«Һаятимиз вә хизмитимиз. Иш дәптири» үчүн мәлумат мәнбәлири
7—13 октябрь
ХУДА СӨЗИДИКИ ҒӘЗНӘ | ЯҚУП 3—5
Худадин кәлгән даналиқни көрситиш
cl 221, 222-б., 9, 10-абз.
Һаятиңизда «әрштин чүшкән даналиқни» көрситәмсиз?
9 «Һәммидин авал, пак». Пак болуш пәқәт сиртимиздин әмәс, ичимиздинму таза болушимизни билдүриду. Муқәддәс китапта даналиқ жүрәк билән бағлинишлиқ дәп йезилған. Бирақ яман ойлар билән һәвәсләргә вә қара нийәтләргә толған жүрәккә әрштин кәлгән даналиқ кирәлмәйду (Пәнд-нәсиһәтләр 2:10; Мәтта 15:19, 20). Амма гунакар тәбиитимизигә қаримай, жүригимиз мүмкинчиликниң баричә пак болса, яманлиқтин үз өрүп, яхшилиқ қилимиз (Зәбур 37:27; Пәнд-нәсиһәтләр 3:7). Бу айәттә даналиқ тоғрисида сөз қилғанда, паклиқниң биринчи новәттә турғанлиғи немә дегән яхши! Шуңа, әгәр әхлақий вә роһий җәһәттин пак болмисақ, әрштин кәлгән даналиққа киридиған башқиму хисләтләрни әкс әттүрәлмәймиз.
10 «Андин течлиқпәрвәр». Әрштин кәлгән даналиқ муқәддәс роһниң мевиси болған течлиқни издәшкә дәвәт қилиду (Галатилиқларға 5:22). Биз Йәһваниң хәлқи арисида болған течлиқни бузуштин нери болушқа тиришимиз (Әфәсликләргә 4:3). Шундақла течлиқ бузулса, инақлиқни қайта қуруш үчүн қолумиздин кәлгиничә һәммини қилимиз. Бу немә үчүн муһим? Муқәддәс китапта мундақ йезилған: «Течлиқта яшаңлар һәм хатирҗәмлик вә меһир-муһәббәтликниң Худаси силәр билән биргә болғай» (Коринтлиқларға 2-хәт 13:11) Демәк, течлиқни сақлисақ, течлиқниң мәнбәси болған Йәһва биз билән биргә болиду. Етиқатдашлар билән болған мунасивитимиз, Йәһва билән болған мунасивитимизгә тәсир қилиду. Шуңа течлиққа интилиш үчүн немә қилишимиз керәк? Бир мисални көрүп чиқайли.
cl 223-б., 12-абз.
Һаятиңизда «әрштин чүшкән даналиқни» көрситәмсиз?
12 «Әқил-парасәтлик йәни һәқни чүшинидиған». Һәқни чүшинидиған немини билдүриду? Тәтқиқатчиларниң ейтишичә, Яқуп 3:17дә (ЙД) «һәқни чүшинидиған» дегән грек сөзини тәрҗимә қилиш қийин. Бәзи тәрҗиманлар бу сөзни тәрҗимә қилғанда, «юмшақ», «чидамлиқ» вә «ғәмхорчан» дегән сөзләрни ишләткән. «Йеңи Дуния» тәрҗимисидә бу айәтниң изаһитидә һәқни чүшинидиған дегән сөз «башқиларға йол қоюш», дәп тәрҗимә қилинған. Даналиқ өз ичигә алидиған бу хисләтни һаятимизда қандақ қоллиналаймиз?
cl 224, 225 б., 14, 15-абз.
Һаятиңизда «әрштин чүшкән даналиқни» көрситәмсиз?
