Мис илан

У ХАДА яғачқа йөгишип турған раст иланға охшамду? Яқ. У илан мистин ясалған. Алла Йәһва Мусаға уни хадиға есип қойғин. Шундақ болғанда, кишиләр униңға қарап һаят қалсун, дегән еди. Амма, йәр йүзидики башқа иланлар раст. Бу иланлар адәмләрни чеқип кесәл қилип қойған еди. Немә үчүнлигини биләмсиз?

Сәвәви, Исраил хәлқи, Йәһва Худа билән Мусаға қарши сөз қилди. Улар ағринип: “Немә үчүн бизни Мисирдин елип чиқтиң, чөлдә өлсун дәпму? Бу йәрдә йемәклик яки су йоқ екән. Биз манна йәп зериктуқ”, дейишти.

Бирақ, манна болса әң яхши йемәклик. Йәһва бир мөҗүзә көрситип, маннини уларға чүширип бәргән. Һәм йәнә бир мөҗүзә арқилиқ уларға су бәргән еди. Амма, бу хәлиқ Пәрвәрдигарниң уларға қилған ғәмхорлуғиға миннәтдарлиғини билдүрмиди. Шуңа, Йәһва исраилларни җазалаш үчүн бу зәһәрлик иланларни әвәткән еди. Уларни иланлар чеқип, нурғунлири өлүп кәтти.

Ахири хәлиқ Мусаниң қешиға келип: “Биз гуна қилдуқ, чүнки биз Йәһва вә саңа қарши сөз қилдуқ. Әнди сән Йәһваға дуга қилип, иланларни кәткүзвәткин”, дәп өтүнди.

Шуңа, Муса хәлиқ үчүн Йәһваға дуга қилди. Шуниң билән, Йәһва Муса пәйғәмбәргә бу мис иланни ясашни буйриди. Һәмдә уни хадиға есип қоюшни, шундақла илан чаққан һәр бир кишиниң униңға қаришини ейтти. Муса Пәрвәрдигарниң буйруғинидәк қилди. Һәм илан чеқивалған хәлиқ мис иланға қариғанда, улар қайта яхши болуп қалди.

Бу вақиәдин саваққа егә болалаймиз. Әмәлиятта, биз һәммимиз шу илан чаққан исраилларға охшаймиз. Инсан һаманәм өлүп кетиду. Әтрапиңизға нәзәр селип беқиң. Кишиләрниң қерип, кесәл болуп, ахири өлүп кетидиғанлиғини көрисиз. Сәвәви, тунҗа әр билән аял, йәни Адәм билән Һава Йәһвадин йүз өргән, һәм биз һәммимиз уларниң әвлатлири. Лекин, Йәһва бизгә мәңгү яшашниң бир йолини көрситип кәлмәктә!

Пәрвәрдигар Йәһва, инсанларни мәңгүлүк һаятқа ериштүрүш үчүн Әйса Мәсиһни әвәтти. Бирақ, нурғун кишиләр Әйсани яман адәм дәп ойлиған еди. Шуңа, уни түврүк яғачқа асти. Амма, Йәһва бизни қутқузуш үчүн Әйсани бәргән. Әгәр биз униңға қарисақ, униңға әгәшсәк, шундила мәңгүлүк һаятлиққа еришәләймиз. Бирақ, мошу тоғрисида кейинирәк көпирәк нәрсиләрни үгинимиз.