Мәңгүлүк һаят кәчүрүш үчүн сиз немә қилалайсиз?

1. Бәзи адәмләр мәңгүлүк һаят тоғрисида немә ойлайду?

КӨП адәмләр узақ яшап, сағлам болуп қелиш үчүн дурус тамақлинишқа вә спорт билән шуғуллинишқа тиришиду. Шундақ болсиму, улар мәңгү яшаймиз дәп ойлимайду, чүнки мәңгүлүк һаят улар үчүн чөчәктәк көрүниду. Йоһан 3:16 вә 5:24тин билгинимиздәк, Әйса Мәсиһ адәмләрниң «мәңгүлүк һаят» кәчүрүши мүмкин екәнлигини ейтқан.

2. Йоһанниң 6-бабида мәңгүлүк һаят тоғрилиқ немә йезилған? (Йоһан 6:39, 40)

² Алдинқи мақалидә караштурғинимиздәк, Әйса мөҗүзә көрситип, нурғунлиған адәмләрни нан вә белиқ билән тойдурғанa. Бу әҗайип бир вақиә болди. Бирақ әтиси Әйсаниң ейтқан сөзлиридин халайиқ техиму һәйран қалди. Улар Җәлилийә деңизиға йеқин җайлашқан Кәпәрнаһум шәһиригә кәлгән. Шу йәрдә Әйса уларға өлгәнләрниң қайта тирилдүрүлүп, мәңгү яшиши мүмкин екәнлигини ейтқан (Йоһан 6:39, 40ни оқуң). Әнди, қайтиш болған йеқин достлириңиз яки уруқ-туққанлириңиз тоғрилиқ ойлап көрүң. Әйсаниң сөзлири шу қайтиш болған йеқинлириңизниң тирилип, сиз билән мәңгү яшиши мүмкин екәнлигигә ишәндүриду. Өткән мақалидә биз Йоһан китавиниң 6-бабини қараштурушни башлиған едуқ. Һазир шу бапта йезилған Әйсаниң келәрки сөзлирини көрүп чиқайли. Бу сөзләрни чүшиниш көпчилик үчүн қийин болған. Бүгүнки күндиму униң мәнасини нурғунлири чүшәнмәйду. Әйса шу чағда немә дегән?

3. Йоһан 6:51дә Һәзрити Әйса өзи тоғрилиқ немә дегән?

³ Әйса мөҗүзә қилип халайиқни тойдурғанда, улар Йәһва Худа әҗдатлириға чөл-баяванда манна бәргәнлигини есигә алған. Муқәддәс Язмиларда манна «асманниң нени» дәп аталған (Зәб. 105:40; Йоһ. 6:31). Әйса уларни муһим бир нәрсигә үгитиш үчүн маннини мисалға кәлтүргән. У манна вә өзиниң тени арисидики муһим бир пәриқкә диққәт ағдурмақчи болған. Гәрчә маннини Худа мөҗүзә қилип бәрсиму, уни йегәнләр ахири өлүп кәткән (Йоһ. 6:49). Амма Әйса болса, өзини «асмандин чүшкән һәқиқий нан», «Худаниң нени» вә «һаятлиқ нени» дәп атиған (Йоһ. 6:32, 33, 35). У «Мән асмандин чүшкән тирик нан. Бу нанни йегән киши мәңгү яшайду» дәп ейтқан (Йоһан 6:51ни оқуң). Бу сөзләрни аңлиған йәһудийлар яқисини тутти. Әйса қандақ қилип асмандин чүшкән «нан» болған? Қандақ қилип бу нан Худа уларниң ата-бовилириға мөҗүзә көрситип бәргән маннадин үстүн болиду? Әйса сөзини давамлаштуруп, «бу нан дунияниң һаяти үчүн берилидиған мениң теним» дәп чүшәндүрди. У немә демәкчи болған? Бу соалниң җававини тепиш биз үчүн бәк муһим, чүнки бизниң вә йеқинлиримизниң мәңгү яшиши шуниңға бағлиқ. Шуңа, Әйсаниң немә демәкчи болғанлиғини қараштурайли.

ӘЙСАНИҢ ТЕНИ ВӘ ҺАЯТЛИҚ НАН

4. Хәлиқ немә үчүн Әйсаниң сөзлиридин гаңгирап қалди?