14 «Беқинишқа тәйяр». Яқуп 3:17дә «беқинишқа тәйяр» дәп йезилған грек сөзи Грек язмилириниң башқа айәтлиридә учримайду. Бир тәтқиқатчиниң ейтишичә, беқинишқа тәйяр дегән сөз, «һәрбий тәртипкә қарита пат-пат қоллиниду». Бу сөз «йеник бойсунидиған» вә «қулақ салидиған» дегәнни билдүриду. Худадин кәлгән даналиққа еришкән киши Муқәддәс Язмиларниң һәммисигә тәйярлиқ билән бойсуниду һәм униң чиқарған қарарлириға қарши келидиған дәлил-испатлар болса, у өз дегинидә тирәҗәп турувалмайду. Әксинчә, башқилар шу кишиниң көзқариши хата екәнлигини көрсәткәндә, у өзгиришкә тәйяр болиду. Башқилар сизни шундақ киши дәп тонамду?
«Рәһимликкә вә яхши мевиләргә толған»
15 «Рәһимликкә вә яхши мевиләргә толған». Рәһимлик әрштин кәлгән даналиқниң муһим бир қисми, чүнки у яхши мевиләргә толған. Бу айәттә рәһимлик вә яхши мевиләр биллә тилға елинған. Сәвәви Муқәддәс китапта рәһимлик дегән хисләт башқиларға ғәмхорлуқни әмәлийәттә көрситишни, йәни көп яхши ишларға дәвәт қилидиған һисдашлиқни билдүриду. Бир қамуста рәһимлик дегән сөз «паҗиәлик вақиәгә учриған кишигә ич ағритиш вә униңға ярдәм беришкә тиришиш», дәп тәрҗимә қилиниду. Демәк, кишидә Худадин кәлгән даналиқ болса, у таш жүрәк болмайду һәм башқиларниң азап-қайғусиға көз жуммайду. Әксинчә, шундақ адәм меһрибан, өзигә тартидиған һәм юмшақ болиду. Рәһимлик адәм екәнлигиңизни қандақ көрситәләйсиз?
cl 226-б., 18, 19-абз.
Һаятиңизда «әрштин чүшкән даналиқни» көрситәмсиз?
18 «Айримчилиқ қилмайду». Худадин кәлгән даналиққа еришкән адәм кишиниң ирқини камситмайду вә миллитигә қаримайду. Йәнә шундақ адәм өзиниң жүригидин һәр түрлүк иккиүзлүкни йилтизи билән жулуп ташлашқа тиришиду (Яқуп 2:9). Биз кишиниң билими, ихтисадий әһвали яки җамаәтлиридики вәзипилиригә қарап, униңға алаһидә муамилә қилмаймиз. Шундақла биз җәмийәттики орни қандақ болмисун қериндашларни камситмаймиз. Әгәр Йәһва Худа уларни яхши көрсә, бизму уларни яхши көрүшимиз керәк.
19 «Иккиүзлүк қилмайдиған». «Иккиүзлүк» дегән грек сөзи актерниң ролиға бағлиқ болуши мүмкин. Қедимий заманда, грек вә рим актерлири көрүнүшләрдә йоған ниқапларни кийгән. Шуңа «иккиүзлүк» дегән грек сөзи қувлуқ қилидиған вә алдап ойнайдиған кишигә қарита қоллинилған. Адәмдә Худадин кәлгән даналиқ болса, етиқатдашлар билән яхши муамилидә болупла қалмай, улар һәққидә яхши ой-пикирдиму болиду.
Роһий гөһәрләрни издәйли
Дүшминиңизни яхши биләмсиз?
4 Әлчи Петрус Шәйтан Иблисниң «ширдәк һөкирәп» жүридиғанлиғини ейтқан. Әлчи Йоһан болса, уни «илан» вә «әҗдиһа» дәп атиған (Петрусниң 1-хети 5:8 ЙД; Вәһий 12:9). Амма биз Иблистин қорқмаслиғимиз керәк. Сәвәви униң күчи чәклик (Яқуп 4:7ни оқуң). Буниңдин башқа, бизни Йәһва, Әйса вә садиқ пәриштиләр һимайә қилиду. Уларниң ярдими билән биз дүшминимизгә қарши туралаймиз. Шундақ болсиму, биз үч муһим соалниң җававини билишимиз керәк: Шәйтанниң тәсири қанчилик күчлүк? Шәйтан адәмләргә қандақ тәсир қилишқа уруниду? У немини қилалмайду? Келиңлар, бу соалларниң җававини тепип, қандақ савақ алалайдиғанлиғимизни муһакимә қилайли.
w97 11.15. 20-б., 8-абз.
