Җамаәттә инақ-иттипақлиқни сақлаң

Биз етиқатдашларниң арисида өзүмизни худди Давут падишаға охшаш һис қилимиз. У мундақ дегән: «Нәқәдәр яхши һәм әҗайип қериндашлар билән инақлиқ-бирликтә яшимақ!» (Зәбур 133:1). Аримиздики инақлиқ тәбиийла пәйда болуп қалмайду. Һәрбиримиз инақлиқни сақлаш үчүн өз һәссимизни қошушқа тиришишимиз керәк.

1. Худа хәлқиниң көзгә көрүнәрлик қандақ алаһидилиги бар?

Әгәр сиз башқа бир дөләткә берип, җамаәт жиғилишиға қатнашсиңиз, бәлким уларниң тилини чүшәнмәслигиңиз мүмкин. Амма көп тәрәпләрдин өзүңизни худди өз өйүңиздикидәк әркин-азадә һис қилисиз. Немә үчүн? Чүнки биз һәммила җайда охшаш нәшрий материалларни ишлитип, Муқәддәс китапни үгинимиз. Биз бир-биримизгә меһир-муһәббәт көрситишкә тиришимиз. Мәйли қәйәрдә яшишимиздин қәтъийнәзәр, һәммимиз Йәһваниң исмини чақирип, бирликтә Яратқучимизға ибадәт қилимиз (Зәфания 3:9).

2. Инақ-иттипақлиқни сақлашқа өз һәссиңизни қандақ қошалайсиз?

«Бир-бириңларни чин жүрәктин қизғин сөйүңлар» (Петрусниң 1-хети 1:22). Бу нәсиһәткә қандақ қулақ салалайсиз? Диққитиңизни башқиларниң камчилиқлириға әмәс, артуқчилиқлириға, йәни яхши тәрәплиригә қаритиң. Өзүңиз билән охшаш қизиқишлири бар қериндашлар биләнла әмәс, келип чиқиши пәриқлиқ қериндашлар биләнму тонушуп, вақит өткүзүшкә тиришиң. Биз қәлбимизгә сиңип кәткән камситиш һис-туйғулирини йилтизи билән қомуруп ташлишимиз керәк (Петрусниң 1-хети 2:17ни оқуң)a.

3. Етиқатдишиңиз билән келишмәслик пәйда болса, немә қилисиз?

Гәрчә инақ-иттипақ болсақму, биз бәрибир намукәммәл. Бәзи чағларда бир-биримизни үмүтсизләндүримиз, һәтта бир-биримизниң көңлини ағритип қоюмиз. Шуңа Муқәддәс китап бизгә мундақ дәйду: «Кимду-бирсиниң башқисиға шикайәт қилишиға асас болсиму, бир-бириңларға чидамлиқ болуп, бир-бириңларни һиммәтлик кәчүрүңлар. Йәһва силәрни һиммәтләрчә кәчүргәндәк, силәрму шундақ кәчүрүңлар» (Колосилиқларға 3:13ни оқуң). Биз Йәһваниң көңлини сан-санақсиз қетим ағриттуқ. Шундақ болсиму, У бизни кәчүргән. Шуңа У биздин қериндашлиримизни кәчүрүшимизни күтиду. Әгәр бирсиниң көңлигә азар бәргәнлигиңизни байқисиңиз, араңлардики келишмәсликни һәл қилиш үчүн тәшәббускарлиқ көрситиң (Мәтта 5:23, 24ни оқуң)b.

ЧОҢҚУРИРАҚ ҚЕЗИҢ

4. Камситиш һис-туйғулирини йеңиң

Биз барлиқ қериндашлиримизға меһир-муһәббәт көрситишни халаймиз. Амма биздин пәриқлиқ бирини қобул қилиш биз үчүн қийин болуши мүмкин. Бу қийинчилиқни йеңишкә немә ярдәм берәләйду? Әлчиләр 10:34, 35ни оқуң, кейин төвәндики соалларға җавап бериң:

• Йәһва һәрқандақ адәмләрни Өзиниң Гувачиси сүпитидә қобул қилиду. Бу сиздин пәриқлинидиған кишиләргә болған көзқаришиңизға қандақ тәсир көрситиши керәк?

• Яшаватқан райониңизда кәң тарқалған қайси түрдики камситишлардин сақлинишни халайсиз?