⁴ Әйса өзиниң тени тоғрилиқ: «Бу нан — дунияниң һаяти үчүн бериветидиған мениң теним»,— дегәндә, халайиқ гаңгирап қалди. Әйса уларни өз тенини йейишкә дәвәт қилғанму? (Йоһ. 6:52). Әйса сөзини давамлаштуруп, улар күтмигән нәрсини ейтти: «Әгәр силәр инсан Оғлиниң тенини йемисәңлар вә униң қенини ичмисәңлар, у чағда силәрдә һаятлиқ болмайду» (Йоһ. 6:53).

5. Әйса удул мәнада униң қенини ичиш керәклигини ейтмиғанлиғини нәдин билимиз?

⁵ Йәһва Худа Нуһниң заманида адәмләргә қанни истимал қилишни мәнъий қилған (Ярит. 9:3, 4). Әсирләр өткәндин кейинму Йәһва Худа исраилларға қанни йәп-ичишкә болмайдиғанлиғини ейтқан. Әгәр қандақту бир адәм қанни истимал қилса, у «өлүши керәк» еди (Лав. 7:27). Әйсаму йәһудийларни Тәврат қанунини орунлашқа дәвәт қилған (Мәт. 5:17—19). Шуңа, Әйса жиғилған хәлиқни униң тенини йәп, қенини ичишкә дәвәт қилиши мүмкин әмәс еди. Әслидә, у мошундақ ғәлитә сөзләрни қоллинип, мәңгүлүк һаятқа еришиш үчүн немә қилиш керәклигини үгәтмәкчи болған (Йоһ. 6:54).

6. Әйса өзиниң тенини йәп, қенини ичиш керәклигини көчмә мәнада ейтқанлиғини нәдин билимиз?

⁶ Әйса немә демәкчи болған? Униң бу сөзләрни көчмә мәнада ейтқанлиғи ениқ, чүнки униңдин авал самарийәлик аял билән сөзләшкәндә, у көчмә мәнадики сөзләрни ишләткән. Әйса самарийәлик аялға: «Амма мән беридиған суни ичкәнләр мәңгү уссимайдиған болиду. Мән беридиған судин ичкәнләрниң вуҗудида су мәнбиси, булақ, пәйда болуп, уларға мәңгүлүк һаятлиқ бериду»,— дегән (Йоһ. 4:7, 14)b. Әйса бу аялға мәңгүлүк һаятқа еришиш үчүн немә қилиш керәклигини ейтқанда, удул мәнадики суни ичиш тоғрилиқ демигән. Дәл шуниңға охшаш, Кәпәрнаһум шәһиридә жиғилған хәлиқкә мәңгүлүк һаятқа еришиш үчүн униң тенини йәп, қенини ичиш керәк дәп удул мәнада ейтмиған.

ӘЙСА ӨЗИНИҢ ТЕНИ БИЛӘН ҚЕНИ ТОҒРИЛИҚ ЙӘНӘ ҚАЧАН ЕЙТҚАН?

7. Бәзиләр Йоһан 6:53тә йезилған Әйсаниң сөзлирини қандақ чүшиниду?

⁷ Гайибир диний кишиләр Әйса Йоһан 6:53тики сөзлирини ейтқанда, Хатириләш мәрасимида қандақ ишлар болидиғанлиғини алдин-ала ейтқан дәп ойлайду. Чүнки Хатириләш мәрасимида у дәл мошу сөзләрни ишләткән (Мәт. 26:26—28). Уларниң ейтишичә, Хатириләш мәрасимиға кәлгән барлиқ адәмләр нандин еғиз тегип, шараптин ичиши керәк. Дунияниң җай-җайлирида миллионлиған адәмләр бу мәрасимни нишанлаш үчүн җәм болғачқа, бу соалниң җававини билиш биз үчүн муһим. Шуңа келиңлар, Йоһан китавиниң 6-бабида йезилған вақиә билән Хатириләш мәрасиминиң арисида қандақ пәриқ бар екәнлигини көрүп бақайли.

8. Бу икки вақиәниң қандақ пәрқи бар? (Рәсимләргиму қараң.)