Етиқат бизни сәвирчан болушқа вә көп дуа қилишқа үндәйду
8 Етиқатдашларни яманлаш гуна болуп һесаплиниду (Яқуп 4:11, 12). Бирақ гайибирлири өз көзидә һәққаний болуп, қериндашларни тәнқит қилиду. Йәни өзини жуқури тутуш үчүн башқиларни камситиду (Зәбур 50:20; Пәнд-нәсиһәтләр 3:29). «Яманлаш» дәп кәлтүрүлгән грек сөзи көптүрүп ейтишни, өчмәнлик қилишни яки ялған әйипләшни билдүриду. Бу қериндашни әйипләш билән баравәр. «Қериндишиға қарши» сөзләш вә «қанунниң үстидин һөкүм» қилиш дегәнләр немини билдүриду? Пәрисийләр вә Тәврат устазлири «Худаниң әмрини йоққа чиқирип», өзлири ойлап чиқарған қаидиләр бойичә һөкүм чиқарған (Марк 7:1—13). Әгәр Йәһва Худа әйиплимигән қериндашни биз әйиплисәк, «қанунниң үстидин һөкүм қилған» болумиз. Шундақ қилсақ, қанунда бир камчилиқ бар дәп һесаплиған болумиз. Бу гуна әмәсму? Адаләтсизлик билән етиқатдашларни тәнқит қилсақ, меһир-муһәббәт қануниға бойсунмиған болумиз (Римлиқларға 13:8—10).
14—20 октябрь
ХУДА СӨЗИДИКИ ҒӘЗНӘ | ПЕТРУСНИҢ 1-ХЕТИ 1, 2
Муқәддәс болуңлар
Төләм — Худаниң «мукәммәл һәдийәси»
5 Йәһваниң исмини яхши көридиғанлиғимизни қандақ көрситәләймиз? Һаят тәрзимиз арқилиқ. Йәһва биздин пак болушни тәләп қилиду (Петрусниң 1-хети 1:15, 16ни оқуң). Бу пәқәт Униңға ибадәт қилишимиз вә җан-җигәримиз билән итаәт қилишимиз керәклигини билдүриду. Һәтта тәқипкә дуч кәлсәкму, Йәһваниң тәлимлиригә мас яшашқа бар күчимизни салимиз. Йәһваниң өлчәмлиригә мувапиқ һаят кәчүрүш арқилиқ биз униң исмини мәдһийиләймиз (Мәт. 5:14—16). Шундақ қилип, Йәһваниң қанунлири бизгә пайда елип келидиғанлиғини вә Шәйтанниң ялғанчи екәнлигини испатлаймиз. Әлвәттә, мукәммәлсиз болғанлиқтин, хаталиқларни өткүзимиз. Лекин шундақ пәйтләрдә чин жүрәктин товва қилип, Йәһваниң исмини шәрмәндә қилидиған ишлардин нери болимиз (Зәб. 79:9).
Пайдилиқ оюн-тамашиларни таллаң
6 Әлчи Паул Римдики мәсиһийләрни агаһландуруп: «Өз әзалириңларни гунаға тутуп бәрмәңлар»,— дәп ейтқан. Йәнә Паул уларни «тәнниң ишлирини» өлтүрүшкә дәвәт қилған (Римлиқларға 6:12—14; 8:13). Буниң алдида у «тәнниң ишлириниң» бирнәччисини атап өтти. Гунаға берилгән адәмләр һәққидә Паул мундақ дәп язған: «еғизи қарғишларға толған», «путлири қан төкүшкә алдирайду», «көзлиридә Худадин қорқуш йоқтур» (Римлиқларға 3:13—18). Мәсиһий өзиниң тән «әзалирини» мошундақ гунакар иш-һәрикәтләрни қилиш үчүн пайдиланса, униң пүткүл бәдини булғиниду. Мәсилән, әгәр мәсиһий порнографияни яки вәһшиянә зораванлиқ қатарлиқ әхлақсиз материалларни әтәй қариса, у өз көзлирини гунаға тутуп бериду вә шундақ қилип, пүткүл тенини булғайду. Униң ибадәттә қилған һәрқандақ иши муқәддәслигидин айрилған қурбанлиққа айлиниду һәм Худа уни қобул қилмайду (Қанун шәрһи 15:21; Петрусниң 1-хети 1:14—16; Петрусниң 2-хети 3:11). Бу налайиқ оюн-тамашилар үчүн төлинидиған интайин қиммәт бәдәлдур!
