«Һаятимиз вә хизмитимиз. Иш дәптири» үчүн мәлумат мәнбәлири
© 2024 Watch Tower Bible and Tract Society of Pennsylvania
4—10 НОЯБРЬ
ХУДА СӨЗИДИКИ ҒӘЗНӘ ЗӘБУР 105
У Өзи түзгән келишимни ядида сақлайду
11 Қаримаққа мүмкин болмайдиған бәзи ишлар тоғрилиқ Йәһва өтмүштә өз хәлқигә вәдә қилған. Шу ишлар һәққидә ойлинип көрүң. У Ибраһим билән Сарәниң қериғанда бир оғуллуқ болидиғанлиғини ейтқан (Ярит. 17:15—17). У йәнә Ибраһимға Қанан зиминни униң әвлатлириға беридиғанлиғини вәдә қилған. Ибраһимниң әвладлири, йәни исраиллар Мисирда узун жиллар қул болғинида, бу вәдиләр һәргиз әмәлгә ашмайдиғандәк көрүнгән. Кейин биринчи әсирдә Йәһва яшинип қалған Елизабетниң балилиқ болидиғанлиғини хәвәр қилған. У Өз Оғлини Мәрийәм дегән қизниң туғуп беридиғанлиғини ейтқан. Шуниң билән, Йәһва нәччә миң жил бурун Ерәм беғида вәдә қилған йәнә бир бәшарәт әмәлгә ашқан (Ярит. 3:15).
12 Йәһваниң барлиқ вәдилири вә әшу вәдилирини қандақ әмәлгә ашурғанлиғи һәққидә ойланғинимизда, Униң әҗайип күч-қудрити барлиғини чүшинимиз вә йеңи дуния тоғрилиқ бәргән вәдисигә болған ишәнчимиз техиму күчийиду (Йәшуа 23:14; Йәшая 55:10, 11ни оқуң). Башқиларниң вәдә қилинған йеңи дунияниң бир чүш яки әпсанивий ривайәт әмәслигини чүшинишигә ярдәм беришкә өзүмизни яхширақ тәйярлалаймиз. Йәһва Өзи йеңи асман вә йеңи йәр һәққидә шундақ дегән: «Бу сөзләр ишәнчлик вә һәқтур» (Вәһ. 21:1, 5).
it «Сөз»
Һәммә яратмилар җанлиқ, җансиз болсун һәммиси Худаниң сөзигә беқиниду. Худа Өзиниң мәхситини уларниң ярдими билән әмәлгә ашуриду (Зб 103:20; 148:8). Униң сөзи ишәшлик, Худа Өз вәдисини дайим әстә тутуп, уни орунлайду (Қ.ш 9:5; Зб 105:42—45). У Өзи ейтқан: «Униң сөзи мәңгү болиду» вә У Өз мәхситигә толуқ йәтмигичә, Униңға бекардин-бекар қайтип кәлмәйду (Йша 40:8; 55:10, 11; Пт1х 1:25).
Роһий гөһәрләрни издәйли
w86 11/1 19-б., 15-абз.
15 «Зәнҗиргә униң путлирини қамиди, бойниға төмүр боюнтуруқ есилди. Худаниң вәдиси орунланмиғичә вә Йәһваниң Сөзлири уни шәрәплимигичә, у җапа тартти» (Зәбур 105:17—19). Йәһва Худаниң ирадиси орунланмиғичә, Йүсүп он үч жил зинданда қул болуп, азапланған. Бу синақлар униңға пишип йетилишигә ярдәм бәрди. Униң синақлириға Йәһва Худа сәвәпчи болмисиму, мәлум бир мәхсәт үчүн шундақ җапа чекишигә йол қойған. Шундақ дәһшәтлик синақларға қаримастин, Йүсүп «Йәһваниң сөзлири» әмәлгә ашидиғанлиғиға ишингәнму? У еғир вәзипиләрни орунлаш үчүн чидамлиқ, кичик-пейил, роһи күчлүк, җүръәтлик дегән хисләтләрни риваҗландуралиғанму? Йүсүп бу синақтин алтунни отта тазилиғандәк, таза чиқип, Худаниң көз алдида техиму қәдирлик болған. Кейин Худаниң ярдими билән нурғунлиған әҗайип ишларни атқурған (Яритилиш 41:14, 38—41, 46; 42:6, 9).
11—17 НОЯБРЬ
ХУДА СӨЗИДИКИ ҒӘЗНӘ ЗӘБУР 106
Улар Ниҗаткарини унтуди
w18.07 20-б., 13-абз.
13 Исраиллиқлар Худаниң алаһидә усулда көрсәткән күч-қудритини көргәндә қорқуп кәткәнликтин, Муса Синай теғиға чиқип, хәлиқ үчүн Йәһваға сөз қилған (Чиқиш 20:18—21). Хәлиқ шунчә узун вақит өтсиму, Мусаниң техиғичә тағдин чүшмигәнлигини көрүп, өзлирини чөлдә йолбашчисиз қалидиғандәк сәзгән охшайду. Улар немә иш қилған? Бәлким, улар инсаний йолбашчиси Мусаға һәддидин зиядә таянғачқа, қаттиқ әнсирәп, Һарунға: «Тур, бизгә алдимизда маңидиған бир илаһни ясап бәргин, чүнки Муса билән, бизни Мисирдин ачиққан киши билән, немә болғинини билмәймиз»,— дегән (Чиқиш 32:1, 2).
