Худаниң Ибраһимниң ишәнчини синиши

ҚАРАҢ, бу йәрдә Ибраһим пәйғәмбәр немә иш қиливатиду? Униң қолида пичақ бар екән, қариғанда у өз оғлини өлтүрмәкчи охшайду. Немә үчүн у шундақ қилмақчи болғанду? Авал, Ибраһим билән Сарәниң қандақ қилип бир оғулға егә болғанлиғиға қарап бақайли.

Есиңиздә болса, Йәһва Худа уларниң бир оғулға егә болидиғанлиғини вәдә қилған. Амма, бу қаримаққа мүмкин әмәс иш. Сәвәви, Ибраһим билән Сарә бәкму қерип кәткән еди. Шундақтиму, Ибраһим қаримаққа мүмкин әмәс ишни, Яратқучи Йәһваниң қилалайдиғанлиғиға ишәнгән еди. Нәтиҗидә немә иш йүз бәрди?

Йәһва Худа вәдә қилғандин кейин, дәл бир жил өтти. Шу чағда, Ибраһим 100 яшта, Сарә 90 яшта болуп, улар Исһақ исимлиқ бир оғулға егә болди. Алла өз вәдисидә турған еди!

Лекин, Исһақ чоңирақ болғанда, Пәрвәрдигар Ибраһимниң ишәнчини синап бақмақчи болди. У: “Ибраһим!”, дәп чақирди. Ибраһим: “Мана мән!”, дәп җавап бәрди. Шуниң билән, Йәһва: “Сән оғлуңни, йәни ялғуз оғлуң Исһақни елип, Мән көрситидиған таққа барғин. У йәрдә оғлуңни өлтүрүп қурванлиқ қилғин”, деди.

Шу сөзләр Ибраһимниң көңлини бәкму йерим қилди. Чүнки, у өз оғлини наһайити яхши көрәтти. Сизниң есиңиздә барму, Алла Ибраһимниң әвлатлирини Қанан зиминиға егә қилидиғанлиғи һәққидә вәдә қилған. Бирақ, әнди Исһақ өлүп кәтсә, у иш қандақму әмәлгә ашсун? Ибраһим пәйғәмбәр, немә үчүн Пәрвәрдигарниң шундақ қилишқа буйруғанлиғини чүшәнмигән болсиму, лекин йәнила униңға бойсунди.

Ибраһим таққа чиқип, Исһақни бағлап, у ясиған қурванлиқ суписи үстигә ятқузди. Андин кейин, қолиға пичақ елип, оғлини өлтүрмәкчи болди. Дәл шу вақитта, Худаниң периштәси: “Ибраһим, Ибраһим!”, дәп чақирди. Ибраһим: “Мана мән!”, дәп җавап бәрди.

Худа: “Қолуңни тарт! Балиға тәгмә! Сениң маңа болған ихласмәнлигиңни әнди көрдүм. Чүнки, сән өз оғлуңни, йәни бир тал оғлуңниму Мәндин айимидиң”, деди.

Ибраһимниң Йәһва Худаға болған иман-етиқати немә дегән күчлүк, һә! У Йәһваниң һәр қандақ ишни қилишқа, һәтта Исһақ өлгән тәғдирдә, уни тирилдүрүшкә қадир екәнлигигә ишәнгән еди. Амма, Алла әмәлиятта Ибраһимниң Исһақни өлтүрүшини халиған әмәс. Шуңа Худа, мүңгүзи әтраптики чатқалға илишип қалған бир қойни көрситип, Ибраһимниң оғли орниға, шу қойни қурванлиқ қилишқа буйриди.