Роһий гөһәрләрни издәйли
w08 11.15. 21-б.,9-абз.
Яқуп вә Петрус язған хәтләрдики пайдилиқ ой-пикирләр
1:10—12: Пәриштиләр қедимий замандики пәйғәмбәрләрниң майланған мәсиһийләргә тегишлик язған Муқәддәс китаптики чоңқур һәқиқәтләрни чүшинишини халиған. Бирақ бу һәқиқәтләр мәсиһийләр җамаити пәйда болғандила рошән болди (Әфәс. 3:10). Пәриштиләрдин үлгә елип, бизму Худа даналиғиниң чоңқурлиғини чүшинишкә интилишимиз керәк әмәсму? (Кор. 1-х. 2:10).
w90 9.15. 7-б., 1-абз.
Һәқиқәтни биливелиң!
Худаниң пәйғәмбәрлириму махташқа лайиқ. Улар Мәсиһ арқилиқ келидиған қутқузулуш тоғрилиқ билиш үчүн тәпсилий издәнгән һәм тәтқиқ қилған (Петрусниң 1-хети 1:10). Худа уларниң тиришчанлиғини көрүп бәрикәт бәрди. Демәк, һәқиқәтни тепиш үчүн, қисқа йол йоқ, буниң үчүн көп күч чиқириш керәк. Муқәддәс китап тәлимлирини пухта тәтқиқ қилсиңиз һәм дайим издәнсиңиз, һәқиқәтни толуқ биләләйсиз.
it «Йетәкчи»/«Алий йетәкчи»
Йетәкчи
Алий йетәкчи. Әлчи Петрус Йәшая 53:6ни нәқил кәлтүрүп, «худди қойлардәк езиқип кәткән» адәмләр һәққидә Петрусниң 1-хети 2:25-айитидә: «Әнди болса җениңларни сақлиғучи қойчиға қайтип кәлдиңлар»,— дейилгән. Бу сөзләр чоқум Йәһва Худаға қаритилған, чүнки Петрус хәт язған кишиләр езиқип, Әйса Мәсиһтин тенип кәтмигән. Әксичә улар Әйса арқилиқ әң улуқ Падичи Йәһва Худаға қайтип келишкә йетәкләнгән (Зб 23:1; 80:1; Йр 23:3; Әзк 34:12). Йәһва Худа У бир Йетәкчидур, чүнки У күзитип тәкшүриду (Зб 17:3). Күзитип тәкшүрүш, епископе дегән грек сөзи Худа тәрипидин һөкүм қилиниш дегән ибарә билән бағлинишлиқ болған. Мәсилән, «тәкшүрүш [епископес, гр.] вақтини» билмигән биринчи әсирдики Йерусалим Худаниң һөкүмигә учриған (Лқ 19:44). Амма «тәкшүрүш [епископес, гр.] вақти» кәлгәндә Худани улуқлайдиғанлар яхши нәтиҗигә яки бәрикәткә еришәләйду (Пт1х 2:12).
21—27 октябрь
ХУДА СӨЗИДИКИ ҒӘЗНӘ | ПЕТРУСНИҢ 1-ХЕТИ 3—5
Барлиқ нәрсиниң ахири йеқинлашмақта
w13 11.15. 3-б., 1-абз.