Роһий гөһәрләрни издәйли
w19.02 13-б., 20, 21-абз.
20Шу чағда Муса кәмтәрлик көрсәтмәй, қаттиқ ғәзәпләнгән. Йәһва буйриғандәк қорам ташқа сөзләшниң орниға, Муса хәлиққә қопал сөзләп, мөҗүзини мән қилимән дегән. Андин кейин у қорам ташни икки қетим урғанда, униңдин су етилип чиқти. Тәкәббурлуқ вә ғәзәпкә берилгәнликтин, Муса чоң хаталиқ өткүзгән (Зәб. 106:32, 33). Бир дәқиқигә кәмтәрлигидин айрилғанлиғи үчүн Муса Вәдә қилинған зәмингә кирәлмәй қалған (Сан. 20:12)
21 Бу вақиәдин бирнәччә муһим савақ алимиз. Биринчидин, биз кәмтәрликни көрситиш үчүн һәрқачан күч чиқиришимиз керәк. Әгәр пәхәс болмисақ, тәкәббурлуқ бизни әхмиқанә сөзләшкә яки ахмақлиқ билән һәрикәт қилишқа дәвәт қилиши мүмкин. Иккинчидин, бесимға дуч кәлгәндә, кәмтәр болуп қелиш оңай әмәс. Шуңа һәтта қийин вәзийәттиму кәмтәрлик көрситишкә тиришишимиз муһим.
18—24 НОЯБРЬ
ХУДА СӨЗИДИКИ ҒӘЗНӘ ЗӘБУР 107, 108
«Йәһваға миннәтдарлиқ ейтиңлар, чүнки У меһрибан»
w07 4/15 20-б., 2-абз.
2 Җамаәт бу пәқәтла бир аммивий топ әмәс, у қандақту бир спорт түри билән шуғилинидиған яки умумий нәрсиләргә қизиқидиған, яки келип чиқиши охшаш кишиләрниң җәм болуп туридиған бир топи әмәс. Җамаәт асасән Йәһва Худани мәдһийиләш үчүн тәшкилләнгән. Әсирләр бойи җамаәтниң мәхсити шундақ болған. Буни Зәбур китавидин көрәләймиз. Мәсилән, Зәбур 35:18дә мундақ дәп йезилған: «Мән Саңа бүйүк жиғинда тәшәккүр ейтимән, нурғунлиған хәлиқ арисида Сени қайтилап махтаймән!» Шуниңға охшаш, Зәбур 107:31, 32дә бизни мундақ дәп үндәйду: «Йәһвани Униң меһрибанлиғи вә инсанларға қилған яхши ишлири үчүн чиң махтаңлар! Уни хәлиқ жиғилишлиридә мәдһийилисун вә Униңға ақсақаллар жиғинлирида апирин әйлисун!»
w15 1/15 9-б., 4-абз.
4 Қәлбимиздә һәрдайим миннәтдар болғумиз кәлсә, Худадин алған бәрикәтлиримизни көрүшимиз, улар тоғрилиқ миннәтдарлиқ билән чоңқур ойлинишимиз вә униң садиқ меһир-муһәббити тоғрилиқ мулаһизә қилишимиз керәк. Зәбур язғучиси Йәһваниң көплигән әҗайип ишлири тоғрисида чоңқур ойланғанда, жүриги миннәтдарлиққа толған (Зәбур 40:5; 107:43ни оқуң).
Роһий гөһәрләрни издәйли
w23.10 17-б., 20-абз.
20Һәтта өзүмизни аҗиз һис қилғанда, биз Худадин күч алимиз (Зәб. 108:13). Йәһва Униңдин күч-қувәт елишиңиз үчүн аллиқачан еһтияҗлириңизни тәминләп келиватиду. Шуңа, вәзипини орунлаш, синаққа бәрдашлиқ бериш яки хошаллиғиңизни сақлап қелиш үчүн ярдәмгә муһтаҗ болғанда, чин қәлбиңиздин Йәһваға дуа қилип, Униңға йеқинлишиң вә шәхсий үгиниш арқилиқ Униңдин келидиған көрсәтмиләрни издәң. Етиқатчилардин кәлгән илһам-мәдәтни қобул қилиң. Дайим вақит чиқирип келәчәккә болған үмүтиңизни тәсәввур қилиң. Шундақ қилғиниңизда, «ахириғичә туруп қелишқа һәм хурсәнлик билән узақ сәвирчан болушуңлар үчүн, барлиқ күчүңлар билән Униң шәрәплик қудритигә мувапиқ» мустәһкәм болисиләр (Кол. 1:11).
25 НОЯБРЬ—1 ДЕКАБРЬ
ХУДА СӨЗИДИКИ ҒӘЗНӘ ЗӘБУР 109—112
Падишайимиз Әйсани қоллаң!
w06 9/1 13-б., 6-абз.
Давутниң һакимдари Әйса Мәсиһ Йәһваниң оң тәрипигә олтарғанда, немә қилди? Тирилгәндин кейин, Әйса асманға көтүрүлүп, Падиша сүпитидә һөкүмранлиқ қилидиған вақитни 1914-жилғичә Йәһва Худаниң он тәрипидә олтирип күткән. Шу арилиқта Әйса майланғанларниң үстидин һөкүмранлиқ қилған. У вәз хизмитидә вә шагиртларни тәйярлаш ишида рәһбәрлик берип, уларни Падишалиғида биллә һөкүмранлиқ қилишиға тәйярлиған (Мәтта 24:14; 28:18—20; Луқа 22:28—30).
w00 4/1 18-б., 3-абз.
