Худаниң яритишни башлиши

БИЗ егә болған барлиқ яхши нәрсиләр Худадин кәлгән. У, күндүзи бизгә йоруқлуқ бериши үчүн қуяшни вә кечиси һәм йоруқлуққа егә болушимиз үчүн ай вә юлтузларни яратқан, у макан қуруп яшишимиз үчүн йәр шарини яратқан еди.

Бирақ, Худа тунҗа болуп, қуяш, ай, юлтузлар вә йәр шарини яратқан әмәс. Ундақта, сиз биләмсиз, тунҗа болуп немә яритилған? Пәрвәрдигар тунҗа болуп, өзигә охшаш роһий шәхсләрни яратқан. Худди Худани көрәлмигәнгә охшаш, шу роһий шәхсләрни көрәлмәймиз. Муқәддәс Китапта, шу шәхсләр периштәләр, дәп аталған. Худа периштәләрни өзи билән биллә асманда турушқа яратқан.

Худа яратқан тунҗа периштә бәкму алаһидә еди. Бу периштә Худаниң әң йеқин сирдиши болуп, барлиқ нәрсиләрни яритиш ишиға ярдәм бәргән; һәтта қуяш, ай, юлтузлар вә биз яшаватқан йәр шарини яритишқа ярдәмләшкән еди.

Ундақта, илгири йәр шари қандақ еди? Дәсләптә, йәр шарида һеч қандақ һаятлиқ яшалматти. Йәр йүзи пәқәт су билән қапланған ғайәт зор деңиз-океан болуп, қуп-қуруқ еди. Амма, Худа инсанларниң йәр йүзидә яшишини халиған еди. Шуңа, у биз инсанлар үчүн нәрсиләрни тәйяр қилишқа башлиди. У немиләрни тәйярлиди?

Йәр шариға йоруқлуқ керәк болған. Шуңа, Худа авал йәр шарини йорутуш үчүн нур чачидиған қуяшни яратти. Йоруқлуқ арқилиқ кечә билән күндүзни пәйда қилди. Униңдин кейин, у қуруқлуқни деңиз-океанниң үстигә чиқирип, қуруқ йәрни пәйда қилди.

Дәсләптә, йәр йүзидә һеч немә йоқ, қуп-қуруқ болуп, худди мошу рәсимдикигә охшаш гүл-гия, дәл-дәрәқ яки җан-җаниварлар йоқ еди. Деңизларда һәтта белиқларму йоқ еди. Шуңа, йәр шарини җан-җаниварлар вә инсанларниң яшиши үчүн мувапиқ келидиған вә әң яхши қилип яритиш үчүн, Пәрвәрдигар көп ишларни қилиши керәк едиқ.