⁸ Бу вақиәләр бир-биридин икки тәрәптин пәриқлиниду. Биринчидин, Әйса Мәсиһ Йоһан 6:53—56 ейтқан сөзлирини қәйәрдә вә қачан ейтқан? У бу сөзләрни милади 32-жили Җәлилийәдә йәһудийларға ейтқан еди. Бу вақиә Әйса Мәсиһ Йерусалимда Хатириләш мәрасимини орунлаштурғандин тәхминән бир жил бурун болған еди. Иккинчидин, бу сөзләр кимгә қарита ейтилған? Җәлилийәдә Әйса Мәсиһни тиңшиған адәмләрниң көпинчиси өзлириниң роһий еһтияҗлирини әмәс, җисманий еһтияҗлирини қанаәтләндүрүшни халиған (Йоһ. 6:26). Әпсуски, Әйса Мәсиһ уларға қобул қилиши қийин болған сөзләрни ейтқанда, улар дәрһал униңға дегән ишәнчисини йоқитип қойди. Һәтта бәзибир шагиртлар униңға әгәшмәйдиған болди (Йоһ. 6:14, 36, 42, 60, 64, 66). Әнди бу вақиәдин бир жил өткәндин кейин, йәни милади 33-жили болған вақиәни қараштурайли. Шу жили Әйса Мәсиһ Хатириләш мәрасимини орунлаштурған еди. Шу чағда Әйсаниң 11 шагирти Җәлилийәдики йәһудийларға охшаш униң һәммә сөзини чүшәнмисиму, униңға садиқ болуп қалди вә Әйса Мәсиһниң Худа Оғли екәнлигигә гуман қилмиди (Мәт. 16:16). Әйса уларни махтап, мундақ деди: «Амма силәр мениң билән синақлиримда биллә болдуңлар» (Луқа 22:28). Бу икки ой Әйса Мәсиһ Йоһан 6:53тә ейтқан сөзлири билән Хатириләш мәрасимида болидиған ишларни чүшәндүрүшкә тиришмиғанлиғи көриниду. Буниңға башқиму дәлил-испатлар бар.

ӘЙСАНИҢ СӨЗЛИРИ СИЗГИМУ ТЕГИШЛИК

9. Әйсаниң Хатириләш мәрасимида ейтқан сөзлири кимгә қарита ейтилған?

⁹ Әйса Мәсиһ Хатириләш мәрасимида петир нанни шагиртларға тарқитип, «у мениң тенимни билдүриду» дәп ейтқан еди. Кейин у шарапни елип, «бу мениң келишим қенимни билдүриду» дәп ейтқан (Марк 14:22—25; Луқа 22:20; Кор. 1-х. 11:24). Униң келишим тоғрилиқ ейтқини муһим болди. Әйса бу келишимни һәммә адәмләр билән әмәс, «роһий Исраил өйи билән», йәни өзи билән Худа Падишалиғида һөкүмранлиқ қилидиғанлар билән түзди (Ибр. 8:6, 10; 9:15). Әлчиләр бу сөзләрни бирдин чүшәнмиди, лекин узақ вақит өтмәй улар муқәддәс роһ билән майлинип, йеңи келишим өз күчигә егә болди (Йоһ. 14:2, 3).

10. Әйса Мәсиһниң Хатириләш мәрасимида ейтқан сөзлири Җәлилийәдә ейтқан сөзлиридин қандақ пәриқлиниду? (Рәсимгиму қараң.)

¹⁰ Хатириләш мәрасимида Әйса Мәсиһниң ейтқан сөзлири «кичик падиға» мунасивәтлик болған. Униң билән бир бөлмидә олтарған шагиртлар мошу кичик топниң биринчи әзалири еди (Луқа 12:32). Улар вә мошу кичик падиға қошулидиған адәмләр нан вә шараптин еғиз тегиши керәк еди. Улар Әйса билән асманда һөкүмранлиқ қилиши керәк болиду. Әйсаниң Хатириләш мәрасимида ейтқан сөзлири униң Җәлилийәдә ейтқан сөзлиридин пәриқлиниду, чүнки Әйса бу сөзләрни кичик падиға қарита ейтқан еди. Җәлилийәдә ейтқан сөзлирини болса, у барлиқ адәмләргә қарита ейтқан еди.

11. Һәзрити Әйсаниң Җәлилийәдә ейтқан сөзлири көпчиликкә қарита ейтилғанлиғи нәдин көриниду?

¹¹ Милади 32-жили Җәлилийәдә Әйсани тиңшап турған йәһудий хәлқи Әйсаниң уларға нан бәргәнлигини халиди. Бирақ Әйса Мәсиһ уларниң диққитини униңдинму муһим нәрсигә — мәңгүлүк һаятқа қандақ еришәләйдиғанлиғиға ағдурғиси кәлди. Йәнә Әйса Мәсиһ өлгәнләрниң қайта тирилип, уларниң мәңгү яшайдиғанлиғини ейтқан еди. Әйса бу сөзләрни Хатириләш мәрасимиға қатнашқан адәмләрниң кичик топиға қарита ейтмиған. Бу бәрикәтләрниң пайдисини пүткүл адәмләр көрәләйдиғанлиғиға нәзәр салған. Әйса Мәсиһ мундақ дегән: «Бу нанни йегән киши мәңгү яшайду. Бу нан — дуния һаяти үчүн бериветидиған мениң теним» (Йоһ. 6:51).

