Исраилниң тунҗа падишаси — Саул

ҚАРАҢ, Самуил бир адәмниң бешиға яғ қуюватиду. Қедимки заманда шундақ қилиш арқилиқ, бир кишиниң падиша болушқа талланғанлиғи көрситиләтти. Пәрвәрдигар Йәһва Самуил пәйғәмбәргә, Саулниң бешиға яғ қуюшни ейтқан еди. У бир алаһидә хуш пурақ яғ.

Саул өзини падиша болушқа лайиқ әмәс, дәп қариған еди. Шуңа, у Самуилға: “Мән бир Бинямин болуп, Исраилниң һәммидин кичик қәбилисиниң адими. Немә үчүн сән маңа падиша болисән,—дәйсән?”,деди. Йәһва Саулдин хурсән болди. Чүнки, Саул өзини чоң тутқан яки қалтис киши, дәп қаримиған еди. Шу сәвәп, Йәһва уни падиша болушқа таллиди.

Саул кәмбәғәл адәм әмәс, бәлки у бай аилиниң оғли болуп, бой бәсти егиз, қамлашқан еди. Исраиллар арисидики һәр қандақ бир киши аранла униң мүрисигә келәтти! Саул, у бәк тез жүгрәтти вә наһайити күчлүк еди. Йәһваниң Саулни падиша болушқа таллиғанлиғи үчүн, хәлиқ шат-хорамлиққа чөмди. Шуңа, улар һәммиси: “Падиша яшисун!”, дәп вақирашти.

Исраилларниң дүшмәнлири илгирикидәкла күчлүк еди. Улар йәнила исраилларға арам бәрмәй, көп паракәндә қилатти. Саул падиша болуп узун өтмәй, аммонлуқлар уларға һуҗум қилди. Амма, Саул чоң бир қошун топлап, аммонлуқлар үстидин ғалибә қилди. Бу вақитта, хәлиқ Саулниң падиша болғанлиғи үчүн бәкму хошал болушти.

Жиллар бириниң кәйнидин бирини қоғлап өтти, Саул исраилларға баш болуп, нурғун җәңләрдә дүшмәнлири үстин ғалибә қилди. Саулниң Йонатан исимлиқ бир батур оғли бар еди. Йонатанму исраилларниң көплигән җәңләрдә ғалибә қилишиға ярдәм бәрди. Филистинликләр йәнила исраилларниң күчлүк дүшмини еди. Бир күни, сан-санақсиз филистинликләр исраиллар билән уруш қилиш үчүн кәлди.

Самуил пәйғәмбәр йетип келип, у Пәрвәрдигар Йәһваға қурванлиқ тәғдим қилғичә, Саулниң күтүп турушини ейтқан еди. Бирақ, Самуил аста келивататти. Саул филистинликләрниң җәң башлишидин әнсирәп, өзи қол селип қурванлиқни тәғдим қилди. Ахири Самуил йетип кәлди. У Саулниң Йәһваға итаәтсизлик қилғанлиғини ейтип, “Йәһва башқа бир кишини Исраилға падиша болушқа таллайду”, деди.

Кейин, Саул йәнә итаәтсизлик қилди. Шуңа, Самуил пәйғәмбәр Саулға: “Йәһваға итаәт қилиш һәр қандақ яхши қойни қурванлиқ қилиштин яхширақтур. Чүнки, сән Йәһваға итаәтсизлик қилдиң, Йәһва сени давамлиқ Исраилниң падишаси қилмайду”, деди.

Биз мошу вақиәдин муһим савақ алалаймиз. Наһайити ениқки, һемишәм Йәһваға итаәт қилиш бәк муһим. Йәнә шуни көрүвелишқа болидуки, Саулға охшаш яхши адәмму, яманға өзгирип кетиши мүмкин. Биз һәргизму яманға өзгирип кетишни халимаймиз, шундақму?