брошюраd. Нош «Мае ми тодыны быгатӥськомы Инмарлэн Кылысьтыз?» брошюра — со туж умой тӥрлык, кудӥз юрттэ адямиен Библиез дышетыны кутскыны. Возьматэ адямилы 1-тӥ бамысь 20 юанъёсты но юалэ, кудӥз юан солы тужгес но тунсыко потэ. Собере кутске эскерыны быръем юанэз. Сыӵе амал туж умой луоз, куке адями доры выльысь лыктӥськоды. Валтӥсь дышетон тӥрлыкъёсмы пӧлысь куинетӥез брошюра — «Кин туннэ Иеговалэсь эриксэ быдэсъя?». Солэн ужпумез — тодматыны дышетскисьёсты Инмарлэн организациеныз. 2017-тӥ арын южтолэзь понна поттэм «Христиан улонмы но ужан-тыршонмы» ужан тетрадьын сётэмын вал визь-кенешъёс, кызьы та брошюраез уже кутоно котькуд Библиез дышетонын.

17. а) Кыӵе ужпумзы книгаослэн, кудъёсызъя ми Библия дышетон ортчытӥськомы? б) Мар кароно ваньмызлы, кин пылатӥське, но малы?

¹⁷ Книгаос. Адямиен брошюрая Библиез дышетыны кутскыса, тӥ котьку быгатоды «Малы дышетэ милемыз Библия?» книгае выжыны. Со юрттоз Библиысь валтӥсь зэмлыкъёс сярысь тросгес тодон-валан басьтыны. Та книгаез дышетыса быдтӥды ке но адями духовной азинсконъёс лэсьтэ ке, соку кутске соин «Инмарлэн яратоназ улэ» книгаез (ӟуч) дышетыныe. Со юрттоз дышетскисьлы Библиысь возетъёсты улоназ пыртыны. Тодады возе: адями пылатӥськиз ке но, тӥледлы азьланьтоно соин Библиез дышетыны но кыксэ ик книгаез дышетыса быдтоно. Со юрттоз солы зэмлыкын юн сылыны. (Лыдӟе Колоссыослы 2:6, 7.)

18. а) Мар карыны милесьтым мылкыдмес ӝутэ 1 Тимофейлы 4:16? б) Кыӵе ужпумез тодамы возёно, дышетон тӥрлыкъёсты уже кутыку?

¹⁸ Ми — Иеговалэн Адӟись-Ивортӥсьёсыз, соин ик милемлы дышетоно адямиосты «зэмлыклэн кылызлы — Ӟеч Иворлы», кудӥз адямиослы пырак улыны оскиськон сётэ (Кол. 1:5; лыдӟе 1 Тимофейлы 4:16). Та удысын милемлы юрттозы валтӥсь дышетон тӥрлыкъёс. (Учке «Валтӥсь дышетон тӥрлыкъёс» рамкаез.) Ойдолэ тыршомы дышетскыны соосты умойгес уже кутыны. Котькуд ивортӥсь ачиз ужпум кутыны быгатэ, ку но кыӵе дышетон тӥрлыкез кутоно. Милям уг поты публикациосмес вӧлмытыса гинэ ветлэммы но кельтэммы соослы, кинъёс ӟеч иворен уг тунсыкъясько. Милям ужпуммы — юрттыны Христослэн дышетскисез луыны соослы, «кин быронтэм улон шоры шонер амалэн учке», яке пӧяськисьтэм, кылзӥськись адямиослы, кудъёсызлэн зэмлыкез тодэмзы потэ (Ап. уж. 13:48; Матф. 28:19, 20).