3 Худаниң хәлқи 20-әсирниң бешидин башлап, һуҗумға дуч кәлмәктә. Көплигән дөләтләрдә зулум адәмләр Худа Падишалиғи һәққидики хуш хәвәрниң җакалинишиға тосалғу қилишиға тиришқан. Уларни бу ишқа дәвәт қиливатқан «ширдәк ғарилдап издәп» жүриватқан дүшминимиз Иблис Шәйтан (Петрусниң 1-хети 5:8). 1914-жили хәлиқләргә бәлгүләнгән вақитлар аяқлашқанда, Йәһва Худа Оғлини Падиша қилип, дүшмәнләрниң арисида һөкүмранлиқ қилишқа буйриған (Луқа 21:24; Зәбур 110:2). Өзиниң күчини көрситип, Әйса Мәсиһ Шәйтанни асмандин қоғлап чиқарди. Әнди у пәқәт йәргә тәсир қилалайдиған болди. Аз вақит қалғанлиғини билгән Иблис ғәзәпкә толуп, майланғанларға вә униң ярдәмчилиригә қаттиқ аччиқланмақта (Вәһий 12:9, 17).
be 76-б., 2-абз.
Бизгә берилгән қабилийитимизни қоллиниш үчүн биринчи болуп қәдәм қилишимиз керәк. Мәсилән, бурадәр-қериндашлар билән хизмәткә чиқиш үчүн уларни биринчи болуп чақирамсиз? Җамаитиңиздә йеңидин кәлгәнләргә, яшларға вә ағриқчан қериндашларға ярдәм беришкә тиришамсиз? Ибадәт өйини тазилаш ишлирида яки конгресста тазилиқ бөлмидә хизмәт қилиш үчүн ярдәм қолуңизни сунамсиз? Бәзи вақитларда ярдәмчи пионер яки пионер болуп хизмәт қилаламсиз? Ярдәм керәк җамаәткә көчүп бараламсиз? Әгәр бурадәр болсиңиз, хизмәт ярдәмчиси яки ақсақал болушқа лаяқәтлик болуш үчүн күч чиқирамсиз? Башқиларға ярдәм беришкә тәйяр болсиңиз вә өз бойниңизға җавапкарлиқни алсиңиз, бу сизни роһий җәһәттин қәдәмләрни қиливатқанлиғиңизниң бәлгүси (Зәб. 110:3).
Роһий гөһәрләрни издәйли
it «Келишим»
Мәлкисадиққа охшайдиған роһаний болуш келишими. Бу келишим тоғрилиқ Зәбур 110:4-айәттә йезилған вә Ибранийларға язған хәтниң язғучиси буни Мәсиһкә қарита қоллиниду (Ибранийларға 7:1—3, 15—17). Бу келишим Йәһва Худа билән Әйса Мәсиһниң арисида түзүлгән. Әйса шагиртлири билән Падишалиқ һәққидики келишимни түзгәндә, мошу әһдә тоғрилиқ ейтқан (Лқ 22:29). Йәһва бәргән қәсәм бойичә, Әйса Мәсиһ асмандики Худаниң Оғли Мәлкисадиққа охшайдиған әбәдий роһаний болуши керәк еди. Мәлкисадиқ йәрдә һәм падиша, һәм роһаний болған. Әйса Мәсиһ болса, асмандики һәм Падиша, һәм роһаний болиду. У бу хизмитини асманға көтирилгәндин кейин башлиған (Иб 6:20; 7:26, 28; 8:1). Әйса Йәһва Худаниң рәһбәрлиги бойичә Падиша һәм баш роһаний болуп, мәңгү хизмәт қилиду. Шуниң үчүн бу мәңгүлүк келишим (Иб 7:3).
2—8 ДЕКАБРЬ
ХУДА СӨЗИДИКИ ҒӘЗНӘ ЗӘБУР 113—118
Худаға миннәтдарлиғимизни қандақ билдүрәләймиз?
w01 1/1 11-б., 13-абз.
13 Әйсаниң сөзлилридин көрүватимиз әң авал Йәһвани қаттиқ яхши көрүшимиз керәк. Бирақ биз Йәһва Худаға болған меһир-муһәббәт билән туғулмаймиз. Уни йетилдүрүшимиз керәк. Әң бешида бу тоғрилиқ аңлиғанлиримиз бизни Униңға җәлип қилди. Мәсилән, Худа йәрни инсанийәт үчүн қандақ тәйярлиғанлиғини билдуқ (Яритилиш 2:5—23). Бизниң әҗдатлиримиз Адәм ата билән Һава ана гуна қилғандин кейин, Йәһва Худа инсанийәтни рәт қилмай, уларни қутулдуруш үчүн қандақ қәдәмләрни қилғанлиғини билдуқ (Яритилиш 3:1—5, 15). У садиқ хизмәтчилиригә меһрибанлиқ көрситип, уларниң гуналири кәчүрүлүши үчүн Өзиниң йеганә Оғлини қурбан қилди (Йоһан 3:16, 36). Йәһва тоғрилиқ көпирәк билгәнсири, Униңға болған миннәтдарлиғимиз техиму өсиду (Йәшая 25:1). Давут падиша Йәһва Худани яхши көргән, чүнки Униң ғәмхорлуғини һис қилған (Зәбур 116:1—9). Бүгүнки күндиму Йәһва Худа бизгә ғәмхорлуқ қилиду, йетәкләйду, бизни күчләндүриду вә илһам бериду. Биз Йәһва Худа тоғрилиқ билгәнсири, Униңға болған меһир-муһәббитимиз өсиду (Зәбур 31:23; Зәфания 3:17; Римлиқларға 8:28).
w09 7/15 29-б., 4, 5-абз.
