Иордан дәриясидин өтүш

ҚАРАҢ! Исраиллар Иордан дәриясини кесип өтиватиду! Ундақта, дәрия сүйи нәгә кәтти? Чүнки, һәр жили мошу вақитта ямғур көп йеғип, дәрия сүйи улғийип кетәтти. Лекин, һазир су йоқ! Худди исраиллар илгири Қизил деңиздин өткәнгә охшаш, һазир улар қуруқ йәр билән дәрияни кесип өтмәктә! Ундақта, сулар нәгә йоқилип кәткәнду? Биз бирликтә көрүп бақайли.

Исраил хәлқи Иордан дәриясидин кесип өтидиған вақитта, Худа Йәһва Йәшу арқилиқ уларға буйруқ қилип: “Роһанийлар әһдә сандуғини көтирип, халайиқниң алдида маңсун. Уларниң путлири Иордан дәриясиниң сүйигә тәккән һаман, сулар еқиштин тохтайду”, деди.

Шуңа, роһанийлар әһдә сандуғини елип, хәлиқниң алдида көтирип маңди. Улар Иордан дәриясиға кәлгәндә, роһанийлар суға пут салди. Су еқини бәкму күчлүк вә чоңқур еди. Амма, уларниң пути суға тегишигә, дәрия сүйи еқиштин тохташқа башлиди! Бу бир мөҗүзә! Йәһва дәрияниң жуқури еқинини тосап қойғач, узун өтмәй дәрияда су йоқ болуп кәтти!

Әһдә сандуғини көтәргән роһанийлар сүйи қуруп кәткән дәрияниң оттурисиға қарап маңди. Уларни рәсимдин көрәлидиңизму? Улар оттурида турғанда, барлиқ исраил хәлқи Иордан дәриясини қуруқ йәр билән кесип өтүп кәтти!

Пүтүн хәлиқ дәриядин өтүп болғанда, Йәһва Йәшу арқилиқ 12 күчлүк кишигә: “Дәрияға кирип, әһдә сандуғини көтәргән роһанийлар турған җайдин 12 таш елип келип, уларни барлиқ хәлиқ бүгүн кечини өткүзидиған җайға тикләңлар. Шундақ болғанда, кәлгүсидә силәрниң әвлатлириңлар бу ташларниң мәнаси һәққидә сориғанда, уларға Йәһваниң әһдә сандуғи Иордан дәриясидин өткәндә, дәрия сүйиниң еқиштин тохтиғанлиғини ейтип бериңлар. Бу ташлар силәргә шу мөҗүзини әслитиду!”, дәп буйриди. Униңдин башқа, Йәшу дәрияниң оттурисидики роһанийлар пут дәссәп турған җайға 12 ташни тикләп қойди.

Ахирида, Йәшу әһдә сандуғини көтәргән роһанийларға: “Иордан дәриясидин чиқиңлар”, дәп буйриди. Улар дәриядин чиқип турушиға, сулар қайта еқишқа башлиди.