08-ДӘРИС
Яратқучи Йәһваниң дости болалайсиз
Йәһва сизниң уни яхширақ тонушиңизни халайду. Немә үчүн? Яратқучи Өз есил пәзиләтлири, йоллири вә ирадиси һәққидә сизниң көпирәк үгинип, Униң дости болушни техиму арзу қилишиңизни үмүт қилиду. Сиз растинла Худаниң дости болаламсиз? (Зәбур 25:14ни оқуң) Униң дости болуш үчүн немә иш қилалайсиз? Муқәддәс китап мошу соалларға җавап бериду вә немә үчүн Йәһва билән дост болушниң шунчә муһим екәнлигини сизгә көрситиду.
1. Йәһва сизни немә қилишқа тәклип қилиду?
«Худаға йеқинлишиңлар һәм Уму силәргә йеқинлишиду» (Яқуп 4:8). Бу немини билдүриду? Яратқучи сизни Өзи билән дост болушқа тәклип қиливатиду. Худа көзгә көрүнмигәчкә, бәзиләр үчүн Униң билән дост болушни тәсәввур қилишму қийин болиду. Йәнә бәзиләр Худа билән дост болушни ойлашниң өзи һөрмәтсизлик дәп қарайду. Бирақ Худа Өз Сөзи Муқәддәс китапта Униңға йеқинлишиш үчүн Униң есил пәзиләтлири һәққидә билишимиз керәклигини көрсәткән. Муқәддәс китаптики Худадин кәлгән хәвәрни оқуғинимизда, һәтта Яратқучини һечқачан көрәлмисәкму, Униң билән болған достлуғимиз техиму күчийиду.
2. Немә үчүн Йәһва сизниң әң яхши достуңиз болалайду?
Һечким сизни Йәһва сөйгәндәк сөймәйду. У сизниң хошал болушиңизни вә қачанла ярдәм керәк болса, Униңдин ярдәм соришиңизни халайду. «Пүткүл ғәм-тәшвишлириңларни Униңға тапшуруңлар, чүнки У силәргә ғәмхорлуқ қилмақта» (Петрусниң 1-хети 5:7). Яратқучи Егимиз Өз достлирини қоллап-қувәтләп, тәсәлли бериш үчүн улар билән муңдишишқа һәрқачан тәйяр (Зәбур 94:18, 19ни оқуң).
3. Йәһва Өз достлиридин немә қилишни күтиду?
Йәһва барчә инсанларни яхши көриду, бирақ «ақкөңүлләргә ... У йеқин Досттур» (Пәнд-нәсиһәтләр 3:32). Худа Өз достлиридин яхши ишларни қилишни вә яман ишлардин жирақ турушни тәләп қилиду. Бәзиләр һәргизму Йәһваниң тәләп қилған өлчәмлиригә мувапиқ яшалмаймиз дәп қариши мүмкин. Амма Йәһва Худаниң көңли деңиздәк кәң. У Өзини чин қәлбидин сөйидиғанларни вә Уни хурсән қилиш үчүн қолидин келишичә тиришқанларни қобул қилиду (Зәбур 147:11; Әлчиләр 10:34, 35).
ЧОҢҚУРИРАҚ ҚЕЗИҢ
Яратқучи Йәһваниң дости болуш үчүн немә қилалайсиз вә У немә үчүн сизниң әң яхши достуңиз болалайдиғанлиғи һәққидә көпирәк биливелиң.
4. Ибраһим пәйғәмбәр Худаниң дости болған
Абрам, дәпму аталған Ибраһим пәйғәмбәр тоғрисидики мәлуматлар бизгә Худаниң дости болуш немини билдүридиғанлиғи һәққидә жип учи бериду. Ибраһим пәйғәмбәр һәққидә Яритилиш 12:1—4тә оқуң, кейин төвәндики соалларға җавап бериң:
Йәһва Ибраһимға немә қилишни ейтқан?