Зәбур язғучиси мундақ дегән: «Йәһва Рәббимгә маңа қилған барлиқ яхшилиқлири үчүн немә қайтуримән?» (Зәб. 116:12) Бу йәрдә у қандақ яхшилиқлар тоғрилиқ ейтқан? У қайғу-һәсрәт чәккәндә, Йәһва Худа униңға тәсәлли бәргән. Униңдин ташқири, Йәһва Худа униң җенини қутулдуруп, өлүмдин аман қалдурди. Йәһваниң мошу яхшилиқлири үчүн у бир нәрсә қайтурғиси кәлгән. У немә қилди? У мундақ дегән: «Йәһваға бәргән барлиқ вәдилиримни орунлаймән» (Зәб. 116:3, 4, 8, 10—14). У Йәһва Худаға бәргән қәсимини орунлашқа вә Худаниң алдидики борчини ада қилишқа бәл бағлиған.
Сизму шундақ қилиш үчүн немә қилалайсиз? Һаятиңизда һәрқачан Худаниң қанунлири билән принциплирини мәһкәм тутуң. Шуңа, Йәһва Худаға болған ибадитиңиз һаятиңизда биринчи орунда болғанлиғиға көз йәткүзүң вә немә қилсиңизму, муқәддәс роһ сизни йетәклишигә йол бериң (Вәз 12:13; Гал. 5:16—18). Әлвәттә, Йәһва Худа бизгә қилған барлиқ яхшилиқлирини қайтуралмаймиз. Шундақ болсиму, Йәһва Худаға бар вуҗудимиз билән хизмәт қилсақ, Униң жүригини хошал қилимиз (Пәнд н. 27:11). Шундақ йол билән Йәһва Худани хошал қилиш чоң шан-шәрәп!
w19.11 22, 23-б., 9—11 абз.
9 Иккинчи савақ: Биз Йәһваға миннәтдар болғачқа, Униңға хизмәт қилимиз. Буни чүшиниш үчүн исраиллар тәғдим қилған течлиқ қурбанлиғи тоғрилиқ көпирәк биливалайли. Ләвийләр китавида йезилғандәк, исраиллар течлиқ қурбанлиғини «шүкүр қурбанлиғи» сүпитидә әкиләтти (Ләв. 7:11—13, 16—18). Улар бу қурбанлиқни мәҗбурий әмәс, өзлири халап әкәлгән. Демәк, улар ихтиярий қурбанлиқларни Йәһвани яхши көргәнликтин елип кәлгән. Қурбан қилинған малниң гөшини уни әкәлгән киши, униң өйидикилири вә роһанийлар йегән. Лекин малниң бәзи қисимлири пәқәт Йәһва Худағила берилгән.
10 Үчинчи савақ: Меһир-муһәббәт бизни Йәһваға қолумизда бар әң яхшисини беришкә дәвәт қилиду. Йәһва Худа үчүн малниң әң яхши қисми яғ болған. Шундақла У җигәр билән бөрәкләрниң алаһидә екәнлигини ейтқан (Ләвийләр 3:6, 12, 14—16ни оқуң). Шу сәвәптин исраиллиқ киши өз ихтияри билән малниң бу алаһидә қисимлирини вә яғни қурбанлиқ сүпитидә тәғдим қилғанда, Йәһва Худа интайин хошал болған. Чүнки шу киши Йәһваға қолида бар әң яхши нәрсисини беришни халиғанлиғини көрсәткән. Шуниңға охшаш, Әйсаму Йәһвани яхши көргәнликтин Униңға бар күчи билән хизмәт қилиш арқилиқ өз ихтияри билән әң яхшисини бәргән (Йоһ. 14:31). Худаниң ирадисини орунлаш Әйсаниң көңлини қанаәтләндүргән вә у Худаниң қанунлирини бәк яхши көргән (Зәб. 40:8). Буни көрүш Йәһва Худаниң көңлини хурсән қилғанлиғи шәк-шүбһисиздур!
11 Йәһваға болған хизмитимиз течлиқ қурбанлиғиға охшаш. Чүнки өз ихтияримиз билән хизмәт қилсақ, Йәһвани қанчилик яхши көридиғанлиғимизни көрситимиз. Уни пүтүн вуҗудимиз билән сөйгәнликтин, Униңға қолумизда бар әң яхшисини беримиз. Миллионлиған хизмәтчилириниң Униңға меһир-муһәббәт түпәйлидин өз ихтияри билән хизмәт қилғанлиғини көрүш Йәһваниң жүригини шат-хорам қилиду. Йәһваниң пәқәт иш-һәрикәтлиримизнила әмәс, нийәтлиримизниму көридиғанлиғини вә қәдирләйдиғанлиғини билиш бизгә тәсәлли бериду. Мәсилән, сиз яшанған болсиңиз вә өзүңиз халиғандәк көп хизмәт қилалмисиңиз, Йәһва Худа сизниң чәклимилириңизни чүшинидиғанлиғини унтумаң. Сиз Йәһваға бәк аз хизмәт қиливатимән дәп ойлишиңиз мүмкин, бирақ У қолуңиздин кәлгиничә һәммисини қилишқа дәвәт қилидиған қәлбиңиздики чоңқур меһир-муһәббәтни көриду. Йәһва биздә бар әң яхшисини хошаллиқ билән қобул қилиду.
