Мусаниң қечип кетиши

ҚАРАҢА! Муса Мисирдин қечип кетиватиду. Арқисидин қоғлап келиватқан адәмләрни көрдиңизму? Уларниң немә үчүн Мусани өлтүрмәкчи болғанлиғини биләмсиз? Бирликтә қарап бақайли, сәвәвини тепип чиқаламдуқ!?

Муса Мисирниң һөкүмрани фирәвнниң ордисида чоң болди. У наһайити әқиллиқ вә һөрмәткә сазавәр киши болған еди. Муса өзиниң мисирлиқ әмәслигини; вә өзиниң һәқиқий ата-анисиниң қул болуп ишләватқан исраиллар екәнлигини биләтти.

Муса қириқ яшқа киргән еди. Бир күни, у өз хәлқиниң қандақ турмуш кәчүрүватқанлиғини көрүп кәлмәкчи болди. Улар бәкму начар муамилигә учриған еди. Муса бир мисирлиқниң бир исраил қулни уруватқанлиғини көрди. Муса төрт әтрапиға қариди. Һеч киши көрүнмәтти. У мисирлиқни уруп өлтүрүп, униң өлүгини қумға көмүвәтти.

Әтиси Муса өз хәлқини көргили йәнә барди. Муса, исраилларни мисирлиқларниң қул қилишидин азат болушиға ярдәм берәләймән, дәп ойлиған еди. У уруш-җедәл қиливатқан икки исраил кишини көрүп қалди. Шуңа, Муса хата қилған биригә: “Немишкә қериндишиңни урисән?”, деди.

У киши: “Ким сени бизгә башлиқ яки сорақчи болсун дәпту? Сән мениму һелиқи мисирлиқни өлтүргәндәк өлтүрмәкчимусән?”, деди.

Муса мана әнди қорқти. Чүнки, у өзиниң һелиқи мисирлиқни өлтүргәнлигини башқиларниң билип қалғанлиғини билгән еди. Һәтта, фирәвн бу ишларни аңлап, Мусани өлтүрүшкә адәм әвәтти. Бу Мусаниң немә үчүн Мисирдин қечип кәткәнлигиниң сәвәвидур.

Муса Мисирдин айрилип, жирақларға қечип Медиян дегән җайға барди. У җайда, Муса Йетрониң аилисидикиләр билән учришип қалди вә униң қизлиридин Зипорә исимлиқ бири билән той қилди. Муса падичи болуп, Йетрониң қойлирини бақти. У Медиянда 40 жил турди. Әнди у 80 яшқа киргән еди. Бир күни, Муса Йетрониң қойини беқиватқанда, кишини һәйран қалдуридиған бир иш йүз берип, униң һаяти пүтүнләй өзгәрди. Кейинки бәтни ечип, зади қандақ һәйран қаларлиқ иш йүз бәргәнлигигә қарап бақайли.