«Дуалириңларда сәгәк болуңлар»
Бурун кечидә ишлигән бир киши: «Таң атмастин бурун сәгәк болуш бәк қийин»,— дәп ейтқан. Түндә ишләйдиғанлар бу сөзләр билән келишиду. Бүгүнки күндә Худа хизмәтчилириму шуниңға охшаш қийинчилиқларға дуч келиду, сәвәви, Шәйтанниң һөкүми астидики дуния, узун қараңғу түнгә охшайду (Рим. 13:12). Таң атай дегәндә ухлап қелиш биз үчүн бәк хәтәрлик болған болатти! Биз «сағлам пикирлик» болуп, Муқәддәс китаптики «дуалириңларда сәгәк болуңлар» дегән нәсиһәткә қулақ селишимиз керәк (Пет. 1-х. 4:7).
w99 4.15. 22-б., 3-абз.
Роһий аҗизлиғимизни қандақ тонуп-йетәләймиз вә йеңәләймиз?
Шундақла әлчи Петрусниң меһир-муһәббәт билән бәргән нәсиһитини әстә тутушимиз керәк: «Барлиқ нәрсиниң ахири йеқинлашмақта. Шуңа сағлам пикирлик вә дуалириңларда сәгәк болуңлар. Әң авал бир-бириңларни қизғин сөйүңлар, чүнки меһир-муһәббәт көплигән гуналарни япиду» (Петрусниң 1-хети 4:7, 8). Әгәр өзүмизниң яки башқиларниң камчилиқлири әқлимизни вә қәлбимизни чирмавалса, улар асанла биз үчүн путликашаң теши болиду. Шәйтан адәмләрниң бу аҗиз тәрипини яхши билиду. Униң һийлә-микирлириниң бири — җамаәтниң ичидә бөлгүнчилик қилиш. Шуниң үчүн бир-биримизгә сәмимий меһир-муһәббәт көрситип, камчилиқлирини кәчүрүп, Шәйтанниң қапқиниға чүшүп қалмаслиқ үчүн, униңға йол қоймаслиғимиз лазим (Әфәсликләргә 4:25—27).
Көңүлни хуш қилидиған меһмандостлуқ бәк муһим!
2 Петрус қериндашларға бәргән мәслиһәтләрниң бири: «Өз ара меһмандост болуңлар» (Пет. 1-х. 4:9). «Меһмандост» дәп тәрҗимә қилинған грек сөзи удул мәнада «натонуш кишиләргә меһир-муһәббәт яки меһрибанлиқ көрситиш» дегәнни билдүриду. Қериндашлар бир-бирини яхши тонуған вә өз ара арилашқан болсиму, Петрус уларни «өз ара» меһмандост болушқа үндиди. Меһмандост болуш уларға қандақ пайда әкеләтти?
3 Бу уларни бир-биригә йеқинлаштуратти. Сиз тоғрисида немә ейтишқа болиду? Сизни кимду-бирси меһманға чақирғанда, вақитни көңүллүк өткүзгәнлигиңиз есиңиздиму? Өзүңизму бирсини меһман қилип, достлуғиңиз техиму қоюқлашқанду. Қериндашлириңизни йеқинирақ тонушниң бир усули — меһмандостлуқ көрситиш. Петрусниң вақтида яшиған мәсиһийләрниң қийинчилиқлири кәскинләшкәнсири, улар өз ара зич мунасивәттә болуши бәк муһим еди. Бу ахирқи күнләрдә бизгиму шундақ қилиш керәк (Тим. 2-х. 3:1).
Роһий гөһәрләрни издәйли
w13 6.15. 23-б.
Оқурмәнләрниң соаллири
Муқәддәс китапта Әйса «зиндандики роһларға» хәвәр ейтқан, дәп йезилған (Пет. 1-х. 3:19). Бу немини билдүриду?