Роһий гөһәрләрни издәйли
w17.12 11-б., 9-абз.
Һә, Зәбур 118:22дә тирилиш һәққидики бәшарәт йүзлигән жиллардин кейин әмәлгә ашқанлиғи ейтилған. Мәсиһ рәт қилинип, өлтүрүлди. Лекин у тирилгәндин кейин, булуңға қоюлған һул таш болди. Адәмләргә берилгән исимларниң арисида пәқәт тирилгән Оғли, йәни Әйсаниң исми арқилиқ «ниҗат тепишимиз» мүмкин (Әлчиләр 4:12; Әфәсликләргә 1:20).
9—15 ДЕКАБРЬ
ХУДА СӨЗИДИКИ ҒӘЗНӘ ЗӘБУР 119:1—56
Яш жигит қандақ қилип өз йолини пак туталайду?
w87 11/1 18-б., 10-абз.
10 Әфәсликләргә 5:5тә әлчи Паул мундақ дәп агаһландурған: «Силәр буни билисиләрки һәм пүтүнләй чүшинисиләрки, һечқандақ паһишиваз, напак һәм ачкөз, йәни бутпәрәс Худаниң вә Мәсиһниң Падишалиғида мирасхор болмайду». Һәр жили миңлиған бурадәр қериндашлар әхлақсизлиқ қилғанлиқтин яки өз тениға қарши гуна қилғанлиқтин җамаәттин чиқирилиду (Коринтлиқларға 1-хәт 6:18). Мәсилән, көплигән бурадәрләр отпуска вақтида һошиярлиғини йоқитип қойған (Зәбур 119:9). Улар роһий ишларға сәл қарап, Худаға хизмәт қилмайдиған дәм еливатқан башқа кишиләр билән дост болуп кәткән. Бу адәмләр яхши болуп көрүнгәчкә, уларға қошулуп гуманлиқ ишларни қилған. Шуниңға охшаш, башқилар болса хизмәтдашлири билән йеқин арилишип, дост болуп кәткән. Бир ақсақал өзи билән ишлигән аял билән қоюқ арилишип, ахирида аилисидин кетип, шу аялға қошулған. Нәтиҗисидә, у җамаәттин чиқирилди. Һәқиқәтән, яман муамилиләр пайдилиқ адәтләрни бузиду (Коринтлиқларға 1-хәт 15:33).
w18.02 17-б., 6-абз.
Җисманий адәмгә қариғанда, роһий адәм Худа билән болған мунасивәтни бәк муһим дәп һесаплайду. У Муқәддәс роһниң өзини йетәклишигә йол берип, Йәһваға тәқлит қилишқа күч салиду (Әфәсликләргә 5:1). Йәһваниң пикир қилиш тәрзини билишкә вә һәммә мәсилиләргә Йәһвадәк қарашқа тиришиду. Худа униң үчүн тирик Шәхс. Җисманий адәмгә қариғанда, роһий адәм Йәһваниң өлчәмлирини һаятиниң һәр саһасида тутиду (Зәбур 119:33; 143:10). У «тәнниң ишлириға» арилашмайду, амма «роһниң мевисини» риваҗландурушқа күч салиду (Галатилиқларға 5:22, 23). Роһий адәм дегән ибариниң мәнасини чүшиниш үчүн, келәрки мисални қараштурайли: сода-сетиқ қилишқа уста адәмни тиҗарәтчи дәп атайду. Шуниңға охшаш барлиқ диққитини роһий ишларға ағдуридиған адәмни роһий адәм дәп ейтсақ болиду.
w17.07 19-б., 12-абз.
Амма Йәһва «рәзилләрни йәргичә төвәнлитиду» (Зәбур 147:6ә). Бу бизниң бешимизға чүшкәнлигини халимаймиз! Биз Худаниң меһир-шәпқитидин айрилғумиз кәлмәйду. Шуңа У нәпрәтлинидиған нәрсидин бизму нәпрәтлинишкә тиришишимиз керәк (Зәбур 97:10). Мәсилән, җинсий әхлақсизлиқтин нәпрәтлинишимиз лазим. Бу дегинимиз, бундақ яман ишларға қул болушимизға елип келидиған һәрқандақ нәрсидин, шу җүмлидин порнографиядин, қечишимиз керәк (Зәбур 119:37; Мәтта 5:28). Бу қийин күрәш болуши мүмкин, лекин Йәһваниң бәрикитигә еришиш күч чиқиришқа әрзийду.
Роһий гөһәрләрни издәйли
w05 4/15 10-б., 2-абз.
2 119-зәбур Худаниң Сөзи баһалиқ екәнлигини көрситиду. Бәлким, бу зәбурни әстә тутушқа қолайлиқ болуши үчүн, у акростих шәкилдә йезилған. Бу шеир әсирниң 176 айәтлириниң һәммиси ибраний елипбәсигә асасән түзүлгән. Әсли тилда, түп нусхисида зәбурниң 22 мисрасиниң һәр бири охшаш һәрип билән башланған 8 қурдин тәркип тапқан.
16—22 ДЕКАБРЬ
ХУДА СӨЗИДИКИ ҒӘЗНӘ ЗӘБУР 119:57—120
Қийинчилиқларни қандақ қилип йәңсәк болиду?
w06 6/15 20-б., 2-абз.
