Йәшуниң башламчи болуши

МУСА пәйғәмбәр исраил хәлқи билән биргә Қанан зиминиға кирмәкчи болди. Шуңа, у: “Йәһва, мениң Иордан дәриясини кесип өтүп, у гөзәл зиминни көрүшүмгә рухсәт қилғин”, дәп өтүнди. Амма, Пәрвәрдигар Йәһва: “Әнди болди, бәс! Бу ишни йәнә тилға алма!”, деди. Йәһваниң немә үчүн шундақ дегәнлигини биләмсиз?

Муса пәйғәмбәр қия ташни урғанда, немә иш йүз бәргәнлиги ядиңиздиму? Муса билән Һарун Йәһваға һөрмәт-еһтирам көрсәтмигән. Йәни, таштин суни әслидә Йәһваниң чиқарғанлиғини хәлиққә ейтмиған еди. Мошу сәвәп, Йәһва уларниң Қанан зиминиға киришигә йол қоймайдиғанлиғини ейтқан еди.

Шуңа, Һарун өлүп бир қанчә айдин кейин, Йәһва Мусаға: “Йәшуни қешиңға чақирип, роһаний Әлиазар вә хәлиқниң алдида турғузуп, Йәшуниң йеңи башламчи екәнлигини барлиқ халайиққа ейт”, дәп буйриди. Худди сиз мошу рәсимдә көрүп турғандәк, Муса пәйғәмбәр Йәһваниң буйруғини орунлиди.

Андин кейин, Йәһва Йәшуға сөзләп: “Җүръәтлик бол, қорқмиғин. Сән исраил хәлқини мән вәдә қилған Қанан зиминиға башлап кирисән. Мән сән билән биргә болимән”, деди.

Кейин, Йәһва Худа Мусани Моаб зиминидики Небо теғиниң чоққисиға чиқишқа буйриди. Муса у егиз җайдин Иордан дәриясиниң қарши тәрипигә нәзәр селип, шу гөзәл Қанан зиминини көрәләтти. Алла Йәһва: “Ибраһим, Исһақ вә Яқупларниң әвлатлириға беримән, дәп вәдә қилған зимин будур. Мән сениң у зиминни көрүшүңгә рухсәт қилимән, амма кирәлмәйсән”, деди.

Муса пәйғәмбәр Небо теғи үстидә өлүп кәтти. У шу вақитта, 120 яшта болуп, йәнила күчлүк, көрүш қувити яхши еди. Униң өлүми үчүн кишиләр қайғуруп, көп жиға-зар қилишти. Бирақ, улар Йәшуниң өзлириниң йеңи башламчиси болғанлиғидин хошал болди.