4-БӨЛҮМ
Худаниң Ибраһим пәйғәмбәр билән келишим түзүши
Ибраһимниң ишәнч билән Худаға итаәт қилиши, Йәһванң уни бәрикәтләйдиғанлиғи вә әвлатлирини көп қилидиғанлиғи тоғрисида вәдә бериши
НУҺ пәйғәмбәрниң күнидики топан сүйидин кейин, тәхминән 530 жил өтүп кәтти. Ибраһим пәйғәмбәр гүлләнгән ават шәһәр Ур, йәни бүгүнки күндики Ирақ дөлити зиминида, яшатти. Ибраһим, иман-етиқади күчлүк киши еди. Лекин әнди униң иман-етиқади синаққа дуч кәлди.
Йәһва Худа Ибраһим пәйғәмбәрниң өзи туғулған жутидин айрилишини вә ят әлгә көчүп беришини ейтти. Ибраһим иккиләнмәстинла буйруққа бойсунуп, аяли Сарә, җийәни Лут вә нурғун чакарлирини елип узун сәпәр қилғандин кейин, ят бир жут Қананға келип, чедир тикип олтурақлашти. Пәрвәрдигар, Ибраһим билән келишим түзүп, Ибраһимниң улуқ бир милләтниң атиси болидиғанлиғи, у арқилиқ йәр йүзидики барчә милләт бәхит-саадәткә еришидиғанлиғи вә йәнә униң әвлатлириниң Қанан зиминиға егә болидиғанлиғи һәққидә вәдә бәргән еди.
Ибраһим вә Лут риваҗ тепип, уларниң мал-чарва падиси көпәйди. Ибраһим кәмтәрлик билән Лутниң өзи қайси зәминни халиса, шуни таллишиға қоюп бәрди. Лут Иордан дәриясиниң үнүмлүк зәминини таллиди вә Содом шәһиригә йеқин җайға олтурақлашти. Амма Содом шәһиридики кишиләрниң әхлақсиз қилмишлири чекигә йетип, улар Пәрвәрдигар Йәһваниң алдида еғир гунакар болди.
Кейин Пәрвәрдигар Йәһва қайта вәдә берип, Ибраһимниң әвлатлири асманлардики сан-санақсиз юлтуздәк көп болидиғанлиғини ейтти. Ибраһим шу вәдигә ишәнч қилди. Амма униң аяли Сарәниң техи балиси йоқ еди. Кейин Худа, Ибраһим 99 яш вә аяли Сарә болса 90 яшқа йеқинлашқанда, уларниң бир оғул пәрзәнтлик болидиғанлиғини ейтти. Худаниң сөзи әмәлгә ешип, Сарә Исһақни туғди. Ибраһимниң башқа балилириму бар еди, бирақ Ерәм бағда вәдә қилинған Қутқазғучи Исһақ арқилиқ мәйданға келәтти.
Шу вақитта, Лут вә униң аилиси Содом шәһиридә яшиған болсиму, һәққаний киши Лут, шу шәһәрниң әхлақсиз кишилиригә охшимиған еди. Йәһва Содом шәһирини һалак қилишни қарар қилғанда, Лутни һалакәт хәвпидин агаһландуруш үчүн пәриштиләрни әвәтти. Пәриштиләр Лут вә униң аилисини Содом шәһиридин қечип чиқишқа алдиратқан һәм һәргиз кәйнигә қаримаслиқни ейтқан еди. Шуниң билән, Содом вә униңға хошна болған рәзилликкә толған Гоморра шәһирини һалак қилиш үчүн Худа асмандин от билән гуңгут яғдурди. Лут вә униң икки қизи қечип қутулди. Бирақ Лутниң аяли дуниясини қиймиған болуши керәк, чүнки кәйнигә қариди. Шу итаәтсизлиги үчүн өлгән еди.
Яритилиш 11:10—19:38гә асасланған.