Худаниң дости — Ибраһим

ТОПАН сүйидин кейин, бир топ адәмләр Ур, дәп аталған җайға берип яшиған еди. У наһайити муһим шәһәргә айланған болуп, у шәһәрдә пакизә-көркәм өйләр бар еди. Амма, у җайдики кишиләр, Бабил шәһиридики адәмләргә охшаш ялған ғәйри илаһларға ибадәт қилатти. Ур вә Бабил шәһәрлиридики адәмләр, Йәһваға ибадәт қилидиған Нуһ вә униң оғли Самға охшиматти.

Топан сүйидин кейин 350 жил өтүп, садақәтмән киши Нуһ өлүп кәтти. Икки жилдин кейин, сиз көрүватқан рәсимдики бу киши туғулди. Худа уни бәкму яхши көрәтти. Униң исми Ибраһим болуп, аилисидикиләр билән Ур дегән шәһәрдә яшатти.

Бир күни, Худа Ибраһимға: “Ур шәһиридин вә уруқ-туққанлириңдин айрилип, Мән саңа көрситидиған җайға барғин”, дәп буйриди. Ибраһим Худаниң сөзигә қулақ селип, Ур шәһиридики раһәт-паравәнлик турмушини ташлап кәттиму? У шундақ қилди. Ибраһим һәр вақит Яратқучиниң буйруғиға итаәт қилғанлиғи үчүн, у Худаниң дости, дәп аталди.

Ибраһим пәйғәмбәр Ур шәһиридин айрилғанда, униң аилисидики бәзиләр, йәни Ибраһимниң дадиси Тәраһ вә җийәни Лут униң билән биллә маңди. Әлвәттә, Ибраһимниң аяли Сарәму шуларниң арисида еди. Кейин, улар Һаран дегән җайға йетип кәлгәндә, Тәраһ өлүп кәтти. Шу вақитта, улар Ур шәһиридин көп жирақлап кәткән еди.

Узун өтмәй, Ибраһим вә униң аилисидикиләр Һаран дегән җайдин айрилип, Қанан дәп аталған зиминға кәлди. У йәрдә, Алла Йәһва йәнә униңға: “Бу зиминни сениң әвлатлириңға беримән”, дәп вәдә қилди. Шуңа, Ибраһим пәйғәмбәр Қанан зиминидин кәтмәй, шу йәрдә чедир ясап маканлишип қалди.

Худа Йәһва Ибраһимға ярдәм бәрди. Шуңа, у нурғун қой вә башқа мал-чарвилар вә нәччә йүзлигән хизмәтчиләргә егә болди. Бирақ, Ибраһим билән Сарәниң бирму балиси йоқ еди.

Ибраһим пәйғәмбәр 99 яшқа киргәндә, Йәһва: “Саңа шундақ вәдә берәй, сән нурғун милләтләрниң атиси болисән”, деди. Бирақ, Ибраһим билән Сарә қерип кәткән турса, шундақ чоң яшта, уларниң пәрзәнтлик болалиши қандақму мүмкин болсун?