Барлиқ яманлиқниң ахирлишиши

БУ РӘСИМДӘ немини көрдиңиз? Шундақ, бир ақ атлиқ қошун. Бирақ, уларниң қәйәрдин келиватқанлиғиға диққәт қилиң. Бу ақ атлар асманда булутлар үстидин учқандәк чепип келиватиду! Асманда растинла ат барму?

Яқ, улар һәқиқий ат әмәс. Чүнки, атлар һәргизму булутлар үстидә жүгрәлмәйду, тоғриму? Бирақ, Муқәддәс Китап асмандики атлар һәққидә сөзләйду. Немә үчүн Муқәддәс Китап шундақ дәйду, биләмсиз?

Сәвәви, өтмүштә җәңләрдә атлар көп ишлитилгән. Шуңа, Муқәддәс Китап асмандин атларни чаптуруп чүшиватқан кишиләр һәққидә сөзләш арқилиқ, йәр йүзидики кишиләр билән Худаниң бир мәйдан уруш қилидиғанлиғини көрсәткән. Шу уруш болидиған җәң мәйданиниң немә дәп атилидиғанлиғини биләмсиз? Армагедон! Бу урушта йәр йүзидики барлиқ яманлиқ йоқ қилиниду.

Армагедон урушида, Әйса Мәсиһ қошунға йетәкчилик қилиду. Ядиңизда барму, Йәһва өз һөкүмитиниң Падишаси болушқа аллиқачан Әйсани таллиған еди. Шуңа, Әйса бешиға падишалиқ таҗини кийгән. Униң қолидики қилич, униң барлиқ Худа билән дүшмәнләшкүчиләрни өлтүридиғанлиғини ашкарә қилиду. Худа барлиқ яман адәмләрни йоқ қилса, буниңға чоқум һәйран қалимизму?!

Илгири көргән 10-һекайигә қараң. У йәрдә немини көрдиңиз? Шундақ, ғайәт зор кәлкүн сүйи яман кишиләрни суға ғәриқ қилған еди. Ким шу кәлкүн сүйини пәйда қилған? Йәһва Худа. Ундақта 15-һекайигә қараң. У йәрдә немә иш йүз бериватиду? Худа асмандин чүшәргән отта Содом вә Гомора шәһәрлири вәйран болуватиду.

33-һекайини ечип қараңа! Мисирлиқларниң җәң һарвулири вә атлириға немә болғанлиғини көрүң. Ким деңиз сүйи арқилиқ уларни ғәриқ қилған? Йәһва. У өз хәлқини қоғдаш үчүн шундақ қилған еди. 36 вә 76-һекайиләргә қараң. Сиз бу йәрдә, Йәһваниң һәтта өз хәлқи исраилларниң рәзил ишларни қилғанлиғи үчүн, уларни вәйран қилғанлиғини көрисиз!

Шуниң үчүн, Йәһва йәр йүзидики барлиқ яманлиқларни ахирлаштуруш үчүн өз қошунлирини әвәтсә, һәргиз һәйран қалмаслиғимиз лазим. Бирақ, ишлар жуқурида ейтилғандәк болса, ойлап көрүң! Нәтиҗиси қандақ болар? Кейинки бәтни ечип, бирликтә көрүп бақайли.