Лутниң аялиниң кәйнигә қариши

ЛУТ вә униң аилисидикиләр Ибраһим билән Қанан зиминида биргә яшатти. Бир күни, Ибраһим Лутқа: “Барлиқ мал-варанлиримиз үчүн бу зимин йетәрлик әмәс. Айрилип яшайли. Әгәр сән бу тәрәпкә маңсаң, ундақта мән башқа тәрәпкә маңай”, дегән еди.

Лут төрт әтрапқа бир қарап чиқип, топриғи яхши, сүйи мол вә мал-варанлири үчүн от-чөпи көп бир парчә зиминни көрди. Бу җай Иордан дәрия вадиси еди. Лут аилиси вә мал-варанлири билән у йәргә көчти. Ахири улар Содом дегән шәһәргә келип маканлишип қалди.

Содом шәһиридики адәмләр наһайити яман кишиләр еди. Лут бәкму беарам болди, чүнки Лут яхши адәм еди. Худаму бәк беарам болди. Ахири болмай, Пәрвәрдигар икки периштәни әвәтип, Лутни агаһландуруп, өзиниң Содом вә униң хошна шәһири Гомораниң яманлиққа толғанлиғи сәвәплик, уларни йоқ қилидиғанлиғини ейтти.

Периштәләр Лутқа: “Дәрһал аялиң билән икки қизиңни елип, бу шәһәрдин чиқип кәт!”, деди. Лут вә униң аилисидикиләр бир аз арисалди болушти, шуңа периштәләр уларни қоллиридин йетиләп, шәһәрдин чиқирип қойди. Периштәләрдин бири: “Силәр җениңларни елип қечиңлар! Кәйниңларға қаримаңлар, таққа йәткичә қечиңлар, шундила өлүп кәтмәйсиләр”, деди.

Лут вә униң қизлири периштәләрниң сөзигә қулақ селип, Содом шәһиридин қечип кәтти. Улар тохтимай жүгриди, кәйнигиму қаримиди. Бирақ, Лутниң аяли буйруққа бойсунмиған еди. Улар Содомдин азирақ жирақлиғанда, у тохтап, кәйнигә қариди. Шуңа, Лутниң аяли таш туз түврүккә айлинип қалди. Рәсимдин уни көрәлидиңизму?

Биз мошу иштин савақ алалаймиз. Шуни һәм көрүвалалаймизки, Йәһва Худа өзиниң сөзигә қулақ салғанларни қутқузиду. Амма, униң сөзигә қулақ салмайдиғанлар һаятидин айрилиду.