2 Бәлким, сиз мундақ ойлиғансиз: Худаниң қанунлири зәбур язғучисиға қандақ илһам бәргән? Йәһва Худа униңға көңүл бөлидиғанлиғиға ишәнчлик болған. У дүшмәнлиридин зәрдап чәксиму, меһир-муһәббәткә асасланған Худаниң қанунлирини билгәнлиги уни бәхитлик қилған вә Йәһва Худа униңға рази екәнлигини билгән. Униңдин ташқири, Худаниң қанунлирини қолланғанлиғи уни дүшмәнлиридин дана қилди вә һаятини сақлап қалди. Худаниң қануниға бойсунғанлиқтин, зәбур язғучиси көңүл арамлиғиға вә пак вижданға егә болған (Зәбур 119:1, 9, 65, 93, 98, 165).
w00 12/1 14-б., 3-абз.
3 Худаниң әскәртмилирини сөйгән зәбур язғучиси мундақ дегән: «Кечиктүрмәй, Сениң вәсийәтлириңни Һәр ян сақлашқа алдираймән. Зулумларниң қармақлири мени қоршиди, лекин Қануниңни мән унтумидим» (Зәбур 119:60, 61). Йәһва Худаниң әскәртмилири тәқипләрдә чиң турушқа ярдәм бериду. Чүнки Йәһва Худа дүшмәнлиримиз бизни чирмавалған торлардин қутқузалайдиғанлиғиға ишинимиз. Падишалиқ тоғрилиқ хуш хәвәрни башқиларға ейталишимиз үчүн, У бизни қийинчилиқлардин өз вақтида қутулдуриду (Марк 13:10).
w06 9/1 14-б., 4-абз.
Қийинчилиқлар бизни Йәһва Худаға көпирәк тайинишқа, Униңға қизғин дуа қилишқа, Муқәддәс китапни пухта тәтқиқ қилишқа вә оқуғанлиримизни һаятимизда қоллинишқа үгитиду. Униңдин башқа, қийинчилиқларға дуч кәлгәндә камчилиқлиримиз ашкарә қилиниду. Әгәр синақларниң бизни яхши қилишиға йол қойсақ, ундақта бу һаятқа хапа болуп кәтмәймиз.
w17.07 13-б., 3, 5 абз.
3 Шүбһисизки, тәсәллиниң асасий мәнбәси — рәһимлик Атимиз Йәһвадур (Коринтлиқларға 2-хәт 1:3, 4ни оқуң). У рәһимликниң әң улуқ үлгиси вә у адәмләргә: «Силәргә тәсәлли бәргүчи Өзүм»,— дәп вәдә қилған (Йәшая 51:12; Зәбур 119:50, 52, 76).
5 Йәһва бизгә ярдәм қолини сунидиғанлиғиға һеч гуманланмаймиз. Ундақта, униңға һеч тартинмастин дуа қилип, ич-бағримизни төкүшимиз керәк. Йәһваниң дәрдимизни чүшинидиғанлиғи вә бизгә керәк тәсәлли беридиғанлиғи көңлүмизгә арам бәрмәмду? Лекин у бизгә қандақ тәсәлли бериду?
Роһий гөһәрләрни издәйли
w17.05 18-б., 11, 12-абз.
11 Мәсиһийләр сүпитидә биз һәқиқәтни яхши көримиз. Биз үчүн һәқиқәтниң мәнбәси — Худа Сөзи. Әйса Мәсиһ Худаға: «Сениң сөзүң һәқиқәттур»,— дегән (Йоһан 17:17). Шуңа һәқиқәтни сөйүш үчүн биз Муқәддәс китапта немә йезилғанлиғини билишимиз керәк (Колосилиқларға 1:10). Лекин буниңдинму көп нәрсә һаҗәт. Зәбур 119ниң язғучиси немә қилишимиз керәклигини язған (Зәбур 119:97—100ни оқуң). Күн давамида биз Муқәддәс китаптин оқуғанлиримиз һәққидә тәпәккүр қилишимиз, йәни чоңқур мулаһизә қилишимиз керәк. Муқәддәс китапта йезилғанларни әмәлийәттә қоллинишниң пайдиси һәққидә мулаһизә қилғансири, һәқиқәтни техиму яхши көридиған болимиз.
12 Зәбур язғучиси шундақла: «Сөзлириң тилимға шунчә шерин тетийду! Ағзимда һәсәлдин татлиқтур!»— дәп язған (Зәбур 119:103). Худа тәшкилати тәйярлайдиған Муқәддәс китапқа асасланған әдәбиятлар тәмлик таамға охшаш. Биз яхши көридиған тамиғимизни йегәндә, униңдин һузурлунушқа вақит бөлүшни халаймиз. Шуниңға охшашла, алдиримай тәтқиқ қилиш үчүн вақит аҗритишимиз лазим. Шу чағда һәқиқәтниң «йеқимлиқ сөзлиридин» һузурлинип, оқуғанлиримизни есимиздә сақлашқа вә уни башқиларға ярдәм бериш үчүн қоллинишқа асанирақ болиду (Вәз 12:10).
23—29 ДЕКАБРЬ
ХУДА СӨЗИДИКИ ҒӘЗНӘ ЗӘБУР 119:121—176
Өзүңизни Һаҗәтсиз азапқа селиштин нери болуң
w18.06 17-б., 5, 6-абз.