Коринтлиқларға 2-хәт 6:11—13ни оқуң, кейин төвәндики соалға җавап бериң:

• Келип чиқиши охшимайдиған қериндашларға қандақ йеқинлишалайсиз?

5. Кәчүрүмчан болуң вә инақ-иттипақлиқни илгири сүрүң

Гәрчә Йәһва бизниң кәчүрүм қилишимизға муһтаҗ болмисиму, У бизни чин көңлидин кәчүриду. Зәбур 86:5ни оқуң, кейин төвәндики соалларға җавап бериң:

• Яратқучи Йәһваниң кәчүрүмчанлиғи қандақ тәсвирләнгән?

• Немә үчүн Униң кәчүрүмчанлиғиға миннәтдар болисиз?

• Қандақ вәзийәтләр башқилар билән инақ-иттипақ болушимизға қийинчилиқ туғдириду?

Қандақ қилғанда Йәһва Худани үлгә қилип, қериндашлиримиз билән инақ-иттипақлиқни сақлалаймиз? Пәнд-нәсиһәтләр 19:11ни оқуң, кейин төвәндики соалға җавап бериң:

• Башқилар сизни зериктүрсә яки рәнҗитсә, немә қилсиңиз болиду?

Бәзидә биз башқиларни рәнҗитимиз. Шундақ ишлар йүз бәргәндә, немә қилишимиз керәк? ВИДЕОНИ көрүң, кейин төвәндики соал үстидә ойлинип көрүң.

ВИДЕО: «Инақ-иттипақлиқ — бәрикәт» (6:01)

• Видеодики қериндаш инақ-иттипақлиқни илгири сүрүш үчүн немә қилған?

6. Қериндашларниң яхши тәрәплирини көрүшкә тиришиң

Қериндашлиримиз билән йеқин тонушқансири, уларниң артуқчилиқлирини вә камчилиқлирини көримиз. Уларниң артуқчилиқлириға қандақ диққәт қилалаймиз? ВИДЕОНИ көрүң, кейин төвәндики соал үстидә ойлинип көрүң.

ВИДЕО: «Әҗайип хисләтләргә егә болайли!» (5:10)

• Қериндашлириңизниң артуқчилиқлирини көрүшкә немә ярдәм берәләйду?

Йәһва бизниң яхши тәрәплиримизгә диққәт ағдуриду. Тарихнамә 2-язма 16:9ни оқуң, кейин төвәндики соалға җавап бериң:

• Йәһваниң яхши пәзиләтлириңизгә диққәт ағдуридиғанлиғини билиш сизгә қандақ тәсир қилиду?

ХУЛАСӘ

Кәчүрүмчан болуш вә барлиқ қериндашлириңизға сөйгү-муһәббәт көрситиш арқилиқ җамаәтниң инақ-иттипақлиғиға өз һәссиңизни қошалайсиз.

Тәкрарлаш

• Башқиларни камситиш һис-туйғусини қандақ йеңәләйсиз?

• Әгәр бир қериндаш билән араңларда келишмәслик йүз бәрсә немә қилалайсиз?

• Немә үчүн Йәһвани үлгә қилип, башқиларни кәчүрүшни халайсиз?

ИЗДИНИП КӨРҮҢ

Башқиларниң үстидин һөкүм қилиштин сақлинишимизға ярдәм берәләйдиған Әйсаниң бир тәмсилини көрүп беқиң.

«Лимни еливәт» (6:56)

Әгәр хата қилмиғанлиғимизни һис қилсақ, кәчүрүм соришимиз керәкму?

«Кәчүрүм сораш — тинч-инақлиқниң ачқучи» («Күзитиш мунари» 2002-жил, 1-ноябрь)

Бәзиләрниң һәммә кишиләргә тәң баравәр муамилә қилишни қандақ үгәнгәнлигини биливелиң.

«Башқиларни ташқи қияпитигә қарап һөкүм қилмаң» (5:06)

Шәхсий зиддийәтләр җамаәтниң инақ-иттипақлиғиға тәсир қилиштин бурун, уларни қандақ бир тәрәп қилишниң йоллири тоғрилиқ оқуп беқиң.

«Келишмәсликләрни сөйгү-муһәббәт билән һәл қилиң» («Күзитиш мунари» 2016-жил, май)