Он икки пайлақчи

БУ КИШИЛӘР көтирип кетиватқан мевә-чевиләргә қараңа! Паһ, әву бир сапақ үзүмниң йоғанлиғини! Уни икки адәм таяққа өткүзүп көтириши керәк еди. Йәнә у әнҗир вә анарларни көрүңа! Бу шерин мевә-чевиләрни қәйәрдин елип кәлди? Қанан зиминидин! Ядиңизда барму, Қанан илгири Ибраһим, Исһақ вә Яқуплар яшиған зимин. Бирақ, у йәрдә ачарчилиқ болғачқа, Яқуп аилисидикиләр билән Мисир зиминиға көчүп кәткән еди. Мана әнди, 216 жилдин кейин, Муса пәйғәмбәр исраилларни башлап Қанан зиминиға қайтип маңди. Улар чөлдә Кадеш, дәп атилидиған йәргә кәлди.

Қанан зиминида яман адәмләр яшатти. Шуңа, Муса 12 пайлақчини әвәтип, уларға: “У йәрдә қанчилик адәм яшайду, уларниң күчи қандақ. Шуниңдәк, териқчилиқ қилишқа болидиған яхши топриғи бармекән күзитип келиңлар. Йәнә бәзи мевә-чевиләрдин елип келишни унтумаңлар”, дәп буйриди.

Пайлақчилар Кадешқа қайтип кәлгәндә, улар Мусаға: “У йәр һәқиқәтән гөзәл зимин екән”, дәп мәлум қилди. Һәм уни испатлаш үчүн, елип кәлгән бәзи мевә-чевиләрни Мусаға көрсәтти. Бирақ, он пайлақчи: “У йәрдә яшайдиған адәмләр йоған вә күчлүк екән. Әгәр у зиминни елишқа урунсақ, һалак болимиз”, деди.

Исраиллар буни аңлап қорқуп кетишти. Улар: “Биз Мисирда яки бу чөлдә өлсәк яхширақ болатти. Шундақ болғанда, биз җәңдә өлмәй, хотун-балилиримиз әсир болуп қалмайду. Мусаниң орниға йеңи бир йолбашчи таллап, Мисирға қайтип кетәйли!”, деди.

Бирақ, пайлақчиларниң арисидики иккиси Йәһваға ишәнч бағлап, хәлиқни хатирҗәм қилишқа урунди. Уларниң исми Йәшу вә Калеб еди. Улар: “Қорқмаңлар. Йәһва биз билән биргә. У зиминни алмақ асан болиду”, деди. Амма, хәлиқ қулақ салмиди. Улар һәтта Йәшу билән Калебни өлтүрмәкчи болушти.

Бу Йәһваниң аччиғини кәлтүрди. Шуниң билән, У Мусаға: “20 яш вә униңдин чоң яштикиләрдин һеч ким Қанан зиминиға кирәлмәйду. Чүнки, улар Мән Мисирда вә чөлдә көрсәткән мөҗүзиләрни көргән еди. Бирақ, Маңа йәнила ишәнч қилмайватиду. Шуңа, ахирқи бир киши өлгичә, улар 40 жил чөлдә сәрганда болуп жүриду. Пәқәт Йәшу билән Калеб Қанан зиминиға кириду”, деди.