▪ Әлчи Петрус бу роһларниң ким екәнлигини чүшәндүрүп, мундақ дегән: «Улар — Нуһ пәйғәмбәрниң дәвридә Худа кемә қурулушини сәвир-тақәт билән күткән вақитта итаәтсизлик қилған роһлардур» (Пет. 1-х. 3:20). Шүбһисиз, әлчи Петрус Шәйтанниң иссияниға қошулған роһий мәвҗудатлар һәққидә ейтқан. Йәһуда бу садақәтмәнликни сақлимиған пәриштиләр һәққидә: «Авалқи дәриҗисини сақлап қалмай вә лайиқ болған өз маканини ташлап кәткән пәриштиләрни... [Худа] мәңгү кишәнләп, мутләқ қараңғулуқта улуқ күнниң сотиға сақлаватиду»,— дәп язған (Йәһуда 6).
Нуһ заманида роһий мәвҗудатлар қандақ қилип итаәтсизлик қилған? Топан су бесиштин авал рәзил пәриштиләр адәмниң қияпитигә кирип, Худаниң нийитигә қарши иш қилған (Ярит. 6:2, 4). Униңдин ташқири, улар аяллар билән җинсий алақидә болған. Шундақ нәрсә тәбиий болмиған еди, чүнки Худа пәриштиләрни аяллар билән җинсий алақидә болуш үчүн яратмиған (Ярит. 5:2). Бу рәзил һәм итаәтсиз пәриштиләрни Худа бәлгүлигән вақитта йоқ қилиду. Һазир болса, улар «мутләқ қараңғулуқта» йәни символлуқ қамақта.
Әйса «зиндандики роһларға» хәвәрни қачан вә қандақ қилип ейтқан? Петрусниң ейтишичә, бу вақиә Әйса «роһ сүпитидә» тирилдүрүлгәндин кейин болған еди (Пет. 1-х. 3:18, 19). Әйса «хәвәрни елан қилди», дегән Петрусниң сөзлиригә диққәт ағдуруң. Петрус бу айәтни язғанда, өткән заман пеилини қолланған. Демәк, Петрус биринчи хетини йезиштин бурун Әйса роһий мәвҗудатларға хәвәрни елан қилған. Еһтимал, тирилгәндин кейин көп өтмәй, Әйса рәзил роһларға уларни адаләтлик җаза күтүп турғанлиғини һөкүм қилған. Әйса бу хәвәр арқилиқ уларниң қутулушқа үмүти йоқлиғини ейтқан. Демәк, өлүм җазасиға һөкүм қилинғанлиғи һәққидә хәвәрни ейтқан (Юнус 1:1, 2). Немә үчүн Әйсаниң бу һөкүм хәвирини ейтишқа һоқуқи болған? Чүнки у һаятиниң ахириғичә садақәтмәнлигини вә етиқадини көрсәткән, кейин тирилдүрүлгән. Бу — Шәйтан Әйсаниң үстидин һакимийити йоқ екәнлигиниң испати (Йоһ. 14:30; 16:8—11).
Келәчәктә Әйса Шәйтанни вә исиян көтәргән пәриштиләрни кишәнләп, теги йоқ һаңға ташлайду (Луқа 8:30, 31; Вәһ. 20:1—3). Бу вақит кәлгичә, итаәтсиз пәриштиләр «мутләқ қараңғулуқта» болиду. Шәк-шүбһисиз, улар келәчәктә йоқ қилиниду (Вәһ. 20:7—10).
w08 11.15. 21-б., 7-абз.
Яқуп вә Петрус язған хәтләрдики пайдилиқ ой-пикирләр
4:6: Хуш хәвәр йәткүзүлгән «өлүкләр» кимләр? «Өлүкләр» — «қилмишлириңларда һәм гуналириңларда өлүк болғанларни», йәни хуш хәвәрни аңлимай туруп, роһий җәһәттин өлгән кишиләрни билдүриду (Әфәс. 2:1). Бирақ улар хуш хәвәргә қулақ селип, Худаға лайиқ һаят кәчүрүшкә башлиди.
28-октябрь — 3-ноябрь
ХУДА СӨЗИДИКИ ҒӘЗНӘ | ПЕТРУСНИҢ 2-ХЕТИ 1—3
Йәһваниң күниниң һазир болушини есиңларда мәккәм тутуңлар
w06 12.15. 27-б., 11-абз.