5 Худа қанунлириниң бизгә ярдәм беришини халисақ, уларни пәқәт оқуп яки билипла қоймай, шу қанунларни сөйүшимиз вә һөрмәтлишимиз керәк. Муқәддәс китапта: «Яманлиқтин нәпрәтлиниңлар, меһрибанлиқ-яхшилиқни сөйүңлар»,— дәп йезилған (Амос 5:15). Буни қандақ қилалаймиз? Биз Йәһваниң көзқаришиға охшаш көзқарашни йетилдүрүшимиз керәк. Бир мисал кәлтүрәйли. Сиз уйқусизлиқ кесилигә гириптар болдиңиз дәйли. Дохтур сизгә пайдилиқ таамларни йейиш, көпирәк бәдән чиниқтуруш вә турмуш адитиңизни өзгәртиш һәққидә көрсәтмә бериду. Униң ейтқанлири бойичә қилип, пайдисини көргәндә, дохтурниң бәргән көрсәтмилири һәққидә немә ойлайсиз?
6 Шуниңға охшаш, Яратқучимиз бизни гунаниң яман ақиветидин һимайә қилип, турмушимизни техиму яхшилаш үчүн қанунларни бәргән. Мәсилән, Худа Сөзидин биз ялғанчилиқ, алдамчилиқ, оғрилиқ, зина, зораванлиқ қилмаслиғимиз вә җинлар билән алақидә болмаслиғимиз керәклигини үгинимиз (Пәнд-нәсиһәтләр 6:16—19ни оқуң; Вәһий 21:8). Йәһваға итаәтчан болушниң қандақ яхши нәтиҗә елип келидиғанлиғини көргәндә, Униңға вә Униң қанунлириға болған меһир-муһәббитимиз ашиду.
w93 4/15 17-б., 12-абз.
12 Әң муһими, сиз яман нәрсиләрни өч көрүп, униңдин жиркинишиңиз керәк (Зәбур 97:10). Һузур яки қизиқ болуп көрүнидиған ишларни қандақ өч көрәләйсиз? Ақивети тоғрилиқ ойлаң. «Алданмаңлар: Худа мәсхирә қилинидиған Шәхс әмәс. Инсан немә терисә, шунила жиғиду: тенигә тәргүчи, тенидин чирикликни алиду, роһиға тәргүчи болса, муқәддәс роһтин мәңгү һаятни алиду» (Галатилиқларға 6:7, 8). Аздурушларға дуч кәлгәндә, униң ақивети тоғрилиқ ойлаң. Биринчидин, Йәһва Худаниң жүригини ағритимиз (Зәбур 78:41ни селиштуруң). Йәнә некасиз еғир аяқ болуш, йә болмиса СПИДқа охшаш жуқумлуқ ағриқларни жуқтурувелишиңиз мүмкин. Униңдин башқа, депрессияға чүшүп, өзүңизгә болған һөрмәтни йоқитип қоюсиз. Бу ақивәтниң азавини узақ жиллар тартишиңиз мүмкин. Бир қериндишимиз мундақ дегән: «Иккимиз той қилмастин авал, биз башқилар билән җинсий мунасивәттә болған. Той қилғичә әхлақсиз ишлиримиз һазир аилимиздики күлләш билән қийинчилиқниң сәвәви боливатиду». Шундақла биз тәшкилатимиздики вәзипилиримиздин айрилип қелишимиз яки җамаәттин чиқирилишимиз мүмкин (Коринтлиқларға 1-хәт 5:9—13). Бир минутлуқ ләззәт үчүн шунчилик жуқури һәқ төләш немә дегән ахмақлиқ!
Роһий гөһәрләрни издәйли
w23.01 2-б., 2-абз.
2Биз Йәһваниң хизмәтчилири сүпитидә, Униң һәқиқәтниң Худаси екәнлигигә вә У дайим биз үчүн әң яхши нәрсиләрни тәминләп беридиғанлиғиға ишинимиз (Зәб. 31:5; Йәшая 48:17). Шуни билимизки, Муқәддәс китапни оқуғинимизда, «Сөзүңниң һули — һәқиқәттур» дегән сөзләргә ишинәләймиз (Зәбур 119:160ни оқуң). Биз йәнә Муқәддәс китапни тәтқиқ қилған бир алимниң язған сөзлиригә қошулимиз: «Худаниң еғизидин чиққан һәрбир сөз һәқиқәт вә чоқум әмәлгә ашмай қалмайду. Худа хәлқиниң буниңға ишәнчи камил, чүнки улар мошу сөзләрни қилған Худаға ишиниду».
30 ДЕКАБРЬ—5 ЯНВАРЬ
ХУДА СӨЗИДИКИ ҒӘЗНӘ ЗӘБУР 120—126
Көз яшлирини еқитип териғанлар шатлиқ билән орар
w04 6/1 16-б., 10-абз.
10 Биз Худаға хизмәт қилғанда, Шәйтанға қарши чиқимиз. Яқуп 4:7дә: «Иблисқа қарши туруңлар һәм у силәрдин қачиду»,— дейилгән. Бирақ бу оңай әмәс. Худаға хизмәт қилиш үчүн көп күч чиқириш керәк (Луқа 13:24). Амма Зәбур 126:5тә мундақ вәдә йезилған: «Жиға билән тәргәнләр нахша билән омисини жиғивалсун». Биз разилиқни билмәйдиған Худаға ибадәт қилмаймиз. Йәһва Худа Уни әстаидил издигәнләрни мукапатлайду вә Униңға шан-шәрәп кәлтүрүдиғанларни бәрикәтләйду (Ибранийларға 11:6).
w21.11 24-б., 17-абз.
