Раһабниң пайлақчиларни йошуруши

БУ КИШИЛӘР аваричилиққа учриди. Улар чоқум қечип кетиши керәк, болмиса уларни өлтүрүветиду. Улар кимләр? Улар исраиллар әвәткән пайлақчилар болуп, уларға ярдәм бериватқан аялниң исми Раһаб. Раһаб Ериха шәһириниң сепил теми үстидики бир өйдә туратти. Немә үчүн у кишиләр аваричилиққа йолуқти? Җававини бирликтә издәп бақайли.

Исраиллар Иордан дәриясини кесип өтүп, Қанан зиминиға киришкә тәйяр болди. Бирақ, улар шундақ қилиштин илгири, Йәшу икки пайлақчи әвәтип, уларға: “Берип, у зимин билән Ериха шәһирини көрүп келиңлар”, деди.

Пайлақчилар Ериха шәһиригә киргәндә, улар Раһабниң өйигә барди. Амма, бирси Ериханиң падишасиға: “Исраилларниң икки пайлақчиси бу зиминни чарлаш үчүн, бүгүн ахшам бу шәһәргә кәлди”, дәп хәвәр бәрди. Падиша буни аңлап, Раһабниң өйигә адәмләрни әвәтти. Улар Раһабқа: “Өйүңдики кишиләрни тапшуруп бәр!”, дәп буйруқ қилди. Амма, у пайлақчиларни өйниң өгүзисигә йошуруп қойған еди. Шуңлашқа, Раһаб: “Мениң өйүмгә кишиләр кәлгән, лекин уларниң қәйәрдин кәлгәнлигини билмәймән. Қараңғу чүшүп, шәһәр дәрвазиси тақилиштин илгири кетип қалди. Әгәр тезрәк қоғлисаңлар, уларни тутувалалайсиләр!”, деди. Шуниң билән, у адәмләр уларниң арқисидин қоғлап кәтти.

Улар кәткәндин кейин, Раһаб дәрһал өгүзгә чиқти. У пайлақчиларға: “Мән Йәһваниң бу зиминни силәргә беридиғанлиғини билимән. Силәр исраиллар Мисирдин чиққанда, Йәһваниң Қизил деңиз сүйини қандақ қурутқанлиғи вә силәрниң падиша Сиһон вә Огни қандақ өлтүргәнлигиңларни аңлиғанмиз. Мән силәргә яхшилиқ қилдим, шуңа маңа вәдә бериңлар. Яхшилиқ қилип, мениң ата-анам, ака-сиңиллиримни тирик қойсаңлар”, деди.

Пайлақчилар яхшилиқ қилидиғанлиғи һәққидә вәдә бәрди. Бирақ, Раһаб бәзи ишларни қилиши керәк. Шуңа, пайлақчилар униңға: “Бу қизил шойнини елип деризәңгә чигип қой. Андин барлиқ уруқ-туққанлириңни өз өйүңгә жиғип җәм қил. Биз Ериха шәһирини ишғал қилғанда, деризәңдики бу шойнини көрүп, өйиңдики һеч бир кишини өлтүрмәймиз”, дәп буйриди. Пайлақчилар Йәшуниң йениға қайтип кәлгәндә, болуп өткән барчә ишларни униңға сөзләп бәрди.