12. Мәңгүлүк һаятқа еришиш үчүн немә қилиш керәк?

¹² Әйса адәмләр қәйәрдә вә қачан яшимисун, һәммиси мәңгүлүк һаятқа еришиду дәп ейтқуси кәлдиму? Яқ. Пәқәт бу нанни йегән, йәни Әйса Мәсиһкә ишинидиған адәмләр мәңгү яшалайду. Өзини мәсиһийләр дәп һесаплайдиғанлар Әйса Мәсиһкә ишиниду вә уни өзиниң Қутқазғучиси дәп һесаплайду (Йоһ. 6:29). Амма бу йетәрлик әмәс еди. Чүнки Җәлилийәдә Әйсаға ишинимиз дәп ейтқан адәмләр униңға әгәшмәй қалди. Немишкә?

13. Әйсаниң һәқиқий шагирти болуш үчүн немә қилиш керәк?

¹³ Әйсаға әгәшкән нурғунлиған адәмләр, пәқәт халиған нәрсилирини елиш үчүн униң кәйнидин маңған. Әйса уларни сақайтқанда, озуқ бәргәндә, уларға йеқимлиқ нәрсиләрни ейтқанда, бу уларға яқатти. Амма у пәқәт адәмләрниң җисманий еһтияҗлирини қанаәтләндүрүш үчүн әмәс, униң һәқиқий шагирти болуш үчүн немини қилиш керәклигини чүшәндүрүш үчүн кәлди. Улар Әйсаниң «маңа келиңлар» дегән тәкливини қобул қилип, бурун ейтқан барлиқ сөзлиригә бойсунуши керәк еди (Йоһ. 5:40; 6:44).

14. Әйса өзиниң тени билән қенини қурбан қилди. Буниң пайдисини көрүш үчүн немә қилишимиз керәк?

¹⁴ Әйса уларниң мәңгү өмүр сүрүши үчүн өзиниң тени билән қенини қурбан қилидиғанлиғини ейтти. Улар бу һәқиқәткә ишиниши керәк еди. Мундақ етиқатни риваҗландуруш йәһудийлар үчүн қанчилик муһим болса, бизгиму шунчилик муһим (Йоһ. 6:40). Демәк, Йоһан 6:53тики сөзләр бизниң мәңгүлүк һаятқа еришишимиз үчүн Әйса Мәсиһниң төләм қурбанлиғиға ишинишимиз керәклигини билдүриду. Бу бәрикәткә нурғунлиған адәмләр еришәләйду (Әфәс. 1:7).

15, 16. Йоһан китавиниң 6-бабидин қандақ муһим савақларни алдуқ?

¹⁵ Йоһанниң 6-баби бизни көп муһим нәрсиләргә үгәтти вә илһамландурди. Әйса адәмләрни қанчилик яхши көридиғанлиғини көрдуқ. Мәсилән, у Җәлилийәдә болғанда ағриқларни сақайтқан, Худа Падишалиғи тоғрилиқ тәлим бәргән вә қосиғи ач болған адәмләрни тойдурған (Луқа 9:11; Йоһ. 6:2, 11, 12). Әң муһими, у «һаят нени» тоғрилиқ үгәткән (Йоһ. 6:35, 48).

¹⁶ «Башқа қойларға» ятидиған адәмләр Хатириләш мәрасимида нан билән шараптин еғиз тәгмәйду (Йоһ. 10:16). Амма уларму «һаят ненини» йәп, униң бәрикитини көрәләйду. Буниң үчүн уларға төләм қурбанлиғиға ишиниш керәк (Йоһ. 6:53). Хатириләш мәрасимида нан билән шараптин еғиз тегидиғанлар Йеңи келишимдә болидиғанлиғини вә Падишалиқта һөкүмранлиқ қилидиғанлиғини көрситиду. Йоһанниң 6-бабидин майланғанларму вә «башқа қойларму» муһим савақларни алалайду. Бу айәттики ойлар бизгә етиқадимизни мустәһкәмләшкә вә мәңгүлүк һаятқа еришишкә ярдәм берәләйду.