Давут билән Җолят

ФИЛИСТИНЛИКЛӘР келип, исраиллар билән йәнә уруш қилмақчи болди. Давутниң үч акиси Саулниң қошунида әскәр еди. Шуңа, Жишай бир күни Давутқа: “Буғдай қомичи вә нанларни акилириңға апирип бәргин вә уларниң әһвали қандақ көрүп кәл”, дәп әвәтти.

Давут қошунларниң лагерьға келип, акилирини издәп җәң мәйданиға жүгирәп барди. Шу вақитта, филистинлик ғайәт йоған адәм Җолят алдиға чиқип, исраилларни мазақ қиливататти. У һәр күни әтигәндә, кәчтә чиқип шундақ қилатти. Үзүлдүрмәй 40 күн шундақ қилған еди. У: “Араңлардин бирини мениң билән җәң қилишқа таллаңлар, әгәр у йеңип, мени өлтүрсә, биз силәргә қул болайли. Бирақ, мән йеңип, уни өлтүрсәм, силәр бизгә қул болуңлар. Мән силәргә җәң елан қилимән, җүръәт қилалисаңлар, бирини таллаңлар, мән билән җәңгә чүшсун”, деди.

Давут бир қанчә әскәрләрдин: “Әгәр бири бу филистинликни өлтүрүп, исраилларни мошу һақарәтләштин азат қилса, қандақ мукапатқа еришиду”, дәп сориди.

Улардин бири: “Саул у кишини мукапатлап, көп байлиққа егә қилиду вә қизини у кишигә аяллиққа бериду”, деди.

Лекин, барлиқ исраиллар Җоляттин қорқуп кәткән еди. Чүнки, у бәкму йоған еди. Униң бойи 3 метрчә егиз болуп, қалқинини көтиридиған бир әскири бар еди.

Бәзи әскәрләр берип, Давутниң Җолят билән җәңгә чүшмәкчи екәнлигини Саулға ейтти. Амма, Саул Давутқа: “Сән бу филистинлик билән җәң қилалмайсән. Сән техи бир бала, лекин у пүтүн өмридә җәң қилип көнгән әскәр”, деди. Давут җавап берип: “Мән дадамниң қойлирини елип маңған ейиқ вә ширни өлтүргәнмән. Бу филистинлик шуларниң биридәк болиду. Йәһва маңа ярдәм бериду”, деди. Шуңа, Саул: “Барғин! Йәһва сән билән биргә болсун”, деди.

Давут су еқиватқан ериқтин силиқ бәш тал ташни терип елип, уларни халтисиға салди. Андин кейин, қолиға салғисини елип, у йоған адәм билән җәңгә чүшмәкчи болди. Җолят Давутни көргәндә, у өз көзигә ишәнмәй, Давутни өлтүрүш наһайити асан иш, дәп ойлиди.

Шуңа, Җолят: “Маңа кәлгин, мән сениң гөшиңни учар қанатлар вә һайванларға йәм қилип берәй”, деди. Бирақ, Давут: “Сән қилич, нәйзиләрни елип алдимға кәлдиң. Лекин, мән Йәһваниң исми билән алдиңға чиқимән. Бүгүн Йәһва сени мениң қолумға тапшуриду вә мән сени уруп йәргә жиқитимән”, деди.

Шуниң билән, Давут Җолятниң алдиға жүгриди. У халтисидин бир ташни елип, салғиға селип, барчә күчи билән атти. Таш учуп берип, Җолятниң бешиға тәгди вә у йәргә жиқилип өлди! Филистинликләр өзлириниң палвининиң жиқилғанлиғини көрүп, арқисиға өрүлүп қечишти. Исраиллар уларниң арқисидин қоғлап, урушта ғалибә қилди.