Йәһва пат арида адаләтни тикләйду
11 Әйса, Йәһва адаләтликни тикләшкә алдирайду дәп ейтқан. Бу сөзләрни қандақ чүшинишкә болиду? Йәһва Худа сәвирлик болсиму, У вақит-саат кәлгәндә, адаләтни тикләйду (Луқа 18:7, 8; Петрусниң 2-хети 3:9, 10). Нуһ пәйғәмбәр заманида Топан сүйи кәлгәндә, рәзил адәмләр дәрһал йоқ қилинған еди. Шуниңға охшаш, Лутниң күнлиридиму асмандин от чүшүп, рәзил адәмләр өлтүрүлгән еди. Әйса: «Инсан Оғли рошән болған күндиму нәқ шундақ болиду»,— дегән (Луқа 17:27—30). Келәчәктиму зулум адәмләр «туюқсиз» һалак болиду (Салоникилиқларға 1-хәт 5:2, 3). Йәһва Худа Шәйтанниң дуниясиға бирму күн бәлгүләнгән вақиттин артуқ яшишиға йол қоймайдиғанлиғиға ишәнчимиз камил.
w06 12.15. 19-б., 18-абз.
Йәһваниң улуқ күни йеқиндур
18 Әлчи Петрус «Йәһваниң күниниң» келишини есимиздә мәһкәм тутушимиз керәклигини ейтқанғу! Буни қандақ қилалаймиз? Мәсилән, буни муқәддәс жүрүш-турушимиз вә Худаға болған садақәтмәнлигимиз арқилиқ көрситәләймиз (Петрусниң 2-хети 3:11, 12). Бу бизгә Худаниң күнини үмүт билән күтүшкә ярдәм бериду. «Есиңларда мәһкәм тутуңлар» дегән сөз удул мәнада «илдамлаштуруш» дегәнни билдүриду. Әлвәттә, биз Йәһваниң күнини илдамлиталмаймиз. Бирақ, әгәр биз Худаға хизмәт қилиш билән бәнт болсақ, вақит көзни жумуп-ачқичә өтүп кетиду (Коринтлиқларға 1-хәт 15:58)
Роһий гөһәрләрни издәйли
w08 11.15. 22-б., 2-абз.
Яқуп вә Петрус язған хәтләрдики пайдилиқ ой-пикирләр
1:19: «Таң юлтузи» дегән ким, у қачан пәйда болған вә униң алиқачан чиққанлиғини қәйәрдин билимиз? «Таң юлтузи» — бу Падишалиқ һоқуқиға егә болған Әйса Мәсиһ (Вәһ. 22:16). 1914-жили Әйса, Худа тәйинлигән Падиша сүпитидә пүтүн мәвҗудат үстидин һөкүмранлиқ қилип, йеңи күнниң келиватқанлиғини көрсәтти. Шагиртлар алдида Әйсаниң өзгирип кетиши, униң асмандики Падишалиқниң қудрәтлик Падиша екәнлигини ениқ көрсәткән. Шундақла, Муқәддәс китапниң пәйғәмбәрлик сөзлириниң раст екәнлигини көрсәткән. Бу сөзләргә қулақ салсақ, бу бизниң қәлбимизни йоритиду вә шуниң арқилиқ «таң юлтузниң» пәйда болғанлиғини чүшинимиз.
w08 11.15. 22-б., 3-абз.
Яқуп вә Петрус язған хәтләрдики пайдилиқ ой-пикирләр
2:4: «Тартарус» дегән немә вә исиян көтәргән пәриштиләр униңға қачан ташланди? У бир түрмигә ташланғандәк әһвални көрситиду. Инсанлар әмәс, бәлки роһий шәхсләр шундақ әһвалға чүшиду, йәни яман роһлар роһий җәһәттин қараңғулуқта қелип, Худаниң парлақ ирадисини көрәлмәйду. Тартаруста болғанларниң кәлгүси вә үмүти йоқ. Нуһниң заманида Худа исиянчи пәриштиләрни тартарусқа ташлиған, улар таки пүтүнләй йоқ қилинғичә шундақ түрмигә ташланғандәк әһвалда болиду.