17 Йеқин кишиңизниң өлүми сизни қайғу-әләмгә селиватамду? Өлүмдин тирилдүрүлгәнләр һәққидики баянларни оқуш арқилиқ тирилиш үмүтигә болған иман-етиқадиңизни күчәйтиш үчүн вақит чиқириң. Аилиңиздики бири җамаәттин чиқирилғач, азап-оқубәт чекиватамсиз? Худаниң әдәпләп-түзитиш йоли әң яхши екәнлигигә өзүңизни қайил қилиш үчүн тәтқиқ қилишни давамлаштуруң. Мәйли қандақ қийинчилиққа дуч кәлмәң, уни иман-етиқадиңизни күчәйтишниң бир пурсити дәп билиң. Ич-бағриңизни дуа арқилиқ Йәһваға төкүп бериң. Өзүңизни башқилардин қачурмай, қериндашлириңиз билән йеқин мунасивәтни сақлаң (Пәнд н. 18:1). Сизниң бәрдашлиқ беришиңизгә ярдәм беридиған ишларни қилиң. Һәтта шу ишлар сизгә илгири болған вақиәләрни есиңизгә селип қойсиму, уларни қилишни давамлаштуруң (Зәб. 126:5, 6). Яхши адәтлириңизни ташлимаң, мәсилән, җамаәт жиғилишлириға қатнишиң, вәз қилиң вә Муқәддәс китапни оқуң. Диққитиңизни Йәһваниң келәчәктә сизни ериштүридиған мол бәрикәтлиригә қаритиң. Йәһваниң сизгә қандақ ярдәм беридиғанлиғини көргиниңиздә, Униңға болған иман-етиқадиңиз техиму күчийиду.
w01 7/15 18, 19-б., 13, 14-абз.
13 Худаниң хизмәтчилири, болупму тәқипкә учриғанлар Зәбур 126:5, 6дин тәсәлли алалайду: «Жиға билән тәргәнләр нахша билән Омисини жиғивалсун. Уруқларни етизиға жиға арилаш апарған, дан бағлирини күйләр билән әкәлсун!» Жиғиш вә териш тоғрилиқ бу сөзләр Бабилдин қайтқан Исраил хәлқигә Йәһва Худа қандақ илһам берип бәрикәтлигәнлиги тәсвирләнгән. Улар өз жутиға қайтқанда хошал болған. Амма 70 жил чөлдәрәп қалған етизларни тәргәндә жиғлиған болуши мүмкин. Шундақ болсиму, теришни вә қурулушни давамлаштурғанлар мол мевиләргә еришти вә әмгигидин һузурланди.
14 Биз яки бизниң қериндашлиримиз һәққанийлиқ үчүн азап чәккәндә, көз яш қилимиз (Петрусниң 1-хети 3:14). Һосул жиғишимиздә дәсләптә қийин болуши мүмкин, чүнки әмгигимизниң нәтиҗисини бирдин көрәлмәймиз. Амма биз теришни вә суғурушни тохтатмисақ, Йәһва Худа биз күткәндинму мол өсүм бериду (Коринтлиқларға 1-хәт 3:6). Бу бизниң Муқәддәс китап вә Муқәддәс китапқа асасланған әдәбиятлиримизни тарқитиватқанлиғимиздин көриниду.
Роһий гөһәрләрни издәйли
w18.07 9-б., 1, 2-абз.
1 БИЗ «адәттин ташқири қийин вақитларда» яшаватимиз (Тимотийға 2-хәт 3:1). Йәһва бу рәзил дунияни йоқ қилип, йәрдә течлиқ орнатқичә, турмушимиз барғансири қийинлишиду. Шу сәвәптин өз-өзүмиздин: «Кимдин ярдәм вә йетәкчилик сораймән?»— дәп соришимиз зөрүр. Бәлким, биз дәрһал: «Йәһвадин»,— дәп җавап беридиғандимиз. Бу — бәк яхши җавап.
2 Көзни Йәһваға тикиш дегинимиз немини билдүриду? Қийинчилиққа дуч кәлгәндә, көзүмизни Йәһваға тикиш үчүн немә қилишимиз керәк? Қедимда зәбур язғучиси ярдәмгә муһтаҗ болғинимизда көзлиримизни Йәһваға тикишниң наһайити муһим екәнлигини чүшәндүргән (Зәбур 123:1—4ни оқуң). У көзини Йәһваға тикидиған адәмни ғоҗайиниға көз тикидиған қулға охшатқан. Буни қандақ чүшинишкә болиду? Қул пәқәт йемәк-ичмәккә вә қоғдашқа муһтаҗ болғандила өз ғоҗайиниға көз тикмәстин, бәлки һәрдайим ғоҗайининиң өзидин немә қилишини халиғанлиғини чүшиниш вә шу буйруқларни орунлаш үчүн униңдин көзини үзмәслиги керәк. Шуниңға охшаш, бизму Йәһва немә қилишимизни халайдиғанлиғини чүшиниш үчүн Худа Сөзини һәр күни пухта үгинип, билгәнлиримизни турмушимизда ишлитишимиз лазим. Шундила биз ярдәмгә муһтаҗ болғанда Йәһваниң ярдәм беридиғанлиғиға ишәнч қилалаймиз (Әфәсликләргә 5:17).