Қандақ қилип оқушни қизиқарлиқ қилсам болиду?

Муқәддәс китапни оқуш сизгә зерикишлик туюламду яки қизиқарлиқму? Бу көпинчә сизниң қандақ оқушиңизға бағлиқ. Келиң, Муқәддәс китапни оқушқа болған қизиқишиңизни ашурушқа вә оқуштин көпирәк һузур елишқа ярдәм беридиған бирқанчә мәслиһәтни көрүп чиқайли.

Ишәнчилик вә заманавий тилдики тәрҗимини таллаң. Әгәр китапта мурәккәп яки кона вә ишлитиштин қалған сөз-ибариләр көп болса, бәлким бу китапни оқуштин һузур алалмаслиғиңиз мүмкин. Шуңа сөз-җүмлиләрниң қәлбиңизгә чоңқур тәсир қилиши үчүн асан чүшинидиған тилдики Муқәддәс китапни тепиң. Шуниң билән биргә сиз таллиған тәрҗиминиң ениқ вә тоғра екәнлигигә көз йәткүзүң.

Нурғун кишиләр Муқәддәс китапниң «Йеңи Дуния» тәрҗимисиниң тоғра, ишәнчлик вә оқуп чүшинишкә асан екәнлигини байқиған. Йәһва гувачилири тәрипидин нәшир қилинған бу Муқәддәс китап 130дин артуқ тилға тәрҗимә қилинған. Сиз jw.org торбетидин электронлуқ нусхисини чүшүрәләйсиз яки JW Library программисидин чүшүрәләйсиз. Халисиңиз, Йәһва гувачилири басма нусхисини өйүңизгә йәткүзүп берәләйду.

Заманивий пән-техникидин пайдилиниң. Бүгүнки күндә Муқәддәс китап тәрҗимилириниң пәқәт басма нәшри әмәс, бәлки электронлуқ нәшриму бар. Муқәддәс китапни торбәттә яки тордин чүшүрүп компьютер, қол компьютер яки телефонда шәхсий оқушқа болиду. Бәзи тәрҗимиләрдә охшаш бир темидики башқа айәтләрни тезликтә тәкшүрәләйдиған яки бирқанчә тәрҗимини селиштурушқа болидиған қошумчә қураллар бар. Әгәр оқушни әмәс, аңлашни яхши көрсиңиз, авазлиқ нәшри бар. Нурғун кишиләр аммивий қатнаш васитилири билән сәпәргә чиққанда, кир жуйғанда яки башқа паалийәтләр билән шуғулланғанда, тиңшашни яхши көриду. Немә үчүн өзүңизгә мас келидиған усулни синап бақмайсиз?

Муқәддәс китапни тәтқиқ қилиш қураллирини ишлитиң. Муқәддәс китапни тәтқиқ қилип үгиниш қураллири оқуғанлириңиздин техиму көп пайдилинишиңизға ярдәм берәләйду. Муқәддәс китапта тилға елинған җайларниң хәритилири бар, бу оқуған чағда, учратқан җай-намлирини тепишиңизға вә вақиәләрни көз алдиңизға кәлтүрүшиңизгә ярдәм бериду. Бу журналдики яки jw.org торбетидики «Муқәддәс китап тәлимлири» дегән сәһипидики мақалиләр Муқәддәс китапниң нурғун мәзмунлириниң мәнәси үстидә издинип тәтқиқ қилишиңизға ярдәм бериду.

Оқуш усулиңизни өзгәртиң. Әгәр Муқәддәс китапни баштин-ахириғичә оқуш қийин туюлса, немә үчүн сизни алаһидә җәлип қилидиған қисимдин башлап, оқушқа болған қизиқишиңизни ашурушқа тиришип бақмайсиз? Әгәр сиз Язмилардики мәшһур кишиләр һәққидә билмәкчи болсиңиз, әшу шәхсни асас қилип оқушни синап бақсиңиз болиду. Бу усулниң бир үлгиси «Худаниң садиқ хизмәтчилири билән тонушуш арқилиқ Муқәддәс китаптин ғәзнә қезиш» намлиқ изаһаттин пайдилансиңиз болиду. Униңдин башқа, мавзу яки вақиәләрниң йүз бериш тәртиви бойичә оқусиңиз болиду. Ундақта бу усулларниң бирини синап беқиң!