Йәһва униңға қандақ вәдә бәргән?
Ибраһим пәйғәмбәр Йәһваниң көрсәтмиси бойичә немә иш қилған?
5. Йәһва Өз достлиридин немә қилишни тәләп қилиду?
Адәттә, биз өз достлиримиздин мәлум нәрсини күтимиз.
Достлириңизниң сизгә қандақ муамилә қилишини халайсиз?
Йоһанниң 1-хети 5:3ни оқуп, кейин төвәндики соалға җавап бериң:
Йәһва Өз достлиридин немә қилишни күтиду?
Йәһваға бойсунуш үчүн иш-һәрикәт яки миҗәз-хулқимизни өзгәртишимизгә тоғра келиду. Йәшая 48:17, 18ни оқуп, кейин төвәндики соалға җавап бериң:
Немә үчүн Йәһва Өз достлиридин өзгиришләрни қилишни тәләп қилиду?
Яхши дост бизгә пайдилиқ нәрсиләрни ейтип, бизни хәтәрдин агаһландуриду. Йәһваму Өз достлириға шундақ қилиду
6. Йәһва Өз достлириға ярдәм бериду
Йәһва Өз достлириниң қийинчилиқларға бәрдашлиқ беришигә ярдәм бериду. ВИДЕОНИ көрүң, кейин төвәндики соал үстидә ойлинип көрүң.
Видеодики аялниң сәлбий ой-пикирлирини вә һис-туйғулирини йеңишигә Йәһва қандақ ярдәм бәргән?
Йәшая 41:10, 13ни оқуп, кейин төвәндики соалларға җавап бериң:
Йәһва Өзиниң барлиқ достлириға немә қилидиғанлиғини вәдә қилған?
Сизниңчә, Йәһва яхши дост болаламду? Немә үчүн?
Сиз ярдәмгә муһтаҗ болғанда, йеқин достлар ярдәм қолини суниду. Йәһваму сизгә шундақ қилиду
7. Йәһва билән дост болуш үчүн, Униң билән параңлишип, Униңға қулақ селишимиз керәк
Һәрдайим муңдишиш достлуқ риштини күчәйтиду. Зәбур 86:6, 11ни оқуп, кейин төвәндики соалларға җавап бериң:
Йәһва билән қандақ муңдишалаймиз?
Йәһва биз билән қандақ сөзлишәләйду?
Биз дуа арқилиқ Йәһваға сөзләймиз, У Муқәддәс китап арқилиқ бизгә сөзләйду
БӘЗИЛӘР МУНДАҚ ДӘЙДУ: «Худаға йеқинлишиш әсла мүмкин әмәс».
Йәһва билән дост болалайдиғанлиғимизни көрситиш үчүн, қайси айәтләрдин пайдилиналайсиз?
ХУЛАСӘ
Йәһва сиз билән дост болушни халайду вә Униңға йеқинлишишиңизға ярдәм бериду.
Тәкрарлаш
Йәһва Өз достлириға қандақ ярдәм бериду?
Йәһва немә үчүн Өз достлириға өзгириш керәклигини ейтиду?
Сизниңчә, Йәһва билән дост болуш шунчә қийинму? Немә үчүн?
ИЗДИНИП КӨРҮҢ
Худа билән дост болуш һаятиңизға қандақ тәсир көрситәләйду?
«Йәһва — тонушушқа әрзийдиған Худа» («Күзитиш мунари» 2003-жил, 15-февраль)
Худа билән дост болуш үчүн немә қилалайдиғанлиғиңиз һәққидә биливелиң.
Йәһва билән болған достлуқ, бир аялниң һаятини қандақ өзгәрткәнлиги һәққидә биливелиң.
«Өлүп кетишни халимиған едим!» («Күзитиш мунари» 2017-жил, 1-сан)
Өсмүрләрниң Йәһва Худа тоғрисидики һис-туйғулирини аңлап беқиң.